Skip to content

ᐊᖏᕐᕋᒥ ᐱᕈᖅᓴᔭᐅᔪᖅ ᐅᔭᕋᖕᓂᐊᕐᕕᒃ ᐃᓱᒻᒥᖅᑎᐅᔪᑦ ᓇᓂᓯᕗᑦ ᐱᓕᕆᑦᑎᐊᕐᓂᐅᔪᒥ

ᐊᑕᐅᓯᐅᔪᖅ ᓄᓇᕗᒻᒥ ᐱᖓᓱᓂ ᐊᐅᓚᑕᐅᔪᓄᑦ ᐅᔭᕋᖕᓂᐊᕐᕕᐅᔪᓂ ᓄᓇᓕᖕᓄᑦ ᑐᕌᖓᓂᖅᓴᐅᓕᖅᐳᖅ: ᐋᓕᒃᔅ ᐱᐅᑲᓐ, ᐃᓅᓚᐅᖅᓯᒪᔪᖅ ᐊᒻᒪ ᐱᕈᖅᓴᔭᐅᓪᓗᓂ ᓄᓇᕗᒻᒥ, ᖁᕝᕙᕆᐊᖅᑎᑕᐅᓚᐅᖅᐳᖅ ᐊᖓᔪᖅᑳᑉ ᑐᖓᓕᐊᓄᑦ TMAC ᐃᑲᔪᕈᑎᒃᓴᓄᑦ ᔭᓄᐊᕆ 10−ᖑᑎᓪᓗᒍ.

Nunavut’s Alex Buchan is now vice president of corporate social responsibility for TMAC Resources Inc., which operates a gold mine 125 kilometres southwest of Cambridge Bay. Photo courtesy of Alex Buchan.
ᓄᓇᕘᑉ ᐋᓕᒃᔅ ᐱᐅᑲᓐ ᒫᓐᓇ ᐊᖓᔪᖅᑳᑉ ᑐᖓᓕᕆᕙᖓ ᑎᒥᐅᔪᓄᑦ ᐃᓅᖃᑎᒌᖕᓂᕐᒧᑦ ᑲᒪᒋᔭᖃᕐᓂᕐᒥ TMAC ᐃᑲᔪᕈᑎᒃᓴᓄᑦ, ᐊᐅᓚᑦᑎᓲᒥᒃ ᒎᓗᒧᑦ ᐅᔭᕋᖕᓂᐊᕐᕕᖕᒧᑦ 125 ᑭᓛᒥᑐᒥ ᓂᒋᕐᒥ ᑲᓇᖕᓇᒥ ᐃᖃᓗᒃᑑᑦᑎᐊᕐᒥ.

ᐊᐅᓚᑦᑎᔨᐅᓚᐅᖅᑐᖅ ᓄᓇᓕᖕᓂ ᐱᓕᕆᓂᐅᔪᓂ ᑲᒻᐸᓂᐅᔪᒧᑦ, ᐱᐅᑲᓐ ᒫᓐᓇ ᐊᖓᔪᖅᑳᑉ ᑐᖓᓕᕆᓕᖅᐸᖓ ᑎᒥᐅᔪᓄᑦ ᐃᓅᖃᑎᒌᖕᓂᕐᒧᑦ ᑲᒪᒋᔭᖃᕐᓂᕐᒥ, ᑲᒪᒋᔭᖃᖅᑎᑦᑎᔪᒥ ᓄᓇᓕᖕᓂ ᐱᓕᕆᓂᐅᔪᓂ ᐊᒻᒪ ᐊᑐᓕᖅᑎᑦᑎᓂᕐᒥ ᑲᒻᐸᓂᐅᑉ ᐃᓄᖕᓄᑦ ᐊᒃᑐᐃᓂᐅᔪᓄᑦ ᐊᒻᒪ ᐱᕙᓪᓕᕈᑎᓄᑦ ᐊᖏᕈᑎᖓᓐᓂ. ᐃᓚᐅᖃᑕᐅᖏᓐᓇᕐᓂᐊᖅᐳᖅ ᐱᔪᓐᓇᐅᑎᖃᖅᑎᑦᑎᓂᕐᒧᑦ ᐱᓕᕆᓂᐅᔪᒥ.
"ᖁᕕᐊᑉᐳᖓ ᐊᖏᒡᓕᒋᐊᖅᑎᑦᑎᓂᐅᔪᒥ," ᐅᖃᓚᐅᖅᐳᖅ ᐱᐅᑲᓐ. "ᐊᑐᕐᓂᖃᐅᑎᕗᑦ ᐃᖃᓗᒃᑑᑦᑎᐊᕐᒥ ᐱᒋᐊᖅᑎᑦᑎᓂᕐᒧᑦ ᐃᓚᖏᓐᓂ ᐸᕐᓇᐅᑎᓄᑦ ᐱᒋᐊᕈᑕᐅᔪᓂ ᐃᑲᔪᖅᓱᐃᓂᐊᖅᑐᒥ ᓯᕗᓂᐊᓂ−ᐃᖅᑲᓇᐃᔮᖃᕐᓂᕐᒧᑦ ᐱᓕᒻᒪᒃᓴᕐᓂᐅᔪᒥ."
ᐅᖃᓚᐅᖅᐳᖅ ᑲᒻᐸᓂᐅᔪᖅ ᒫᓐᓇᒧᑦ ᑎᑭᖦᖢᒍ ᐊᑐᕈᓐᓇᖅᓯᒪᕗᑦ ᐊᕕᒃᑐᖅᓯᒪᓂᐅᔪᒥ ᐃᖅᑲᓇᐃᔭᖅᑎᖁᑎᖏᓐᓂ ᐃᓕᓯᒪᔪᒥ, ᐱᑕᖄᓂᒃᑐᓂ ᐊᔪᙱᓐᓂᐅᔪᓂ ᓯᕗᓂᐊᓂ ᐱᓕᕆᐊᒃᓴᐅᓚᐅᖅᑐᓄᑦ ᓲᕐᓗ ᓘᐱᓐᒥ.
ᑲᒻᐸᓂᐅᑉ Hope Bay ᐱᓕᕆᐊᒃᓴᖓᓂ – ᑯᕕᓯᓚᐅᖅᑐᒥ ᓯᕗᓪᓕᖅᐹᖓᓂ ᒎᓗᒥ ᑐᐊᕆᔅ ᐅᐊᖕᓇᒥ ᐅᔭᕋᖕᓂᐊᕐᕕᖓᓂ 2017−ᒥ – ᐱᕈᖅᐸᓪᓕᐊᓂᖓᓂ, ᐊᒻᒪ ᑲᒻᐸᓂᐅᔪᖅ ᐃᖏᕐᕋᐃᓐᓇᕐᓂᖓᓂ ᐊᐅᓚᑦᑎᓂᕐᒧᑦ ᐊᕐᕌᒍᒐᓵᓗᖕᓂ ᓯᕗᓂᒃᓴᒧᑦ, ᐱᐅᑲᓐ ᐅᖃᓚᐅᖅᐳᖅ TMAC ᐱᓕᕆᔭᕆᐊᖃᖅᐳᖅ ᐊᔾᔨᒌᙱᕈᓘᔭᖅᑐᓂ ᑭᒡᓕᐅᔪᓄᑦ ᒐᕙᒪᐅᔪᓂ ᒪᒃᑯᒃᑐᓂ ᐱᓕᕆᓂᕐᒧᐊᖅᑎᑦᑎᓂᕐᒧᑦ ᐃᓯᖅᑎᑦᑎᓂᐊᖅᑐᓄᑦ ᐹᖑᔪᒧᑦ.
"ᐅᕙᓐᓄᑦ ᐊᔪᙱᓐᓂᖅᓴᖃᖅᑎᑦᑎᔪᒃᓴᐅᕗᖅ ᐆᒧᖓ ᖃᐅᔨᒋᐊᕐᓂᕐᒧᑦ ᓇᖕᒥᓂᖅ ᐊᒥᓱᐊᓗᖕᓂ ᖃᐅᔨᒪᔭᖃᕋᒪ ᐃᓄᖕᓂ ᐃᖅᑲᓇᐃᔭᕈᒪᓇᔭᖅᑐᓂ Hope Bay−ᒥ ᐊᒻᒪ, ᖃᐅᔨᒪᕗᖓ ᑕᒪᐃᑎᒍᑦ ᖃᓄᐃᑦᑑᓂᖏᓐᓂ ᐊᔪᙱᓐᓂᖏᓐᓂ ᐊᒻᒪ ᐃᖅᑲᓇᐃᔭᕐᓂᕐᒧᑦ ᐱᓕᕆᓕᒪᓂᖏᓐᓂ ᐃᓄᐃᑦ ᐱᖃᕐᓂᖏᓐᓂ," ᐅᖃᓚᐅᖅᐳᖅ ᐱᐅᑲᓐ.
ᐱᐅᑲᓐ ᐱᓕᕆᓯᒪᕗᖅ Hope Bay ᐱᓕᕆᐊᒃᓴᖓᓂ ᐊᕐᕌᒍᓄᑦ 13−ᓄᑦ, ᐃᖅᑲᓇᐃᔭᖅᖢᓂ ᓯᕗᓂᐊᓂ ᓇᖕᒥᓂᖃᖅᑎᐅᓚᐅᖅᑐᓄᑦ Miramar ᐅᔭᕋᖕᓂᐊᕐᕕᖓᓄᑦ ᑎᒥᐅᔪᓄᑦ ᐊᒻᒪ Newmont ᐅᔭᕋᖕᓂᐊᓂᕐᒧᑦ TMAC ᐃᓇᖏᖅᓯᓚᐅᖅᑳᕋᑎᒃ 2013−ᒥ.
TMAC ᐊᖓᔪᖅᑳᖓ ᐊᒻᒪ ᐊᐅᓚᑦᑎᔨᖓ ᔭᐃᓴᓐ ᓃᔪᓪ ᐅᖃᓚᐅᖅᐳᖅ "ᑕᐃᔭᐅᓂᑦᑎᐊᕙᐅᓂᖓᓂ" ᐱᐅᑲᓐᒥ ᐃᓚᐅᖃᑕᐅᓂᖓᓂ ᐃᓱᒻᒥᖅᑎᐅᔪᓂ.
"ᐊᖏᕐᔪᐊᖅᑐᒥ ᐊᒃᑐᐃᓂᖃᖅᑎᑦᑎᓯᒪᕗᖅ ᑲᒻᐸᓂᑦᑎᓐᓂ," ᐅᖃᓚᐅᖅᐳᖅ ᓃᔪᓪ. "...ᐱᐅᒧᒻᒪᕆᐊᓗᖕᓂ ᐱᓕᕆᓂᖃᖅᐳᖅ."
ᐅᖃᓚᐅᖅᐳᖅ ᓂᕆᐅᖕᓂᖃᖅᐳᖅ ᐊᒥᓱᒃᑲᓐᓂᒻᒪᕆᖕᓂ ᓄᓇᕗᒻᒥᐅᓂ ᐃᓚᐅᖃᑕᐅᓂᖏᓐᓂ ᐃᓱᒻᒥᖅᑐᐃᔨᐅᔪᓂ ᑭᒡᓕᐅᔪᒥ ᐱᓕᕆᓂᐅᔪᒥᑦ ᐱᕈᖅᐸᓪᓕᐊᑎᓪᓗᒍ ᓄᓇᕗᒻᒥ.
"ᐊᑯᓂᐅᐸᓗᑐᐃᓐᓇᕐᓂᐊᖅᐳᖅ," ᐅᖃᓚᐅᖅᐳᖅ ᐱᐅᑲᓐ.
"ᐅᔭᕋᖕᓂᐊᕐᓂᖅ, ᓯᕗᓂᒃᓴᒥ, ᐊᖏᓛᐸᓘᓗᓂ ᓇᖕᒥᓂᕆᔭᐅᓂᐅᓂᐊᖅᐳᖅ ᐱᓕᕆᓂᐅᓗᓂ ᓄᓇᕗᒻᒥ. ᓂᕿᒃᓴᓕᐅᖅᐸᒃᑐᖁᑎᖃᙱᓚᒍᑦ. ᓇᐹᖅᑐᓕᕆᓂᖃᙱᓚᒍᑦ. ᑎᑭᐅᑎᓯᒫᓂᒃᐳᒍᑦ ᑭᒡᓕᐅᔪᒥ ᖃᓄᑎᒋ ᑮᓇᐅᔭᓕᐅᕐᓂᕐᒧᑦ ᐱᕙᓪᓕᐊᑎᑕᐅᓂᖓᓂ ᐊᔪᕐᓇᙱᓐᓂᖓᓂ ᐃᖃᓗᓕᕆᓂᐅᔪᒥ. ᒐᕙᒪᐅᙱᑉᐸᑦ, ᐅᔭᕋᖕᓂᐊᕐᓂᕐᒥᐅᓂᐊᖅᐳᖅ."
ᐱᐅᑲᓐ ᐅᖃᓚᐅᖅᐳᖅ ᐊᑕᐅᓯᐅᔪᒥ ᓄᓇᕗᒻᒥ ᐊᔪᙱᓐᓂᖅᓴᖃᕐᓂᕆᓛᖓᓂ ᒪᒃᑯᒃᑐᓂ ᐃᓄᒋᐊᖕᓂᖏᓐᓂ. ᑕᐃᒪᙵᓂ 2016−ᒥ ᒐᕙᒪᑐᖃᒃᑯᑦ ᓇᐃᓴᐃᓂᐅᔪᒥ, ᓇᑉᐸᓪᓗᐊᖓ ᓄᓇᕘᑉ ᐃᓄᒋᐊᖕᓂᖓᓂ ᐅᑭᐅᖃᓚᐅᖅᐳᑦ 25 ᑐᖔᓂ.
"ᖃᐅᔨᒪᑦᑎᐊᖅᐳᖓ, ᐊᕐᕌᒎᓂᐊᖅᑐᓄᑦ, ᒪᒃᑯᒃᑐᑦ ᑕᑯᓂᐊᖅᐳᑦ ᐱᓕᕆᐊᕆᔭᑦᑎᓐᓂ ᓴᖅᑭᑉᐸᓪᓕᐊᓂᖓᓂ ᐊᒻᒪ ᑕᑯᓗᓂ ᓂᕈᐊᒐᒃᓴᖃᕈᒪᒍᑎᒃ ᓇᖕᒥᓂᖃᖅᑎᐅᔪᓄᑦ ᐱᓕᕆᔨᐅᔪᓅᕐᓂᕐᒧᑦ, ᐅᔭᕋᖕᓂᐊᕐᓂᒨᕐᓂᖏᑦ ᐊᒻᒪ ᐃᖏᕐᕋᕙᓪᓕᐊᓗᑎᒃ ᐅᔭᕋᖕᓂᐊᓂᕐᒧᑦ ᑲᒻᐸᓂᐅᔪᒥ ᐊᑐᖅᑕᐅᔪᒃᓴᐅᑕᐅᕗᖅ."