by Cody Punter
ᑯᕆᔅ ᔫᓐᔅ ᐊᒻᒪ ᕋᐃᔭᓐ ᑰᓕᑦ ᐊᐅᓪᓚᕋᒥᒃ ᐊᖑᓇᓱᒋᐊᕐᓂᕐᒧᑦ ᑎᑭᕋᕐᔪᐊᒥ 18-ᓂ ᐃᓯᒐᓪᓗᐊᓂ ᑕᑭᓂᓕᖕᒥ ᓴᕕᕋᔭᖕᒥ ᐅᒥᐊᖓᓐᓄᑦ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᓚᐅᖅᑐᒥ, ᓯᕿᓐᓂᑦᑎᐊᓚᐅᖅᐳᖅ ᐊᒻᒪ ᐅᖅᓱᐊᑦᑎᐊᖅᖢᓂ.
ᐅᐸᒃᑕᐅᓪᓗᑎᒃ ᑎᓴᒪᓄᑦ ᐊᖑᓇᓱᒃᑎᓄᑦ ᐊᓯᐊᓂ ᐅᒥᐊᖑᔪᒥ, ᑲᑎᙵᔪᑦ ᐊᐅᓪᓚᓚᐅᖅᐳᑦ ᐊᐃᕕᕈᒪᓪᓗᑎᒃ ᐅᑎᕈᔾᔭᐅᓂᐊᖅᑐᒧᑦ ᑎᑭᕋᕐᔪᐊᒧᑦ ᐊᒻᒪ ᑐᓂᐅᖅᑲᖅᑕᐅᓗᓂ ᓄᓇᓕᖕᓄᑦ ᐃᓄᑐᖃᖏᓐᓄᑦ.
ᖃᐅᔨᒪᓚᐅᙱᓚᑦ ᖃᔅᓯᒐᓚᖕᓄᑦ ᐅᓪᓗᓂ ᐊᔪᖅᓯᓯᒪᓂᐊᕐᓂᖏᓐᓂ ᕿᑭᖅᑕᒥ ᑲᖏᖅᓱᐊᓘᑉ ᕿᑎᐊᓂ.
ᐊᖑᓇᓱᒃᑏᑦ ᐅᐊᖕᓇᓕᐊᖅᐸᓪᓕᐊᓪᓗᑎᒃ ᐅᖅᓱᕆᐊᖅ ᐅᖓᑖᓄᑦ, ᔫᓐᔅ ᐅᖃᓚᐅᖅᐳᖅ ᐅᔾᔨᕆᓚᐅᕐᓂᖓᓂ ᓯᓚ ᕿᓚᒥᐊᓗᒃ ᐊᓯᔾᔨᖅᐸᓪᓕᐊᓂᖓᓂ. ᐊᓂᕆᕐᔪᐊᕌᓗᖕᒥ ᐱᕈᖅᐸᓪᓕᐊᓚᐅᖅᐳᖅ ᑲᓇᖕᓇᒥ ᑲᑎᖅᓱᐃᓪᓗᓂ ᐊᖏᔪᒻᒪᕆᐊᓗᖕᓂ ᒪᓪᓕᓂᑦ ᒪᖁᐊᓗᖕᒥ ᑕᑯᒃᓴᐅᓪᓗᓂ ᖃᓂᒡᓕᕙᓪᓕᐊᔪᒥ ᓯᓚᖓᓐᓂ.
“ᓈᒻᒪᓚᐅᙱᑦᑐᖅ,” ᐅᖃᓚᐅᖅᐳᖅ ᔫᓐᔅ.
ᐅᐸᒐᓱᐊᖅᑕᒥᓄᐊᙱᖔᕐᓗᑎᒃ, ᐊᖑᓇᓱᒃᑏᑦ ᐅᑎᕈᒪᓕᓚᐅᖅᐳᑦ ᐊᒻᒪ ᐊᖏᕐᕋᐅᓵᕐᓗᑎᒃ ᑎᑭᕋᕐᔪᐊᒧᑦ.
ᐊᖑᑏᑦ ᐊᒃᓱᕈᓚᐅᖅᐳᑦ ᓇᓂᓯᓇᓱᐊᕐᓂᕐᒧᑦ ᓄᓇᐅᔪᒥ ᐊᓄᕆ ᐊᓂᒍᖅᓯᐊᕆᓗᒍ. ᒪᓪᓖᑦ ᐊᖏᒡᓕᓗᐊᒧᑦ ᒪᕐᕉᒃ ᐅᒥᐊᑦ, 50 ᒦᑕᓂᑦ ᐅᖓᓯᒃᑎᒌᐸᓗᒃᑐᓂ, ᑕᑯᖃᑦᑕᐅᑎᔪᓐᓇᐃᔾᔨᖃᑦᑕᓚᐅᖅᐳᑦ ᒪᓪᓕᐅᑉ ᐊᑦᑎᖕᓂᖓᓃᓕᕌᖓᒥᒃ.
“ᒪᓕᖅᑐᒦᓐᓂᑰᕗᖓ ᐊᓯᖏᓐᓂ ᐅᒥᐊᓂᑦ ᑭᓯᐊᓂ ᑕᒪᓐᓇ ᑲᑉᐱᐊᓇᕐᓂᖅᐹᖑᓚᐅᖅᐳᖅ ᖃᓄᐃᓐᓂᐅᔪᒥ ᐅᕙᓐᓄᑦ,” ᐅᖃᓚᐅᖅᐳᖅ ᑰᓕᑦ.
ᐱᕕᒃᓴᖃᕈᓐᓃᓚᐅᖅᐳᑦ ᑭᓯᐊᓂ ᐅᖅᑯᐊᕐᒥ ᕿᓂᕐᓗᑎᒃ ᑭᓯᐊᓂ 3 ᐅᓪᓛᕌᓗᒃᑯᑦ ᓇᓂᓯᔪᓐᓇᓚᐅᖅᐳᑦ ᒥᑭᑦᑐᒥ ᐅᔭᕋᖃᐅᕐᓂᐅᔪᒥ ᓄᓇᒐᓛᒥᑦ ᐅᒥᐊᖏᑦ ᓄᓇᒧᐊᖅᑕᐅᔪᓐᓇᕐᓂᖏᓐᓂ. ᓄᓇᒧᐊᑕᐃᓐᓇᕋᒥᒃ, 6-ᖑᔪᑦ ᐊᖑᑏᑦ ᖃᐅᓯᓕᑦᑎᐊᓕᓚᐅᖅᐳᑦ ᒪᖁᕐᔪᐊᕐᓂᐅᔪᒧᑦ ᐊᒻᒪ ᒪᓪᓕᓄᑦ. ᐱᐅᙱᒋᐊᓪᓚᒃᑎᑦᑎᔪᒥ ᐊᑕᐅᓯᖅ ᐊᖑᓇᓱᒃᑎᐅᖃᑕᐅᔪᖅ ᐊᓯᐊᓂ ᐅᒥᐊᕐᒦᑦᑐᒥ, ᔨᕌᑦ ᒪᒃᑖᖅ, ᐃᒫᓄᑦ ᑲᑕᓚᐅᖅᐳᖅ ᓯᒡᔭᓕᐊᕋᓱᒃᖢᓂ.
“ᐱᐅᙱᑲᐅᑎᒋᓚᐅᖅᐳᖅ ᐱᒋᐊᕐᓂᖓᓂ,” ᐅᖃᓚᐅᖅᐳᖅ ᔫᓐᔅ. “ᐊᑦᑕᓇᙱᑦᑐᒧᐊᕋᓗᐊᕋᑦᑕ ᓱᓕ ᐱᐅᓚᐅᙱᓚᖅ.”
ᐋᖅᑭᒃᓯᓚᐅᖅᑎᓪᓗᒋᑦ ᐅᖅᑯᐊᖑᓚᐅᑲᖕᓂᐊᖅᑐᒧᑦ ᐊᑐᖅᖢᑎᒃ ᐃᔅᓴᔭᙱᑦᑐᒥ ᐅᓕᖕᒥᑦ ᐊᒻᒪ ᐃᑭᑎᑦᑎᓪᓗᑎᒃ ᓱᐴᔫᕐᓂᑦ ᐅᖅᑰᔾᔪᑕᐅᓇᓱᐊᖅᖢᑎᒃ ᐊᖑᑎᑦ ᓈᓚᐅᑎᒃᑯᑦ ᐃᑲᔪᖅᑕᐅᔪᒪᓚᐅᖅᐳᑦ.
ᖃᖓᒃᑲᓐᓂᐅᓕᖅᑎᓪᓗᒍ ᕼᐅᑭᓕᔅᒥ ᖃᖓᑕᓲᒥ ᖁᓚᐅᓚᐅᖅᐳᖅ ᕿᑭᖅᑕᒥᑦ ᐊᒻᒪ ᑲᑕᒐᐃᓪᓗᑎᒃ ᐱᖁᑎᓂᑦ ᐃᓚᖃᖅᑐᒥ ᓄᑖᓂ ᓈᓚᐅᑎᓂᑦ, ᓂᕿᓂᑦ ᐊᒻᒪ ᐊᓐᓄᕌᓂᑦ. ᐊᓐᓄᕌᑦ ᐸᓂᖅᑐᑦ ᐱᒻᒪᕆᐅᓛᖑᓚᐅᖅᐳᑦ ᑕᒪᕐᒥᓕᒫᑦ ᒪᓴᐅᑦᑎᐊᓚᐅᕐᒪᑕ ᒪᖁᖕᒧᑦ, ᐱᓗᐊᖅᑐᓂ ᒪᒃᑕᖅ, ᓯᓂᒍᓐᓇᓚᐅᙱᑦᑐᒥ ᕿᓗᔨᕐᔪᐊᑲᑕᖕᓂᖓᓂ.
ᐊᐃᑦᑖᖑᒐᓗᐊᖅ, ᐊᓄᕆᕐᔪᐊᕐᓂᖅ ᓄᖅᑲᖅᐸᓪᓕᐊᓚᐅᙱᓚᖅ ᐅᓪᓗᖓᓐᓂ. ᖁᓕᒥᒎᓖᑦ ᑎᑭᑦᑐᓐᓇᓚᐅᙱᓚᑦ ᓴᐳᔾᔨᓂᕐᒧᑦ ᐊᖑᑎᓂᑦ ᑭᓯᐊᓂ ᐊᓄᕌᕈᓐᓃᕈᓂ, ᑐᑭᖃᓚᐅᖅᐳᖅ ᐅᓐᓄᒃᑲᓐᓂᕐᒥ ᕿᑭᖅᑕᒦᓐᓂᕐᒥ.
ᐃᔅᓴᔭᙱᑦᑐᒥ ᐅᓕᐅᑉ ᐊᑖᓃᖦᖢᑎᒃ ᐅᓪᓗᓄᑦ ᒪᕐᕉᖕᓄᑦ, 6-ᖑᔪᑦ ᐊᖑᑏᑦ ᐊᐃᔭᐅᑕᐃᓐᓇᓚᐅᖅᐳᑦ ᖁᓕᒥᒎᓕᒃᑯᑦ ᓈᑦᑎᖑᔭᒥ, ᐊᑖᑕᐅᑉ ᐅᓪᓗᕆᓪᓗᐊᖅᑕᖓᓂ.
ᐊᖏᕐᕋᕐᒪᑕ ᑭᓯᐊᓂ ᐃᓚᒥᓄᑦ ᖃᓱᔪᓐᓇᖅᓯᑕᐃᓐᓇᓚᐅᖅᐳᑦ.
“ᕿᐊᓯᓚᐅᖅᐳᖓ ᐊᐃᑉᐸᕋ ᑕᑯᒐᒃᑯ. ᕿᐊᓱᙳᓈᓘᓚᐅᖅᐳᖅ,” ᐅᖃᓚᐅᖅᐳᖅ ᑰᓕᑦ.