Skip to content
  1. Home
  2. Kivalliq News

ᑭᕙᓪᓕᕐᒥ ᐃᓕᓐᓂᐊᖅᑐᑦ ᓂᕈᐊᖅᑕᐅᔪᑦ ᑲᓇᑕᒥᐅᑦ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐱᒡᒍᓴᐅᔾᔪᐊᕐᓂᐊᖅᑎᓪᓗᒋᑦ

Darrell Greer

ᓯᓚᑦᑕᐅᙱᓐᓂᖓᓄᑦ ᐃᓕᓐᓂᐊᖅᑐᑦ ᓇᐅᔮᓂ ᓴᓪᓕᓂᓗ ᑎᑭᑦᑐᓐᓇᓚᐅᙱᑦᑐᑦ ᐊᕐᕕᐊᓄᑦ 2019-ᒥ ᑭᕙᓪᓕᕐᒥ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐱᒡᒍᓴᐅᔾᔪᐊᕐᓂᖃᖅᑎᓪᓗᒋᑦ ᕿᑎᖅᖠᖅ ᐃᓕᓐᓂᐊᕐᕕᖕᒥ ᒫᑦᓯ 15-ᒥ 17-ᒧᑦ.

Qitiqliq Middle School principal Doreen Hannak, left, and teacher Juanita Belhauzin display the Awards of Merit they received from the Kivalliq Science Educators Community for the outstanding job the school did hosting the Kivalliq Regional Science Fair in Arviat from March 15-17, 2019. Photo courtesy Kivalliq Science Educators Community
Qitiqliq Middle School principal Doreen Hannak, left, and teacher Juanita Belhauzin display the Awards of Merit they received from the Kivalliq Science Educators Community for the outstanding job the school did hosting the Kivalliq Regional Science Fair in Arviat from March 15-17, 2019. Photo courtesy Kivalliq Science Educators Community

ᑕᒪᓐᓇ ᐊᕐᕌᒍᑕᒫᒃᑯᑦ ᐱᒡᒍᓴᐅᔾᔪᐊᕐᓂᐅᖃᑦᑕᖅᑐᖅ ᐊᑭᓕᖅᑐᖅᑕᐅᓲᖅ ᑭᕙᓪᓕᕐᒥ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐊᒻᒪᓗ ᐃᓕᓐᓂᐊᕐᕖᑦ ᐊᒥᖅᑳᖅᖢᑎᒃ ᐅᑭᐅᑕᒫᒃᑯᑦ ᑕᒪᑐᒥᙵ ᑲᒪᔨᐅᕙᒃᑐᑦ.
ᑭᕙᓪᓕᕐᒥ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐊᖓᔪᖅᑳᖑᖃᑕᐅᔪᖅ ᒋᓚᓐ ᐳᕋᑯᐸᐃᖕᒃ ᐅᖃᖅᖢᓂ ᐃᓕᓐᓂᐊᖅᑐᒡᒎᖅ ᐱᓕᕆᐊᕆᓯᒪᔭᖏᑦ ᖃᐅᔨᓴᖅᑕᐅᑎᓐᓇᓱᓚᐅᖅᑕᖏᑦ ᐃᓕᓐᓂᐊᕐᕕᖏᓐᓂᒃ, ᑕᐃᑲᓃᖃᑕᐅᙱᒃᑲᓗᐊᖅᑎᓪᓗᒋᑦ.
ᑭᓯᐊᓂ, ᐅᖃᖅᖢᓂ, ᑲᔪᓯᓂᖃᑦᑎᐊᓚᐅᙱᒻᒪᒡᒎᖅ.
"ᐃᓕᓐᓂᐊᖅᑎᑦᑎᔨᖏᑦ ᓇᒃᓯᐅᑎᑦᑎᑦᑎᓚᐅᖅᑕᖅᐳᑦ ᐱᓕᕆᐊᕆᓯᒪᔭᖏᓐᓂᒃ, ᓴᖅᑭᔮᖅᑎᑦᑎᓯᒪᑉᓗᒋᑦ, ᐊᒻᒪᓗ ᐋᖅᑭᒃᓯᑉᓗᑕ ᐃᓕᓐᓂᐊᖅᑐᑦ ᐅᖃᓗᒡᓗᑎᒃ ᑐᑭᓯᑎᑦᑎᒋᐊᖁᑉᓗᒋᑦ ᖃᐅᔨᓴᖅᑕᐅᔪᓐᓇᖁᑉᓗᒋᑦ ᐊᔪᙱᓐᓂᕆᔭᖏᑦ ᐅᖃᓘᑎᒃᑯᑦ," ᑕᐃᒪᓐᓇ ᐅᖃᖅᖢᓂ ᐳᕋᑯᐸᐃᖕᒃ.
"ᑲᔪᓯᓂᖃᑦᑎᐊᓚᐅᖅᑐᖅ ᓴᓪᓕᕐᒥᐅᑦ ᐃᓕᓐᓂᐊᖅᑐᖁᑎᖏᓐᓄᑦ ᑭᓯᐊᓂ ᐋᖅᑭᒃᓱᐃᓯᒪᓕᖅᑎᓪᓗᑕ ᐊᒻᒪᓗ ᑕᒪᕐᒥᒃ ᖃᕆᑕᐅᔭᒃᑯᑦ ᐱᖃᑕᐅᔭᕆᐊᓖᑦ ᐊᑐᐃᓐᓇᐅᓕᖅᑎᓪᓗᒋᑦ ᐱᕕᒃᓴᕇᕈᑎᓚᐅᕋᑉᑕ ᓇᐅᔮᕐᒥᐅᑦ ᖃᐅᔨᓴᖅᑕᐅᔪᓐᓇᖁᑉᓗᒋᑦ ᐊᔪᙱᓐᓂᕆᔭᖏᑦᑎᒍᑦ.
"ᓇᐅᔮᕐᒥᐅᑦ ᐱᓕᕆᐊᕆᓯᒪᔭᖏᑦ ᓴᙱᔪᐊᓘᓚᐅᖅᑐᑦ, ᐅᒡᒍᐊᕐᕕᒋᔭᕆᐊᖃᓪᓚᕆᒃᑕᖅᐳᑦ ᐃᓕᓐᓂᐊᖅᑐᖁᑎᖏᑦ ᐃᓚᐅᖃᑕᐅᑎᑦᑎᔪᓐᓇᓚᐅᙱᓐᓇᑉᑕ ᓂᕆᐅᓇᙱᑦᑐᓂᒃ ᐃᖢᐊᖏᓕᐅᕈᑎᖃᓕᓚᐅᕐᓂᕐᒧ.
"ᑕᑯᒋᐊᒃᑲᓐᓂᕐᓂᐊᖅᑕᖅᐳᑦ ᒪᓕᒐᖁᑎᒋᔭᖅᐳᑦ ᑕᑯᒋᐊᕐᓗᑕ ᖃᓄᐃᓕᐅᖃᑦᑕᕐᓂᐊᕐᒪᖔᑉᑕ ᐃᓕᓐᓂᐊᖅᑐᑦ ᑎᑭᑦᑐᓐᓇᙱᒃᑳᖓᑕ ᓯᓚ ᐱᔾᔪᑎᒋᑉᓗᒍ ᐊᒻᒪᓗ ᖃᐅᔨᓇᓱᒡᓗᑕ ᖃᓄᖅ ᑕᒪᕐᒥᒃ ᐃᓕᓐᓂᐊᖅᑐᑦ ᐃᓚᐅᖃᑕᐅᔪᓐᓇᖃᑦᑕᕋᔭᕐᒪᖔᑕ ᓯᕗᓂᒃᓴᒥ."
ᐳᕋᑯᐸᐃᖕᒃ ᐅᖃᖅᖢᓂ 2019-ᒥᒎᖅ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐱᓕᕆᐊᖑᔪᖅ ᑕᐃᒎᓯᖃᓚᐅᖅᑐᖅ ᐊᑐᖅᑕᐅᒃᑲᓐᓂᕈᓐᓇᖅᑐᓄᑦ ᖃᐅᒻᒪᖅᑯᑎᓕᕆᓂᒃᑯᑦ ᐊᒻᒪᓗ ᕿᑎᖅᖠᖅ ᐃᓕᓐᓂᐊᕐᕕᒃ ᐱᓕᕆᑦᑎᐊᖅᑐᒻᒪᕆᐊᓘᓚᐅᖅᑐᕉᖅ ᑐᙵᓱᒃᑎᑦᑎᓂᒃᑯᑦ ᐃᓕᓐᓂᐊᖅᑐᓂᒃ.
ᐅᖃᖅᖢᓂ ᐊᒡᓂᒍ ᐃᒍᒃᑯᑦ ᐅᔭᕋᖕᓂᐊᖅᑐᓕᕆᔨᒃᑯᑦ ᓴᕕᒐᐅᔭᓕᕆᔨᖓ ᓗᐃ ᑕᑦᑐᐃᓂ ᑲᖏᖅᖠᓂᕐᒥᐅᑕᖅ ᐊᕐᕕᐊᓄᒡᒎᖅ ᑎᑭᑦᑐᓐᓇᖅᓯᓚᐅᖅᑐᖅ ᐅᖃᐅᓯᖃᕆᐊᖅᑐᖅᖢᓂ ᓱᓇᓕᕆᔨᐅᖃᑦᑕᕐᒪᖔᕐᒥ ᓴᕕᒐᐅᔭᓕᕆᔨᐅᓂᒃᑯᑦ ᑐᓴᖅᑎᑦᑎᒋᐊᖅᖢᓂ ᐃᓕᓐᓂᐊᖅᑐᓂᒃ.
ᐊᕐᕕᐊᑦ ᐃᓕᓐᓂᐊᖅᑐᖁᑎᖓ ᔭᓇᑕᓐ ᑳᒻᐳ ᓵᓚᒃᓴᓚᐅᖅᑐᖅ ᑕᒡᕙᓂ ᐅᑭᐅᒥ ᐃᒐᓛᒃᑯᑦ ᔭᐸᓕᕆᓂᐅᑉ ᒥᒃᓵᓄᑦ ᐱᓕᕆᐊᖃᖅᓯᒪᑎᓪᓗᒍ.
"ᐱᖓᓱᓂᒃ ᐃᓕᓐᓂᐊᖅᑐᓂᒃ ᐊᐅᓪᓚᖅᑎᑦᑎᓂᐊᖅᑐᒍᑦ - ᔭᓇᑕᓐ ᑳᒻᐳ ᐊᕐᕕᐊᕐᒥᐅᑕᖅ, ᑕᔅᑕᓐ ᐃᓴᓗᒃ ᐃᒡᓗᓕᒑᕐᔪᖕᒥᐅᑕᖅ ᐊᒻᒪᓗ ᔪᐊᓐ ᐳᑐᓕᒃ ᐃᒡᓗᓕᒑᕐᔪᖕᒥᐅᑕᖅ - ᑲᓇᑕᒥ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐱᒡᒍᓴᐅᔾᔪᐊᖅᑐᓄᙵᐅᓂᐊᖅᑐᑦ ᕗᕆᑦᔪᐃᒃᑕᓐ, ᓂᐅ ᐳᕋᓐᔅᐅᐃᒃᒧᑦ, ᒪᐃ 11-ᒥ 17-ᒧᑦ."