Skip to content

ᐱᔭᒃᓴᖃᕐᔪᐊᖅᑐᖅ ᐃᖃᓗᖕᓂ ᑎᑎᖅᑲᒃᑯᕕᒃ ᐊᒃᑐᖅᓯᔾᔮᙱᓚᖅ ᑎᑎᖅᑲᓂᖅ ᕼᐋᒻᓚᓄᑦ

ᖁᕕᐊᓱᒡᕕᖕᒧᐊᖅᐸᓪᓕᐊᓪᓗᑎᒃ ᓄᓇᕗᒻᒥ ᐊᓂᑦᑕᐃᓕᒪᓂᖃᓚᐅᖅᑎᓪᓗᒍ ᐃᖅᑲᐅᒪᔭᐅᓪᓗᓂ ᐃᓄᖕᓂ ᐃᖅᑲᐅᒪᓂᕆᔭᖏᓐᓂ, ᐃᖃᓗᖕᓂ ᑎᑎᖅᑲᒃᑯᕕᖓ ᐱᔭᒃᓴᖃᕐᔪᐊᖅᓯᒪᕗᖅ, ᐊᒥᓱᐊᓗᖕᓂ ᑐᔫᓯᐊᓂᑦ ᐊᒻᒪᓗ ᑕᑭᔪᐊᓗᖕᓂ ᐅᑕᖅᑭᔪᓄᑦ ᑎᑎᖅᑲᒃᑯᕕᐅᑉ ᐃᓂᓪᓗᐊᑕᖓᓂ.

ᐅᓄᖅᓯᒋᐊᖅᑐᓂ ᓇᒃᓯᐅᔾᔪᓯᐊᓂ ᐅᓄᕐᓂᖏᓐᓂ ᖁᕕᐊᓱᒡᕕᙳᓕᒑᓂᖓᓂ ᐊᒻᒪᓗ ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ, ᑕᐃᒃᑯᐊ ᐅᑕᖅᑭᔪᑦ ᐃᖃᓗᖕᓂ ᑎᑎᖅᑲᒃᑯᕕᖓᓂ ᓯᓚᒥ ᐅᑕᖅᑭᔭᕆᐊᖃᒐᔪᒃᐳᑦ.

"ᐃᖃᓗᖕᓂ ᑎᑎᖅᑲᒃᑯᕕᖓ ᐱᔭᒃᓴᖃᐃᓐᓇᐅᔭᓛᖑᑎᓪᓗᒍ ᑎᑎᖅᑲᒃᑯᕕᖕᓂ ᑲᓇᑕᒥ, ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ ᐊᒻᒪ ᒪᓕᒃᑐᒥ ᖁᕝᕙᕆᐊᕐᓂᐅᔪᒥ ᖃᕋᓴᐅᔭᑎᒍᑦ–ᓂᐅᕕᕋᕐᓂᐅᔪᒥ ᐅᓄᖅᓯᒋᐊᖅᓯᒪᑎᓪᓗᒍ ᑐᔫᓯᐊᓂᑦ ᐅᓄᕐᓂᖏᓐᓂ ᓂᕆᐅᒋᓚᐅᙱᑦᑎᐊᖅᑕᑦᑎᓐᓂ," ᐅᖃᓚᐅᖅᐳᖅ ᑕᐃᔪᓪ ᓚᑲᓕᐊᕐ, ᑐᑭᒧᐊᒃᑎᑦᑎᔨ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᑲᓇᑕᒥ ᑎᑎᖅᑲᓐᓂᐊᕐᕕᖓᓂ.

ᓚᑲᓕᐊᕐ ᐃᓚᒋᐊᖅᓯᕗᖅ ᐊᓯᔾᔨᕐᓂᖃᖅᓯᒪᖕᒥᖕᒪᑦ ᑎᑎᖅᑲᕐᓂᐊᕐᕕᖕᒥ ᐊᐅᓚᑕᐅᓂᖏᓐᓂ ᐊᒻᒪᓗ ᕿᒥᕐᕈᐃᓐᓇᖅᐳᑦ ᓯᕗᓂᒃᓴᒧᑦ ᐊᓯᔾᔨᕐᓂᐅᓂᐊᖅᑐᓄᑦ, ᐃᓚᖃᖅᑐᒥ ᐅᓄᕐᓂᖅᓴᓂ ᐃᖅᑲᓇᐃᔮᖅᑎᑖᕐᓂᕐᓄᑦ.

"ᐊᖏᖅᓯᒪᓂᖃᖅᐳᒍᑦ ᕿᒥᕐᕈᓂᕐᒧᑦ ᑕᒪᐃᑎᒍᑦ ᐅᓂᒃᑳᕆᓯᒪᑦᑎᐊᕐᓂᖓᓂ ᐊᐅᓚᑕᐅᓂᖏᓐᓂ ᑭᐅᓂᕐᒧᑦ ᐱᔭᕆᐊᖃᕐᓂᐅᔪᓄᑦ ᓄᓇᓕᐸᐅᔭᐅᑉ ᖁᑦᑎᖕᓂᖓᓂ ᐊᖏᓂᖓᓂ ᐱᕈᖅᐸᓪᓕᐊᓂᖓᓂ."

ᐃᖃᓗᖕᓂ ᑎᑎᖅᑲᒃᑯᕕᖓ ᐅᖓᕙᕆᐊᖅᓯᓯᒪᕗᑦ ᐃᑲᕐᕋᖏᓐᓂ ᖁᕕᐊᓱᒡᕕᐅᑉ ᑕᖅᑭᖓᓂ ᑕᐃᑯᖓ ᑎᓯᐱᕆ 23–ᒧᑦ ᐃᑲᔪᕐᓂᕐᒧᑦ ᑭᐅᒪᓂᕐᒧᑦ ᐱᔭᕆᐊᖃᕐᓂᐅᔪᒥ ᐊᒥᓱᒻᒪᕆᐊᓗᖕᓂ ᑐᔫᓯᐊᓂᒃ ᑎᑭᑉᐸᓪᓕᐊᔪᓄᑦ.

ᒪᑐᐃᖓᕙᒃᐳᑦ ᓇᒡᒐᔾᔭᐅᒥ ᐅᓪᓗᑐᐃᓐᓇᕐᒧᑦ 8:30 ᐅᓪᓛᒃᑯᑦ 9 ᐅᓐᓄᒃᑯᑦ ᑭᖑᓪᓕᖅᐹᖑᔪᓂ ᐃᑲᕐᕋᓂ ᐱᖓᓱᓂ ᑐᔫᓯᐊᓄᑐᐊᖅ ᐊᐃᒃᓯᕐᓂᐅᔪᒧᑦ ᐊᒻᒪᓗ ᑎᑎᖅᑲᕐᓂᐊᕐᕕᖓᓄᑦ ᓄᑖᙳᕆᐊᖅᑎᑦᑎᓂᐅᔪᒧᑦ. ᒪᑐᐃᖓᖃᑦᑕᕆᕗᑦ ᓯᕙᑖᕐᕕᖕᒥ 1 –ᒥ 5 ᐅᓐᓄᒧᑦ ᑭᓯᐊᓂᑦᑕᐅᖅ ᑐᔫᓯᐊᓄᑐᐊᖅ ᐊᐃᒃᓯᕐᓂᐅᔪᒧᑦ ᐊᒻᒪᓗ ᑎᑎᖅᑲᕐᓂᐊᕐᕕᖓᓄᑦ ᓄᑖᙳᕆᐊᖅᑎᑦᑎᓂᐅᔪᒧᑦ.

ᐃᖃᓗᖕᓂ ᑎᑎᖅᑲᒃᑯᕕᖓ ᐱᔭᒃᓴᖃᕐᓂᖅᓴᐅᒐᓗᐊᖅᑎᓪᓗᒍ ᑕᐃᒪᐃᒐᔪᖕᓂᖓᓂ, ᓚᑲᓕᐊᕐ ᐅᖃᖅᐳᖅ ᐅᓇ ᐊᒃᑐᐃᓂᖃᔾᔮᙱᓚᖅ ᑎᑎᖅᑲᓂᑦ ᓄᓇᓕᐸᐅᔭᒃᑰᓲᓂ ᑕᒪᕐᒥᒐᓚᖕᓄᑦ ᕼᐋᒻᓚᐅᔪᓄᑦ ᕿᑭᖅᑕᓂ ᐊᕕᒃᑐᖅᓯᒪᓂᐅᔪᒥ.

"ᑲᑎᙵᓂᕆᔭᕗᑦ ᐊᒃᓱᕈᖅᖢᑎᒃ ᐱᓕᕆᕗᑦ ᐊᒻᒪᓗ ᐅᐱᐅᖅᑲᕗᒍᑦ ᐱᔨᑦᑎᕋᕐᓂᕐᒧᑦ ᐃᓄᖕᓄᑦ ᓄᓇᕗᒻᒥ. ᖁᔭᓕᕗᒍᑦ ᐱᓕᕆᔾᔪᔾᔨᕙᒃᑕᑦᑎᓐᓄᑦ ᕿᓄᐃᓵᕐᓂᖏᓐᓄᑦ ᐊᒻᒪ ᐃᑲᔪᖅᓱᐃᓂᖏᓐᓂ," ᐅᖃᓚᐅᖅᐳᖅ ᓚᑲᓕᐊᕐ.