ᐊᖓᔪᖅᑳᕐᔪᐊᖓ ᓄᓇᕘᑉ ᑲᓇᑕᒥ ᐸᓖᓯᒃᑯᖏᓐᓂ ᒪᒥᐊᓚᐅᖅᐳᖅ ᑭᙵᐃᑦ ᒪᐃᔭᖓᓄᑦ ᐊᒻᒪ ᑲᑎᒪᔨᐅᔪᓄᑦ ᐊᐃᑉᐹᓂ ᒫᓐᓇᓕᓴᐅᔪᒥ ᐊᒃᓱᕈᕐᔪᐊᕐᓂᐅᔪᒥ ᑎᒍᓯᓂᐅᔪᒥ ᐊᒻᒪ ᒪᐃᔭ ᓇᓗᓇᐃᖅᓯᓚᐅᖅᐳᖅ ᓄᓇᓕᖓ ᐊᑲᐅᙱᓕᐅᕈᑎᖃᕐᓂᖓᓂ ᐃᒥᐊᓗᖕᒧᑦ.
ᐱᓕᕆᖃᑎᒌᖑᔪᑦ ᑲᑎᒪᖃᑎᒌᓚᐅᖅᐳᑦ ᓯᕗᓪᓕᖅᐹᒥ ᑕᐃᒪᙵᓂ ᖁᒃᓴᓪᓚᒡᔪᐊᕐᓇᖅᑐᒥ ᑕᕐᕆᔭᓕᐊᖑᔪᒥ ᑲᓇᑕᓕᒫᒥ ᑕᑯᒃᓴᕈᓚᐅᖅᑐᒥ ᓴᖅᑭᑎᑕᐅᓚᐅᖅᑎᓪᓗᒍ ᖃᕋᓴᐅᔭᑎᒍᑦ ᔫᓂ 1–ᒥ. ᑕᐃᓐᓇ ᑕᕐᕆᔭᓕᐊᖑᔪᖅ ᑕᑯᒃᓴᐅᑎᑦᑎᕗᖅ ᑎᒍᓯᔨᐅᔪᒥ ᐸᓖᓯᐅᔪᒥ ᐊᑐᕐᓂᖓᓂ ᐹᖓᓂ ᑲᓇᑕᒥ ᐸᓖᓯᒃᑯᑦ ᓄᓇᓯᐅᑎᖓᓂ, ᓱᓕ ᐃᖏᕐᕋᑎᓪᓗᒍ, ᐊᐳᖅᓯᓂᖓᓂ ᐋᖓᔮᖅᑐᒥ ᐊᖑᒻᒥ ᐱᔾᔪᑕᐅᓚᐅᖅᐳᖅ ᐅᖃᐱᓗᖕᓂᐅᔪᒥ ᐃᓄᓕᒫᓂᑦ.
ᒪᐃᔭ ᑕᐃᒨᓐ ᑐᓐᓄ ᐅᖃᓚᐅᖅᐳᖅ ᑲᓇᑕᒥ ᐸᓖᓯᒃᑯᑦ ᐊᖓᔪᖅᑳᕐᔪᐊᖓ ᐊᒫᓐᑕ ᔫᓐᔅ ᑐᓂᓯᓚᐅᖅᐳᖅ ᒪᒥᐊᓐᓂᐅᔪᒥ ᖃᓄᐃᓐᓂᐅᓚᐅᖅᑐᒧᑦ, ᑭᓯᐊᓂ ᐅᖃᕆᐊᓪᓚᓚᐅᖅᐳᖅ ᑭᙵᕐᓂ ᑲᓇᑕᒥ ᐸᓖᓯᒃᑯᑦ ᐊᓄᓪᓚᒃᓰᕕᖏᑦ ᑕᑖᓚᐅᕐᓂᖓᓂ ᐋᖓᔮᖅᑐᓂ ᓄᓇᖃᖅᑎᐅᔪᓂ ᑕᐃᔅᓱᒪᓂ ᐅᓐᓅᓚᐅᖅᑐᒥ– ᖃᓄᐃᓐᓂᐅᔪᒥ ᑕᐃᒪᐃᒐᔪᒃᑐᒥ ᐊᒻᒪᓗ ᑐᕌᖅᑎᑦᑎᕙᓪᓕᐊᓂᖓᓂ ᑕᖃᓗᐊᖅᑐᓄᑦ ᐸᓖᓯᐅᔪᓄᑦ.
ᑐᓐᓄ ᐅᖃᓚᐅᖅᐳᖅ ᖃᓄᐃᓕᐅᕐᓂᖃᕆᐊᖃᓕᕐᓂᖓᓂ ᐃᒥᐊᓗᓗᐊᖃᑦᑕᖅᑐᓄᑦ, ᑭᓯᐊᓂ ᓱᓕ ᕿᓂᖅᐳᖅ ᐋᖅᑭᒍᑎᒃᓴᒥ. ᐅᖃᓚᐅᖅᐳᖅ ᕼᐋᒻᓚᒃᑯᑦ ᑐᒃᓯᕋᖅᓯᒪᕗᑦ ᓄᓇᓕᖕᓂ ᒪᒥᓴᐃᕝᕕᖕᒥ ᓄᓇᕗᒻᒥ ᒐᕙᒪᒃᑯᑎᒍᑦ ᑭᓯᐊᓂ ᓇᓗᓇᙱᓚᖅ ᐱᓕᕆᐊᒃᓴᐅᔪᖅ ᓴᖅᑭᔾᔮᙱᓐᓂᖓᓂ, ᐅᖃᓚᐅᖅᐳᖅ.
"ᑮᓇᐅᔭᖃᙱᒻᒪᑕ... ᑮᓇᐅᔭᖃᕐᓇᓂ, ᐊᔪᕐᓇᕐᔪᐊᖅᐳᖅ ᐃᓄᖕᓂ ᐃᓅᓯᓕᕆᔭᐅᕙᖕᓂᖏᓐᓂ," ᑐᓐᓄ ᐅᖃᓚᐅᖅᐳᖅ, ᐅᖃᕆᓪᓗᓂ ᐊᒃᓱᓪᓘᓐᓃᑦ, ᐃᓱᒪᒧᑦ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐃᓗᐊᖅᓴᐃᔨᖃᕐᓂᖓᓂ ᐊᒻᒪᓗ ᓄᓇᓕᖕᓄᑦ ᓴᐃᒻᒪᖃᑎᒌᖕᓂᒃᑯᑦ ᐋᖅᑭᖃᑎᒌᖕᓂᕐᒥ ᓴᓇᔨᑕᖃᕐᓂᖓᓂ ᓄᓇᓕᖕᓂ. "ᐃᓄᐃᑦ ᐃᒻᒥᖕᓂᒃ ᐃᑲᔪᖃᑎᒌᒐᓱᐊᖅᓯᒪᕗᑦ ᑭᓯᐊᓂ ᐊᔪᕐᓇᐸᓗᒃᑐᖅ.
"ᖃᐅᔨᒪᕗᖓ ᑎᓴᒪᓂ (ᐊᓄᓪᓚᒃᓰᕕᖕᓂ) ᐃᒡᓗᕈᓯᖃᕐᓂᖓᓂ ᐅᕙᓂ... ᑭᐅᓂᖅ ᐱᒃᑲᓐᓂᕐᓂᐅᙱᑦᑐᒥ ᐅᓄᕐᓂᖅᓴᓂ ᐊᓄᓪᓚᒃᓰᕕᒃᓴᓂ."
ᐱᓇᓱᐊᕈᓯᐅᑉ ᓯᕗᓂᐊᓂ ᐊᒃᓱᕈᕐᔪᐊᖅᖢᑎᒃ ᑎᒍᔭᐅᓂᐅᔪᒥ, ᓴᖅᑭᑎᑦᑎᓚᐅᖅᑐᒥ ᐃᒻᒥᒃᑰᖅᑐᒥ ᓯᓚᑖᒍᑦ ᖃᐅᔨᓴᖅᑕᐅᓂᐅᔪᒥ, ᑭᙵᐃᑦ ᐃᓱᓕᑦᑎᓚᐅᖅᐳᑦ ᐱᓇᓱᐊᕈᓯᕐᓂ ᒪᕐᕉᖕᓂ ᓄᖅᑲᖅᑎᑕᐅᓯᒪᓂᖓᓂ ᑎᑭᓴᐃᓂᕐᒧᑦ ᐃᒥᐊᓗᖕᓂ, ᑎᓕᐅᕈᑕᐅᔪᓂ ᒪᐃᔭᒥ ᐊᒻᒪ ᑲᑎᒪᔨᓄᑦ. ᑐᓐᓄ ᐅᖃᓚᐅᖅᐳᖅ ᐊᐱᖅᑯᑎᒃᓴᖃᕐᓂᖓᓂ ᓄᖅᑲᖅᑎᑦᑎᓯᒪᓚᐅᑲᖕᓂᖓᓂ ᐱᓕᕆᔪᓐᓇᕐᒪᖔᑕ ᑲᓇᑕᒥ ᐸᓖᓯᒃᑯᓐᓄᑦ ᑭᓪᓕᓯᓂᐊᕐᓂᖏᑦ ᑕᑯᒃᓴᐅᑎᑦᑎᖕᒪᑕ ᐃᒥᐊᓗᖕᒧᑦ–ᐱᔾᔪᑕᐅᔪᓂ ᐅᖃᓗᖕᓂᐅᔪᑦ ᐊᒻᒪ ᑎᒍᓯᓂᐅᔪᑦ ᑲᑕᒃᐹᓪᓕᒐᓛᑐᐃᓐᓇᓚᐅᕐᒪᑕ ᐃᒥᐊᓗᖕᒥ ᓄᖅᑲᖓᑎᑦᑎᓚᐅᑲᖕᓂᐅᔪᒥ ᐃᓕᓯᒪᔪᖃᖅᑎᓪᓗᒍ.
"ᐱᕋᔭᒃᑐᓂ ᐃᒥᐊᓗᖕᓂ ᓂᐅᕕᐊᒃᓴᖃᖅᖢᑎᒃ ᖁᑦᑎᒃᓯᕚᓪᓕᓲᖑᕗᖅ ᓄᖅᑲᖅᑎᑦᑎᓯᒪᒑᖓᑦᑕ ᐃᒥᐊᓗᖕᒥ ᐅᕙᓂ," ᒪᐃᔭ ᐅᖃᓚᐅᖅᐳᖅ. "ᖃᐅᔨᒪᙱᓚᖓ (ᓄᖅᑲᖅᑎᑦᑎᓯᒪᓚᐅᑲᒃᑐᑦ) ᐱᓕᕆᓂᖃᕐᒪᖔᑕ ᐋᒃᑲᓘᓐᓃᑦ. ᐃᓄᐃᑦ ᐅᖃᓲᖑᕗᑦ ᐋᖅᑭᒍᑎᒃᓴᐅᓂᖓᓂ ᑭᓯᐊᓂ ᖃᐅᔨᒪᙱᓚᖓ. ᓇᓗᕗᖓ."
ᐃᖏᕐᕋᓂᕆᔭᐅᔪᒧᑦ ᐱᕈᖅᐸᓪᓕᐊᕗᖅ ᐊᑐᕐᓂᕐᒥ ᑲᓇᑕᒥ ᐸᓖᓯᒃᑯᓐᓄᑦ ᑎᒥᒧᑦ ᐊᑕᔪᓂ ᐊᔾᔨᓕᐅᕈᑎᓂᑦ
ᐅᓄᖅᓯᕙᓪᓕᐊᑐᐃᓐᓇᖅᑐᓂ ᑲᑎᒪᔨᕐᔪᐊᖑᔪᓄᑦ ᓄᓇᕗᒻᒥ ᖃᐃᖁᔨᓯᒪᓂᖏᓐᓂ ᑲᓇᑕᒥ ᐸᓖᓯᒃᑯᓐᓂ ᐊᑐᓕᖅᑎᑦᑎᓂᖏᓐᓂ ᑎᒥᒧᑦ ᐊᑕᔪᓄᑦ ᐊᔾᔨᓕᐅᕈᑕᐅᔪᓂ, ᑲᓇᑕᒥ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᑐᓴᒐᒃᓴᓕᐊᖓ ᑕᑯᔭᐅᕐᔪᐊᓚᐅᖅᐳᖅ ᔫᓂ 8–ᒥ ᖃᐃᖁᔨᓯᒪᓂᖃᖅᑎᓪᓗᒍ ᑲᓇᑕᐅᑉ ᐸᓖᓯᖏᓐᓂ ᐊᑐᓕᖁᓪᓗᓂᒋᑦ ᓄᑖᙳᖅᐸᓪᓕᐊᓂᐅᔪᒥ.
"ᓱᓕᓂᐅᔪᖅ ᐊᒥᓱᓂ ᐃᓄᖕᓂ ᐅᕙᓂ ᓄᓇᐅᔪᒥ ᓴᐳᔾᔭᐅᓯᒪᔫᔮᙱᓚᑦ ᐸᓖᓯᒃᑯᓐᓄᑦ, ᐃᒻᒪᖄ, ᑲᑉᐱᐊᒋᔭᐅᔪᑦ. ᑕᒪᓐᓇᑐᐊᖅ ᐱᐅᙱᓐᓇᔭᖅᐳᖅ, ᑭᓯᐊᓂ ᐱᓕᕆᔾᔪᓯᐅᔪᒥ ᐊᔾᔨᒌᙱᑎᑦᑎᓂᖅ ᐊᒻᒪ ᐃᓅᖃᑎᒥᒃ ᐊᑭᕋᖅᑐᕐᓂᖅ ᐊᔾᔨᒌᙱᓐᓂᕐᒧᑦ ᑲᓇᑕᒥ ᑕᐅᕗᙵᐅᔾᔨᒃᑲᓐᓂᓲᖑᕗᖅ ᐸᓖᓯᓕᕆᓂᐅᔪᒥ. ᐊᔪᖅᓴᕐᓂᕐᒥᐅᕗᖅ ᐊᒻᒪ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ. ᓱᓕᓂᐅᔪᒥ ᐃᓄᐃᑦ ᐱᓕᕆᐊᖑᕙᖕᓂᖏᓐᓂ ᐱᕋᔭᒃᑎᑐᑦ ᐃᑲᔪᖅᓯᖅᑕᐅᙱᖔᖅᖢᑎᒃ ᐱᔭᕆᐊᓕᖏᓐᓂ," ᐅᖃᓚᐅᖅᐳᖅ ᑐᕉᑑ.
ᕿᓚᒻᒥᐅᔪᒥ ᑭᖑᓂᐊᒍᑦ, ᑲᓇᑕᒥ ᐸᓖᓯᒃᑯᓐᓄᑦ ᐅᖃᖅᑎᐅᔪᖅ ᑖᓐ ᐳᕋᐃᔭᓐ ᑐᓂᓯᓚᐅᖅᐳᖅ ᐅᖃᐅᓯᒃᓴᐅᔪᒥ ᓇᓗᓇᐃᖅᓯᔪᒥ ᐸᓖᓯᒃᑯᑦ ᑲᓇᑕᒥ ᑲᒥᓴᓇᖓ "ᐃᓚᐅᖃᑕᐅᓂᐊᕐᓂᖓᓂ ᐱᓕᕆᓂᐅᔪᒥ ᐊᒻᒪ ᐅᖃᓪᓚᖃᑎᖃᕐᓂᖓᓂ ᐸᓖᓯᓕᕆᓂᕐᒧᑦ ᐱᓕᕆᖃᑎᒋᔭᖏᓐᓂ ᐊᒻᒪᓗ NPF–ᑯᓐᓂ (ᑲᓇᑕᒥ ᐸᓖᓯᒃᑯᓐᓄᑦ ᑎᒥᖁᑕᐅᔪᓄᑦ –ᑲᓇᑕᒥ ᐸᓖᓯᒃᑯᑦ ᔫᓂᐊᓐ–ᖓ) ᐊᒥᓲᓂᖅᓴᓄᑦ ᓴᖅᑭᑎᑦᑎᓂᐅᔪᒥ ᑎᒥᒧᑦ–ᐊᑐᖅᑕᐅᕙᒃᑐᓄᑦ ᐊᔾᔨᓕᐅᕈᑎᓂᑦ."
ᓇᓗᓇᐃᖅᓯᓯᒪᙱᓚᑦ ᖃᖓ ᐊᑐᓕᖅᑎᑕᐅᓂᐊᕐᓂᖓᓂ ᐊᒻᒪ ᓄᓇᕗᑦ ᐃᓚᐅᖃᑕᐅᓂᐊᕐᓂᖓᓂ ᐱᔪᓐᓇᕐᓂᖃᕐᓂᐅᔪᓂ ᐊᑐᓕᖅᑎᑦᑎᓂᕐᒧᑦ ᐊᔾᔨᓕᐅᕈᑎᓂᑦ.
ᑭᒡᒐᖅᑐᐃᔨᐅᔪᒥ ᓄᓇᕘᑉ ᑲᓇᑕᒥ ᐸᓖᓯᒃᑯᑦ V ᐊᕕᒃᓯᒪᓂᐅᔪᓄᑦ ᐅᑎᖅᑎᓚᐅᙱᓚᖅ ᑐᒃᓯᕋᕐᓂᐅᔪᒥ ᐅᖃᐅᓯᒃᓴᓕᐅᕐᓂᕐᒧᑦ ᑎᒥᒧᑦ ᐊᑕᔪᓄᑦ ᐊᔾᔨᓕᐅᕈᑎᓄᑦ ᐱᖓᔪᐊᓐᓂ.
ᑐᓐᓄ ᐅᖃᓚᐅᖅᐳᖅ ᐅᒃᐱᕈᓱᒃᐳᖅ ᐸᓖᓯᒃᑯᑦ ᐊᑐᓪᓗᐊᕐᓂᖏᓐᓂ ᑎᒥᒧᑦ ᐊᑕᔪᓄᑦ ᐊᔾᔨᓕᐅᕈᑎᓂᑦ.
"ᐱᓕᕆᓲᖑᕗᖅ ᑕᒪᒃᑭᐅᒪᔪᓄᑦ – ᓴᐳᔾᔨᓯᒪᓂᕐᒧᑦ ᑲᓇᑕᒥ ᐸᓖᓯᒃᑯᓐᓂ ᐊᒻᒪᓗ ᓴᐳᔾᔨᓯᒪᓂᕐᒧᑦ ᐃᓄᖕᒧᑦ ᑎᒍᔭᐅᕙᓪᓕᐊᔪᒧᑦ," ᐅᖃᓚᐅᖅᐳᖅ.
ᑕᐃᔅᓱᒧᖓ ᐸᓖᓯᐅᔪᒥ ᐊᐳᖅᓯᓚᐅᖅᑐᒥ ᑭᙵᕐᒥᐅᑕᒥᒃ ᓄᓇᓯᐅᑎᒧᑦ ᐹᖓᓄᑦ, ᐊᐅᓪᓚᖅᑎᑕᐅᓯᒪᓕᖅᐳᖅ ᑭᙵᕐᓂ ᐅᑕᖅᑭᓂᖓᓂ ᖃᓄᐃᓕᖓᓂᐊᕐᓂᖓᓂ ᖃᐅᔨᓴᖅᑕᐅᓂᐅᔪᒥ ᖃᓄᐃᓐᓂᕆᓚᐅᖅᑕᖓᓐᓂ. ᑐᓐᓄ ᐅᖃᓚᐅᖅᐳᖅ ᐸᕐᓇᒃᓯᒪᙱᓚᖅ ᓱᓕ ᑕᐃᔅᓱᒥᖓ ᐸᓖᓯᐅᔪᒥ ᐊᓂᑕᐅᓪᓚᕆᖕᓂᖓᓂ ᓄᓇᓕᐅᔪᒥ.
"ᖃᐅᔨᓴᖅᑕᐅᕌᓂᒃᐸᑦ ᑭᐅᑦᑎᐊᒃᑲᓐᓂᕈᓐᓇᕐᓂᐊᖅᐸᖓ," ᐅᖃᓚᐅᖅᐳᖅ. "ᐱᐅᙱᑦᑐᒻᒪᕆᐊᓘᔮᖅᑐᖅ ᒫᓐᓇᐅᔪᒥ ᑕᕐᕆᔭᓕᐊᖑᓚᐅᕐᒪᑦ ᑭᓯᐊᓂ ᐅᑕᖅᑭᔪᒪᕗᖓ ᖃᐅᔨᓴᖅᑕᐅᓂᕐᒧᑦ ᐅᓂᒃᑳᓕᐊᒥ."
ᒪᐃᔭ ᐃᓚᒋᐊᖅᓯᓚᐅᖅᐳᖅ ᔫᓐᔅ ᓄᑖᓂ ᑐᓴᒐᒃᓴᓕᐊᖃᓚᐅᙱᓚᖅ ᑲᑎᒪᔨᓄᑦ ᐱᔾᔪᑎᖃᖅᑐᒥ ᑐᖁᓂᐅᔪᒥ ᐹᖅᓯᓂᐅᓚᐅᖅᑐᒥ ᐸᓖᓯᐅᔪᒥ ᐊᒻᒪ ᑭᙵᕐᒥᐅᑕᒥᑦ ᕕᕈᐊᕆ 26–ᒥ. ᑕᐃᓐᓇ ᖃᓄᐃᓐᓂᐅᔪᖅ ᑐᓂᔭᐅᓚᐅᖅᐳᖅ ᐊᑑᕚᒥ ᐸᓖᓯᒃᑯᓐᓄᑦ ᐱᔨᑦᑎᕋᖅᑎᓄᑦ ᖃᐅᔨᓴᖅᑕᐅᓂᕐᒧᑦ.