Skip to content

ᐱᙳᐊᕆᐊᓕᖅᑐᑦ ᑲᖏᖅᖠᓂᕐᒥ

200-ᖃᔭᑦ Hᐊᑭᖅᑏᑦ Hᐊᑭᕐᓂᒃᑯᑦ ᐱᒋᐊᖅᑎᑕᐅᓚᐅᖅᑐᑦ ᑲᖏᖅᖠᓂᕐᒥ ᐅᑐᐱᕆ 14-ᒥ 19-ᒧᑦ.
ᓯᐊᕐᕆᔮᕐᓂᕐᒥᒃ ᐃᓕᓐᓂᐊᖅᑎᑕᐅᑉᓗᑎᒃ, ᑕᒪᓐᓇ ᐅᑭᐅᖅᑕᖅᑐᒥ ᓵᓚᒃᓴᕈᑕᐅᖃᑦᑕᖅᑐᒃᑯᑦ ᓵᓚᒃᓴᖅᑎᑕᐅᓚᐅᖅᑐᖅ ᐃᓕᓐᓂᐊᕈᑕᐅᓚᐅᕐᒥᔪᖅ ᐅᖃᐅᓯᓕᕆᓂᒃᑯᑦ ᓇᖕᒥᓂᕐᓗ ᐱᕈᖅᐸᓪᓕᐊᔪᓐᓇᕐᓂᒃᑯᑦ, ᓄᓇᒥ ᐃᓕᓐᓂᐊᖅᑎᑕᐅᑉᓗᑎᒃ, ᓂᕆᑦᑎᐊᔪᓴᕐᓂᕐᒥᒃ ᐃᓕᓐᓂᐊᖅᑎᑕᐅᑉᓗᑎᒃ ᐊᒻᒪᓗ Hᐊᑭᕐᓂᒃᑯᑦ ᐱᕙᓪᓕᐊᑎᑕᐅᑉᓗᑎᒃ.
ᐃᓕᓐᓂᐊᖅᑐᑦ ᐊᔾᔨᒌᙱᑦᑑᑕᐅᔪᓂᒃ ᐅᑭᐅᓖᑦ ᐊᕕᒃᑐᖅᓯᒪᔪᒃᑯᑦ ᐃᓕᓐᓂᐊᖅᑎᑕᐅᓚᐅᖅᑐᑦ ᓄᑲᑉᐱᐊᑦ ᓂᕕᐊᖅᓵᓪᓗ ᐱᙳᐊᖅᑏᑦ ᐊᒻᒪᓗ ᓯᕗᓕᖅᑏᑦ.
ᑕᒪᑐᒥᙵ Hᐊᑭᕐᓂᒃᑯᑦ ᐃᓕᓐᓂᐊᕈᑎᒥᒃ ᐱᕙᓪᓕᐊᑎᑦᑎᔨ ᐊᒻᒪᓗ Hᐊᑭᕐᓂᒃᑯᑦ ᐃᓕᓐᓂᐊᖅᑎᑦᑎᔨ ᑕᐃᕕᑎ ᑲᓛᒃ ᐅᖃᓚᐅᖅᑐᖅ ᐃᓚᐅᓂᐊᖅᑐᒡᒎᖅ ᐃᓚᕚᓪᓕᖅᓯᒪᓚᐅᖅᑐᑦ ᐅᐱᓐᓇᖅᑐᒃᑯᑦ ᑕᒡᕙᓂ ᐅᑭᐅᒥ, ᐱᓗᐊᖅᑐᒥ ᓄᑲᖅᖠᐅᓂᖅᓴᑦ.
ᐅᖃᖅᖢᓂ ᓄᑲᖅᖠᐅᓂᖅᓴᒡᒎᖅ ᐃᓚᕚᓪᓕᓚᐅᖅᑐᑦ 30-ᓄᑦ.
"ᐅᖃᕈᓐᓇᖅᑐᖓ ᑕᒪᕐᒥᒃ ᓄᑕᖅᑲᑦ ᐱᕚᓪᓕᖅᓯᒪᖕᒪᑕ ᑕᒡᕘᓇ ᐃᓕᓐᓂᐊᕐᓂᒃᑯᑦ, ᑭᓯᐊᓂ ᐅᔾᔨᕐᓇᕐᓂᖅᓴᐅᖃᑦᑕᖅᑐᖅ ᓄᑲᖅᖠᐅᔪᒃᑯᑦ," ᑕᐃᒪᓐᓇ ᐅᖃᖅᖢᓂ. "ᐃᓕᓐᓂᐊᖅᑐᖃᓚᐅᖅᑐᖅ ᓯᕗᓪᓕᖅᐹᒥ ᐅᑉᓗᕐᒥ ᓯᐊᕐᕆᔮᕈᓐᓇᙱᑦᑐᓂᒡᓘᓐᓃᑦ, ᐊᒻᒪᓗ ᐊᔪᕈᓐᓃᑦᑎᐊᖅᖢᑎᒃ ᐃᓕᓐᓂᐊᕌᓂᓕᖅᑎᓪᓗᒋᑦ."
ᐊᒥᓱᑦ ᐊᓯᖏᓐᓂᒃ ᓄᓇᓕᖕᓂᕐᒥᐅᑕᑦ ᑎᑭᓯᒪᓚᐅᕐᒥᔪᑦ ᐃᓕᓐᓂᐊᕆᐊᖅᖢᑎᒃ. ᑲᖏᖅᖠᓂᓕᐊᕐᓂᐊᕐᓗᑎᒃ ᐃᖕᒥᓂᒃ ᐊᑭᓖᔭᕆᐊᖃᓚᐅᖅᑐᑦ ᑭᓯᐊᓂ ᐃᓕᓐᓂᐊᕐᓂᒃᑯᑦ ᐊᑭᓖᔭᕆᐊᖃᙱᖦᖢᑎᒃ.
"ᐊᕙᑏᑦ ᑲᑎᖦᖢᒋᑦ ᐃᓕᓐᓂᐊᖅᑎᑦᑎᔪᑦ ᐊᒻᒪᓗ ᐊᐅᓪᓛᖅᑎᑦᑎᔪᑦ ᐃᓕᓐᓂᐊᕈᑎᒥᒃ, 30-ᓄᑦ ᐃᓚᒋᐊᖅᓯᒪᓚᐅᖅᑐᑦ ᐅᖃᐅᓯᓕᕆᓂᒃᑯᑦ ᐃᓕᓐᓂᐊᖅᑎᑦᑎᔪᖃᖅᑎᓪᓗᒍ, ᐃᒐᔩᓪᓗ ᐊᒻᒪᓗ ᑕᒪᕐᒥᒃ ᓴᓇᔪᑦ ᑕᒡᕙᓂ ᐱᓇᓱᐊᕈᓯᐅᓚᐅᖅᑐᒥ," ᑕᐃᒪᓐᓇ ᐅᖃᖅᖢᓂ ᑲᓛᒃ.
ᐊᑐᓂ ᐊᕕᒃᑐᖅᓯᒪᔪᑦ ᐃᓕᓐᓂᐊᖅᑐᑦ ᐊᑕᐅᓯᕐᒥᒃ ᐃᑲᕐᕋᒥᒃ ᐅᑉᓗᕈᒥᑕᖃᑦᑕᓚᐅᖅᑐᑦ ᐱᙳᐊᕐᕕᖕᒥ, ᓂᕿᓕᐅᖅᑕᐅᓯᒪᕙᒃᖢᑎᒃ ᑭᓕ ᑲᓛᒃ - ᓕᓐᑎᐅᒧᑦ ᐃᑲᔪᖅᑎᖏᓐᓄᓪᓗ.
ᐃᑐᕆᔮᓇ ᑯᓱᒐᖅ, ᓗᐊᕋ ᒥᐅᕆᑦ ᐊᒻᒪᓗ ᓵᓐᑏ ᑎᐊᔅ ᐅᖃᐅᓯᓕᕆᓂᒃᑯᑦ ᐃᓕᓐᓂᐊᖅᑎᑦᑎᔨᐅᓚᐅᖅᑐᑦ, ᐸᓐᓂᐅᖅ ᖃᕆᑕᖅ ᓄᓇᒥ ᐃᓕᓐᓂᐊᖅᑎᑦᑎᕙᒃᖢᓂ, ᑕᐃᒪᓐᓇ ᐅᖃᖅᖢᓂ ᑲᓛᒃ.
ᐃᓕᓐᓂᐊᕐᓂᐅᔪᖅ ᐊᐅᓪᓛᑦᑎᐊᖅᑐᒻᒪᕆᐊᓘᓚᐅᖅᑐᖅ ᐊᒻᒪᓗ ᑲᓛᒃ ᐅᖃᖅᖢᓂ ᐅᑉᓗᕈᒥᑕᖅᑎᖃᑦᑕᖅᖢᒋᒡᒎᖅ ᐃᓕᓐᓂᖅᑐᑦ ᐱᕚᓪᓕᕈᑕᐅᓪᓚᕆᓚᐅᖅᑐᖅ.
"ᓄᖅᑲᕈᓐᓇᓚᐅᙱᑦᑐᑦ ᐅᑉᓛᒃᑯᑦ ᐱᒋᐊᖅᑎᓪᓗᒋᑦ ᐅᑉᓘᑉ ᐃᓱᓕᕝᕕᖓᓄᑦ," ᑕᐃᒪᓐᓇ ᐅᖃᖅᖢᓂ.
ᑲᓛᒃ ᐅᖃᖅᖢᓂ ᖃᐅᔨᒋᐊᖏᓐᓇᖃᑦᑕᖅᑐᕉᖅ ᓯᕗᓕᖅᑎᒋᔭᐅᓚᐅᖅᑐᓂᒃ ᓱᓇᑦ ᐊᐅᓪᓛᑦᑎᐊᓚᐅᕐᒪᖔᑕ ᐊᒻᒪᓗ ᓇᐅᒃᑯᑦ ᐋᖅᑭᒋᐊᕆᐊᖃᕐᒪᖔᑦ ᐃᓕᓐᓂᐊᕈᑎ.
ᐅᖃᖅᖢᓂ ᑕᑯᒋᐊᖏᓐᓇᖃᑦᑕᖅᑐᕉᖅ ᐃᓕᓐᓂᐊᕈᑕᐅᔪᒥᒃ ᐊᐅᓪᓛᑦᑎᐊᒃᑲᓐᓂᓕᕈᓐᓇᖁᑉᓗᒍ.
ᑲᓛᒃ ᐅᖃᖅᖢᓂ ᐃᓕᓐᓂᐊᖅᑎᑦᑎᓂᐊᕐᒪᑦ ᑕᐃᒪᓐᓇᕐᓚᒃ ᐃᓕᓐᓂᐊᕈᑎᒥᒃ ᒪᕐᕉᒃᑲᓐᓂᕐᓂᒃ ᓄᓇᓕᖕᓂ ᑭᕙᓪᓕᕐᒥ ᑕᒡᕙᓂ ᐅᑭᐅᒥ. ᑕᐃᒪᐃᓕᐅᖅᑎᑦᑎᔪᒪᔪᖅ ᖃᒪᓂ'ᑐᕐᒥ ᓄᕕᐱᕆᐅᑉ ᓄᙳᐊᓂ ᓯᐊᕐᕆᔮᕐᕕᖓ ᐋᖅᑭᐅᒪᓕᖅᐸᑦ ᐊᒻᒪᓗ ᐊᕐᕕᐊᓂ ᑎᓯᐱᕆᐅᑉ ᐱᒋᐊᕐᕕᖓᓂ.