ᑕᒪᓐᓇ ᐅᓂᑉᑳᖅᑐᐊᑦᑎᐊᕙᒻᒪᕆᐊᓗᒃ ᕙᓕᐹᖅᑏᑦ ᓵᓚᒃᓴᓚᐅᖅᑎᓪᓗᒋᑦ ᑕᒪᓐᓇ ᐅᖃᐅᓯᐅᔪᓐᓇᖅᑐᖅ ᕕᒃᑐᐊᕆᔭ ᖃᑯᖅᑎᓐᓂᕐᒧᑦ ᐊᒻᒪᓗ ᑎᑭᕋᕐᔪᐊᕐᒥᐅᑦ ᐱᙳᐊᖅᑎᖏᓐᓄᑦ.
ᖃᑯᖅᑎᓐᓂᖅ ᑲᖏᖅᖠᓂᕐᒥᐅᑕᒃᓴᔭᖅ, ᑲᖏᖅᖠᓂᕐᒦᓚᐅᖅᑐᖅ ᐃᓕᓐᓂᐊᖅᑎᑦᑎᔭᖅᑐᖅᖢᓂ ᒥᖅᓱᕐᓂᕐᒥᒃ ᐊᒻᒪᓗ ᐅᑕᖅᑭᑉᓗᓂ ᐃᖃᓗᖕᒥᐅᑕᓂᒃ ᐱᙳᐊᖃᑎᒋᕙᒃᑕᖏᓐᓂᒃ.
ᖁᕕᐊᓱᓚᐅᙱᑦᑐᖅ ᑎᖕᒥᓲᖅ ᐃᖃᓗᖕᓂᙶᖅᑐᖅ ᒥᑦᑐᓐᓇᙱᒻᒪᑦ, ᓄᕕᐱᕆ 23-ᒥ.
ᖃᑯᖅᑎᓐᓂᖅ ᐱᙳᐊᖃᑎᖃᖃᑦᑕᖅᓯᒪᓂᑯ ᑲᖏᖅᖠᓂᕐᒥᐅᓂᒃ Fusion-ᑯᓐᓂᒃ ᖃᑉᓰᑲᓪᓚᒃᖢᓂ, ᑭᓯᐊᓂ ᐱᙳᐊᙱᑐᐃᓐᓇᕐᓂᐊᓕᓚᐅᖅᑐᖅ ᕙᓕᐹᖅᑐᓂᒃ.
ᑕᐃᒪᓕ, ᐱᙳᐊᖅᑏᑦ ᑎᑭᕋᕐᔪᐊᕐᒥᐅᑕᑦ - ᒪᕐᕈᐃᖅᑕᑐᐃᓐᓇᖅᖢᑎᒃ ᐅᑭᐅᓂᒃ ᓗᐊᕋ ᒎᑦᓯ ᐃᖅᑲᐅᒪᑉᓗᒍ ᕙᓕᐹᖅᑐᓂᒃ ᐃᓚᐅᖃᑕᐅᖃᑦᑕᖅᓯᒪᔪᑦ - ᐊᐱᕆᑉᓗᑎᒃ ᕕᒃᑐᐊᕆᔭ ᐃᓚᒋᔭᐅᖃᑕᐅᔪᒪᓇᔭᕐᒪᖔᑦ ᐃᖕᒥᓄᑦ.
ᑕᐃᒪᓕ ᑕᒡᕙᙵᑦ ᐱᒋᐊᖅᖢᒍ ᐅᓂᑉᑳᖅᑐᐊᖅ ᐱᐅᔪᒻᒪᕆᐊᓗᒃ ᐱᒋᐊᓕᓚᐅᖅᐳᖅ.
ᐱᙳᐊᖅᖢᑎᒃ ᓵᓚᒃᓴᑲᑕᓕᖅᖢᑎᒃ ᑎᑭᕋᕐᔪᐊᕐᒥᐅᑦ, ᐸᕐᓇᒃᐸᓪᓕᐊᓕᖅᖢᑎᒃ ᑭᖑᓪᓕᖅᐹᒃᑯᑦ ᐱᙳᐊᕐᓂᐊᖅᑐᓄᑦ.
ᐱᙳᐊᖃᑎᖃᖅᖢᑎᒃ Fusion-ᑯᓐᓂᒃ ᓵᓚᒋᑉᓗᒋᑦ, ᐊᒻᒪᓗ ᐱᙳᐊᖃᑎᖃᓕᖅᖢᑎᒃ V-Team-ᑯᓐᓂᒃ ᐊᕐᕌᓂ ᓵᓚᒃᓴᓚᐅᖅᑐᓂᒃ
ᖃᑯᖅᑎᓐᓂᖅ ᐅᖃᖅᖢᓂ ᐅᒃᐱᕈᓱᓕᓚᐅᖅᑐᕉᖅ ᑎᑭᕋᕐᔪᐊᕐᒥᐅᑦ ᓵᓚᒃᓴᕈᓐᓇᕋᓱᒋᑉᓗᓂᒋᑦ ᑕᒪᐃᓐᓂᒃ Fusion-ᑯᓐᓂᒃ ᐱᙳᐊᖃᑎᖃᖅᑎᓪᓗᒋ5.
ᐅᖃᖅᖢᓂ ᑎᑭᕋᕐᔪᐊᕐᒥᐅᑕᒡᒎᖅ ᓵᓚᖃᓕᕐᒪᑕ Fusion-ᑯᓐᓂᒃ, ᐱᙳᐊᖃᑎᒌᑦ ᐅᔾᔨᕈᓱᓕᓚᐅᖅᑐᑦ ᓵᓚᖃᕈᓐᓇᕋᒥᒃ ᑕᒪᐃᓐᓂᒃ.
"ᐱᙳᐊᓕᕋᑉᑕ ᓯᕗᓪᓕᖅᐹᒥ ᐱᙳᐊᑐᐃᓐᓇᓚᐅᖅᑐᒍᑦ ᖁᕕᐊᓱᖃᑎᒌᒃᖢᑕ ᑭᓯᐊᓂ, ᑕᐃᑲᙵᑦ ᐱᒋᐊᖅᖢᒍ ᐅᒃᐱᕈᓱᑦᑎᐊᓕᓚᐅᖅᑐᒍᑦ ᑕᒪᐃᓐᓂᒃ ᓵᓚᒃᓴᕈᓐᓇᕐᓂᑉᑎᓐᓂᒃ," ᑕᐃᒪᓐᓇ ᐅᖃᖅᖢᓂ ᖃᑯᖅᑎᓐᓂᖅ.
"ᖁᕕᐊᓇᖅᓯᑦᑎᐊᓚᐅᖅᑐᖅ ᐱᕙᓪᓕᐊᑐᐃᓐᓇᓕᕋᑉᑕ ᑭᖑᓪᓕᖅᐹᒃᑯᓪᓗ ᐱᙳᐊᖃᑕᐅᓕᕋᑉᑕ, ᐅᒃᐱᕈᓱᒍᓐᓇᐃᓪᓕᑉᓗᑕ ᑭᖑᓪᓕᖅᐹᒃᑯᑦ ᐱᖃᑕᐅᓂᑉᑎᓐᓂᒃ. ᐊᑕᐅᓰᑐᐃᓐᓇᕐᓗᑕ ᐱᙳᐊᕐᓂᐊᓕᖅᑎᓪᓗᑕ ᐱᒋᐊᓪᓚᑦᑖᓕᓚᐅᖅᑐᒍᑦ ᓵᓚᒃᓴᖅᖢᑕᓗ."
ᖃᑯᖅᑎᓐᓂᖅ ᐅᖃᖅᖢᓂ ᑭᖑᓪᓕᖅᐹᒃᑯᒡᒎᖅ ᐱᙳᐊᕆᐊᓕᕋᒥᒃ ᑕᐅᑐᒋᐊᖅᑐᖅᓯᒪᔪᑦ ᑐᑮᕈᑎᓕᓚᐅᖅᑐᑦ. ᑲᖏᖅᖠᓂᕐᒥᐅᓪᓗ ᐃᑲᔪᖅᑎᖏᑦ ᐃᕆᐊᓛᖅᖢᑎᒃ ᐃᑲᔪᖅᑐᖅᖢᑎᒃᑕᐅᖅ ᑎᑭᕋᕐᔪᐊᕐᒥᐅᓂᒃ.
"ᑕᒪᐃᓐᓄᑦ ᐃᑲᔪᖅᑐᖅᑕᐅᔫᔭᕐᓇᓚᐅᖅᑐᖅ. ᐊᓕᐊᓇᐃᓚᐅᖅᑐᖅ ᐱᙳᐊᖃᑎᖃᖅᖢᓂ ᐃᑲᔪᖅᑐᖅᑕᐅᔪᓂᒃ ᐃᓛᒃ ᐃᑲᔪᖅᑐᖅᑕᐅᓐᓇᙱᒻᒪᑦ ᐃᖃᓗᖕᒥᐅᑕᓂᒃ ᐱᙳᐊᖃᑎᖃᖅᖢᓂ. ᖁᕕᐊᓇᑦᑎᐊᓚᐅᖅᑐᖅ ᑕᐅᑐᒋᐊᖅᑐᖅᓯᒪᔪᑦ ᐃᕆᐊᓛᕐᒪᑕ ᐃᒪᓐᓇ, "ᐊᑏ ᑎᑭᕋᕐᔪᐊᕐᒥᐅᑦ, ᐊᑏ."
ᓵᓚᒃᓴᕋᑉᑕ, ᑕᐅᑐᒋᐊᖅᑐᖅᓯᒪᔪᑦ ᒫᓂ ᐅᓗᔪᒃ ᐃᓕᓐᓂᐊᕐᕕᒡᔪᐊᑉ ᐱᙳᐊᕐᕕᖓᓂ ᐃᕆᐊᓛᖅᑐᐊᓘᓕᓚᐅᖅᑐᑦ ᐊᒻᒪᓗ ᑎᑭᕋᕐᔪᐊᕐᒥᐅᑦ ᐊᕐᓇᖏᑦ ᓵᓚᒃᓴᕈᑎᒥᒃ ᐱᑉᓗᑎᒃ. ᖃᑯᖅᑎᓐᓂᖅ ᐅᖃᖅᖢᓂ ᑭᖑᓪᓕᖅᐹᕉᖅ ᕿᑎᒃᑕᖓ ᐊᓕᐊᓇᐃᑦᑐᐊᓘᓚᐅᖅᑐᖅ.
"ᑕᒪᑦᑕ ᓄᖅᑲᖓᔪᓐᓇᐃᓪᓕᓪᓗᑕ, ᖁᕕᐊᓱᑦᑎᐊᖅᖢᑕ ᓴᕆᒪᒋᑉᓗᒍᓗ ᓄᓇᓕᕋᓛᑯᓗᒃ ᑎᑭᕋᕐᔪᐊᖅ - ᐱᒋᐊᓕᓵᖅᑐᑦ ᓗᐊᕋ ᒎᑦᓯ ᐃᖅᑲᐅᒪᑉᓗᒍ ᕙᓕᐹᕐᓂᒃᑯᑦ ᐱᒡᒍᓴᐅᔾᔪᐊᖃᑦᑕᖅᑐᓂᒃ ᒪᕐᕉᖕᓂᒃ ᐅᑭᐅᓂᒃ ᐱᖃᑕᐅᓕᓵᖅᑐᑦ - ᓵᓚᒃᓴᖅᖢᑎᒃ."
ᖃᑯᖅᑎᓐᓂᖅ ᐅᖃᓚᐅᖅᑐᖅ ᐱᙳᐊᖅᖢᓂᒎᖅ ᖁᕕᐊᓇᙱᖅᑳᖅᖢᓂ ᖁᕕᐊᓇᖅᓯᔪᐊᓘᓚᐅᖅᑐᖅ.
ᐅᖃᖅᖢᓂ ᖁᕕᐊᓱᐊᓂᒍᓐᓇᓚᐅᙱᑦᑐᕉᖅ, ᐱᙳᐊᖃᑎᖃᕆᐊᖅᑐᓚᐅᙱᒃᑲᓗᐊᕋᒥ ᑎᑭᕋᕐᔪᐊᕐᒥᐅᑕᓂᒃ.
"ᓲᖃᐃᒻᒪ ᖁᕕᐊᓱᓚᐅᙱᒃᑲᓗᐊᖅᑐᖓ ᐱᙳᐊᖃᑎᒃᑲ ᑲᖏᖅᖠᓂᕐᒧᑦ ᒥᙱᒻᒪᑕ. ᑕᐃᑉᑯᐊ ᐅᑭᐅᓗᒃᑖᖅ ᐱᙳᐊᖃᑎᒋᖃᑦᑕᕋᑉᑭᑦ, ᐊᒻᒪᓗ ᖁᕕᐊᓱᑦᑎᐊᓚᐅᖅᖢᑕ ᑲᖏᖅᖠᓂᓕᐊᕐᓂᐊᕋᑉ ᑕ. ᑮᓇᐅᔾᔭᒃᓴᓚᐅᖅᖢᑕ ᐱᙳᐊᕆᐊᖅᑐᕐᓂᐊᕐᓂᕐᒧᑦ, ᐊᓕᐊᓇᐃᙱᑦᑐᒻᒪᕆᐊᓘᓚᐅᖅᑐᖅ ᖄᖏᐅᑎᑐᐃᓐᓇᕐᒪᑕ.
"ᑭᓯᐊᓂ ᑎᑭᕋᕐᔪᐊᕐᒥᐅᑕᑦ ᐱᙳᐊᖃᑎᒋᓚᐅᖅᑕᒃᑲ ᐅᐱᓐᓇᖅᑐᒻᒪᕆᐊᓘᓚᐅᖅᑐᑦ, ᐊᓕᐊᓇᐃᑦᑎᐊᓚᐅᖅᑐᖅ ᐱᙳᐊᖃᑎᒋᑉᓗᒋᑦ.