ᑲᔾᔮᕐᓇᕐᔪᐊᕐᓂᖓᓂ ᓄᓇᒥᒃ, ᓯᕿᓂᖅ ᓯᓚᒥ ᐊᒻᒪ ᐸᖓᓕᒃᐸᓕᑦᑎᓂᖅ ᕿᒻᒥᖓᑕ ᐃᓯᒐᖏᓐᓂ ᐊᐳᑎᓕᖕᒥ ᓄᓇᒥᒃ ᑕᑯᒃᓴᐅᑎᑦᑎᓯᒪᕗᖅ ᐊᖏᔪᓂ ᖁᕝᕙᕆᐊᖅᑎᑦᑎᓂᐅᔪᒥ ᑕᕙᓐ ᒪᓂᒃ ᐃᓱᒪᒋᓯᒪᔭᖏᓐᓂ.
“ᐱᒋᐊᓚᐅᖅᑳᕐᓂᓐᓂ ᑖᔅᓱᒥᖓᓕᒫᖅ, ᐃᓂᑦᑎᐊᕙᖕᒦᓚᐅᙱᓚᖓ, ᓂᑲᓪᓗᖓᓚᐅᖅᐳᖓ,” ᐅᖃᓚᐅᖅᐳᖅ. “ᐱᔾᔪᑎᒋᓪᓗᒍ ᐊᔾᔨᓕᐅᕆᖃᑦᑕᓕᓚᐅᖅᐳᖓ ᐊᒻᒪ ᕿᒧᒃᓯᖅᐸᒃᖢᖓ... ᑕᖅᑳᓃᑎᓪᓗᖓ, ᐃᓱᒪᖅᓱᖅᑑᔮᖅᐳᖓ. ᑲᔾᔮᕐᓇᐃᓐᓇᓲᖅ ᐊᐅᓪᓛᑐᐊᕌᖓᒪ.”
ᐅᑭᐊᒃᓵᕐᔪᐊᖑᒐᓗᐊᖅᑎᓪᓗᒍ ᐊᒻᒪ ᐅᑭᐅᕐᒥ ᑖᖏᓐᓇᒐᓚᒃᑲᓗᐊᖅᑎᓪᓗᒍ ᖃᐅᓱᐃᑦᑐᕐᒥ ᑕᐃᑯᖓ ᕕᕈᐊᕆ ᓄᙳᐊᓄᑦ, ᒪᓂᒃ ᖁᕕᐊᑉᐳᖅ ᐱᒋᐊᓪᓚᕆᖕᓂᐊᕐᓂᖓᓂ ᕿᒧᒃᓯᒃᑯᑦ ᐊᐅᓪᓚᕈᔾᔨᓂᕐᒧᑦ ᓇᖕᒥᓂᕆᔭᖓᓂ ᐃᖏᕐᕋᓯᑎᓐᓂᖓᓂ. ᐸᕐᓇᒃᐳᖅ ᐱᓕᕆᔾᔪᔾᔨᕙᖕᓂᐊᕐᓂᖓᓂ ᐳᓚᕋᖅᐸᒃᑐᓄᑦ ᖃᐅᓱᐃᑦᑐᕐᒧᑦ ᐊᐅᓪᓛᕈᒪᔪᓄᑦ ᐊᒻᒪ ᑕᑯᓗᑎᒃ ᖃᓂᒋᔭᖓᓂ ᓇᓗᓇᐃᒃᑯᑕᐅᔪᓄᑦ.
“ᐱᓕᕆᔪᒪᕗᖓ ᐊᓕᐊᓇᐃᒋᑦᑎᐊᖅᑕᓐᓂ,” ᐅᖃᓚᐅᖅᐳᖅ.
ᑐᔾᔮᑦ ᐊᐅᓪᓚᕈᔾᔨᓂᖅ ᐊᑎᖃᖅᐳᖅ ᐅᐱᒋᔭᖃᕐᓂᐅᔪᒥ ᐊᑖᑕᑦᑎᐊᒃᑯᖏᑦ ᐊᓈᓇᑦᑎᐊᒃᑯᖏᑕ ᐃᓚᖏᑦ ᐊᑎᖃᖅᑎᑉᐸᓚᐅᖅᑕᖓᓐᓂ ᐃᓂᐅᔪᒥ ᓄᓇᖃᖅᑎᓪᓗᒋᑦ ᑰᒐᓇᔫᑉ ᓄᓇᖓᓐᓂ.
ᒪᓂᒃ, 18, ᐃᓕᑦᑎᓚᐅᖅᓯᒪᕗᖅ ᖃᓄᖅ ᐃᓕᓐᓂᐊᖅᑎᑦᑎᓂᕐᒥ ᐃᓐᓇᕐᓂ ᕿᒻᒥᖏᓐᓂ ᖁᙱᐊᖅᐸᒃᖢᓂ ᖃᕋᓴᐅᔭᑎᒍᑦ ᑕᕐᕆᔭᓕᐊᖑᔪᓂ ᑲᓛᖦᖠᐅᑉ ᓄᓈᓐᓂ. ᐃᓕᓐᓂᐊᖅᑎᑦᑎᓂᕐᒥ ᓄᖅᑲᕐᓂᕐᒧᑦ ᐊᔪᕐᓇᓛᖑᓂᐅᓚᐅᖅᐳᖅ.
“ᐊᕐᕌᒍᓕᒫᐸᓗᖕᒥ ᒪᓕᖕᓂᖏᓐᓂ ᐱᓕᕆᐊᕆᔪᒪᔭᓐᓂ,” ᐅᖃᓚᐅᖅᐳᖅ, ᐃᒡᓚᖅᖢᓂ.
ᕿᒻᒥᑦ ᖁᕕᐊᑉᐳᑦ ᐅᓪᓚᖕᓂᕐᒧᑦ ᐃᑲᕐᕋᓄᑦ ᑎᓴᒪᓄᑦ ᐅᓪᓗᕐᒥ, ᐅᖃᓚᐅᖅᐳᖅ. ᖃᐅᔨᒪᕐᔪᐊᕆᕗᑦ ᐃᒡᓗᕋᓛᕐᒧᐊᕈᔾᔨᓂᕐᒧᑦ, 30 ᑭᓛᒥᑐᐸᓗᖕᒥ ᐅᐊᖕᓇᒥ ᐱᓇᖕᓇᕐᒧᑦ ᖃᐅᓱᐃᑦᑐᕐᒥ, ᐊᒻᒪᓗ ᐊᖑᓇᓱᒡᕕᖕᓄᑦ ᐃᓂᐅᔪᓄᑦ, ᐃᓚᖃᖅᑐᒥ ᐊᒡᓗᓄᑦ. ᐊᖑᓇᓱᖕᓂᕐᒧᑦ ᐊᔪᙱᓐᓂᖅᑖᓚᐅᖅᐳᖅ ᐊᑖᑕᑦᑎᐊᖓᓂ, ᐊᓈᓇᑦᑎᐊᖓᓂ ᐊᒻᒪ ᑕᐱᓴ ᒪᓕᓐᒥ, ᐅᖃᓚᐅᖅᐳᖅ.
ᒪᓂᒃ, ᐃᓱᓕᑦᑎᓚᐅᖅᑐᒥ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᑕᒪᑐᒪᓂ ᐊᕐᕌᒎᔪᒥ, ᐊᖑᓇᓱᒃᓯᒪᒋᕗᖅ ᐅᒥᖕᒪᖕᓂᑦ, ᑐᒃᑐᓂᑦ, ᓇᓄᕐᓂ, ᐊᓪᓚᙳᐊᑦ ᕿᓚᓗᒐᕐᓂ ᐊᒻᒪ ᐊᒪᕈᕐᒥᑦ. ᐊᐅᔭᐅᑎᓪᓗᒍ, ᑐᖂᑦᑎᓚᐅᖅᐳᖅ ᒪᕐᕉᖕᓂ ᖃᑯᖅᑕᓂ ᕿᓚᓗᒐᕐᓂ ᖃᓂᒋᔭᖓᓂ ᐃᒪᕐᒥ ᖃᔭᕐᒥᓃᑎᓪᓗᒍ.
“ᐊᒃᓱᕈᕆᐊᖃᕐᓇᙱᓚᖅ ᐅᓈᑦ ᐃᐱᑦᑎᐊᕈᓂ,” ᐅᖃᓚᐅᖅᐳᖅ ᐱᔪᓐᓇᕐᓂᖓᓂ ᐊᖑᓇᓱᖕᓂᕐᒥ ᕿᓚᓗᒐᕐᓂ ᐃᒃᓯᕚᕋᓗᐊᖅᑎᓪᓗᒍ ᐊᐅᓚᔾᔭᒃᓴᕋᐃᑦᑐᒥ ᐅᒥᐊᕐᒥ. “ᐅᓈᖓ ᐃᓗᐊᓄᐊᑦᑎᐊᕆᐊᖃᖅᐸᐃᑦ ᐊᒻᒪ ᐃᓗᐊᓅᕈᓂ ᐊᒃᖢᓈᖅ ᐊᑕᕗᖅ ᐊᕙᑕᕐᒧᑦ ᐊᒻᒪ ᐱᐅᕗᖅ.”
ᓄᓇᒥᒃ ᐊᐅᓪᓛᖅᓯᒪᒐᔪᒃᖢᓂ, ᐃᓛᓐᓂᓚᐅᓱᖓᕐᒥ ᐱᕐᕈᓗᐊᕿᓂᖃᖅᓯᒪᕗᖅ ᐊᒻᒪ ᐹᖅᓯᑲᓴᖕᓂᐅᔪᒥ ᐆᒪᔪᓂᑦ, ᐅᖃᓚᐅᖅᐳᖅ. ᓇᓄᕐᓂ ᐅᐸᒃᑕᐅᓯᒪᕗᖅ ᐊᒻᒪ ᕿᒻᒥᒥᓂᑦ ᐊᒡᓗᓃᑎᓪᓗᒍ ᓂᒃᐸᖅᑎᓪᓗᒋᑦ. ᐊᑕᐅᓯᐊᖅᑐᒥ ᖁᑭᕆᐊᓚᐅᖅᐳᖅ ᑕᑉᐸᐅᖓ ᐊᒻᒪ ᑲᐸᑎᖦᖢᓂᒋᑦ ᓇᓄᐃᑦ, ᓇᖏᖅᓯᓚᐅᖅᑐᒥ. ᐊᓯᐊᒍᑦ ᐹᖅᓯᓂᐅᔪᒥ ᐊᑎᖅᑕᓕᖕᒥ ᐊᑎᖅᑕᓛᓕᖕᒥ ᐃᑭᑲᐅᖅᑐᖅᖢᓂ ᖃᒧᑎᖓᓄᑦ ᐊᒻᒪ ᕿᒧᒃᓯᓕᖅᖢᓂ.
“ᓇᓄᐃᑦ ᕿᒫᓚᐅᖅᐳᑦ. ᕿᒻᒥᓂᒃ ᑲᑉᐱᐊᓱᓚᐅᕐᒪᑕ,” ᐃᖅᑲᐅᒪᕗᖅ.
ᔫᓂᒥ, ᐊᐅᓪᓛᓚᐅᖅᐳᖅ ᐃᒡᓗᕋᓛᖓᑕ ᐅᖓᑖᓄᑦ ᑕᐅᕘᓇ ᑰᒃᑯᑦ ᐅᒥᖕᒪᒐᓱᐊᖅᖢᑎᒃ ᓯᑭᑑᖓ ᐃᒻᒥᓂᒃ ᐃᓪᓗᖓᓗ ᐊᖁᑕᖓᑦ ᐱᐅᙱᓐᓂᖅᓴᐅᓪᓗᓂ ᕿᒻᒥᖏᓐᓂᑦ. ᐊᐅᓚᐅᑎᖓ ᐊᔪᖅᓯᓚᐅᖅᐳᖅ ᐊᒻᒪ ᐱᓱᔪᒋᐊᖃᓚᐅᖅᐳᑦ ᐃᑲᕐᕋᓂ ᑎᓴᒪᓂᑦ ᐅᒡᓗᕋᓛᒧᑦ. ᖃᐅᑎᓪᓗᒍ ᐃᑲᕐᕋᒃᑲᓐᓂᕐᓂ 8-ᓂ ᖃᐅᓱᐃᑦᑐᕐᒧᑦ ᐅᑎᕐᓂᕐᒧᑦ.
ᒪᓂᒃ ᒫᓐᓇᓕᓴᒥ ᐱᓚᐅᖅᐳᖅ ᐊᖓᔪᖅᑳᑉ ᓵᓚᖃᐅᓯᐊᖓᓐᓂ ᓄᓇᑖᕐᓂᕐᒧᑦ ᑲᑐᔾᔨᖃᑎᒌᖑᔪᓄᑦ ᓄᓇᕗᒻᒥ ᑐᙵᕕᒃᑯᓐᓂ. ᐅᐱᒋᔭᐅᒋᓪᓗᓂ ᖁᑦᑎᒃᑐᖅ ᒪᓕᒐᓕᐅᖅᑎᖓᓐᓂ ᑕᐃᕕᑦ ᐊᕿᐊᕈᕐᒥ ᒪᓕᒐᓕᐅᖅᑎᒃᑯᑦ ᑲᑎᒪᕝᕕᒡᔪᐊᖓᓐᓂ ᐅᒃᑐᐱᕆ 25−ᒥ, ᐊᒻᒪ ᓯᕗᓪᓕᖅᐸᐅᒋᓚᐅᙱᓚᖓ.
“ᐅᖃᐅᓯᕆᓯᒪᕙᕋ ᑕᕙᓐ ᒪᓂᒃ ᐅᕙᓂ ᑲᑎᒪᕝᕕᒡᔪᐊᕐᒥ ᖃᔅᓰᖅᓱᒐᓚᒃᖢᒍ ᐅᐱᕆᕐᔪᐊᕋᒃᑯᑦ,” ᐅᖃᓚᐅᖅᐳᖅ ᐊᕿᐊᕈᖅ. “ᐅᐱᒋᔭᖃᑦᑎᐊᖅᐳᖅ ᐃᓄᐃᑦ ᐃᓕᖅᑯᓯᖓᓐᓂ ᐊᒻᒪ ᖁᔭᓕᕙᕋ ᐊᒻᒪ ᖁᔭᓕᕗᖓ ᐊᖓᔪᖅᑳᖅ ᐊᓗᑭ ᑰᑦᑎᕐᒥ ᐊᒻᒪ ᓄᓇᕗᒻᒥ ᑐᙵᕕᒃᑯᓐᓂ ᐃᓕᓴᖅᓯᓂᕐᒧᑦ ᐆᒥᖓ ᐃᓕᓐᓂᐊᖅᑎᐅᔪᒥ.”