Skip to content

ᑲᖏᖅᖠᓂᕐᒥ ᒪᓐᓂᓕᕆᕕᒡᔪᐊᕐᓂᕐᒥᑦ

ᓱᕈᓰᑦ ᓂᐱᖃᕐᓂᐊᖅᐳᑦ ᖁᕕᐊᓱᒡᓗᑎᒃ ᒪᓕᒃᓴᖅᑎᓪᓗᒋᑦ ᐱᒻᒪᕆᐅᔪᒥ ᑯᑯᖕᓂ ᓂᓪᓕᐊᓂᐅᔪᒥ ᒪᕐᕈᖓᓂ ᐊᕐᕌᒍᑕᒫᒥ ᒪᑭᕝᕕᐊᓂ ᒪᓐᓂᓕᕆᕕᒡᔪᐊᕐᓂᕐᒥᑦ ᑎᑭᑉᐸᓪᓕᐊᔪᒧᑦ ᓯᕙᑖᕐᕕᖕᒥ, ᒫᔾᔨ 31-ᖑᓕᖅᐸᑦ, ᑲᖏᖅᖠᓂᕐᒥ.

ᖃᓄᐃᓕᐅᕐᓂᐅᔪᖅ ᐊᐅᓚᓂᐊᖅᐳᖅ 11 ᐅᓪᓛᒃᑯᑦ 2:30 ᐅᓐᓄᓴᙳᕋᓱᐊᕐᓂᖓᓄᑦ ᐅᐃᓕᐊᒻᒪᓐ ᑕᓯᖓᓐᓂ ᓯᓚᒥ ᓯᐊᕐᕆᔮᕐᕕᖕᒥ, ᕿᓂᕐᓂᐅᓂᐊᖅᑐᒧᑦ ᖃᖅᑳᒍᐊᕌᓗᖕᒥ ᑯᑯᓂᑦ ᒪᒪᑕᒐᒃᓴᓂ ᐱᒋᐊᕐᓂᐊᖅᑐᒥ 11:30 ᐅᓪᓛᒃᑯᑦ.

ᑲᖏᖅᖠᓂᕐᒥ ᖃᑦᑎᕆᔨᓄᑦ ᐊᖓᔪᖅᑳᖓ ᒫᒃ ᕙᐃᔭᑦ ᐃᑲᔪᖅᐳᖅ ᐅᑲᓕᖃᕐᓇᐅᔪᒥ ᖁᕕᐊᓲᑕᐅᔪᒥ ᓄᓇᓕᖕᓂ ᐸᕐᓇᐃᓂᕐᒧᑦ ᒪᕐᕈᖓᓂ ᐊᕐᕌᒍᑕᒫᒥ ᒪᓐᓂᓕᕆᕕᒡᔪᐊᕐᓂᕐᒥᑦ ᑲᖏᖅᖠᓂᕐᒥ ᑎᑭᑉᐸᓪᓕᐊᔪᒧᑦ ᓯᕙᑖᕐᕕᖕᒥ, ᒫᔾᔨ 31-ᖑᓂᐊᖅᑐᒧᑦ.

ᑯᑯᒃᓯᐅᕐᓂᖅ ᐊᕕᒃᑐᖅᓯᒪᓂᐊᖅᐳᖅ ᐱᖓᓱᓄᑦ ᐅᑭᐅᖃᕐᓂᐅᔪᓄᑦ ᑲᑎᙵᓂᐅᔪᓄᑦ ᐊᑕᐅᓯᕐᒥ ᑎᓴᒪᓄᑦ ᐅᑭᐅᓕᖕᓄᑦ, 5-7 ᐊᒻᒪ 8-13-ᓄᑦ.

ᐊᓕᐊᓇᐃᓐᓂᐅᓂᐊᖅᑐᒥ ᑕᑖᖅᑐᒥ ᖃᓄᐃᓐᓂᐅᔪᖅ ᐃᑭᑎᑦᑎᓂᐅᔪᒥ ᐊᒻᒪ ᐊᑭᖃᙱᑦᑐᓂ ᐆᓇᖅᑐᒥ ᑯᑯᖕᒥ ᓂᐅᖅᑲᒐᒃᓴᓂ, ᐅᓲᔮᖅᑐᖃᕐᓗᑎᒃ ᐊᒻᒪᓗ ᓯᒐᓛᓂᑦ ᐱᑎᑕᐅᑲᐅᑎᒋᓗᑎᒃ ᒪᑭᕝᕕᐊᓂ ᒪᓐᓂᒃᓯᐅᕐᓂᖓ ᐱᔭᕇᑐᐊᖅᐸᑦ

ᑲᖏᖅᖠᓂᖅ ᖃᑦᑎᕆᔨᓄᑦ ᐊᖓᔪᖅᑳᖓ ᒫᒃ ᕙᐃᔭᑦ ᐅᖃᓚᐅᖅᐳᖅ ᓂᕆᐅᖕᓂᖓᓂ 20-ᐸᓗᖕᓂ ᓄᓇᓕᖕᓂ ᐊᑭᓕᖅᓱᖅᑕᐅᓇᑎᒃ ᖃᑦᑎᕆᔨᐅᔪᑦ ᐃᑲᔪᕐᓂᐊᕐᓂᖏᓐᓂ ᐊᐅᓚᑦᑎᓂᕐᒧᑦ ᖃᓄᐃᓐᓂᐅᔪᒥ.

ᐅᖃᓚᐅᖅᐳᖅ ᑕᒪᑐᒪᓂ ᐊᕐᕌᒍᒥ ᒪᓐᓂᓕᕆᕕᒡᔪᐊᕐᓂᖓ ᑕᑯᒃᓴᐅᑎᑦᑎᓂᖃᕐᓂᐊᕆᕗᖅ ᖁᙱᐊᖅᑎᑦᑎᓂᑦᑎᐊᕙᐅᔪᒥ ᐅᓐᓄᖓᓂ ᒫᔾᔨ 30-ᒥ, ᐱᒋᐊᕐᓗᓂ 10 ᐅᓐᓄᒃᑯᑦ ᐅᐃᓕᐊᒻᓴᓐ ᑕᓯᖓᓐᓂ.

“ᐊᖏᒡᓕᒋᐊᖅᑎᑦᑎᒃᑲᓐᓂᕈᒪᓚᐅᖅᐸᕗᑦ ᑕᒪᑐᒪᓂ ᐊᕐᕌᒍᒥ, ᐃᓚᓯᓚᐅᖅᐳᒍᑦ. ᖁᒻᒧᐊᒃᑎᑕᐅᓲᓂ ᖃᐅᒪᔪᓂᑦ ᖁᙱᐊᖅᑎᑦᑎᓂᐅᔪᒥ ᑲᑎᙵᓂᐅᔪᒧ ᓯᕙᑖᕐᕕᖕᒥ ᐅᓐᓄᖓᓐᓄᑦ,” ᐅᖃᓚᐅᖅᐳᖅ ᕙᐃᔭᑦ. “ᐃᓄᐃᑦ ᐊᓕᐊᓇᐃᒋᔭᖃᓚᐅᖅᑐᓂ ᓄᑖᒥ ᐊᕐᕌᒍᙳᖅᑐᒥ ᖁᒻᒧᐊᒃᑎᑕᐅᓲᓂ ᖃᐅᒪᔪᓂᑦ ᐊᓕᐊᓇᐃᒋᔭᖃᕐᓂᐊᖅᐳᑦ ᐆᒥᖓ ᖁᙱᐊᖅᑕᐅᓂᐅᔪᒥ ᑕᐃᒪᓐᓇᑎᒋ ᐊᖏᔪᒻᒪᕆᐊᓘᓗᓂ ᖁᙱᐊᖅᑎᑦᑎᓂᐅᓂᐊᕐᒥᖕᒪᑦ. ᐱᐅᔪᒻᒪᕆᐊᓘᓂᐊᖅᐳᖅ ᐊᒻᒪᓗ ᐃᓄᐃᑦ ᓄᓇᓕᖕᓂ ᐊᓕᐊᓇᐃᒋᑦᑎᐊᕐᓂᐊᖅᑕᖓᑦ.”

ᕙᐃᔭᑦ ᐅᖃᓚᐅᖅᐳᖅ ᐃᓱᒪᓂᐅᔪᖅ ᐊᕐᕌᒍᑕᒫᒥ ᒪᓐᓂᓕᕆᕕᒡᔪᐊᕐᓂᕐᒥᑦ ᓯᕗᓪᓕᕐᒥ ᓴᖅᑭᑎᑕᐅᓚᐅᖅᐳᖅ ᐊᕐᕌᒍᑦ ᒪᕐᕉᓕᖅᑐᓂ ᖄᖏᖅᓯᒪᓕᖅᑐᓄᑦ, ᐃᓄᑭᑦᑐᓂ ᑲᑎᙵᓂᐅᔪᓂ ᖃᑦᑎᕆᔨᐅᔪᑦ ᓯᐊᕐᕆᔮᕐᕕᐅᑉ ᖃᓂᒋᔭᖓᓃᖦᖢᑎᒃ ᐅᐃᓕᐊᒻᓴᓐ ᑕᓯᖏᓐᓂ ᐊᒻᒪ ᑐᓐᓂᖅᓴᐃᓪᓗᑎᒃ ᐅᓲᔮᖅᑐᓂᑦ ᐊᒻᒪ ᐆᓇᖅᑐᒥ ᑯᑯᖕᒥ ᓂᐅᖅᑲᒐᒃᓴᓂ ᓱᕈᓯᕐᓄᑦ ᐱᙳᐊᖅᑐᓄᑦ ᑕᓯᕐᒥ. ᐃᓄᐃᑦ ᐱᐅᒋᓚᐅᖅᐸᖓᑦ ᐃᓱᒪᓂᐅᔪᖅ ᑕᐃᒪᐃᒃᑲᓐᓂᕈᒪᓕᓚᐅᖅᐳᑦ ᐊᕐᕌᒍᒃᑲᓐᓂᕈᓂ.

“ᑕᐃᒪᐃᒃᑲᓐᓂᓛᕈᒪᓕᕋᑦᑕ, ᐃᓱᒪᓚᐅᖅᐳᒍᑦ ᑲᑎᖃᓯᐅᑎᓕᒍᓕᑭᐊᖅ ᒪᑭᕝᕕᐊᓂ ᐊᒻᒪᓗ ᒪᑭᕝᕕᐊᓂ ᒪᓐᓂᒃᓯᐅᕐᓂᕐᒧᑦ ᐊᒥᓱᐃᑦ ᓱᕈᓰᑦ ᑕᐃᒪᐃᓕᐅᓚᐅᖅᓯᒪᙱᒻᒪᑕ. ᑮᓇᐅᔭᑲᓪᓚᖕᓂ ᐊᑐᓚᐅᖅᐳᒍᑦ ᒪᓐᓂᖕᓄᑦ ᐊᓯᖏᓐᓂᓪᓗ, ᐊᒻᒪᓗ ᒪᓐᓃᑦ ᓄᖑᓚᐅᖅᐳᑦ 15 ᒥᓂᑦᐸᓗᖕᓂᑦ. ᓂᐅᕕᕐᕕᒃ ᐊᒻᒪ ᑭᓴᕐᕕᒃ ᑯᐊᐸᒃᑯᑦ ᐃᓚᐅᖃᑕᐅᓕᖅᑎᖦᖢᒋᑦ ᐃᓱᒪᓂᐅᔪᒧᑦ, ᑐᓐᓂᖅᓴᐃᓪᓗᑕ ᐊᒥᓱᐊᓗᖕᓂ ᐅᓲᔮᖅᑐᓂᑦ ᐊᒻᒪ ᐃᑭᑎᑦᑎᓂᖃᒐᓛᓚᐅᖅᖢᑕ. ᐃᓄᐃᑦ ᐊᓕᐊᓇᐃᒋᑦᑎᐊᓚᐅᖅᐸᖓᑦ, ᑕᐃᒫᒃ ᐃᓱᒪᓕᐅᕆᓚᐅᖅᐳᒍᑦ ᒪᑭᕝᕕᐊᓂ ᐱᖅᑯᓯᙳᕐᓂᐊᕐᓂᖓᓂ ᑲᖏᖅᖠᓂᕐᒧᑦ ᖃᑦᑎᕆᔨᐅᔪᓄᑦ ᑕᐃᒪᐃᓕᐅᖅᑎᑦᑎᕙᒡᓗᑎᒃ ᐊᕐᕌᒍᑕᒫᒥ.”

ᕙᐃᔭᑦ ᐅᖃᓚᐅᖅᐳᖅ ᖃᑦᑎᕆᔨᐅᔪᑦ ᐊᒥᓱᒻᒪᕆᐊᓗᖕᓂ ᕿᔪᖃᐅᖅᐳᑦ ᐆᑦᑎᔾᔪᑕᐅᓂᐊᖅᑐᓄᑦ, ᓱᕈᓰᑦ ᐆᑦᑎᔪᓐᓇᕐᓂᐊᕐᒪᑕ ᓇᖕᒥᓂᖅ ᐅᓲᔮᖅᑐᖏᓐᓂᑦ ᐃᑭᑎᑕᐅᔪᒧᑦ. ᒪᕐᕉᖕᓂ ᐴᕌᓗᖕᓂ ᑯᑯᖕᓂ ᖃᑦᑎᕆᕕᖕᒥ ᐃᔨᖅᑐᖅᑕᐅᓂᐊᖅᑐᓄᑦ ᓱᕈᓰᑦ ᕿᓂᕆᐊᖃᓛᖅᑕᖏᓐᓂᑦ.

“ᐅᒃᐱᕈᓱᙱᒃᑲᓗᐊᕈᕕᑦ, ᐊᒃᑐᖅᓯᓚᐅᙱᑦᑐᖓ ᑯᑯᖕᓂᑦ,” ᐅᖃᓚᐅᖅᐳᖅ ᕙᐃᔭᑦ.