ᐅᖃᖃᑦᑕᕈᓘᔭᖅᓯᒪᔪᑦ, ᑎᑎᕋᖃᑦᑕᖅᓯᒪᑉᓗᑎᒡᓗ ᖃᓄᐃᓕᔭᐅᓂᐊᕐᒪᖔᑦ ᓯᐊᕐᕆᔮᕐᕕᑐᖃᖅ ᑭᖑᓪᓕᖅᐹᖅᓱᓕᖅᑎᓪᓗᒍ ᐊᑐᖅᑕᐅᓂᐊᕐᓂᖓ ᓄᑖᒧᑦ ᓅᑉᐸᓪᓕᐊᔪᒫᓕᖅᑎᓪᓗᒋᑦ 2019-2020-ᒥ ᑲᖏᖅᖠᓂᕐᒥ.
Photo courtesy Noel Kaludjak
ᓄᑕᐅᙱᑦᑐᖅ ᐱᙳᐊᕐᕕᒃ ᐃᓗᓕᖃᖅᑎᓪᓗᒍ ᒧᒥᕐᕕᖕᒥ, ᒥᑭᔪᒥᒃ ᑰᓕᒡᕕᖕᒥ (Curling), ᐊᒻᒪᓗ ᓈᓚᒡᕕᖕᒥ ᖁᓛᖓᓂ, ᓄᑕᐅᙱᑦᑐᖅ ᐱᙳᐊᕐᕕᒃ ᐊᑑᑎᖃᖅᓯᒪᔪᓪᓚᕆᒃ ᐃᓄᖕᓄᑦ ᑲᖏᖅᖠᓂᕐᒥ Hᐊᑭᓐᓂᑐᐃᓐᓇᐅᙱᑦᑐᒃᑯᑦ – ᐊᑐᖅᑕᐅᙱᓐᓇᑐᐃᓐᓇᕐᓂᐊᖅᑐᖅ.
ᒪᐃᑯ ᓲᑕᐃᔅ ᐅᑭᐅᖅᓯᐅᕋᔪᒃᓯᒪᔪᖅ ᑭᕙᓪᓕᕐᒥ ᐊᕐᕕᐊᓂ ᑲᖏᖅᖠᓂᕐᒥᓗ.
ᓲᑕᐃᔅ ᐅᖃᖅᖢᓂ ᑕᑯᒋᐊᕋᔭᕈᑉᑕᒎᖅ ᖃᓄᐃᓕᐅᕐᕕᐅᕈᓘᔭᖃᑦᑕᖅᑐᓂᒃ ᑲᖏᖅᖠᓂᕐᒥ, ᖃᐅᔨᓐᓇᑲᐅᑎᒋᓇᔭᖅᑐᖅ ᑕᐃᓯᓂᐊᕐᓗᓂ ᓄᓇᓕᖕᒥ ᐃᓄᒋᐊᒐᔪᒃᑐᒥᒃ.
ᐅᖃᖅᖢᓂ ᐊᓯᖏᑦᑕᐅᕉᖅ ᐱᒻᒪᕆᐊᓗᐃᑦ ᐅᐸᒃᑕᐅᒐᔪᒃᑐᑦ – ᓂᐅᕕᕐᕖᑦ ᓂᕿᑖᕐᕖᑦ, ᐃᖃᐃᓕᓴᕐᕖᑦ ᐊᒻᒪᓗ ᐃᓕᓐᓂᐊᕐᕕᐅᑉ ᐃᖃᐃᓕᓴᕐᕕᖓ ᖃᑉᓰᓐᓇᑦ ᑖᑉᑯᐊ ᑕᐃᔭᖏᑦ – ᑭᓯᐊᓂ, ᑕᐃᔭᐅᑲᐅᑎᒋᓇᔭᖅᑐᖅ, ᐃᓄᖕᓄᑦ ᐃᓐᓄᒐᔪᖕᓂᖓᓄᑦ ᐱᙳᐊᕐᕕᒃ-ᓯᐊᕐᕆᔮᕐᕕᒃ ᐊᓕᐊᓇᐃᒋᔭᐅᑦᑎᐊᖃᑦᑕᕐᒪᑦ ᐃᓄᖕᓄᑦ ᓄᓇᖅᑲᑎᒌᖕᓄᑦ.
“ᐅᖃᕋᔭᖅᑐᖓ 90%-ᒋᔭᖏᑦ ᖃᓄᐃᓕᐅᕌᖓᑉᑕ ᐃᓅᖄᑎᒌᖕᓂᒃᑯᑦ ᐱᙳᐊᕐᓂᒃᑯᓪᓗ, ᐃᓅᖃᑎᒌᒃᑎᓪᓗᒋᑦ ᓄᓇᖅᑲᑎᒌᑦ, ᐱᙳᐊᕐᕕᖕᒦᓲᑦ.” ᑕᐃᒪᓐᓇ ᐅᖃᖅᖢᓂ ᓲᑕᐃᔅ
“ᐊᒥᓱᑦ ᐊᑭᓕᖅᑐᖅᑕᐅᙱᖦᖢᑎᒃ ᐃᑲᔪᓲᑦ ᑕᒡᕙᓂ ᓄᓇᓕᖕᒥ ᐊᒻᒪᓗ, ᑕᒪᒃᑯᐊ ᐃᓄᖁᑎᒋᓚᐅᙱᒃᑯᑉᑎᒍᑦ, ᖃᑉᑎᕆᔨᖃᕋᔭᙱᑦᑐᒍᑦ, ᑐᐊᕕᕐᓇᖅᑐᓕᕆᔨᑕᖃᕋᔭᙱᑦᑐᒍᑦ, ᐅᕝᕙᓘᓐᓃᑦ ᓂᕕᐊᖅᓵᑯᓗᐃᑦ ᐃᖃᐃᓕᓴᖅᑎᑕᐅᖃᑦᑕᕋᔭᙱᑦᑐᑦ, ᐊᖅᓴᖅᑎᓂᒃ ᐱᙳᐊᖅᑎᑕᖃᕋᔭᙱᑦᑐᒍᑦ ᐅᕝᕙᓘᓐᓃᑦ Hᐊᑭᕐᓂᒃᑯᑦ ᐃᑲᔫᑎᑕᖃᕋᔭᙱᑦᑐᖅ.
“ᐃᓄᐃᑦ ᐊᑭᓕᖅᑐᖅᑕᐅᙱᓪᓗᑎᒃ ᐃᑲᔪᖃᑦᑕᕋᔭᙱᑉᐸᑕ ᑕᒪᒃᑯᐊ ᐱᑕᖃᕋᔭᙱᑦᑐᑦ, ᑕᐃᒪᐃᒻᒪᑦ ᖁᔭᓐᓇᒦᒻᒪᕆᐊᓗᒃ ᐊᑭᓕᖅᑐᖅᑕᐅᓇᑎᒃ ᐃᑲᔪᖅᑐᖃᕈᒪᖃᑦᑕᕐᒪᑦ.
“ᐊᒻᒪᓗ ᑕᒪᒃᑯᐊ ᖃᓄᐃᓕᐅᕈᑕᐅᕙᒃᑐᑦ ᑕᐃᑲᓃᒐᔪᒃᑐᑦ ᐱᙳᐊᕐᕕᖕᒥ.”
ᓲᑕᐃᔅ ᐅᖃᖅᖢᓂ ᑐᒡᓕᖓᒎᖅ ᐱᒻᒪᕆᐊᓗᒃ ᖃᓄᐃᓕᐅᕈᑕᐅᓲᖅ ᑕᐃᑲᓂ ᐱᙳᐊᕐᕕᖕᒥ ᑮᓇᐅᔾᔭᒃᓴᕋᓱᖕᓂᖅ.
ᐅᖃᖅᖢᓂ Hᐊᒻᒪᒃᑯᒎᖅ ᐱᙳᐊᖅᑐᓕᕆᔨᒃᑯᓐᓄᑦ ᑐᓂᓯᓲᑦ ᐊᕐᕌᒍᑕᒫᒃᑯᑦ ᑮᓇᐅᔭᓂᒃ, ᑮᓇᐅᔭᓕᐊᒃᓴᓂᒃ ᓴᓇᔨᓄᑦ, ᐊᑭᓕᐅᑎᒃᓴᓂᒃ ᐅᖁᖅᓴᖅᓯᒪᔪᓐᓇᖁᑉᓗᒍ ᐱᙳᐊᕐᕕᒃ ᐊᒻᒪᓗ ᖃᓄᐃᓕᐅᖅᑎᑦᑎᔪᓐᓇᕐᓂᕐᒧᑦ ᐃᓚᖓᒍᑦ, ᑭᓯᐊᓂ ᑮᓇᐅᔾᔭᒃᓴᕋᓱᖕᓂᖅ ᐊᔾᔨᐅᙱᑦᑐᒃᑯᑦ ᖃᓄᐃᓕᐅᕈᑕᐅᒐᔪᒃᑐᖅ ᓄᓇᓕᖕᒥ.
“1 ᒥᓕᔭᓐ ᓇᑉᐸᖓᑕ ᐅᖓᑖᒍᑦ ᑮᓇᐅᔾᔭᒃᓴᕐᓂᖃᓲᑦ ᑲᖏᖅᖠᓂᕐᒥ ᐊᕐᕌᒍᑕᒫᒃᑯᑦ ᑕᐃᒪᐃᒻᒪᑦ ᐃᓄᐃᑦ ᖃᓄᐃᓕᐅᖅᑎᑦᑎᕈᓘᔭᓲᑦ ᐊᒻᒪᓗ ᑭᒡᒐᖅᑐᐃᔪᓐᓇᖅᓯᓲᑦ ᑲᖏᖅᖠᓂᕐᒥᐅᓂᒃ ᐱᒻᒪᕆᐅᔪᒃᑯᑦ ᖃᓄᐃᓕᐅᕈᑕᐅᔪᓂᒃ, ᓇᓂᑐᐃᓐᓇᑦᑎᐊᖅ ᑲᓇᑕᒥ.
“ᐱᒻᒪᕆᐊᓗᒃᑯᑦ ᐱᓕᕆᖃᑎᒌᖕᓂᐅᕙᒃᑐᖅ, ᐊᒻᒪᓗ ᑕᑯᖃᑦᑕᖅᑐᒍᑦ ᐱᓕᕆᖃᑎᖃᖅᑐᓂᒃ ᖃᑉᑎᕆᔨᒃᑯᓐᓂᒃ, ᐆᒃᑑᑎᒋᓗᒍ, ᓴᖅᑭᑎᑦᑎᓯᒪᔪᑦ ᐃᓕᓐᓂᐊᕈᑎᓂᒃ, ᐱᖁᑎᓂᒃ ᐊᒻᒪᓗ ᐊᒥᓱᒻᒪᕆᐊᓗᖕᓂᒃ ᐊᓯᖏᓐᓂᒃ ᐱᖁᑎᓂᒃ ᓄᓇᓕᖕᒥ.
“ᐱᓗᐊᖅᑐᒥ, ᐱᙳᐊᕐᓃᑦ ᐊᒻᒪᓗ ᐃᓅᖃᑎᒌᖕᓃᑦ ᑕᐃᑲᓃᖃᑦᑕᖅᑐᑦ ᐱᙳᐊᕐᕕᖕᒥ.
“ᓄᓇᒋᔭᖅᐳᑦ ᑕᑯᒋᐊᕈᑉᓯᐅᒃ, ᐱᓗᐊᖅᑐᒥ ᐅᑭᐅᒃᑯᑦ ᐅᑭᐅᖑᑯᑖᖑᑎᓪᓗᒍ, ᐱᙳᐊᕐᕕᒃ ᑕᐃᑲᓃᙱᑉᐸᑦ ᓇᒧᙵᐅᖃᑦᑕᕋᔭᖅᐸᑦ ᐱᙳᐊᕆᐊᖅᑐᕐᓗᑎᒃ, ᐃᓅᖃᑎᒌᒋᐊᖅᑐᕐᓗᑎᒃ ᐊᒻᒪᓗ ᐃᖃᐃᓕᓴᕆᐊᖅᑐᕐᓗᑎᒃ – ᐅᐊᖏᓛᒃ, ᐃᓱᒪᔪᒪᙱᑦᑐᖓᓘᓐᓃᑦ ᐃᓅᓯᖅᐳᑦ ᖃᓄᐃᓐᓇᔭᕐᒪᖔᑦ ᑕᐃᒻᓇ ᐱᙳᐊᕐᕕᒃ ᐱᑕᖃᕋᔭᙱᑉᐸᑦ.”
ᓲᑕᐃᔅ ᐅᖃᖅᖢᓂ ᐱᒻᒪᕆᐅᓂᖅᐹᖑᖃᑕᐅᔪᕉᖅ Hᐊᒻᓚᒃᑯᑦ ᑲᑎᒪᔨᖏᑦᑕ ᑲᒪᒋᔭᕆᐊᖃᖅᑕᖓ ᒫᓐᓇᑲᐅᑎᒋ ᖃᓄᐃᓕᓂᐊᕐᒪᖔᒍ ᐱᙳᐊᕐᕕᒃ ᓄᑖᖅ ᓯᐊᕐᕆᔮᕐᕕᒃ ᒪᑐᐃᖅᐸᑦ, ᖃᓄᖅ ᐋᖅᑭᒃᓱᖅᑕᐅᓂᐊᕐᒪᖔᑦ, ᐱᕈᖅᑎᑦᑎᓂᐊᕐᒪᖔᑕ ᐃᑲᔫᑕᐅᕙᒃᑐᓂᒃ ᑕᐃᑲᓂ ᐊᒻᒪᓗ ᓱᓇᓂᒃ ᐱᑕᖃᕐᓂᐊᕐᒪᖔᑦ ᓄᓇᓕᐅᑉ ᐱᔭᕆᐊᖃᖅᑕᖏᓐᓂᒃ.
“ᐃᓱᒪᒋᔭᖃᖅᓯᒪᔪᒍᑦ ᖃᔪᖅᑐᕐᕕᒃᑖᖁᑉᓗᒍ ᐃᖃᐃᓕᓴᕐᕕᖕᒥᒡᓗ ᐅᕝᕙᓘᓐᓃᑦ ᓄᑕᖅᑲᓄᑦ ᐱᙳᐊᕐᕕᒃᑖᖁᑉᓗᒍ ᐃᓗᐊᓂ ᐱᙳᐊᕐᕕᖃᓕᖁᑉᓗᒋᑦ,” ᑕᐃᒪᓐᓇ ᐅᖃᖅᖢᓂ ᓲᑕᐃᔅ.
ᐃᓱᒪᒋᔭᐅᓯᒪᔪᑦ ᐊᒥᓲᔪᑦ, ᐊᒻᒪᓗ ᐋᖅᑭᒃᓱᐃᑦᑎᐊᖅᓯᒪᓇᓱᒃᑐᒍᑦ ᐱᔪᓐᓇᕐᓂᓗᒃᑖᒃᑯᑦ, ᑭᓯᐊᓂ ᑕᐃᒻᓇ ᐱᙳᐊᕐᕕᒃ ᓄᓇᖅᑲᑎᒌᖕᓄᑦ ᐱᒻᒪᕆᐅᑎᑕᐅᖕᒪᑦ ᐅᑭᐅᓗᒃᑖᒃᑯᑦ, ᐱᓗᐊᖅᑐᒥ ᐅᑭᐊᒃᓵᒃᑯᑦ ᐅᑭᐅᒃᑯᓪᓗ ᑕᖅᑭᕆᔭᐅᔪᓂᒃ.
“ᐃᓅᖃᑎᒌᖕᓂᕐᓗ – ᐃᓄᐃᑦ ᑲᑎᑦᑐᓐᓇᖃᑦᑕᕐᒪᑕ ᐅᖃᖃᑎᒌᒃᐸᒃᖢᑎᒃ, ᓄᑕᖅᑲᓪᓗ ᑕᐃᑲᓃᑉᐸᒃᖢᑎᒃ 8:00-ᒧᐊᖅᓯᐊᕆᑉᓗᒍ ᐅᓐᓄᒃᑯᑦ ᐅᓐᓄᑕᒫᒃᑯᑦ, ᑲᑎᑎᑕᐅᔪᓪᓗ ᑕᐃᑲᓂ ᑲᑎᑉᐸᒃᖢᑎᒃ, ᓂᕆᕕᒡᔪᐊᖅᐸᒃᖢᑎᒃ, ᐃᓅᖃᑎᒌᒃᐸᒃᖢᑎᒃ, ᒧᒥᖅᐸᒃᖢᑎᒃ, ᐃᓄᐃᑦ ᑲᑎᒪᑎᑕᐅᕙᒃᖢᑎᒃ, ᑲᑎᒪᔪᖃᖅᐸᒃᖢᓂᓗ, ᑲᑎᒪᕐᔪᐊᖅᑐᓪᓗ ᑕᐃᒪᐅᕙᒃᑐᑦ ᐊᒻᒪᓗ ᐃᒻᖏᕆᐊᖅᑐᖅᓯᒪᔪᖃᖅᐸᒃᖢᓂ – ᐱᒻᒪᕆᐅᓂᖓ ᐆᒃᑐᕋᖅᑕᐅᔪᓐᓇᙱᑦᑐᕐᓘᓐᓃᑦ.
“Hᐊᑭᕐᕕᖕᒧᑦ ᐱᔾᔪᑎᖃᑐᐃᓐᓇᙱᑦᑐᑦ, ᐃᓐᓄᓪᓚᕆᖃᑦᑕᕐᒪᑦ ᐱᙳᐊᕆᐊᖅᑐᖅᓯᒪᔪᖃᖅᑎᓪᓗᒍ ᓄᓇᓕᖕᓂᒃ, ᐃᓅᖃᑎᒌᖕᓂᕐᒧᑦ ᑐᕌᖓᔪᖅ ᓄᓇᖅᑲᑎᒌᒃᑐᒃᑯᑦ.”
ᑕᐃᕕᑎ ᑲᓛᒃ ᑲᖏᖅᖠᓂᕐᒥ ᐱᙳᐊᖅᑐᓕᕆᔨᐅᓕᖅᑐᖅ ᐊᒥᓱᓂᒃ ᐅᑭᐅᓂᒃ ᐊᒻᒪᓗ ᐱᓕᕆᐊᒃᓴᖃᖅᐸᒃᑐᖅ ᓇᓗᓇᐃᔭᐃᖃᑦᑕᕐᓂᕐᒧᑦ ᑭᒃᑯᑦ ᑕᐃᑲᓂ ᐱᙳᐊᕐᕕᖕᒥ ᓱᓕᕆᓂᐊᕐᒪᖔᑕ, ᐊᐅᓚᑕᐅᓂᖏᓐᓂᒃ ᐅᔾᔨᖅᑐᖅᑎᐅᔪᖅ, ᐊᒻᒪᓗ ᐱᐅᓂᖅᐹᒃᑯᑦ ᐊᑑᑎᖃᕈᓐᓇᖁᑉᓗᒍ ᐱᙳᐊᕐᕕᒃ ᒥᑭᓗᐊᓕᖅᑑᒐᓗᐊᖅ ᓄᓇᓕᐅᔫᑉ ᐱᔭᕆᐊᖃᖅᐸᒃᑕᖏᑦ ᒪᓕᒃᖢᒋᑦ.
ᑲᓛᒃ ᐅᖃᖅᖢᓂ ᐱᔭᕆᐊᑐᔫᓕᖃᑦᑕᖅᑐᕉᖅ ᐋᖅᑭᒃᓱᐃᓇᓱᒃᖢᓂ ᑎᒥᐅᔪᑦ ᐱᓕᕆᖃᑎᒌᒃᑏᓪᓗ ᑮᓇᐅᔾᔭᒃᓴᕈᒪᓇᓱᒃᑎᓪᓗᒋᑦ ᖃᓄᐃᓕᐅᖅᑎᑦᑎᔪᒪᑎᓪᓗᒋᑦ ᖃᓄᐃᓕᐅᖅᑎᑦᑎᔪᖃᓕᐊᓂᒃᑎᓪᓗᒍ.
ᐅᖃᖅᖢᓂ ᖃᓄᐃᓕᐅᖅᑐᖃᕐᔪᐊᖅᑎᓪᓗᒍᒎᖅ ᐃᓐᓄᒃᑐᒻᒪᕆᐊᓘᖃᑦᑕᕐᒪᑦ ᐊᒻᒪᓗ ᐃᑲᔫᑕᐅᒻᒪᕆᖃᑦᑕᖅᖢᑎᒃ ᓄᓇᓕᐅᔪᖅ ᑮᓇᐅᔾᔭᒃᓴᕋᓱᒃᑎᓪᓗᒍ, ᑭᓯᐊᓂ ᐊᓯᖏᑦᑕᐅᖅ ᐱᒻᒪᕆᐊᓘᖕᒥᖕᒪᑕ, ᓲᕐᓗ 100-ᖏᓐᓃᑦᑐᑦ ᓄᑕᖅᑲᑦ ᐱᙳᐊᕐᕕᓕᐊᓲᑦ ᐅᑉᓗᑕᒫᒃᑯᑦ ᓯᐊᕐᕆᔮᕆᐅᖅᓴᖅᖢᑎᒃ, ᓯᐊᕐᕆᔮᕆᐊᖅᑐᖅᖢᑎᒡᓗ ᐃᓄᖕᓄᑦ ᒪᑐᐃᖓᓕᕌᖓᑦ ᑭᒃᑯᑐᐃᓐᓇᕐᓄᑦ, ᐃᖃᐃᓕᓴᕆᐊᖅᑐᖅᑐᓪᓗ, ᐊᒻᒪᓗ ᑕᐃᑲᓃᑐᐃᓐᓇᖅᑐᓪᓘᓐᓃᑦ ᑭᐱᙳᐃᔭᕆᐊᖅᑐᖅᖢᑎᒃ.
“ᓄᓇᓕᖕᒥ ᑎᒥᐅᔪᑦ ᐊᒻᒪᓗ ᓴᓇᔨᒃᑲ ᐅᕙᖓᓗ ᐱᓕᕆᓇᓱᒃᐸᒃᑐᒍᑦ ᑕᒪᐃᓐᓂᒃ ᐃᓄᖕᓂᒃ ᖁᕕᐊᓱᒃᑎᑦᑎᓇᓱᒃᖢᑕ ᐊᒻᒪᓗ ᓱᓇᓗᒃᑖᑦ ᐊᐅᓪᓛᑦᑎᐊᖅᑎᓐᓇᓱᒃᖢᒋᑦ, ᑭᓯᐊᓂ ᐱᔪᓐᓇᕐᓂᑉᑎᓐᓃᓐᓇᖅ ᐱᓇᓱᐊᕈᓐᓇᖃᑦᑕᕋᑉᑕ ᐊᑐᕈᓐᓇᖅᑕᖅᐳᑦ ᐊᑐᖅᖢᒋᑦ,” ᑕᐃᒪᓐᓇ ᐅᖃᖅᖢᓂ ᑲᓛᒃ.
“ᐱᒻᒪᕆᐊᓗᒃ ᓴᙱᔪᒥᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᖃᕆᐊᖃᕐᓂᑉᑎᓐᓄᑦ ᓄᑕᐅᙱᑦᑐᒧᑦ ᐱᙳᐊᕐᕕᖕᒧᑦ ᓄᑖᖅ ᓯᐊᕐᕆᔮᕐᕕᒃ ᒪᑐᐃᖅᐸᑦ.”
ᑲᓛᒃ ᐅᖃᖅᖢᓂ Hᐊᒻᓚᒃᑯᒡᒎᖅ ᑮᓇᐅᔭᓂᒃ ᐆᒃᑐᖅᑐᑦ ᓄᑖᙳᖅᑎᑦᑎᔪᒪᑉᓗᑎᒃ ᐱᙳᐊᕐᕕᖕᒥᒃ.
ᐅᖃᖅᖢᓂ ᓄᑖᙳᖅᑎᕆᓂᖅ ᐊᖏᓪᓕᒋᐊᖅᑎᑦᑎᓂᕐᓗ ᐱᒻᒪᕆᐊᓘᓂᐊᕐᒪᑦ ᐱᙳᐊᕐᕕᒃ ᓯᕗᒻᒧᐊᒋᐊᖁᑉᓗᒍ.
“ᑮᓇᐅᔭᖅᑖᕋᓱᒃᑐᒍᑦ ᐊᖏᓪᓕᒋᖅᑕᐅᖁᑉᓗᒍ ᐱᙳᐊᕐᕕᒃ ᐊᒻᒪᓗ ᐱᐅᓯᒋᐊᖁᑉᓗᒍ.
“ᖃᓄᐃᓕᐅᕈᑎᒃᓴᑦ ᓴᖅᑭᑎᑕᐅᔪᒫᖅᑐᑦ ᐊᒻᒪᓗ ᑕᐃᒪᐃᑦᑐᕈᔪᐃᑦ ᑲᒪᒋᔭᐅᓂᐊᖅᑐᑦ ᑲᑎᒪᔨᓄᑦ ᐅᖃᖃᑎᖃᑦᑎᐊᕐᓗᑎᒃ ᓄᓇᓕᖕᒥ.
“ᑭᓯᐊᓂ, ᒫᓐᓇᐅᔪᖅ, ᑮᓇᐅᔭᖅᑖᕈᒪᓂᖅ ᓄᑖᙳᖅᑎᕆᔾᔪᑎᓄᑦ ᐊᖏᓪᓕᒋᐊᖅᑎᑦᑎᔪᒪᓂᕐᒧᓪᓗ ᐃᓱᒫᓘᑕᐅᓂᖅᐹᖑᔪᖅ ᓄᑖᒥᒃ ᐱᙳᐊᕐᕕᒃᑖᓕᒑᙱᓐᓇᑉᑕ ᑲᖏᖅᖠᓂᕐᒥ ᕿᓚᒻᒥᐅᔪᒃᑯᑦ.
“ᑕᐃᒪᐃᒻᒪᑦ, ᓄᑖᖅ ᓯᐊᕐᕆᔮᕐᕕᒃ ᒪᑐᐃᖅᐸᑦ, ᓴᖅᑭᑎᑦᑎᔭᕆᐊᖃᕐᓂᐊᖅᑐᒍᑦ ᓄᓇᓕᐅᑉ ᐱᔪᒪᔭᖏᓐᓂᒃ ᑕᐃᑲᓂ ᓄᑕᐅᙱᑦᑐᒥ ᐱᙳᐊᕐᕕᖕᒥ ᑭᓯᐊᓂ ᓴᖅᑭᑎᑦᑎᔪᓐᓇᔾᔮᙱᑦᑐᒍᑦ ᑕᐃᒪᐃᑐᐃᓐᓇᖅᑎᓪᓗᒍ ᒥᑭᓗᐊᖅᑎᓪᓗᒍ ᐊᒻᒪᓗ ᓄᑕᐅᙱᓗᐊᖅᑎᓪᓗᒍ.”