ᓄᓇᕗᒻᒥ ᓱᕈᓯᖏᑦ ᐊᒻᒪ ᒪᒃᑯᒃᑐᖏᑦ ᐃᓂᖃᓚᐅᖅᐳᑦ ᐊᖏᐸᓗᒃᑐᒥ ᐃᓂᐅᔪᒥ ᐅᖃᓪᓚᖕᓂᐅᔪᓂ ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓᓐᓂ ᕕᕈᐊᕆᒥ, ᒪᓕᒐᓕᐅᖅᑎᒥᒃ ᒪᓕᒐᓕᐅᖅᑎᒧᑦ ᐅᖃᓪᓚᑲᑕᒃᑎᓪᓗᒋᑦ, ᒪᓕᒐᓕᐅᖅᑎᑦ ᒥᓂᔅᑕᖏᓐᓂ ᐱᓕᕆᒃᑲᓐᓂᖁᔭᐅᓪᓗᑎᒃ ᓱᕈᓯᕐᓄᑦ ᐋᓐᓂᖅᓯᕆᓂᐅᔪᒥ.
ᒪᓕᒐᓕᐅᖅᑎᑐᐃᓐᓇᐃᑦ ᑎᒃᑯᐊᖅᓯᓚᐅᖅᐳᑦ ᐊᔾᔨᒌᙱᓐᓂᐅᔪᓄᑦ ᐅᑯᓇᓂ ᑐᓴᖅᑕᐅᒐᔪᒃᑐᓂ "ᓱᕈᓰᑦ ᐊᒻᒪ ᒪᒃᑯᒃᑐᑦ ᓯᕗᓂᒃᓴᐅᕗᑦ ᓄᓇᕗᒻᒧᑦ" ᐊᒻᒪ ᖁᑦᑎᒃᑐᒥ ᖃᓄᐃᓐᓂᐅᒐᔪᒃᑐᒥ ᐋᓐᓂᖅᓯᕆᓂᐅᔪᒥ ᐊᑐᖅᑕᐅᕙᒃᑐᓂ ᓱᕈᓯᕐᓂᑦ ᐊᒻᒪ ᒪᒃᑯᒃᑐᓂ, ᐅᓇᐅᒐᓗᐊᖅᐸᑦ ᐃᓱᒪᒃᑯᑦ, ᑎᒥᒃᑯᑦ ᖁᓄᔪᕐᓂᐊᕐᓂᕐᒥᓪᓘᓐᓃᑦ.
"ᖃᐅᔨᒪᕗᒍᑦ ᐅᓄᕐᓂᖓ ᐅᓂᒃᑳᕆᓯᒪᔪᒥ ᓱᕈᓯᕐᓄᑦ ᐋᓐᓂᖅᓯᕆᓂᐅᔪᒥ ᓄᓇᕗᒻᒥ 10−ᖏᖅᓱᓪᓗᐊᖅᑐᒥ ᐅᓄᕐᓂᖅᓴᐅᕗᑦ ᑲᓇᑕᒥ ᑕᐃᒪᐃᒐᔪᖕᓂᐅᔪᒥ. ᖃᐅᔨᒪᕗᒍᑦ ᐅᓄᖅᑐᒻᒪᕆᐊᓗᖕᓂ ᐋᓐᓂᖅᓯᕆᓂᐅᔪᒥ ᐅᓂᒃᑳᕆᔭᐅᕙᙱᓚᑦ. ᐅᒃᐱᕈᓱᒃᐳᖓ ᐱᓕᕆᖃᑎᒌᒋᐊᖃᕐᓂᑦᑎᓐᓂ ᐊᓯᔾᔩᓂᕐᒧᑦ," ᐅᖃᓚᐅᖅᐳᖅ ᐋᑕᒻ ᓚᐃᑦᔅᑑᓐ, ᒪᓕᒐᓕᐅᖅᑎᑦ ᐃᖃᓗᐃᑦ-ᒪᓂᕋᔭᖕᒧᑦ.
ᒥᓂᔅᑕ ᒪᓕᒐᓕᕆᔨᒃᑯᓐᓄᑦ ᔩᓂ ᐃᕼᐊᓗᐊᒃ ᐅᖃᐅᓯᖃᓚᐅᖅᐳᖅ ᑕᐃᔅᓱᒪᓂ ᓴᖅᑭᑎᑕᐅᓂᖓᓂ ᐅᒥᖕᒪᒃ ᐱᓕᕆᕝᕕᖕᒥ, ᓱᕈᓯᕐᓄᑦ−ᑐᕌᖓᔪᓄᑦ ᐃᒡᓗᕐᔪᐊᒥ ᐃᖃᓗᖕᓂ ᐸᖅᑭᓂᕐᒧᑦ ᓄᓇᕗᒻᒥ ᐱᕋᔭᒃᑕᐅᔪᓄᑦ ᓱᕈᓯᕐᓄᑦ ᐋᓐᓂᖅᓯᕆᓂᐅᔪᒧᑦ. ᐅᑭᐅᖅᑕᖅᑐᒥ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᑐᙵᕕᒋᔭᐅᔪᖅ, ᐋᖅᑭᒃᑕᐅᓂᑰᔪᒥ ᒥᐊᕆ ᓴᐃᒪᓐᒧᑦ, ᐱᓕᕆᓚᐅᖅᐳᖅ ᑕᖃᔪᐃᑦᑑᓪᓗᓂ ᖄᖏᖅᓯᒪᓕᖅᑐᓄᑦ ᖃᔅᓯᒐᓚᖕᓄᑦ ᐊᕐᕌᒍᓄᑦ ᐱᓕᕆᕝᕕᒃ ᐱᓪᓚᕆᙳᖅᑎᓐᓇᓱᐊᕐᓂᕐᒧᑦ. ᐱᓕᕆᖃᑎᒋᔭᐅᔪᑦ ᐃᓚᖃᖅᐳᑦ ᓄᓇᕗᒻᒥ ᒐᕙᒪᒃᑯᑦ ᐱᓕᕆᕝᕕᖏᓐᓂ ᒪᓕᒐᓕᕆᔨᒃᑯᓐᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ, ᐃᓕᓐᓂᐊᕐᓂᓕᕆᔨᒃᑯᓐᓂ, ᐊᒻᒪ ᐃᓚᒌᓄᑦ ᐱᔨᑦᑎᕋᖅᑎᓄᑦ, ᑲᓇᑕᒥ ᐸᓖᓯᒃᑯᑦ ᐊᒻᒪ ᓄᓇᕗᒻᒥ ᑐᙵᕕᒃᑯᓐᓂ. ᐱᓕᕆᕝᕕᒃ ᒪᑐᐃᖅᑐᒃᓴᐅᑕᐅᕗᖅ ᓯᑎᐱᕆᒥ, ᐊᒻᒪ $875,526−ᓂ ᐊᕐᕌᒍᓄᑦ ᑕᓪᓕᒪᓄᑦ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᐅᔪᓂ ᐅᖃᐅᓯᐅᓪᓚᕆᓚᐅᖅᐳᑦ ᔪᓚᐃ 29−ᒥ.
ᑕᒪᓐᓇ ᐱᓕᕆᖃᑎᒌᖕᓂᐅᕗᖅ.
ᐅᒥᖕᒪᒃ ᐱᓕᕆᕝᕕᒃ ᐱᓕᕆᓂᖃᕐᓂᐊᖅᑎᓪᓗᒍ ᐱᓪᓚᕆᐅᔪᒥ ᐊᑐᕐᓂᖃᐅᑎᐅᔪᒥ ᐃᑲᔪᕐᓂᕐᒧᑦ ᓱᕈᓯᕐᓂ ᖃᓄᐃᙱᑦᑎᐊᕐᓂᐅᔪᒥ ᐃᓅᓯᖃᕐᓂᖏᓐᓄᑦ, ᖃᓄᐃᓕᐅᕐᓂᖃᕈᓐᓇᖅᐸᑦ ᓇᓗᓇᐃᖅᓯᓂᕐᒧᑦ ᐅᓄᙱᓐᓂᖅᓴᐅᔪᓂ ᓱᕈᓯᕐᓂ ᐱᓂᕐᓗᒃᑕᐅᖃᑦᑕᙱᓐᓂᖓᓐᓂ ᓯᕗᓪᓕᖅᐹᒥ?
ᐊᒃᓱᕈᕈᑕᐅᔪᑦ ᖃᔅᓯᒐᓚᖕᓂ-ᐃᓚᒋᔭᐅᓂᖃᕆᐊᖃᖅᐳᖅ, ᑭᐅᕙᓪᓕᐊᑎᓪᓗᑕ ᖃᓄᐃᓕᐅᕐᓂᐅᔪᓂ ᖃᓄᐃᓕᐅᕐᓂᖃᙱᓗᐊᕐᓂᐅᔪᓂᓪᓘᓐᓃᑦ ᑕᐃᔅᓱᒪᓂᐅᓚᐅᖅᑐᒥ – ᐊᒻᒪ ᑕᒪᓐᓇ ᐃᓚᖃᖅᐳᖅ ᐊᐅᓚᑦᑎᓂᖃᕋᓱᐊᕐᓂᐅᔪᒥ ᐊᑐᖅᑕᐅᓂᑰᔪᓂ ᑐᕌᖓᓂᖃᓪᓚᕆᒃᑐᓂ ᐱᓂᕐᓗᒃᑕᐅᓂᑯᓄᑦ ᓇᐃᓴᖅᑕᐅᓯᒪᓂᐅᔪᓄᑦ – ᑭᐅᔭᕆᐊᖃᖅᐳᒍᑦ ᒫᓐᓇᐅᔪᒥ, ᑕᐅᑐᒡᓗᑕ ᓯᕗᓂᒃᓴᒧᑦ.
ᒫᓐᓇᐅᔪᖅ ᐃᓚᖃᖅᐳᖅ ᐱᓐᓇᕈᓱᖕᓂᕐᒥ ᓱᕈᓯᕐᓂ ᖃᐅᑕᒫᑦᑎᐊᖅ, ᑐᓂᓗᒋᑦ ᓂᕿᑦᑎᐊᕙᖕᓂ ᓂᕿᓂᑦ, ᖁᑦᑎᓛᖑᔪᒥ ᐃᓕᓐᓂᐊᕐᓂᐅᔪᒥ ᓇᖕᒥᓂᖅ ᐅᖃᐅᓯᖓᓐᓂ, ᐊᒻᒪ ᐊᖏᕐᕋᓂᑦ – ᐊᖏᕐᕋᐅᔪᑦ ᐅᖁᒃᓯᒪᓂᐅᙱᑦᑐᓄᑦ ᐊᒻᒪ ᐸᖕᒥᐅᓗᐊᕐᓂᐅᔪᓅᙱᑦᑐᖅ, ᐊᖏᕐᕋᐅᔪᑦ ᐊᑦᑕᓇᙱᑦᑐᓂ.
ᓚᐃᑦᔅᑑᓐ ᐅᖃᓚᐅᖅᐳᖅ ᐱᓕᕆᓂᖃᕐᓂᐊᖅᐳᖅ "ᑕᒪᒃᑭᓂ ᑲᑐᔾᔨᖃᑎᒌᖑᔪᓂ, ᑕᒪᒃᑭᓂ ᐱᓕᕆᕝᕕᓂᑦ, ᑕᒪᒃᑭᓂ ᐃᓄᖕᓂ, ᐊᒻᒪ ᑕᒪᒃᑭᓂ ᓄᓇᓕᖕᓂ ᑲᑎᖃᑎᒌᖕᓂᐅᔪᒥ ᐅᖃᕐᓂᕐᒧᑦ ᑕᐃᒪ ᑕᐃᒪᐃᑦᑕᕆᐊᖃᕈᓐᓃᖅᐳᖅ." ᓇᓚᐅᑦᑎᕗᖅ, ᖃᓄᐃᓐᓂᐅᔪᓄᑦ ᐱᓕᕆᙱᓐᓂᕐᒧᑦ ᐱᐅᙱᑦᑐᒻᒪᕆᐅᖕᒪᑦ. ᖃᐅᔨᒪᕗᒍᑦ ᐃᒻᒥᓃᕐᓂᖅ ᒪᒃᑯᒃᑐᓂ ᐃᒪᐃᒻᒪᑦ, ᐊᒻᒪ ᑕᐃᒪᐃᓯᒪᕗᖅ, ᑐᐊᕕᕐᓇᖅᑐᒥ ᑭᒡᓕᒦᓐᓂᖓᓂ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᕐᕌᒍᓄᑦ 20−ᓄᑦ ᐊᒃᓱᕈᕐᓂᖏᓐᓂ ᑭᐅᓂᕐᒧᑦ ᑕᐃᔅᓱᒪᓂᐅᓚᐅᖅᑐᒥ ᐊᒻᒪ ᓯᕗᒻᒧᑦ ᐃᖏᕐᕋᓂᕐᒧᑦ ᓯᕗᓂᒃᓴᒧᑦ ᐃᓕᓴᕆᔭᐅᓯᒪᓪᓚᕆᓕᖅᐳᖅ ᐅᕘᓇ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᐱᓕᕆᕐᔪᐊᖅᓯᒪᔭᖏᓐᓄᑦ – ᑲᓇᑕᒥ ᒐᕙᒪᒃᑯᑦ ᐊᑐᐃᓐᓇᖃᖅᑎᑦᑎᓚᐅᖅᐳᑦ ᒪᒥᐊᓐᓂᐅᔪᒥ ᐋᒍᔅᑎ 14−ᒥ, $20 ᒥᓕᐊᓐᓂ ᐱᓕᕆᐊᖑᔪᓄᑦ ᑐᕌᖓᓂᐊᖅᑐᓄᑦ ᓴᖑᑎᑦᑎᓂᕐᒧᑦ ᐋᖅᑭᒃᓯᒪᓂᐅᔪᒥ ᐃᓗᒻᒧᑐᖄᓗᒃ ᐱᓂᕐᓗᒃᑕᐅᓂᑯᓄᑦ ᐊᒻᒪ ᐊᒥᓱᓂ ᖃᓄᐃᓕᖓᓕᕐᓂᐅᔪᓄᑦ. ᐊᖏᖃᑎᒌᒡᒍᑦ ᑐᑭᓯᐅᒪᖃᑦᑕᐅᑎᓂᒃᑯᑦ ᐊᑎᓕᐅᖅᑕᐅᓚᐅᖅᐳᖅ ᓴᖅᑭᑎᑦᑎᓂᕐᒧᑦ ᑮᓇᐅᔭᓂᒃ ᒪᒥᐊᓐᓂᐅᔪᒥ ᑐᑭᖃᖅᑎᑕᐅᒃᑲᓐᓂᕐᓂᐅᔪᒧᑦ, ᑐᕌᖓᓇᓱᐊᖅᑐᒥ ᑕᑯᓂᕐᒧᑦ ᐃᓄᖕᓂ ᐅᑎᖅᑎᕆᓂᖏᓐᓂ, ᐊᑯᓂᐅᔪᒃᑯᑦ, ᐅᐱᒋᓂᕐᒥ, ᐱᔪᓐᓇᕐᓂᐅᔪᒥ ᐃᒻᒥᒃᑯᑦ−ᐊᐅᓚᑦᑎᓂᐅᔪᒧᑦ ᐊᒻᒪ ᖃᓄᐃᙱᑦᑎᐊᕐᓂᐅᔪᒧᑦ.
ᐊᒻᒪ ᐊᓱᐃᓛᒃ ᐊᒥᐊᒃᑰᔪᑎᒍᑦ – ᐱᖃᓐᓇᕆᔭᐅᔪᑦ, ᓴᓂᓕᐅᔪᑦ, ᐃᓚᒌᖑᔪᑦ. ᐃᓚᐅᖃᑕᐅᔪᐃᓐᓇᐅᔭᕆᐊᖃᖅᐳᒍᑦ, ᐃᓅᒐᓗᐊᕈᑦᑕ ᖃᓪᓗᓈᖑᒍᑦᑕᓘᓐᓃᑦ, ᐱᓕᕆᖃᑎᒌᒃᑎᓪᓗᑕ, ᒪᒥᓴᐃᓂᖅ ᐊᑐᖅᑕᐅᓂᑯᓂ ᐊᒻᒪ ᓴᖅᑭᑎᑦᑎᓂᕐᒥ ᐆᒻᒪᕆᒃᑐᒥ ᓯᕗᓂᒃᓴᒥ ᐱᔪᓐᓇᖅᐳᖅ.