Skip to content

ᐊᑐᖅᑕᐅᓪᓚᕆᒃᓯᒪᔪᒥ ᐅᓂᒃᑳᕆᔭᐅᓯᒪᔪᒥ ᐃᓄᑐᖃᕐᒧᑦ ᐅᐊᒋᔭᐅᕗᖅ

ᐊᑏᓐ ᐊᑕᑕᕼᐊᒃ ᐊᒻᒪ ᑕᐱᓴ ᔅᑎᐅᕆᑦ ᓱᕋᒃᓯᓯᒪᕗᑦ ᓄᓇᕐᔪᐊᒥ ᓇᐃᑦᑐᓂ ᐊᑐᖅᑕᐅᓯᒪᓪᓚᕆᒃᓯᒪᔪᓂᑦ ᐊᖏᔪᕐᒧᐊᒻᒪᕆᐊᓘᔪᒥ.

ᖁᕐᓗᖅᑐᕐᒥ ᐃᓅᓱᒃᑐᑦ ᐊᑏᓐ ᐊᑕᑕᕼᐊᒃ ᐊᒻᒪ ᑕᐱᓴ ᔅᑎᐅᕆᑦ ᑐᑭᒧᐊᒃᑎᑦᑎᓚᐅᖅᐳᑦ ᓵᓚᖃᐅᓯᐊᒥ−ᓵᓚᖃᖅᑐᒥ ᓇᐃᑦᑐᒥ−ᐊᑐᖅᑕᐅᓪᓚᕆᒃᓯᒪᔪᒥ ᐅᓂᒃᑳᕆᔭᐅᓯᒪᔪᒥ ᐃᓄᑐᖃᕐᒧᑦ ᐋᓚᓯ "ᕼᐃᑦᑯᐊᒃ" ᐊᔭᓕᖕᒥ ᖃᓂᒋᔮᓃᑦᑐᓂ 70,000−ᓂ ᑕᑯᔭᐅᓯᒪᓂᐅᓕᖅᑐᒥ ᕙᐃᔅᐳᒃᑯᑦ.

ᑕᕐᕆᔭᓕᐊᖓ ᖁᕐᓗᖅᑐᒥ ᐃᓄᑐᖃᕐᒧᑦ ᐋᓚᓯ "ᕼᐃᑦᑯᐊᒃ" ᐊᔭᓕᒃ ᓵᓚᖃᓚᐅᖅᐳᖅ ᐱᐅᓛᖑᔪᒥ ᐊᑐᖅᑕᐅᓪᓚᕆᒃᓯᒪᔪᒥ ᐅᓂᒃᑳᕆᔭᐅᓯᒪᔪᒥ ᓵᓚᖃᐅᓯᐊᖓᓐᓂ ᑎᐱᓕᓯ ᓄᓇᕐᔪᐊᒥ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᑕᕐᕆᔭᓕᐊᓄᑦ ᖁᕕᐊᓱᒍᑕᐅᔪᓄᑦ ᐊᒻᒪ ᖃᕋᓴᐅᔭᑎᒍᑦ ᐱᐅᒋᔭᐅᕐᔪᐊᖅᓯᒪᕗᖅ.

ᑕᕐᕆᔭᓕᐊᖑᔪᖅ, ᑕᐃᔭᐅᔪᒥ ᕼᐃᑦᑯᐊᒃ−ᖑᔪᖓ, ᓴᖅᑭᑎᑕᐅᓚᐅᖅᐳᖅ ᑕᕐᕆᔭᓕᐅᓄᑦ ᒪᒃᑯᒃᑐᓄᑦ ᕙᐃᔅᐳᒃᑯᑦ ᒪᒃᐱᖅᑐᒐᖓᓐᓄᑦ ᔪᓚᐃ−ᕿᑎᖅᐸᓯᐊᓂ. ᑕᐃᒪᙵᓂ ᖁᙱᐊᖅᑕᐅᓯᒪᕗᖅ 70,000−ᑲᓴᖕᓂᑦ ᐊᒻᒪ ᓴᖅᑭᑎᑕᐅᒃᑲᓐᓂᖅᐸᒃᖢᓂ ᐃᓄᖕᓂ 1,600−ᖏᖅᓱᖅᑕᐅᓪᓗᓂ.

"ᐅᐊᑲᓪᓚᖔ, ᑲᒪᓇᖅᑐᐊᓗᒃ," ᐅᖃᓚᐅᖅᐳᖅ ᔅᑎᐅᕆᑦ, ᐋᓐᑎᐊᕆᐅᒥᐅᑕᐅᓕᖅᑐᖅ. "ᖃᒪᕐᔪᐊᖅᐳᖓ ᐱᐅᒋᔭᐅᓂᖓᓂ."

ᔅᑎᐅᕆᑦ ᐊᒻᒪ ᐊᑕᑕᕼᐊᒃ ᐱᓇᓱᐊᕈᓯᑲᓴᖕᒥ ᐊᔭᓕᖕᒦᖃᑎᖃᓚᐅᖅᐳᑦ ᑕᕐᕆᔭᓕᐅᖅᑎᓪᓗᒋᑦ ᐊᕐᕌᓂ. ᑕᐃᓐᓇ ᐊᔾᔨᓕᐅᖅᑕᐅᓂᖅ ᒥᒃᖠᒋᐊᖅᑕᐅᓚᐅᖅᐳᖅ 6 ᒥᓂᑦ ᐊᒻᒪ 25 ᓴᑲᓐᓄᑦ.

ᑕᕐᕆᔭᓕᐊᖅ ᒪᑐᐃᖅᐳᖅ ᐊᔭᓕᒃ ᐱᙳᐊᖅᖢᓂ ᑭᔪᖕᓄᑦ ᐱᙳᐊᕈᓯᓂᑦ ᐊᒻᒪ ᐃᖅᑲᐃᓂᖃᖅᖢᓂ ᓱᕈᓯᐅᓂᕆᓚᐅᖅᑕᒥᓂᑦ, ᐅᔭᖅᑲᓂᑐᐊᖅ ᐱᙳᐊᖃᖅᖢᓂ ᐊᒻᒪ ᐊᑐᖅᖢᓂᐅᒃ ᐃᓱᒪᒋᔭᒥᐊᒥᓂᑦ ᐊᓯᔾᔩᓂᕐᒧᑦ ᑖᒃᑯᓇᓂ ᐅᔭᖅᑲᓂ ᐊᔾᔨᒌᙱᑦᑐᓄᑦ ᐱᖁᑎᓄᑦ ᓲᕐᓗ ᐃᒡᓗᒧᑦ ᐊᒻᒪ ᐃᕐᙳᓯᓄᑦ.

ᐅᖃᓪᓚᖕᓂᖃᖅᐳᖅ ᐱᐅᒋᓂᖅᓴᐅᓂᖏᓐᓂ ᐱᖅᑯᓯᑐᖃᖅᑎᒍᑦ ᓂᕆᐅᓯᖃᕐᓂᕐᒧᑦ ᑐᒃᑐᒥ, ᐃᖃᓗᒃ ᐊᒻᒪ ᓇᑦᑎᕐᒥ, ᐊᒻᒪᓗ ᐃᖅᑲᐅᒪᕗᖅ ᐊᒃᓱᕈᕐᓇᕐᓂᐅᓚᐅᖅᑐᒥ ᐃᒻᒥᓂᒃ ᐊᒻᒪ ᐃᓄᖕᓂ ᓯᕕᕚᖏᓐᓂ ᐊᑐᓚᐅᖅᓯᒪᔭᖏᓐᓂ.

"ᓂᕿᒃᓴᖃᙱᑎᓪᓗᒍ ᐊᑐᐃᓐᓇᐅᔪᒥ, ᐆᑦᑎᕙᓚᐅᖅᐳᑦ ᑲᒪᖏᓐᓂ ᐊᒻᒪ ᐊᑐᖓᖏᓐᓂ ᐆᒪᓇᓱᐊᕐᓂᕐᒧᑦ," ᐅᖃᖅᐳᖅ ᐃᓄᐃᓐᓇᖅᑐᓐ ᖃᓪᓗᓈᑎᑐᑦ ᑎᑎᕋᖅᓯᒪᓂᖃᖅᖢᓂ ᑐᑭᓕᐅᕆᔪᒥ ᐅᖃᐅᓯᖏᓐᓂ ᑕᕐᕆᔭᐅᑉ ᐊᑎᖓᓐᓂ.

ᐊᔭᓕᒃ ᐃᓚᒋᐊᖅᓯᕗᖅ ᓂᕿᓂᑦ ᓂᕿᖃᖅᑎᑦᑎᓂᕐᒥ ᐊᒻᒪ ᐱᖁᑎᓂᑦ ᑭᓇᓕᒫᒨᖅᑎᑦᑎᓂᖅ ᐊᑐᖅᑕᐅᒐᔪᖕᓂᐅᓚᐅᖅᐳᖅ ᐊᒻᒪ ᐱᓪᓚᕆᐅᓪᓗᓂ ᐊᑐᖅᑕᐅᓂᐅᓪᓗᓂ.

ᔅᑎᐅᕆᑦ, 13, ᑲᒪᕐᔪᐊᓚᐅᖅᐳᖅ ᑐᓵᓂᕐᒧᑦ ᖃᓄᖅ ᐃᓅᓯᖃᑉᐸᓚᐅᕐᓂᖏᓐᓂ.

"ᐊᓕᐊᓇᐃᒋᑦᑎᐊᓚᐅᖅᑕᒃᑲ ᐅᓂᒃᑳᖅᑐᐊᖏᓐᓂᑦ. ᑐᓴᕈᒥᓇᑦᑎᐊᓚᐅᖅᐳᑦ," ᐅᖃᓚᐅᖅᐳᖅ. "ᐃᓄᑦᑎᐊᕙᒻᒪᕆᐊᓗᒃ."

ᔅᑎᐅᕆᑦ ᐊᒻᒪ ᐊᑕᑕᕼᐊᒃ ᐅᖃᓚᐅᖅᐳᑦ ᑕᕐᕆᔭᓕᐅᕐᓂᕐᒥ ᐱᓕᕆᓂᖃᓛᕈᒪᕗᑦ ᓯᕗᓂᒃᓴᐅᔪᒥ.

ᕼᐃᑦᑯᐊᒃ−ᖑᔪᖓ ᐊᒻᒪ ᖃᔅᓯᒐᓚᐃᑦ ᐊᓯᖏᓐᓂ ᓇᐃᑦᑐᓂ−ᐊᑐᖅᑕᐅᓪᓚᕆᒃᓯᒪᔪᒥ ᐅᓂᒃᑳᕆᔭᐅᓯᒪᔪᓂ ᑕᕐᕆᔭᓕᐊᖑᔪᓂ ᖁᕐᓗᖅᑑᒥ ᐊᕐᕌᓂ ᑲᑐᔾᔭᐅᓪᓗᑎᒃ ᐊᒃᓱᕈᕈᑕᐅᕗᖅ ᐅᑯᓇᓂ ᕼᐋᒻᓚᒃᑯᓐᓂ ᖁᕐᓗᖅᑐᒥ ᓯᕗᒻᒧᑦ ᐃᖏᕐᕋᓂᖅ ᑲᑎᙵᓗᑎᒃ ᐱᓕᕆᐊᖑᔪᒧᑦ ᐊᒻᒪ ᑕᕐᕆᔭᓕᐊᓄᑦ ᒪᒃᑯᒃᑐᓄᑦ, ᑲᓇᑕᒥ ᑲᑐᔾᔨᖃᑎᒌᖑᔪᒥ ᖁᕝᕙᖅᓴᐃᔪᒥ ᑕᑯᒃᓴᐅᓂᐅᔪᒥ ᓴᓇᐅᒐᓕᕆᓂᕐᓂ ᒪᒃᑯᒃᑐᓄᑦ.

"ᑲᒪᓇᖅᑐᐊᓘᓪᓗᓂ ᐱᓕᕆᑦᑎᐊᕐᓂᐅᕗᖅ ᑖᒃᑯᓄᖓ," ᓯᕗᒻᒧᑦ ᐃᖏᕐᕋᓂᖅ ᑲᑎᙵᓗᑎᒃᑯᑦ ᔅᑕᕙᓂ ᕙᒧᕐᑎᓐ ᐅᖃᓚᐅᖅᐳᖅ ᐊᑕᑕᕼᐊᒃ ᐊᒻᒪ ᔅᑎᐅᕆᑦ ᐊᒃᓱᕈᕐᓂᖓᓐᓂ. "ᑕᐃᒪᓱᖅ ᐃᒃᐱᒍᓱᖕᓂᐊᖅᐳᑦ ᐱᓕᕆᑦᑎᐊᕐᓂᖏᓐᓂ ᐊᒻᒪ ᐅᐱᒋᔾᔪᑎᒋᓂᐊᖅᐸᖓᑦ ᐃᒻᒥᖕᓄᑦ ᐃᓅᓯᓕᒫᖓᓐᓂ."

ᑕᕐᕆᔭᓕᐅᕐᓂᕐᒧᑦ ᐱᒋᐊᕈᑕᐅᔪᖅ ᐱᖓᔪᖓᓐᓂ ᐊᕐᕌᒍᖓᓃᓕᖅᐳᖅ, ᓯᕗᓂᐊᓂ ᐱᓕᕆᐊᖑᓂᐅᔪᓂ ᐃᓚᖃᖅᑐᒥ ᒪᕋᕐᒧᑦ ᐃᓄᙱᐊᓕᕆᓂᐅᔪᒥ– ᐅᕝᕙᓘᓐᓃᑦ "claymation" – ᑕᕐᕆᔭᓕᐊᖑᔪᑦ ᐊᐅᓚᓂᖃᖅᑐᓂ 10 ᓴᑲᓐᓂ ᐊᒻᒪ ᐅᖃᐅᓯᖃᖅᖢᑎᒃ ᐅᖃᐅᓯᒃᓴᓂ ᐊᒃᑐᐃᓂᐅᔪᓄᑦ ᓄᓇᓕᖕᓂ, ᐅᖃᓚᐅᖅᐳᖅ ᕙᒧᕐᑎᓐ. ᒪᒃᑯᒃᑐᑦ ᑐᕌᖅᑕᐅᔪᑦ ᐱᓕᕆᐊᖑᔪᓄᑦ ᑕᐃᒃᑯᐊᖑᕗᑦ ᐱᕕᒃᓴᖃᙱᓐᓂᖃᓚᐅᖅᑐᓄᑦ ᓄᓇᓕᐊᒐᔪᖕᓂᕐᒧᑦ ᐊᒻᒪ ᐱᕚᓪᓕᕈᑎᖃᕈᓐᓇᖅᑐᓂ ᑲᑎᙵᓂᖃᖅᑎᑕᐅᓂᖏᓐᓂ ᐃᓄᑐᖃᕐᓂᑦ, ᕙᒧᕐᑎᓐ ᐅᖃᓚᐅᖅᐳᖅ.

"ᓴᙱᔪᒻᒪᕆᐊᓗᒃ," ᐅᖃᓚᐅᖅᐳᖅ.

https://www.facebook.com/ReelYouth/videos/10155416882705759/

https://www.facebook.com/ReelYouth/videos/10155416882705759/