ᐃᒥᖅᑕᕐᓂᕐᒥ ᐊᑕᐅᓯᑐᐊᒧᑦ ᐃᒥᖅᑕᐅᒻᒨᖅᐳᖅ ᑐᐊᕕᕐᓇᖅᑐᒥ ᑭᒡᓕᐅᔪᓄᑦ ᑭᙵᕐᓂ.
ᓱᕋᖃᑦᑕᕐᓂᐅᔪᓄᑦ, ᕼᐋᒻᓚᒃᑯᑦ ᐊᑐᖅᐳᑦ ᐊᑕᐅᓯᑐᐊᒥ ᓄᑖᖑᓛᖑᔪᒥ ᐃᒥᖅᑕᐅᒻᒥ ᓄᓇᓯᐅᒻᒥ, 2019–ᒥ ᓄᓇᓯᐅᑎᐅᔪᒥ, ᐊᒻᒪ ᑕᐃᓐᓇ ᓄᓇᓯᐅᑎ ᐊᒃᓱᕈᖅᑎᑕᐅᓗᐊᒧᑦ ᐱᓕᕆᓂᕐᒧᑦ ᐱᓕᕆᐊᒃᓴᐅᔪᓂ ᐱᖓᓱᓂ ᐃᒥᖅᑕᐅᑎᓂ ᐱᓕᕆᒐᔪᒃᑕᖓᓐᓂ.
photo courtesy of Mike Richards
"ᓄᓇᓯᐅᒻᒥ ᐊᐅᓚᑦᑎᕙᒃᐳᒍᑦ ᐃᑲᕐᕋᓄᑦ 16–ᓂ 24–ᓄᑦ ᐅᓪᓗᑕᒫᑦ, ᒪᓕᒃᑐᒥ ᐱᔭᕆᐊᖃᕐᓂᐅᔪᒥ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑎᑭᑎᑦᑎᓂᐊᖅᐳᖅ ᖃᖓᑕᓲᒃᑯᑦ ᖃᑦᑕᕐᓂ ᐃᒪᕐᓂ ᑭᙵᕐᓄᑦ ᓇᓗᓇᐃᖅᓯᓂᕐᒥ ᓄᓇᖃᖅᑎᐅᔪᑦ ᐃᒪᐃᕈᑎᑦᑕᐃᓕᓂᖏᓐᓂ," ᕼᐊᓯ ᐅᖃᓚᐅᖅᐳᖅ, ᑭᙵᐃᑦ ᓄᓇᓕᖕᓂ ᐊᐅᓚᑦᑎᔨᐅᔪᖅ.
ᑕᐃᓐᓇ ᑭᖑᓪᓕᖅᐹᖅ ᐊᐅᓚᔪᖅ ᐃᒥᖅᑕᐅᑦ ᓄᓇᓯᐅᑎ ᓱᕋᖕᓂᕈᓂ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑎᑭᑎᑦᑎᓂᐊᖅᐳᑦ ᖃᑦᑕᓂ ᐃᒪᕐᓂ ᑭᙵᕐᓄᑦ ᓇᓗᓇᐃᖅᓯᓂᕐᒥ ᓄᓇᖃᖅᑎᐅᔪᑦ ᐃᒪᐃᕈᑎᙱᓐᓂᖏᓐᓂ, ᕼᐊᓯ ᐅᖃᓚᐅᖅᐳᖅ.
"ᑕᐃᒪᐃᑦᑕᕆᐊᖃᔾᔮᙱᑉᐳᒍᑦᑐᖅ ᑕᒪᓐᓇ ᐱᓕᕆᓂᕐᔪᐊᖑᖕᒪᑦ, ᖃᖓᑕᓲᖅ ᑕᑖᕐᓗᓂ ᐃᒪᕐᒥ ᐅᕗᖓ ᑎᑭᑎᑕᐅᓗᓂ," ᐅᖃᓚᐅᖅᐳᖅ ᕼᐊᓯ. "ᓱᓕ ᐊᐱᕆᕗᒍᑦ ᐃᓄᖕᓂ ᐱᐅᖅᓱᐊᕐᓂᖏᓐᓂ ᐃᒪᕐᒥ ᐊᒻᒪ ᑕᐃᒪᐃᑉᐳᑦ. ᐱᑦᑎᐊᖅᑐᒻᒪᕆᐊᓗᐃᑦ, ᐊᒻᒪ ᓲᖃᐃᒻᒪ ᑲᓇᑕᒥ ᐸᓖᓯᒃᑯᑦ ᐊᒻᒪ ᐋᓐᓂᐊᕕᒃ ᐃᒪᖃᖅᑏᓐᓇᕆᐊᖃᖅᐸᕗᑦ ᖃᖓᓕᒫᑦᑎᐊᖅ, ᐊᒻᒪ ᒥᑦᑕᕐᕕᒃ."
ᓄᓇᓕᐅᑉ ᐊᓯᖏᑕ ᐱᖓᓱᑦ ᐃᒥᖅᑕᐅᒻᒥ ᓄᓇᓯᐅᑎᓂᑦ– 2011-2018–ᒧᑦ ᓄᑕᐅᙱᓐᓂᓕᑦ, ᓄᑕᐅᙱᓛᖑᔪᖅ ᑭᖑᕝᕕᕈᑕᐅᔪᖅ – ᓄᑖᓂᒃ ᐃᓚᒃᓴᖅᑖᕆᐊᖃᖅᐳᑦ. ᐃᓇᖏᖅᑕᐅᓂᖓᓂ ᐊᐅᓚᐅᑎ ᔫᓇᐃᑎᑦ ᔅᑕᐃᑦᔅᓂ ᐱᔭᐅᔭᕆᐊᖃᕋᔭᖅᐳᖅ ᐊᑕᐅᓯᕐᒧᑦ, ᓄᑖᒥᒃ ᐅᖅᓱᐊᓗᒃᓴᖓᓄᑦ ᑯᑐᒡᕕᖓᓂ ᐊᓯᐊᓄᑦ. ᑎᑭᓴᖅᑕᐅᓯᒪᕗᑦ, ᑭᓯᐊᓂ ᖃᔅᓯᒐᓚᖕᓂ ᐱᓇᓱᐊᕈᓯᐅᓂᐊᖅᐳᑦ ᐃᓚᒃᓴᖏᓐᓄᑦ ᑎᑭᓐᓂᖏᓐᓄᑦ, ᐅᖃᓚᐅᖅᐳᖅ ᕼᐊᓯ.
"ᐱᓇᓱᐊᕈᓰᑦ ᒪᕐᕉᖕᓂ ᐃᓗᐊᓂ ᐊᖑᒻᒪᑎᓪᓗᐊᖅᐳᒍᑦ, ᑕᐃᒪᑐᖅ," ᐅᖃᓚᐅᖅᐳᖅ.
ᐃᓚᖏᑦ ᓄᓇᖃᖅᑎᐅᔪᑦ ᓄᓇᓕᐅᔪᒥ 1,450–ᓂ ᐅᖃᓗᖃᑦᑕᖅᓯᒪᕗᑦ ᕼᐋᒻᓚᒃᑯᑦ ᑎᑎᕋᕐᕕᖓᓄᑦ ᐅᖃᐱᓗᖕᓂᕐᒧᑦ ᐊᑯᓂᐅᔪᒥ ᐅᑕᖅᑭᔭᕆᐊᖃᕐᓂᐅᔪᒧᑦ ᐃᒥᖅᑕᖅᑕᐅᓂᕐᒧᑦ, ᓄᓇᓕᖕᓂ ᐊᐅᓚᑦᑎᔨᐅᔪᖅ ᓇᓗᓇᐃᖅᓯᕗᖅ. ᓄᓇᓕᐅᑉ ᕙᐃᔅᐳᒃᑯᑦ ᒪᒃᐱᖅᑐᒐᖓ – ᑭᙵᕐᓂ ᑭᓱᕈᓘᔭᖏᓐᓄᑦ – ᖃᔅᓯᒐᓚᖕᓂ ᑎᑎᕋᖅᓯᒪᓂᖃᖅᐳᑦ ᐃᓄᖕᓂ ᑐᒃᓯᕋᖅᑐᓄᑦ ᐃᒥᖅᑕᖅᑕᐅᓂᕐᒧᑦ – ᐃᓚᖏᑦ ᐅᖃᖅᓯᒪᓪᓗᑎᒃ ᐅᓪᓗᒐᓴᓂᑦ ᐅᑕᖅᑭᓂᖏᓐᓂ, ᐃᓚᖏᑦ ᓇᓗᓇᐃᖅᓯᓯᒪᓪᓗᑎᒃ ᓄᑕᕋᓛᖃᕐᓂᖓᓂ ᐃᒡᓗᒋᔭᐅᔪᒥ.
ᐊᐅᓚᐅᓯᕆᔨᓂ ᓇᓗᓇᐃᖅᓯᓂᖏᓐᓄᑦ ᐊᑲᐅᙱᓕᐅᕈᑕᐅᔪᒥ ᐊᒻᒪ ᐋᖅᑭᒃᓯᓂᕐᒧᑦ ᐃᒥᖅᑕᐅᒻᒥ ᓄᓇᓯᐅᒻᒥ ᐊᑲᐅᙱᓕᐅᕈᑕᐅᔪᓂ ᐊᑭᑐᔪᒻᒪᕆᐅᕗᖅ ᐊᒻᒪ ᐊᑯᓂᐅᓗᒃ ᐱᓕᕆᐊᕆᓇᓱᐊᕐᓇᖅᐳᖅ. ᕼᐋᒻᓚᒃᑯᑦ, ᓇᖕᒥᓂᖅ ᐊᐅᓚᐅᓯᕆᔨᖃᙱᖦᖢᑎᒃ ᐃᖅᑲᓇᐃᔭᖅᑎᖏᓐᓂ ᑕᖅᑭᒐᓴᖕᓄᑦ, ᑎᑭᑎᑦᑎᔭᕆᐊᖃᓚᐅᖅᐳᑦ ᖃᖓᑕᓲᒃᑯᑦ ᖃᔅᓯᐊᕐᔪᖕᓂ ᓄᑖᙳᖅᐸᓪᓕᐊᔪᓄᑦ ᐋᖅᑭᒃᓱᐃᔨᐅᔪᓂ ᕼᐊᐃ ᕆᕗᕐ, ᓄᓇᑦᓯᐊᕐᒥ.
"ᖃᓄᒃᑲᓐᓂᖅ ᐱᕕᒃᓴᖃᙱᑉᐳᒍᑦ? ᐅᓪᓘᑉ ᐃᓱᐊᓂ, ᐊᑭᑐᕐᔪᐊᖅᐳᖅ ᑭᓯᐊᓂ ᐱᓕᕆᔭᕆᐊᖃᖅᐸᐃᑦ," ᕼᐊᓯ ᐅᖃᓚᐅᖅᐳᖅ.
ᐊᐅᓚᐅᓯᕆᔩᑦ ᐊᐅᓪᓚᓚᐅᖅᐳᑦ ᐃᑲᔪᕆᐊᖅᑐᖅᖢᑎᒃ ᐊᓯᖏᓐᓂ ᓄᓇᕗᒻᒥ ᓄᓇᓕᐅᔪᓂ ᑭᓯᐊᓂ ᐅᑎᓛᕐᒥᔪᑦ ᐃᓚᒃᓴᖏᑦ ᑎᑭᒃᑯᑎᒃ, ᐅᖃᓚᐅᖅᐳᖅ ᕼᐊᓯ.
ᕼᐋᒻᓚᒃᑯᑦ ᒫᓐᓇᓕᓴᐅᔪᒥ ᐋᔩᖃᑎᖃᖅᓯᒪᕗᑦ ᐊᐅᓚᐅᓯᕆᔨᐅᔪᒥ ᐃᖃᓗᖕᓂᕐᒥᐅᑕᐅᔪᒥ ᓅᓐᓂᖓᓄᑦ ᑭᙵᕐᓄᑦ. ᐱᖓᓱᓄᑦ-ᑕᖅᑭᓄᑦ ᐆᒃᑐᕐᓂᐅᔪᒥ ᐱᓕᕆᓂᐅᔪᒥ ᐱᓕᕆᖃᑎᒌᖑᔪᓂ ᐱᒋᐊᕐᓂᐊᖅᐳᖅ ᐱᓇᓱᐊᕈᓯᐅᓛᖅᑐᒥ, ᓄᓇᓕᖕᓂ ᐊᐅᓚᑦᑎᔨᐅᔪᖅ ᐅᖃᓚᐅᖅᐳᖅ. ᕼᐋᒻᓚᒃᑯᑦ ᐱᔪᒪᕐᔪᐊᕋᔭᖅᐳᑦ ᓄᓇᓕᖕᓂ ᐃᓅᔪᒥ ᓴᖅᑭᑦᑐᒥ ᐱᓕᕆᓂᐅᔪᓄᑦ ᐸᐃᑉᐹᖃᖅᑐᒥ ᐊᐅᓚᐅᓯᕆᔨᙳᖅᑐᒥ ᐊᒻᒪ ᐊᑕᐅᓯᕐᒥ ᒪᒃᑯᒃᑐᒥ ᐊᖑᒻᒥ ᐅᖃᐅᓯᖃᖅᓯᒪᕗᖅ ᐱᔪᒪᓂᖓᓂ, ᕼᐊᓯ ᐃᓚᒋᐊᖅᓯᓚᐅᖅᐳᖅ.
"ᐃᒻᒪᖄ ᐊᕐᕌᒍᓂ ᑕᓪᓕᒪᓂ ᐱᔪᓐᓇᖅᓯᑦᑎᐊᕐᓂᐊᖅᐳᖅ ᐅᓪᓗᓕᒫᖅᓯᐅᑎᐅᓗᓂ, ᐊᐅᐸᖅᑐᒥ–ᓇᓗᓇᐃᒃᑯᑕᓕᖕᒥ ᐊᐅᓚᐅᓯᕆᔨᐅᓂᖓᓂ," ᐅᖃᓚᐅᖅᐳᖅ.
ᐅᖓᑖᓂ ᐱᔭᕆᐊᓕᖕᓂ ᐋᖅᑭᒃᓱᖅᑕᐅᓂᐅᔪᓂ, ᓄᑖᒥ ᐃᒥᖅᑕᐅᒻᒥ ᓄᓇᓯᐅᒻᒥ ᐊᒻᒪ ᓄᑖᒥᒃ ᑯᕕᖅᑕᐅᒻᒥ ᓄᓇᓯᐅᒻᒥ ᑎᑭᑦᑐᒃᓴᐅᑕᐅᕗᑦ ᐅᒥᐊᕐᔪᐊᒃᑯᑦ ᓯᑎᐱᕆᒥ, ᕼᐊᓯ ᐅᖃᓚᐅᖅᐳᖅ.
ᐃᒥᖅᑕᕐᓂᕐᒧᑦ ᐊᑲᐅᙱᓕᐅᕈᑕᐅᔪᓂ ᓄᑖᖑᓂᐅᙱᓚᑦ ᑭᙵᕐᓄᑦ. ᒪᐃᔭ ᑕᐃᒨᓐ ᑐᓐᓄ ᐅᖃᐅᓯᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᒥ ᐊᑕᐅᓯᐅᓪᓗᓂ ᓯᕗᓪᓕᖅᐸᐅᔾᔭᐅᖁᓪᓗᓂᐅᒃ ᓂᕈᐊᖅᑕᐅᑎᓪᓗᒍ ᑎᓯᐱᕆ 2017–ᒥ. ᑐᓐᓄ ᒫᓐᓇᐅᔪᒥ ᒪᕐᕈᖓᓂ ᐱᓕᕆᕗᖅ ᒪᐃᔭᐅᓂᖓᓂ. ᐊᑐᐃᓐᓇᐅᓚᐅᙱᓚᖅ ᐅᖃᐅᓯᒃᓴᓕᐅᕐᓂᕐᒧᑦ ᐊᖑᓇᓱᒋᐊᖅᓯᒪᓚᐅᕐᒪᑦ, ᕼᐋᒻᓚᒃᑯᓐᓂ ᐃᖅᑲᓇᐃᔭᖅᑎᐅᔪᒥ ᐅᖃᓚᐅᖅᐳᖅ.