ᐊᕐᕌᒍᒐᓵᓗᖕᓂ ᑐᖅᑯᖅᓯᒪᓪᓗᑎᒃ ᐋᓪᐴᑕᒥ ᓂᕐᔪᑎᖃᕐᕕᖕᒥ, ᑕᐃᔅᓱᒪᓂᑐᖄᓗᖕᓂ ᐊᔾᔨᙳᐊᓂ ᐊᔾᔨᓕᐅᖅᑕᐅᓂᑯᓂ ᐊᔾᔨᓕᐅᕆᔨᒧᑦ ᔨᐊᕈᑏᓐ ᒨᑎᒧᑦ ᖃᑎᒃᑕᓕᒃ ᐊᕕᒃᓯᒪᓂᐅᔪᒥ 1903 ᐊᒻᒪ 1909 ᕿᑎᖅᐸᓯᐊᓂ ᐳᓚᕋᖅᐳᑦ ᐅᑭᐅᖅᑕᖅᑐᒥ.
ᑭᐊᒍᕆᒥᐅᑕᖅ Glenbow ᑕᑯᓐᓇᒐᖃᕐᕕᖓ ᐳᓚᕋᖅᐳᖅ ᓄᓇᓕᖕᓂ ᐃᓄᐃᑦ ᐃᓚᓯᔪᓐᓇᕐᓂᐊᕐᒪᑕ ᐅᓂᒃᑳᖅᑐᐊᒥᓂᑦ ᐊᒻᒪ ᐃᓱᒪᒋᔭᒥᓂᑦ ᐱᑕᖃᒐᔪᙱᑦᑐᓄᑦ ᐊᔾᔨᙳᐊᓄᑦ, ᐅᖃᓚᐅᖅᐳᖅ ᔪᐋᓐ ᓯᒥᑦ, ᓄᓇᖃᖅᑳᖅᓯᒪᔪᓄᑦ ᖃᐅᔨᓴᐃᓂᐅᔪᒥ ᐅᖃᖅᑎᐅᔪᒥ Glenbow−ᒥ.
"ᔨᐊᕈᑏᓐ ᐊᒻᒪ ᑕᒡᓚᔅ ᑎᑎᕋᖅᐸᓪᓕᐊᖃᑦᑕᕐᓂᑯᖏᓐᓂ ᐱᓯᒪᕗᒍᑦ. ᖃᐅᔨᒪᕗᒍᑦ ᖃᓄᖅ ᐃᓱᒪᕙᓚᐅᕐᓂᖏᓐᓂ, ᑭᓯᐊᓂ ᖃᐅᔨᒪᙱᑉᐳᒍᑦ ᐃᓄᐃᑦ ᐃᓱᒪᓚᐅᕐᓂᖏᓐᓂ. ᐱᒻᒪᕆᐅᕐᔪᐊᖅᐳᖅ ᐱᓂᕐᒥ ᐃᓄᐃᑦ ᐃᓱᒪᒋᔭᓯᒪᔭᖏᓐᓂᑦ ᑖᔅᓱᒧᖓ," ᐅᖃᓚᐅᖅᐳᖅ.
Glenbow ᑕᑯᒃᓴᐅᑎᑕᐅᓂᖓ ᐊᐅᓪᓛᕐᓂᐊᖅᐳᑦ ᐸᖕᓂᖅᑑᒧᑦ, ᑲᖏᖅᖠᓂᖅ, ᖃᒪᓂᑦᑐᐊᖅ, ᐃᒡᓗᓕᒑᕐᔪᒃ ᐊᒻᒪ ᑰᒡᔪᐊᕌᓗᖕᒧᑦ ᐅᒃᑐᐱᕆ 15−ᖑᕋᓱᐊᕐᓂᖓᓂ.
ᒨᑎ ᐱᓇᖕᓇᒥ ᑲᓇᑕᒥ ᓯᕗᓪᓕᖅᐸᐅᓪᓗᓂ ᐊᕐᓇᐅᓪᓗᓂ ᐊᔾᔨᓕᐅᕆᔨᒻᒪᕆᐅᓚᐅᖅᐳᖅ. ᐃᓚᐅᖃᑕᐅᓚᐅᖅᐳᖅ ᑕᒡᓚᔅ ᒨᑎᒥ, ᐅᐃᖓ ᐊᒻᒪ ᐸᓖᓯᐅᓪᓗᓂ, ᐊᔾᔨᓕᐅᕆᓂᑰᓪᓗᓂ ᐅᓄᕐᓂᖅᓴᓂ 1,000 ᐊᔾᔨᓕᐊᒥᓂᑦ ᐅᓂᒃᑳᖅᓯᒪᓂᖃᑦᑎᐊᖅᖢᑎᒃ ᑎᑎᖅᑲᓂᑦ.
ᑕᒡᓚᔅ ᒨᑎ ᐃᓂᖃᓚᐅᖅᐳᖅ ᐅᑭᐅᖅᑕᖅᑐᒥ ᑲᑎᖅᓱᐃᓂᕐᒧᑦ ᐊᑭᓕᖅᓱᐃᓂᐅᔪᓄᑦ ᑲᓇᑕᐅᑉ ᓯᓚᑖᓂ ᕿᓚᓗᒐᕋᓱᒃᑎᐅᔪᓂᑦ ᐊᒻᒪ ᓴᖅᑭᑎᑦᑎᓂᕐᒧᑦ ᑲᓇᑕᒥ ᐸᓖᓯᖃᕐᓂᐅᔪᒥ ᖃᑎᒃᑕᓕᖕᒥ, ᐃᒡᓗᓕᒑᕐᔫᑉ ᐅᐊᖕᓇᖓᓂ, ᕿᑎᐊᓂ 1903 ᐊᒻᒪ 1905−ᒥ.
ᔨᐊᕈᑏᓐ ᒨᑎ ᐋᖅᑭᒃᓱᐃᓚᐅᖅᐳᖅ ᐊᔾᔨᓕᐅᕈᑎᖃᕐᕕᖕᒥ ᐸᓖᓯᒃᑯᓐᓂ. ᐊᑐᖅᐸᓚᐅᕆᕗᖅ ᐊᒡᒐᒧᑦ ᑎᒍᒥᐊᖅᑕᐅᓲᒥ ᐊᔾᔨᓕᐅᕈᒻᒥ ᐊᔾᔨᓕᐅᕆᓂᕐᒧᑦ ᓯᓚᒥ ᓄᓇᖓᓐᓂ ᐊᒻᒪ ᐅᑭᐅᖅᑕᖅᑐᒥ ᐆᒪᔪᓄᑦ, ᐊᒻᒪ ᐱᓕᒻᒪᒃᓴᐃᓪᓗᓂ ᐅᐃᒥᓂᑦ ᐊᔾᔨᓕᐅᕆᓂᕐᒧᑦ.
ᔨᐊᕈᑏᓐ ᒨᑎᐅᑉ ᑎᑎᖅᑲᖁᑎᖏᑦ ᐊᒥᓲᒐᓗᐊᖅᑎᓪᓗᒋᑦ, Glenbow ᓂᕆᐅᒃᐳᑦ ᐳᓚᕋᕐᓂᐅᔪᖅ ᓴᖅᑭᑎᑦᑎᒃᑲᓐᓂᕐᓂᐊᕐᓂᖏᓐᓂ ᐅᖃᐅᓯᒃᓴᒃᑲᓐᓂᕐᓂ ᐃᓄᖕᓂ ᐊᔾᔨᙳᐊᓂᑦ.
ᐅᖃᐅᓯᒃᓴᓕᐊᑦ ᑲᑎᖅᓱᖅᑕᐅᔪᓂ ᐃᓚᒋᐊᖅᑕᐅᓂᐊᖅᐳᑦ Glenbow ᐃᑦᑕᕐᓂᑕᓕᕆᓂᕐᒧᑦ ᑎᑎᕋᖅᓯᒪᔪᓂᒃ ᑐᖅᑯᖅᑕᐅᓯ1ᕕᖕᒥ, ᑭᓯᐊᓂ ᐃᓚᒋᔭᐅᓪᓗᓂ ᐳᓚᕋᕐᓂᐅᔪᒥ, ᐊᔾᔨᙳᐊᓄᑦ ᐅᖃᓕᒫᒐᐃᑦ ᐊᒻᒪ ᖃᕋᓴᐅᔭᒃᑰᖅᑐᓂ ᐊᔾᔨᙳᐊᑦ ᕿᒻᒪᑰᓂᐊᖅᐳᑦ.
100−ᖑᐸᓗᒃᑐᓂ ᐊᔾᔨᙳᐊᓂ ᐅᖃᓕᒫᒐᕐᓂ ᐊᒻᒪ 400−ᓂ ᖃᕋᓴᐅᔭᑎᒍᑦ ᐊᔾᔨᙳᐊᓂ Glenbow ᕿᒻᒪᑰᓂᐅᔪᓂ, ᐊᒥᓱᑦ ᖃᑎᒃᑕᓕᖕᒥᙶᖅᐳᑦ, ᑭᓯᐊᓂ ᐊᒥᓱᓂ ᐊᔾᔨᙳᐊᖅᑕᖃᖅᐳᖅ ᑰᒡᔪᐊᕌᓗᒃ, ᒫᓂᑑᐸᒥ, ᑯᐸᐃᖕᒥ, ᑲᖏᖅᓱᐊᓗᒃ ᐃᓗᐊᓂ ᐊᒻᒪ ᓛᐸᑐᐊᒥ, ᐅᖃᓚᐅᖅᐳᖅ ᓯᒥᑦ.
ᔨᐊᕈᑏᓐ ᒨᑎ ᐊᔾᔨᓕᐅᕆᓚᐅᖅᐳᖅ ᐊᒥᓱᓂ ᐊᔾᔨᙳᐊᓂ ᐱᓕᕆᕝᕕᖓᓐᓂ ᐊᒻᒪ ᓴᖅᑭᑎᑦᑎᓚᐅᖅᐳᖅ ᐅᓂᒃᑳᖅᓯᒪᑦᑎᐊᖅᑐᓂ ᑎᑎᕋᖅᑕᐅᕙᓪᓕᐊᓂᐅᔪᓂ ᐅᓪᓗᒥ ᐊᑐᖅᑕᐅᔪᓐᓇᖅᑐᓂ ᑲᑎᖃᑎᖃᕐᓂᕐᒧᑦ ᐃᓄᖕᓄᑦ ᐊᔾᔨᙳᐊᓂᑦ ᑭᖑᕚᖏᓐᓄᑦ.
ᐊᔾᔨᙳᐊᑦ, ᑭᓯᐊᓂ, ᑐᓂᔭᐅᔪᓐᓇᙱᓚᑦ "ᐱᓪᓚᕆᐅᔪᓂ ᑎᑎᕋᐅᓯᐅᓯᒪᓂᐅᔪᓄᑦ" ᓇᓗᓇᐃᖅᓯᔪᓂ ᑕᐃᔅᓱᒪᓂᐅᓚᐅᖅᑐᒥ ᓄᓇᓕᑖᖅᐸᓪᓕᐅᓂᐅᔪᓄᑦ ᐃᓄᐃᑦ ᓄᓇᖏᓐᓂᑦ, ᑎᑎᕋᖅᐳᖅ ᐃᓄᒃ ᓴᓇᐅᒐᓕᕆᔨ ᐊᒻᒪ ᐅᖃᖅᑎ ᔭᐃᑦ ᓇᓱᒐᓗᐊᖅ ᑳᐱᓐᑐᕐ ᑲᓇᑕᒥ ᓴᓇᐅᒐᓕᕆᓂᕐᒧᑦ ᐅᖃᓕᒫᒐᖓᓐᓂ.
ᕿᓂᖅᑏᑦ ᐊᒻᒪ ᐃᖅᓯᕋᕐᔪᐊᑦ ᐊᐅᓪᓛᖅᑎᓪᓗᒋᑦ ᐅᑭᐅᖅᑕᖅᑐᒧᑦ, ᐃᓄᐃᑦ ᓵᙵᓂᖃᓚᐅᖅᐳᑦ ᐱᒋᐊᕐᓂᐅᔪᒥ ᐋᓐᓂᐊᕐᓇᓂᑦ ᖃᓪᓗᓈᓂ ᕿᓂᖅᑎᐅᔪᓂᑦ ᐊᒻᒪ ᕿᓚᓗᒐᕋᓱᐊᖅᑎᓂᑦ, ᐊᒻᒪ ᐃᓕᖅᑯᓯᕐᒥ ᐊᖅᓵᖅᑕᐅᓂᕐᒥ ᐃᒃᓯᕋᕐᔪᐊᓄᑦ ᐅᖃᓚᐅᖅᐳᖅ.
ᐊᒥᓱᐃᑦ ᕿᓂᖅᑎᐅᔪᑦ ᑐᙵᓂᖃᕐᔪᐊᓚᐅᖅᐳᑦ ᐃᓄᖕᓄᑦ ᐆᒪᓇᓱᐊᕐᓂᕐᒧᑦ.
ᐃᓚᖏᑦ ᑎᑎᕋᖅᑕᐅᓯᒪᓂᐅᔪᓂ ᔨᐊᕈᑏᓐ ᒨᑎᒧᑦ ᐅᓂᒃᑳᕆᕗᑦ ᐆᒥᖓ ᑐᙵᓂᖃᕐᓂᐅᔪᒥ ᐃᓄᖕᓄᑦ ᖃᐅᔨᒪᓂᐅᔪᓄᑦ, ᐆᒪᔪᓐᓇᕐᓂᕐᒧᑦ ᐊᔪᙱᓐᓂᐅᔪᓂ ᐊᒻᒪ ᐱᖅᑯᓯᑐᖃᖅᑎᒍᑦ ᐊᓐᓄᕌᖏᓐᓂᑦ.
ᑎᑎᕋᖅᑕᐅᓂᐅᔪᑦ ᑕᒪᒃᑭᓂ ᒨᑎᐅᔪᓄᑦ ᐃᓕᓯᕗᑦ ᐃᓄᖕᓂ ᐱᔪᒪᓪᓗᑎᒃ ᐃᓚᒋᔭᐅᓂᖏᓐᓂ ᓴᓇᓂᐅᔪᒥ ᐊᓐᓄᕌᓂᑦ ᕿᓂᖅᑎᓄᑦ ᐊᒻᒪ ᑐᓂᓯᓂᐅᔪᒥ ᓂᕿᒃᓴᖏᓐᓂᑦ.
Glenbow ᖃᐅᔨᒪᓚᐅᙱᓚᑦ ᐊᖏᓂᖓᓂ ᑲᑎᖅᓱᐃᓂᐅᔪᒥ, ᑭᓯᐊᓂ ᑎᑎᕋᖅᑕᐅᓯᒪᓂᐅᔪᑦ ᑐᓂᓯᕗᑦ ᐅᖃᐅᓯᒃᓴᓂ ᐃᓂᐅᔪᓂᑦ ᐊᒻᒪ ᐊᑎᖏᓐᓂ ᐃᓄᖕᓂ ᐊᔾᔨᙳᐊᓂᑦ ᑭᓯᐊᓂ ᐃᓚᖏᑦ ᐋᖕᓕᑲᙳᖅᓯᒪᓂᖏᓐᓂ, ᐅᖃᓚᐅᖅᐳᖅ.
ᐊᕐᕌᒍᒐᓴᓂ ᐊᓂᒍᖅᑐᓂ, ᐃᓚᖏᑦ ᐊᓕᒍᕐᓂ ᓵᖑᔪᑦ ᓱᕋᓚᐅᖅᐳᑦ ᑭᓯᐊᓂ ᒨᑎᐅᔪᑦ ᐊᒋᑦᑎᓚᐅᖅᓯᒪᙱᓚᑦ ᓱᕐᕋᑯᓂᑦ, ᑕᑯᓐᓇᒐᖃᕐᕕᒃ ᐋᖅᑭᒃᓱᕈᓐᓇᓚᐅᖅᖢᓂᒋᑦ ᑕᒪᒃᑭᐅᒪᔪᓄᑦ ᐊᔾᔨᙳᐊᓄᑦ, ᐅᖃᓚᐅᖅᐳᖅ ᓯᒥᑦ.
ᑕᒡᓚᔅ ᒨᑎ ᐊᑐᒐᔪᓚᐅᖅᐳᖅ ᐊᒡᒐᒧᑦ ᑎᒍᒥᐊᖅᑕᐅᓲᒥ ᐊᔾᔨᓕᐅᕈᒻᒥ ᐱᓕᕆᐊᒥᓂᑦ ᐸᓖᓯᐅᓂᕐᒧᑦ ᐊᔾᔨᓕᐅᕆᓂᕐᒧᑦ.
ᑎᑎᕋᖅᐸᓪᓕᐊᓂᐅᔪᓂ ᑎᑎᕋᖅᑕᒥᓂᑦ ᓇᐃᑦᑑᒐᔪᓚᐅᖅᐳᑦ ᐊᒻᒪ ᓇᓗᓇᐃᖅᓯᓪᓗᓂ ᐊᑐᖅᑕᐅᒐᔪᒃᑐᒥ ᖃᐅᑕᒫᒥ ᐊᐅᓚᑕᐅᓂᐅᔪᓄᑦ ᐃᖅᑲᓇᐃᔮᒥᓂᑦ.
ᐊᔾᔨᙳᐊᑦ ᐃᒻᒥᖕᓂᑦ ᐱᒋᐊᕈᑕᐅᔪᓐᓇᖅᐳᖅ ᐅᓂᒃᑳᓄᑦ ᐊᒻᒪ ᐃᖅᑲᐅᒪᓂᐅᔪᓄᑦ, ᐅᖃᓚᐅᖅᐳᖅ ᓯᒥᑦ.
ᐃᓚᖏᑦ ᐃᓯᖅᑐᑦ ᕿᒥᕐᕈᐊᕆᐊᖅᑐᖅᑐᓂ ᐊᔾᔨᙳᐊᓂ ᐃᑲᕐᕋᒐᓵᓗᖕᓂ ᕿᒥᕐᕈᐊᖅᖢᑎᒃ ᐊᔾᔨᙳᐊᓂᑦ, ᐅᖃᓚᐅᖅᐳᖅ.
ᒫᓐᓇᓕᓴᒥ ᑕᑯᒃᓴᐅᑎᑕᐅᓂᐅᔪᒥ ᐃᖃᓗᖕᓂ, ᐊᔾᔨᙳᐊᖑᔪᒥ ᓂᕕᔅᓴᓐᓇᕐᒥ, ᖃᐅᔨᒪᔭᐅᒐᔪᒃᑐᒥ ᓲᕙᓚᐃᒥ, ᐃᓕᓴᕆᔭᐅᓚᐅᖅᐳᖅ ᐅᐸᒃᓯᒪᔪᒧᑦ ᑭᖑᕚᕆᔭᖓᓐᓂ.
ᓲᕙᓚᐃ, ᐃᒃᐱᒋᔭᐅᑦᑎᐊᖅᑐᒥ ᐃᓅᓪᓗᓂ ᐃᒡᓗᓕᒑᕐᔪᖕᒥᐅᑕᖅ ᐊᐃᑉᐸᖃᓚᐅᖅᐳᖅ ᑳᑉᑕᓐ ᔪᐊᔾ ᑰᒧᕐᒧᑦ, ᐊᒥᐊᓕᑲᒥᐅᑕᖅ ᕿᓚᓗᒐᕋᓱᖕᓂᕐᒧᑦ ᑳᑉᑕᐅᓪᓗᓂ ᐅᑭᐅᓂᑦ 14−ᓂ ᖃᑎᒃᑕᓕᖕᒥ 1900 ᐱᒋᐊᕐᓂᖏᓐᓂ.
ᑰᒧᕐ ᕿᒪᒃᓯᒐᒥ ᐅᑭᐅᖅᑕᖅᑐᒥ, ᓇᒃᓴᓚᐅᖅᐳᖅ ᓂᕕᔅᓴᓐᓇᐅᑉ ᐊᒪᐅᑎᖓᓂ ᔫᓇᐃᑎᑦ ᔅᑕᐃᑦᔅᓄᑦ. ᐃᓂᖃᖅᐳᖅ ᑕᑯᓐᓇᒐᖃᕐᕕᖕᒥ ᓄᓇᒥᙶᖅᑐᓂ ᑕᐃᔅᓱᒪᓂᐅᓚᐅᖅᑐᒥ ᓂᐅ ᔪᐊᒃᒥ.
ᑕᐃᔅᓱᒪᓂᑐᖃᕐᒥ ᐊᔾᔨᙳᐊᑦ ᐱᒋᔭᐅᕗᑦ ᐃᓄᓕᒫᓄᑦ, ᐅᖃᓚᐅᖅᐳᖅ.
"ᐱᒻᒪᕆᕐᔪᐊᖑᓇᓱᒋᕙᕋ ᐊᓯᓄᑦ ᑕᑯᒃᓴᐅᑎᑕᐅᓂᖏᓐᓂ ᐊᒻᒪ ᑐᑭᓯᓂᕐᒧᑦ ᐃᓄᒃ ᑕᐃᓐᓇ ᐊᔾᔨᓕᐅᕆᓚᐅᖅᑐᖅ ᓇᖕᒥᓂᖃᙱᓐᓂᖓᓂ ᐊᔾᔨᙳᐊᒥᑦ," ᐅᖃᓚᐅᖅᐳᖅ.