ᖃᐅᔨᒋᐅᕈᓯᕆᓐᓂᕐᒪᒍ ᐃᓄᒃᑎᑐᑦ ᑎᑎᕋᕆᐅᖅᓴᓪᓗᓂ ᓄᓇᓯᐊᒥᒃ ᒪᒃᑯᒃᑑᓕᖅᖢᓂ ᑖᓐᓇ ᐊᕐᓇᖅ ᖁᐊᒐᖅ ᐱᑦᓯᐅᓛᖅ ᐊᒃᓱᕉᑎᖃᓕᖅᑐᕕᓂᒃ ᐃᓄᐃᑦ ᐅᖃᐅᓯᖏᓐᓂᒃ ᐃᓄᒃᑎᑐᑦ ᐃᓕᓴᐃᔨᐅᔪᒪᓪᓗᓂ - ᐊᒻᒪᓗ ᒫᓐᓇ ᓯᕗᓪᓕᖅᐹᖑᓪᓗᓂ ᐊᔪᐃᓐᓇᐃᖃᑦᑕᓕᖅᑐᑦ ᓄᑕᖅᑲᓂᒃ ᐃᓄᒃᑎᑐᑦ ᑎᑎᕋᕆᐅᖅᓴᐃᓪᓗᓂ ᐃᓄᒃᑑᓐ ᑎᑎᖅᑭᕆᓂᖅ ᐊᑐᖅᖢᓂᐅᒃ ᐅᖃᓕᒫᒐᓕᐊᕆᔭᐅᓯᒪᔪᓂᒃ ᐃᓕᓴᐃᔪᑎᖃᖅᖢᓂ Inhabit Education-ᑯᓐᓄᑦ.
ᐱᑦᓯᐅᓛᖅ ᐃᑲᔪᖅᓯᒪᖕᒪᑦ ᑲᔪᓯᑎᑦᑎᖃᑕᐅᓪᓗᓂ ᑖᓱᒥᖓ ᓄᑖᒥᒃ ᐃᓕᓴᐃᔪᑎᒥᒃ, ᐃᓕᓴᐃᔨᐅᓪᓗᓂ ᐊᑐᕐᓂᖃᓪᓗᑐᕐᓂᕋᖅᖢᓂᐅᒃ, ᐱᒋᐊᖅᑎᑕᐅᓚᐅᕐᒪᑦ ᕖᕗᐊᕆᒥ ᕿᑭᖅᑖᓗᒃᒥ ᐃᓕᓴᐃᔩᑦ ᑲᑎᒪᕕᒃᔪᐊᓚᐅᖅᑎᓪᓗᒋᑦ ᐃᖃᓗᖕᓂ.
“ᑕᐃᒪᓐᓇ ᓇᓗᓇᖏᑦᑐᓂᒃ ᐃᓕᓴᐃᔪᑎᖃᖅᖢᓂ ᐊᑐᕐᓂᖃᓪᓗᑐᖅᑐᖅ ᐃᓕᓴᐃᔨᐅᓪᓗᓂ. ᐊᒻᒪᓗ ᐱᔭᕆᑭᒃᑐᓂᒃ ᐃᓕᓴᐃᔪᑎᖃᕐᒪᑕ ᐅᖃᓕᒫᕆᐅᖅᓴᐅᑎᓂᒃ - ᐃᓄᒃᑎᑐᓪᓘᓐᓃᑦ ᖃᐅᔨᒪᖏᑦᑐᓄᑦ ᐊᑐᖅᑕᐅᔪᓐᓇᕐᒪᑦ.”
ᓄᓇᓕᕋᓛᒥ ᐱᕈᖅᓴᓂᑰᓪᓗᓂ ᑕᒃᓯᖅᑑᑉ ᑲᖏᖅᖢᖓᓂ ᑭᒻᒥᕉᑉ ᑭᓐᖓᐅᓪᓗ ᐊᑯᓐᓂᖓᓂ, ᐊᐅᔭᒃᑯᑦ ᐃᖅᑲᓇᐃᔭᓯᒋᐊᖅᑐᕕᓂᑦ ᕼᐊᑦᓴᓐᐸᐃ ᑲᒻᐸᓂᒃᑯᓐᓂ ᐃᓕᓴᖅᖢᓂ ᓱᓕ.
“ᐃᓕᓴᕐᕕᐊᓂ ᐊᖓᔪᖅᑳᖓᓄᑦ ᐅᖃᐅᔾᔭᐅᓐᓂᕐᒪᑦ ᓯᒃᑭᓕᐅᖁᔭᐅᓪᓗᓂ ᓄᓇᓯᐊᒥᐅᑦ ᒐᕙᒪᖓᓄᑦ. ᐊᓱᐃᓛᒃ ᓯᒃᑭᓕᐅᓚᐅᖅᓯᒪᔪᖓ, ᐊᖓᔪᖅᑳᑉ ᕿᒥᕈᓚᐅᖅᖢᓂᐅᒃ ᐅᖃᐅᑎᓐᓂᕐᒪᒍ ᓯᕗᓪᓕᖅᐹᖑᔪᑎᑦ ᑎᑎᕋᕈᓐᓇᖅᑐᑎᑦ Northwest Territories-ᒥᒃ ᓇᖕᒥᓂᖅ ᐊᐱᕆᖏᖢᑎᒃ ᖃᓄᖅ ᑎᑎᕋᖅᑕᐅᓲᖑᖕᒪᖔᑦ,” ᐅᖃᓚᐅᖅᑐᖅ ᐱᑦᓯᐅᓛᖅ.
“ᐊᒃᓱᐊᓗᒃ ᐅᕙᓐᓂᒃ ᐱᒃᑯᒥᒍᓱᓕᓚᐅᖅᑐᖅ ᐃᓕᓴᐃᔨᑭᒃᓴᕐᒪᑕ ᐃᓄᖕᓂᒃ ᑎᑎᕋᑦᑎᐊᕈᓐᓇᖅᑐᓂᒃ.”
ᑖᓐᓇ ᐃᓕᓴᕐᕕᖓᓂ ᐊᖓᔪᖅᑳᖓᑦ ᐅᑎᒃᑲᓐᓂᕋᒥ ᐱᓇᓱᐊᕈᓯᖅ ᓈᑎᓪᓗᒍ ᐅᖃᐅᑎᓕᖅᑕᕕᓂᖓ ᐃᓕᓴᐃᔨᐅᓂᕐᒥᒃ ᐃᖅᑲᓇᐃᔭᖅᑖᖁᓪᓗᓂᐅᒃ.
“ᐊᓱᐃᓛᒃ ᐃᖅᑲᓇᐃᔭᖅᑖᕈᑎᒥᒃ ᑎᑎᕋᓕᓚᐅᖅᓯᒪᔪᖓ ᐊᒻᒪᓗ ᐃᖅᑲᓇᐃᔭᖅᑖᖅᖢᖓ ᐃᓕᓴᕐᕕᖕᒥ ᐃᓕᓴᐃᔨᓄᑦ ᐃᑲᔪᖅᑎᐅᓂᕐᒥᒃ. ᐃᓱᒪᓇᖅᑐᖅ ᐃᒻᒪᖄ ᕗᐊᓯᒥᒨᖓᐅᔭᐅᓚᐅᖅᓯᒪᔪᖓ ᐊᕐᕌᒍᑎᓪᓗᒍ ᑕᖅᑭᓂᒃ ᑕᓪᓕᒪᓂᒃ ᐃᓕᓴᐃᔨᐅᓂᕐᒥᒃ ᐃᓕᓴᕆᐊᖅᑐᖅᖢᖓ, ᐊᑎᕋᒪ ᑭᓐᖓᓄᑦ ᑕᐃᒪᖓᓂᑦ ᐃᓕᓴᐃᔨᐅᓕᓚᐅᖅᑐᖓ,” ᐅᖃᕆᓪᓗᓂ.
ᐱᑦᓯᐅᓛᖅ ᐃᓕᓴᐃᔨᓄᑦ ᐃᑲᔪᖅᑎᐅᓕᓚᐅᖅᑐᖅ ᐸᖕᓂᖅᑑᒥ ᑲᖏᖅᖢᒑᐱᖕᒥᓗ, ᑕᐃᑲᓂ ᐃᓕᓴᐃᔨᓂᒃ ᐃᓇᖏᖅᑎᐅᖃᑦᑕᖅᖢᓂ ᐃᓛᓐᓂᒃᑯᑦ ᐋᓐᓂᐊᓕᕌᖓᑕ.
ᑕᐃᒪᖓᓂ 2004-ᒥᓂᑦ, ᐃᓕᓴᐃᔨᐅᓂᕐᒥᒃ ᓇᓗᓇᐃᒃᑯᑕᖅᑖᓚᐅᖅᖢᓂ, ᐃᖅᑲᓇᐃᔭᖅᑖᓚᐅᖅᓯᒪᔪᖅ ᔫᒥ ᐃᓕᓴᕐᕕᐊᓂ ᐃᖃᓗᖕᓂ.
ᒫᓐᓇ ᐱᑦᓯᐅᓛᖅ ᐃᓕᓴᐃᖃᑦᑕᕐᒪᑦ ᐃᓄᒃᑎᑐᑦ ᑎᑎᕋᕆᐅᖅᓴᕐᓂᕐᒥᒃ ᐅᖃᓕᒫᕆᐅᖅᓴᕐᓂᕐᒥᒃᓗ ᐃᓕᓴᓯᒋᐊᓕᖅᑐᓂᒃ ᐅᓪᓛᒃᑯᑦ, ᒍᕇᑦ 3 ᐊᒻᒪᓗ 4-ᒦᑦᑐᓂᒃ ᐅᓐᓄᒃᓴᒃᑯᑦ. ᐅᓂᒃᑳᕆᓪᓗᓂ ᒍᕇᑦ 4-ᒨᕌᖓᑕ ᒪᕐᕈᐃᓕᖓᔪᓂᒃ ᐅᖃᐅᓯᕐᓂᒃ ᐃᓕᓴᖅᑕᐅᓕᖃᑦᑕᕐᒪᑕ, ᐅᓪᓛᒃᑯᑦ ᖃᓪᓗᓈᑎᑑᓕᖃᑦᑕᖅᑐᑦ. ᐊᒻᒪᓗ ᐅᓪᓗᕈᒻᒥᑕᕐᓇᕐᒥ ᓴᐸᖓᓕᕆᓂᕐᒥᒃ ᐃᓕᓴᐃᕙᒃᖢᓂ ᑕᒪᐃᓐᓂᒃ ᒍᕇᑦᖃᖅᑐᓂᒃ ᐃᓕᓴᕈᒪᔪᓂᒃ ᐃᓄᒃᑎᑐᑦ.
ᓯᕗᓪᓕᖅᐹᒥ ᐃᓕᓴᓯᒋᐊᖅᑐᓂ ᑭᓐᑐᒑᑕᒥ ᐃᓕᓴᖅᑏᑦ 8 ᐃᓕᓴᖅᑕᖏᑦ ᐱᖓᓱᑦ ᐃᓄᒃᑎᑐᑦ ᐅᖃᓪᓚᑦᑎᐊᕈᓐᓇᖅᑐᑦ, ᑕᓪᓕᒪᐃᑦ ᖃᓪᓗᓈᑎᑑᑦᑎᐊᕈᓐᓇᖅᖢᑎᒃ ᐃᓄᒃᑎᑐᒃ ᑐᑭᓯᐊᖏᑦᑐᑦ.
“ᐅᖃᓪᓚᒃᕕᒋᕙᒃᖢᒋᑦ ᐃᓄᒃᑎᑐᑦ ᓯᕗᓪᓕᖅᐹᒥ ᐊᒻᒪᓗ ᖃᓄᖅ ᑐᑭᖃᕐᒪᖔᑕ ᐅᖃᐅᑎᕙᒃᖢᒋᑦ ᐃᓕᓴᖅᑕᖏᓐᓂᒃ ᖃᓪᓗᓈᑎᑑᖅᑐᖅ ᐱᖅᑳᖃᑦᑕᖅᑕᒃᑲ ᓇᓗᓗᐊᖃᑦᑕᕐᒪᑕ ᐃᓄᒃᑎᑐᒃ ᑐᑭᓯᐊᖏᖢᑎᒃ, ᐊᒻᒪᓗ ᐃᓅᖃᑎᒌᒍᓯᕐᓂᒃ ᖃᐅᔨᒪᓗᐊᖃᑦᑕᖏᖢᑎᒃ.” ᐅᓂᒃᑳᕆᓪᓗᓂ.
ᐅᑭᐅᖅ ᐃᓱᓕᑎᓪᓗᒍ ᐃᓕᓴᖅᑎᑕᕕᓂᒃᑲ, ᖃᓪᓗᓈᑎᑐᑐᐊᖅ ᖃᐅᔨᒪᓚᐅᖅᑐᑦ ᐃᓄᒃᑎᑐᑦ ᑐᑭᓯᐊᓕᖃᑦᑕᖅᑐᑦ, ᑭᓯᐊᓂᓕ ᐊᖓᔪᖅᑳᖏᑦᑕᐅᖅ ᐊᖏᕐᕋᖏᓐᓂ ᐅᖃᓪᓚᒃᕕᐅᖃᑦᑕᕈᑎᒃ ᐊᔪᕈᓐᓃᓵᓕᖃᑦᑕᕐᒪᑕ.
“ᐅᖃᐅᑎᖃᑦᑕᖅᑕᒃᑲ, ᐃᓄᒃᑎᑐᑦ ᐊᖏᕐᕋᒥ ᐅᖃᓪᓚᖃᑦᑕᖏᑉᐸᑕ ᓱᒃᑲᐃᓐᓂᖅᓴᐅᖃᑦᑕᖅᑐᑦ ᐃᓄᒃᑎᑐᑦ ᐃᓕᓴᕈᓯᖏᑦ ᐊᑕᐅᓯᕐᒥᒃ ᐃᓄᒃᑎᑐᑦ ᐃᓕᓴᐃᔨᖃᕐᒪᑕ ᐃᑲᔪᖅᑕᐅᒋᐊᓕᖕᒥᒃ ᐊᖓᔪᖅᑳᖑᔪᓄᑦ.” ᐅᖃᕆᓪᓗᓂ, “ᐃᓄᒃᑎᑐᑦ ᐅᖃᓪᓚᒃᑐᓂᒃ ᐊᖏᕐᕋᒥᓂ ᓈᓚᖃᑦᑕᕆᐊᖃᕐᒪᑕ.”
ᒍᕇᑦ 3-ᒥ 4-ᒥᓗ ᐃᓕᓴᖅᑏᑦ, ᐃᓄᒃᑎᑐᑦ ᐃᓕᓴᖅᓯᒪᓕᖅᑐᖅ ᐱᒋᐊᖓᓚᐅᕈᓯᕐᒥᓂᑦ, ᐃᓚᖏᑦ ᐊᔪᖏᑦᑎᐊᓕᖃᖅᑕᖅᑐᑦ ᐃᓄᒃᑎᑐᑦ ᑭᓯᐊᓂᓕ ᐃᓚᖏᑦ ᐅᖃᐅᓯᕐᒥᓂᒃ ᐊᓯᐅᔨᕙᓪᓕᐊᓕᖅᑐᑦ.
ᐅᖃᕆᓪᓗᓂ ᓇᖕᒥᓂᖅ ᐸᓂᖓᑦᑕᐅᖅ, ᑕᒪᐅᖓ ᓄᒃᑎᖅᓯᒪᓕᖅᑎᓪᓗᒋᑦ ᑭᓐᖓᓂᑦ ᐃᖃᓗᖕᓄᑦ, ᖃᓪᓗᓈᑎᑐᑦ ᐅᖃᓪᓚᒍᓐᓇᓚᐅᖏᒻᒪᑕ.
“ᑕᒪᐅᖓ ᑎᑭᑐᐊᕋᑦᑕ, ᒪᕐᕉᖕᓂ ᐱᖓᓱᓂᓘᓐᓃᑦ ᐱᓇᓱᐊᕈᓯᕐᓂ ᖃᓪᓗᓇᐅᔭᖅᑐᓂᒃ ᐃᔾᔪᐊᖅᓯᔪᓐᓇᖅᓯᓚᐅᖅᑐᖅ ᔮᑭᑎᔮᒃᐸᒃᖢᓂ ᖃᓪᓗᓈᑎᑐᑦ.”
ᐱᑦᓯᐅᓛᖅ ᐅᖃᕆᓪᓗᓂ ᑕᐃᒪᖓᓂᒎᖅ ᕿᓚᓈᖏᓐᓇᐅᔭᕋᒥ ᖃᖓᓕᑭᐊᖅ ᐃᓄᒃᑎᑐᑐᐊᖅ ᐃᓕᓴᕐᕕᖃᓕᕈᒫᖅᐸᑦ. ᐅᖃᕆᓪᓗᓂ ᑕᑯᓪᓗᒋᑦ ᐃᓄᑯᓗᐃᑦ ᐃᓄᒃᑎᑐᑦ ᐅᖃᓪᓚᒍᓐᓇᖏᑦᑐᑦ ᐋᓐᓂᕐᓇᕐᒪᑦ.
ᐅᖃᕆᓪᓗᓂ ᑕᒫᓂ ᓄᓇᓕᐸᐅᔭᑦᑎᓐᓂ ᐊᔪᓕᖅᐸᓪᓕᐊᔪᑦ.
“ᐃᓕᓴᐃᔨᖃᐅᒃᑲᓐᓂᕈᑦᑕ ᐃᓄᒃᑎᑐᑦ ᐅᖃᓪᓚᒍᓐᓇᖅᑐᓂᒃ. ᖃᓪᓗᓈᑎᑐᑦ ᐃᓕᓴᐃᔨᐅᒐᓗᐊᕐᓗᑎᒃ, ᐃᑲᔪᕋᔭᕐᒪᑦ ᐃᓄᒃᑎᑑᕈᓐᓇᖅᐸᑕ. ᒪᕐᕉᖕᓂᒃ ᐅᖃᐅᓯᖃᖅᖢᓂ, ᐃᓕᓴᐃᔪᓐᓇᕐᓇᕐᒪᑦ ᒪᕐᕉᖕᓂᒃ ᐅᖃᐅᓰᖕᓂᒃ ᐊᑕᐅᑦᑎᒃᑯᑦ,” ᐱᑦᓯᐅᓛᖅ ᐅᖃᕆᓪᓗᓂ.
“ᐊᔪᐃᓐᓇᖃᑦᑕᖅᑕᒃᑲ ᑕᐃᒪ ᓄᑕᕋᑯᓗᐃᑦ ᒪᕐᕉᖕᓂᒃ ᐅᖃᓪᓚᒍᓐᓇᖁᓪᓗᒋᑦ ᑕᐃᒪᓐᓇ ᐃᓐᓇᕈᕈᑎᒃ ᐃᖅᑲᓇᐃᔭᖅᑖᕈᓐᓇᕐᓂᐊᕐᒪᑕ. ᐅᖃᐅᑏᓐᓇᖃᑦᑕᖅᑕᒃᑲ ᑕᐃᒪᖓᓂᑦ ᐃᓕᓴᐃᓐᓇᓚᖓᔪᓯ ᐃᓅᓯᓕᒪᓯᓐᓂ. ᐊᒻᒪᓗ ᐃᓕᓴᐃᔨᐅᓕᖅᑐᑦ ᑕᐃᒪᖓᓂᑦ ᐃᓕᓴᐃᓐᓇᕆᐊᓖᑦ ᓱᓕᒃᑲᓐᓂᖅ. ᑕᒪᓐᓇ ᐃᒻᒥᒃᑰᖅᖢᓂ ᐊᑐᕐᓂᖃᓪᓗᑐᖅᑐᖅ.”
ᑭᓯᐊᓂᓕ, ᑭᖑᓪᓕᖅᐹᒥ, ᐅᖃᕆᓪᓗᓂ ᐱᑦᓯᐅᓛᖅ, ᓄᓇᕗᒥᐅᑦ ᐃᓄᒃᑎᑐᒃ ᐅᖃᓪᓚᒍᓐᓇᖅᑐᓂᒃ ᐃᓕᓴᐃᔨᖃᕆᐊᖃᕐᒪᑕ ᐃᓕᓴᖅᑎᖁᑎᖃᖅᑐᓪᓗ ᐃᓄᒃᑎᑐᑦ ᖃᐅᔨᒪᔪᒃᓴᐅᓪᓗᑎᒃ ᐊᖏᕐᕋᒥᓂ ᐅᖃᓪᓚᒍᓐᓇᕐᓗᑎᒃ ᐃᓄᒃᑎᑐᑦ.