Skip to content

ᑲᑎᒋᐅᕐᓚᕗᑦ ᓄᓇᕗᒥ ᓯᕗᓪᓕᖅᐹᖑᓪᓗᓂ ᐃᓅᓚᐅᖅᑐᖅ

ᐊᓖᓇ ᒪᒃᑭᒃ ᑲᒃᑭᒃ, ᓯᕗᓪᓕᖅᐹᖑᓪᓗᓂ ᐸᖕᓂᖅᑑᒥᐅᖑᓪᓗᓂ ᐅᓅᓚᐅᖅᑐᖅ, ᑕᒪᓐᓇ ᐅᑭᐅᖅ ᐱᒋᐊᓕᖅᑎᓪᓗᒍ ᓯᕗᓪᓕᖅᐹᖑᓪᓗᓂ ᐃᓅᔪᖅ ᓄᑖᒥ ᐅᑭᐅᒥ.

ᐊᓈᓇᖓ ᐄᕙ ᑲᒃᑭᒃ ᐅᓂᒃᑳᓚᐅᖅᑐᖅ ᐃᓅᓂᕆᓚᐅᖅᑕᖓᓂᒃ ᕿᑭᖅᑖᓂ ᐊᓐᓂᐊᕕᖕᒥ ᐃᖃᓗᖕᓂ, ᖃᓄᐃᓚᐅᖏᓐᓂᕋᐃᓪᓗᓂ.

ᐊᓖᓇ ᒪᒃᑭᒃ ᑲᒃᑭᒃ, ᐃᓅᓂᑯ ᕿᑭᖅᑖᓂ ᐋᓐᓂᐊᕕᖓᓂ ᔮᓐᓄᐊᕆ 1-ᒥ 7:26-ᒥ ᐅᓐᓄᒃᑯᑦ, ᐅᕿᖏᓐᓂᖃᖅᖢᓂ 8-ᐸᐅᓐᔅ 7 ᐊᐅᓐᓯᔅ, ᓄᓇᕗᒥ ᓯᕗᓪᓕᖅᐸᖑᓪᓗᓂ ᐃᓅᓚᐅᖅᑐᖅ 2018-ᒥ.

“ᑕᒪᐃᑕ ᓯᖓᐃᒍᓰᑦ ᐃᕐᒥᓱᒍᓰᓪᓗ ᐊᔾᔨᒋᖏᒻᒪᑕ … ᑖᓐᓇ ᐱᔭᕆᑭᓚᐅᖅᑐᖅ ᐃᓅᓂᖓ, ᐊᓱᐃᓛᒃ,” ᐅᖃᓚᐅᖅᑐᖅ ᑲᒃᑭᒃ, ᓯᕗᓂᖓᓂ ᑕᓪᓕᒪᓂᒃ ᕿᑐᖏᐅᖅᓯᒪᒐᒥᓕ, ᒪᕐᕉᒃ ᑎᒍᐊᕆᔭᐅᓯᒪᓪᓗᑎᒃ ᐃᓚᖏᓐᓄᑦ.

ᑲᒃᑭᒃ ᐅᖃᕆᓪᓗᓂ ᐃᕐᓂᓱᓯᒋᐊᖅᑐᕕᓂᕉᖅ ᐅᓪᓚᒃᑯᑦ. ᑭᓯᐊᓂᓕ ᐋᓐᓂᐊᕕᓕᐊᓕᖅᑐᕕᓂᖅ ᖁᓕᒧᐊᖅᑎᓪᓗᒍ ᑕᒪᑐᒪᓂ ᐅᓪᓛᒃᑯᑦ, ᐊᖏᕐᕋᖔᖁᔭᐅᓪᓗᓂ. ᖃᐃᓵᓕᓗᐊᕐᓂᕐᒪᑦ.

“ᐅᖃᐅᔾᔭᐅᓪᓗᖓ ᐃᕐᓂᓱᓯᒋᐊᓕᑕᐃᓇᕋᕕᑦ ᐊᑯᓂᐊᓘᓂᐊᖅᑐᖅ,” ᐅᖃᕆᓪᓗᓂ.

ᑲᒃᑭᒃ ᐅᑎᓕᖅᑐᕕᓂᖅ ᐋᓐᓂᐊᕕᖕᒧᑦ ᐃᒻᒪᖄ 4:30-ᒧᐊᖅᑎᓪᓗᒍ ᐊᒻᒪᓗ ᐃᕐᓂᓪᓗᓂ ᐊᓖᓇᒥᒃ 7:26 ᐅᓐᓄᒥ ᑕᒪᑐᒪᓂ, ᐅᕿᖏᓐᓂᖃᖅᖢᓂ 8-ᐸᐅᓐᔅ 7-ᐊᐅᓐᓯᔅᓂᒃ.

ᐊᓈᓇᖓ ᑕᒪᐅᖓᖅᓯᒪᖕᒪᑦ ᐃᕐᓂᒋᐊᖅᑐᖅᓯᒪᓪᓗᓂ ᐃᑲᔪᖅᑎᒋᕈᓐᓇᕐᓂᕋᖅᑕᐅᓚᐅᖅᑑᒐᓗᐊᖅ ᐃᒪᒥᓂᒃ ᑭᓯᐊᓂᓕ ᑲᒃᑭᒃ ᐋᒃᑲᕐᓂᕐᒪᑦ.

“ᑕᐃᒪᖓᓂᑦ ᑕᖅᑭᓕᒫᒥᒃ ᖃᓂᓐᓂᖃᓕᖅᑎᓪᓗᒍ ᐊᐅᓪᓚᖅᑎᑕᐅᖃᑦᑕᕋᑦᑕ. ᑕᐃᒪᓐᓇ ᑕᕝᕙ ᑕᖅᑭᓕᒫᑲᓴᖕᒥᒃ ᐃᖃᓗᖕᓃᑉᐳᖓ ᐅᑕᖅᑭᓪᓗᖓ ᐃᕐᓂᓂᐊᕐᓂᓐᓂᒃ,” ᐅᖃᕆᓪᓗᓂ.

“ᐃᑲᔪᖅᑎᒋᓚᐅᖏᑦᑐᖓ ᐃᓚᓐᓂᒃ ᕿᑐᖓᒃᑲ ᐊᖏᕐᕋᓐᓂ ᐃᓄᑑᑎᓪᓗᒋᑦ ᕿᒪᒃᑕᐅᓯᒪᖁᓚᐅᖏᓐᓇᒃᑭᑦ. ᐊᐃᑉᐸᕋ ᐊᖏᕐᕋᖅᓯᒪᔪᖅ ᑕᐃᒪ ᕿᑐᖓᓐᓂᒃ ᐱᖃᑎᖃᖅᖢᓂ. ᐱᖏᒍᓱᓚᐅᖅᑐᖓ ᑕᒪᑐᒪᓂ ᖁᕕᐊᓱᒃᕕᖕᒥ ᓄᑖᒥᓗ ᐅᑭᐅᒥ ᐃᓄᑑᓗᑎᒃ ᐱᓂᐊᕋᓱᒋᓪᓗᒋᑦ. ᑕᐃᒪᓐᓇ ᐱᔪᒪᓚᐅᖏᓐᓇᒪ.”

ᓇᑯᕐᒦᒃ, ᑲᒃᑭᐅᑉ ᐊᓈᓇᖓ ᐃᖃᓗᖕᒥᐅᑕᐅᖕᒪᑦ, ᑕᐃᒪᓐᓇ ᐃᓄᑑᓗᐊᖏᔪᑎᒋᓚᐅᖅᑕᕋ.

ᐊᓖᓇ ᑕᐃᔭᕋ ᑕᐃᒪᓐᓇ ᐊᓈᓇᑦᑎᐊᖓᑕ ᒪᒃᑭᐅᑉ ᐊᑎᖓᓂᒃ.

“ᐊᓈᓇᒐ ᐊᒃᓱᐊᓗᒃ ᖁᕕᐊᓱᓕᓚᐅᖅᑐᖅ ᐸᓂᓐᓂᒃ ᐊᑦᑎᕋᒃᑯ ᕿᑎᖅᖠᕐᒥᒃ ᐊᑎᕈᓯᐊᓂᒃ, ᐊᓈᓇᒪ ᐊᑎᖓᓂᒃ,” ᑲᒃᑭᒃ ᐅᖃᕆᓪᓗᓂ.

ᐅᓂᒃᑳᕆᓪᓗᓂ ᕿᑐᖓᖏᑦ ᐱᖓᓱᑦ ᑕᐃᒪ ᐅᑕᖅᑭᔪᑦ ᐊᖏᕐᕋᖓᓂ,” ᐊᒃᓱᐊᓗᒃᑕᐅᖅ ᖁᕕᐊᓱᖕᒥᔪᑦ ᑕᑯᓂᐊᕋᒥᒃ ᓂᕆᐅᓗᐊᓕᖅᑐᑦ.”

“ᓂᕆᐅᓗᐊᒧᑦ ᑕᑯᓂᐊᕈᒥᔪᒃ ᓄᑲᑯᓗᑎᒃ. ᑕᒪᑐᒪᓂ ᐊᖏᕐᕋᑐᐊᕋᒪ ᑕᒪᐃᓐᓄᑦ ᐊᒃᓱᐊᓗᒃ ᐱᐅᒋᔭᐅᓕᓚᐅᖅᑐᖅ … ᐃᓂᖁᓇᒃᓴᖅᑐᑦ. ᑕᐃᒪᖓᓂᒃ ᑯᓂᒃᓴᕈᒪᔪᑦ ᐃᕿᓴᕈᒪᔪᓪᓗ,” ᐅᖃᕆᓪᓗᓂ.

ᐊᓖᓇ ᕿᖓᒐᔪᐃᑦᑐᖅ, ᐅᖃᕆᓪᓗᓂ ᐊᓈᓇᖓ, ᑭᓯᐊᓂᓕ ᕿᐊᓕᑕᐃᓐᓇᕌᖓᒥ, ᐊᒃᓱᕈᑦᑎᐊᖅᖢᓂ ᕿᐊᖃᑦᑕᖅᑐᖅ.

“ᑕᐃᒪᖓᓂᑦ ᓱᓕ ᓯᓃᓐᓇᒐᓚᒃᑐᖅ ᐃᖅᑯᒪᑕᐃᓐᓇᕌᖓᒥ ᑕᐃᒪᖓᓂᑦ ᕿᐊᖏᓐᓇᐅᔭᖏᑦᑑᖓᓗᑦ, ᐊᒃᓱᐊᓗᒃ ᐱᒃᑯᒥᓇᖅᑐᖅ. ᐃᖅᑯᒪᑦᑎᐊᓚᐅᑲᖃᑦᑕᖅᑐᖅ ᑐᐸᒃᑳᖓᒥ, ᕿᒥᕐᕈᓪᓗᓂ ᑕᑯᔪᓐᓇᖅᑕᒥᓂᒃ,” ᐅᖃᕆᓪᓗᓂ ᑲᒃᑭᒃ.

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑕᒪᑐᒪᓂ ᐅᑭᐅᑦᑎᓐᓂ ᖃᐅᔨᒪᔭᖃᖏᒻᒪᑕᒎᖅ ᐊᓯᖏᓐᓂᒃ ᐃᓅᔪᖃᓚᐅᕐᒪᖔᑦ 2018-ᒥ ᑖᓱᒪ ᐊᓖᓇᐅᑉ ᐊᓯᐊᓂᒃ, ᑭᓯᐊᓂᓕ ᐃᒻᒪᖄᒎᖅ ᓄᓇᕗᒥᐅᕕᓂᕐᒥᒃ ᑖᕙᓂ ᕿᑐᖏᔪᖃᑐᐃᓐᓇᕆᐊᓕᒃ ᑕᒪᑐᒪᓂᓴᐃᓐᓇᖅ ᐋᑐᕚᒥ, ᔭᓗᓇᐃᕝᒥ, ᕗᐃᓂᐲᒃᒥ, ᐅᕝᕙᓗᑭᐊᖅ ᐃᓐᒪᓐᑕᓐᒥ.