Skip to content

ᑲᔪᓯᔪᓐᓇᓕᕐᓂᖏᑦ

ᐊᒥᓱᑦ ᖁᖑᑐᖃᑦᑕᓕᓚᐅᖅᐳᑦ ᑲᖏᖅᖠᓂᕐᒥ ᖃᐅᔨᑎᑕᐅᑉᓗᑎᒃ ᓯᑯᓕᐅᖅᑐᖃᓕᕐᓂᖓᓄᑦ ᓯᐊᕐᕆᔮᕐᕕᖕᒥ ᐱᓇᓱᐊᕈᓯᐅᓚᐅᖅᑐᒥ.

ᐊᔾᔨᖓ ᔩᓴᓐ ᐱᓚᑲᑉᓯᐅᑉ ᓯᑯᒃᓴᓕᐅᖅᑐᖅ ᓯᐊᕐᕆᔮᕐᕕᖕᒥ ᖁᖓᒍᑕᐅᓚᐅᖅᐳᖅ ᑲᖏᖅᖠᓂᕐᒥᐅᓄᑦ ᐱᓇᓱᐊᕈᓯᐅᓚᐅᖅᑐᒥ. photo courtesy of David Clark

ᑲᖏᖅᖠᓂᕐᒥ ᕼᐋᑭᕐᓇᐅᓂᐊᖅᑐᖅ ᐱᒋᐊᕈᑎᖃᓚᐅᖅᐳᖅ ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑕᐅᑉᓗᑎᒃ, ᓯᑯᒥ ᐊᒻᒪ ᐊᔪᖏᓴᖅᑕᐅᑉᓗᑎᒃ ᐅᖃᓕᒫᕆᐅᖅᓴᓂᕐᒧᑦ ᑎᑎᕋᕆᐅᖅᓴᓂᕐᒧᓪᓗ ᐱᔾᔪᑎᖃᖅᑐᓂᒃ ᐃᓕᓐᓂᐊᖅᑎᑕᐅᒍᑎᖃᖅᖢᑎᒃ.

ᐃᓕᓐᓂᐊᖅᑎᑕᐅᓂᐊᖅᖢᑎᒡᓗ ᑕᒡᕙᓂ ᐅᑭᐅᖑᓂᐊᖅᑐᒥ ᐊᒃᑐᐱᕆ 17-21-ᒧᑦ.

ᑕᒪᓐᓇ ᐃᓕᓐᓂᐊᖅᑎᑕᐅᕕᒃ ᐊᔾᔨᐅᖏᑦᖢᓂ ᐊᕙᑎᒧᑦ ᑐᕌᖅᑐᓂᒡᓗ ᐱᔾᔪᑎᖃᖅᖢᓂ: ᐋᖅᑭᒃᓱᖅᑕᐅᓚᐅᖅᖢᓂ ᐱᒋᐊᖅᑕᐅᓚᐅᖅᖢᓂ ᑲᖏᖅᖠᓂᕐᒥ ᐊᑐᖅᑕᐅᖃᑦᑕᖅᖢᓂᓗ ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑎᔨᓄᑦ ᐊᒻᒪ ᐅᖃᓕᒫᕆᐅᖅᓴᓂᕐᒧᑦ ᑎᑎᕋᕆᐅᖅᓴᓂᕐᒧᓪᓗ ᐊᔪᖏᑦᓯᐊᖅᑐᓄᑦ.

ᑲᖏᖅᖠᓂᕐᒥ ᐱᓐᖑᐊᖅᑐᓕᕆᓂᕐᒧᑦ ᑐᑭᒧᐊᒃᑎᑎᔨ ᐊᒻᒪ ᐱᒋᐊᖅᑎᑎᒍᑎᖃᓚᐅᖅᑐᖅ ᐃᓕᓐᓂᐊᖅᑎᑎᒍᑕᐅᔪᒥᒃ ᐋᖅᑭᒃᓱᐃᖃᑕᐅᓯᒪᑉᓗᓂ ᐊᒻᒪ ᐃᓕᓐᓂᐊᖅᑎᑎᔨᐅᖃᑕᐅᑉᓗᓂ ᑏᕕᑦ ᑲᓛᒃ ᐅᖃᓚᐅᖅᐳᖅ ᑲᖏᖅᖠᓂᕐᒥ ᓯᐊᕐᕆᔮᕐᕕᒃ ᐅᒃᑯᐃᖅᑕᐅᓂᐊᓕᕐᒪᑦ ᐃᓕᓐᓂᐊᖅᑎᑕᐅᓚᐅᖅᑎᓪᓗᒋᑦ ᐊᒃᑐᐱᕆ 23-ᒥ.

ᐅᖃᓚᐅᖅᖢᓂᓗ ᑮᓇᐅᔭᓂᒃ ᑐᒃᓯᕋᐅᑎᒋᓯᒪᔭᒥᓂᒃ ᑐᓴᕈᑎᖃᓚᐅᖏᑉᐳᖅ ᓱᓕ ᐅᑕᕿᑉᓗᓂ ᕼᐋᑭᕐᓇᐅᓂᐊᖅᑐᒥ ᐊᑐᖅᑕᐅᓂᐊᖅᑐᓂᒃ ᕼᐋᑭᖅᑎᐊᓛᑦ ᐱᓐᖑᐊᕐᔪᐊᖅᑎᑕᐅᓂᐊᖅᑎᓪᓗᒋᑦ.

“ᑮᓇᐅᔭᖅᑖᕈᑉᑕ ᐱᖏᒃᑲᓗᐊᕈᑉᑕᓘᓐᓃᑦ ᐊᕐᕌᒍᒥ ᐊᑐᖅᑐᒥ, ᑖᒃᑯᐊ Powerful Peewees, Arctic Atoms ᐊᒻᒪ ᓇᓄᖑᐊᒥᒃ ᓵᓚᒃᓴᐅᑎᖃᕋᓱᐊᕐᓂᖅ ᑲᔪᓯᓂᐊᖅᐳᑦ, ᐃᑲᔪᕈᓐᓇᖏᑐᐃᓐᓇᕐᓂᐊᖅᐳᒍᑦ ᐊᓯᖏᓐᓂᒃ ᓄᓇᓕᖕᓂᒥᐅᑕᓂᒃ ᐃᖏᕐᕋᓂᖏᓐᓄᑦ ᑎᖕᒥᓲᒃᑰᕈᑎᖏᓐᓄᑦ,” ᐅᖃᓚᐅᖅᐳᖅ ᑲᓛᒃ, ᐱᑎᑕᐅᖃᑦᑕᕋᔪᒃᑲᓗᐊᖅᐳᑦ ᐃᒻᒪᖄ $15,000ᓂᑦ $20,000ᓄᑦ ᐱᓐᖑᐊᕐᔪᐊᕈᑎᒃᓴᓄᑦ − ᐊᑐᖅᑕᐅᖃᑦᑕᖅᖢᑎᒡᓗ ᐱᓐᖑᐊᖅᑎᑦ ᐃᖏᕐᕋᔭᒍᑎᖏᓐᓄᑦ.

“ᑕᒪᒃᑯᐊ ᐱᓐᖑᐊᕐᔪᐊᕐᓇᐅᖃᑦᑕᖅᑐᑦ ᓯᑕᓐᓕ ᑲᑉᒋᔭᐅᖕᒪᑕ ᓄᑕᖃᓄᑦ ᐊᑐᓂ ᐅᑭᐅᖃᖅᑐᓄᑦ ᐊᒻᒪ, ᑕᐃᒪᓐᓇ ᑕᐃᓱᒪᓂᑐᖃᐅᓚᐅᖏᑦᑐᕐᓘᓐᓃᑦ ᑕᐃᒪᓐᓇ ᐱᓐᖑᐊᖃᑕᐅᕙᓚᐅᖅᓯᒪᕗᖓ ᐱᓐᖑᐊᕐᔪᐊᕐᓇᐅᔪᓄᑦ,” ᐅᖃᓚᐅᖅᐳᖅ. “ᐃᖅᑲᐅᒪᖃᑦᑕᖅᐳᖓ ᖁᕕᐊᓇᑦᓯᐊᖃᑦᑕᓚᐅᖅᓯᒪᓂᖓᓄᑦ ᓄᑕᖃᓂᒃ ᐊᒥᓱᓂᒃ ᑲᑎᑦᓯᑉᓗᖓ ᓄᓇᓕᖕᓂᑦ ᐊᔾᔨᒌᖏᑦᑐᓂᑦ, ᐱᖃᓐᓇᖅᑖᖃᑦᑕᓚᐅᖅᖢᖓᓗ ᐊᒥᓱᓂᒃ.”

“ᑕᐃᒪᓐᓇ ᐱᕈᖅᓯᒪᕗᒍᑦ ᑭᕙᓪᓕᕐᒥ ᐱᓐᖑᐊᕐᔪᐊᖃᑦᑕᖅᖢᑕ, ᐊᒻᒪ ᑮᓇᐅᔭᖃᖅᑎᑕᐅᖏᒃᑯᑉᑕᓗ, ᑭᖑᓂᐊᒍᑦ, ᐱᐅᖏᒻᒪᑦ ᑕᒪᓐᓇ ᓄᑕᖃᓄᑦ ᐊᒃᓱᕈᖅᑎᑕᐅᓂᐊᕐᒪᑕ ᐊᓯᖏᓐᓂᒥᐅᑕᐃᑦ ᓄᓇᓕᖕᓂ ᑎᑭᑎᑕᐅᓂᕐᒧᑦ.”

ᑲᓛᒃ ᐅᖃᓚᐅᖅᐳᖅ ᕼᐋᑭᖅᑎᐊᓛᑦ ᐱᓐᖑᐊᖅᑎᖏᑦ ᑭᕙᓪᓕᕐᒥ ᓂᕆᐅᒋᔭᖃᖃᑦᑕᖅᐳᑦ ᑲᖏᖅᖠᓂᕐᒥ ᕼᐋᑭᕐᔪᐊᕐᓇᐅᓂᐊᖅᑐᒧᑦ ᕼᐋᑭᕐᓇᖅ ᐱᒋᐊᓕᑐᐊᕌᖓᑦ ᓄᓇᖏᓐᓂ.

ᐅᖃᓚᐅᖅᖢᓂᓗ ᑖᒃᑯᐊ ᐊᒃᑎᒃ ᐋᑕᒻᑯᓐᓂᑦ ᓇᓄᖑᐊᒥᒃ ᓚᐃᓯᓐᓯᑖᕋᓱᐊᕐᓂᕐᒧᑦ, ᐊᑐᓂ ᐱᓐᖑᐊᕐᔪᐊᕐᓇᒃ ᐊᔾᔨᒌᖏᑦᑐᓂᒃ ᐅᑭᐅᖃᖅᑐᖃᖅᐳᖅ ᐊᒃᓱᕈᕈᑕᐅᖃᑦᑕᖅᖢᓂᓗ ᐊᕐᕌᒍᓗᒃᑖᖅ.

“ᐃᓄᐃᑦ ᖃᓄᒥᐊᖅ ᐅᖃᕈᓐᓇᖅᐳᑦ ᖃᓄᒥᐊᕐᓗ ᐃᓱᒪᒍᓐᓇᖅᖢᑎᒃ, ᑕᐃᒪ ᐅᕙᒍᑦ ᐱᓕᕆᐊᖃᐃᓐᓇᖅᐸᒃᑐᒍᑦ ᕼᐋᑭᖅᑐᓕᕆᓂᕐᒥᒃ ᖃᐅᔨᒪᑦᓯᐊᖅᐳᒍᑦ ᑕᒪᓐᓇ ᖃᓄᐃᒻᒪᖔᑦ ᓄᑕᖃᓄᑦ,” ᐅᖃᓚᐅᖅᐳᖅ.

“ᓯᐊᕐᕆᔮᕐᕕᓕᐊᕐᓗᓯ ᕼᐋᑭᕐᔪᐊᖅᑐᖃᓕᖅᐸᑦ ᖃᐅᔨᒍᒪᒍᑉᓯ ᓇᖕᒥᓂᖅ ᖃᓄᖅ ᑐᑭᖃᕐᓂᖓᓄᑦ ᓄᑕᖃᓂᑦ ᑕᐃᒪᓐᓇ ᐃᓚᐅᓂᐊᕐᓗᓂ.”

ᑲᓛᒃ ᐅᖃᓚᐅᖅᐳᖅ ᐊᒥᓱᒻᒪᕆᐅᓂᐊᕐᒪᑕ ᓄᑕᖃᑦ ᐃᓚᐅᓂᐊᖅᑐᑦ ᑲᖏᖅᖠᓂᕐᒥ ᕼᐋᑭᖅᑎᐊᓛᓄᑦ ᑕᒡᕙᓂ ᐊᕐᕌᒎᓂᐊᖅᑐᒥ, ᐊᑎᓕᐅᖃᑕᐅᕙᓪᓕᐊᔪᑦ ᐊᒥᓱᒻᒪᕆᐅᕙᓪᓕᐊᖕᒪᑕ.

ᐅᖃᓚᐅᖅᖢᓂᓗ ᖁᕕᐊᓱᑦᓯᐊᕐᒪᑕ ᓄᑕᖃᑦ ᓯᑯᒥᒃ ᓴᓗᒻᒪᖅᓴᐅᑎᑕᖃᓕᕐᒪᑦ ᓄᑖᒥᒃ ᑎᑭᓐᓂᐊᖅᖢᓂ ᓯᑲᐅᒃᑯᑦ ᑕᒡᕙᓂ ᐊᕐᕌᒍᒥ.