ᓇᓄᖅ ᑕᒪᐅᖓ ᓄᓈᖅᓯᒪᓚᐅᕐᒪᑦ ᐃᖃᓗᐃᑦ ᖃᓂᒋᔭᖓᓄᑦ ᒫᓐᓇᑦᑎᐊᖅ ᐱᓇᓱᐊᕈᓯᐅᓚᐅᖅᑐᒥ ᑭᓯᐊᓂᓕ ᖃᓂᒃᓕᒃᑲᓐᓂᓚᐅᖏᑦᑐᖅ ᑕᑯᔭᐅᓴᐅᑎᒋᒃᑲᓐᓂᑐᐊᕋᒥ.
ᔭᔅᑎᓐ ᕕᓐᓴᓐᑦ ᑕᑯᔭᕕᓂᐊ ᓂᐊᖁᓐᖒᑉ ᐊᖅᑯᑎᐊᓃᓕᖅᑎᓪᓗᒍ ᐊᒻᒪᓗ ᐊᓱᐃᓛᒃ ᖁᑭᕐᓂᖅᖢᓂᐅᒃ ᐱᖓᓱᐊᖅᑎᖅᖢᓂ ᖁᑭᒋᐊᖅᖢᓂᐅᒃ ᑭᓯᐊᓂ.
“ᐱᖃᑎᒐᓗ ᒥᑭᒋᐊᓐᓂᐊᖅᓯᒪᑎᓪᓗᓪᓄᒃ, ᓄᓇᒥ ᐱᓱᓲᔭᖅᑎᓪᓗᓄᒃ ᐊᖅᑯᓵᖅᓯᓚᐅᕋᓐᓄᒃ ᓇᓄᐊᓘᑉ ᑐᒥᖏᓐᓂᒃ. ᐊᓱᐃᓛᒃ ᒪᓕᓕᓚᐅᖅᑕᕗᑦ,” ᕕᓐᓴᓐᑦ ᐃᖅᑲᐅᒪᔭᒥᓂᒃ ᐱᕙᓪᓕᐊᔪᓕᕆᔨᒧᑦ ᐅᓂᒃᑳᓚᐅᖅᑐᖅ.
ᐊᓱᐃᓛᒃ ᖃᓂᒃᓕᓕᖅᖢᑎᒃ ᑖᓱᒧᖓ ᖁᑭᒋᐊᒐᒃᓴᐅᓕᖅᑎᓪᓗᒍ ᐳᑭᖅᑕᓕᒃᑯᓐᓂᒃ ᑕᑯᔪᕕᓃᑦ, ᐅᖃᐅᔾᔭᐅᓪᓗᑎᒃᓗ ᓇᓄᐊᓗᒃ ᖃᓂᑦᑐᒦᓐᓂᕋᖅᑕᐅᓪᓗᓂ.
ᕕᓐᓴᓐᑦ, 19-ᓂᒃ ᐊᕐᕌᒍᓕᒃ ᕿᓂᓕᖅᑐᕕᓂᖅ ᐊᒻᒪᓗ ᓇᓂᓪᓗᓂᐅᒃ ᑖᓐᓇ ᓇᓄᖅ ᖁᑭᐅᑎᒥ ᕿᖑᒥᒐᐅᑎᖓᒍᑦ ᐃᖅᓯᓵᖅᑐᐊᓗᒃ ᑕᐅᑐᓕᖅᖢᓂᐅᒃ ᐅᖓᓯᒃᑲᓗᐊᖅᑎᓪᓗᒍ ᓱᓕ.
“ᐅᓪᓚᓕᓚᐅᖅᑐᖓ ᑖᕗᖓ ᖁᑭᖅᖢᒍᓗ,” ᐅᖃᕆᓪᓗᓂ. “ᒪᑐᐃᖓᓱᖓᖅᑎᓪᓗᒍ ᓱᓕ ᓇᓐᓄᕆᐊᕐᓇᕐᕕᒃ ᐊᒻᒪᓗ ᑭᖑᓪᓕᖅᐹᒥ ᓇᓐᓄᕈᓐᓇᐅᑎ ᓂᕕᖓᑕᖅ ᐱᓚᐅᖅᑕᕋ.
ᐃᓛᖏᓛᒃ ᓇᓐᓄᕆᐅᕈᑎᒋᒐᓗᐊᖅᖢᓂᐅᒃ, ᐊᒻᒪᓗ ᐊᙳᑎᓇᓱᐊᖅᖢᒍ ᐅᓪᓚᓚᐅᕋᓗᐊᖅᖢᓂ, ᕕᓐᓴᓐᑦ ᐅᓂᒃᑳᓚᐅᖅᑐᖅ ᖁᕐᓗᒃᓯᒪᓚᐅᖏᑦᑐᕉᖅ ᑎᒥᖓ ᓱᒃᑲᓕᓴᓕᕋᓗᐊᖅᑎᓪᓗᒍ ᓴᔪᓕᓚᐅᖏᑦᑐᖅ ᐃᓱᒪᑦᑎᐊᓚᐅᖅᑐᕉᖅ.
“ᑕᐃᒪᖓᓂᑦ ᐅᔾᔨᖅᓱᑦᑎᐊᕆᐊᖃᕐᓇᕐᒪᑦ ᐊᖑᓇᓱᒋᐊᖅᓯᒪᓪᓗᓂ,” ᐅᖃᕆᓪᓗᓂ. “ᓱᒃᑲᐃᓪᓗᑎᑦ ᐃᓱᒪᒃᓴᖅᓯᐅᑦᑎᐊᕐᓗᑎᑦ ᖁᑭᖅᓯᑦᑎᐊᕐᓇᕐᒪᑦ ᑭᓯᐊᓂ.
ᐊᒥᓱᓄᑦ ᓇᓄᖅ ᑖᓐᓇ ᕿᓂᖅᑕᐅᓕᓚᐅᖅᑐᖅ - ᖁᑭᐅᓯᔭᖅᑐᓄᑦ - ᐊᒻᒪᓗᑦᑕᐅᖅ ᐅᓄᖅᓯᓚᐅᕐᒥᔪᑦ ᑕᑯᔭᖅᑐᖅᓯᒪᔪᑦ ᑕᒪᐅᖓ, ᕕᓐᓴᓐᑦ ᐃᖅᑲᐅᒪᔭᒥᓂᒃ ᐅᓂᒃᑳᖅᖢᓂ.
“ᐃᓄᒋᐊᖅᓯᒻᒪᕆᓚᐅᖅᑐᖅ ᐊᔾᔨᓕᐅᕆᒋᐊᖅᑐᖅᑐᓂᒃ,” ᐅᖃᒃᑲᓐᓂᖅᖢᓂ.
ᕕᓐᓴᓐᑦ ᐊᐅᔭᖅᑕᐅᖅ ᓯᕗᓪᓕᖅᐸᒥᒃ ᑐᒃᑐᒋᐊᓚᐅᕐᒥᖕᒪᑦ, ᑭᓯᐊᓂᓕ ᑖᓐᓇ ᐆᒪᔪᖅ ᖃᓂᓗᐊᖏᓐᓂᖅᓴᐅᓚᐅᖅᑐᖅ ᐃᖃᓗᖕᒥᐅᑦ ᓄᓇᓕᖓᓄᑦ. ᐊᓯᕙᕆᐊᖅᓯᒪᑎᓪᓗᒋᑦ ᐊᒃᑲᒌᒃ ᐅᖓᓯᓗᐊᖏᑦᑐᒧᑦ ᖃᑦᓰᓐᓇᕈᓗᖕᓂᒃ ᑭᓛᒥᑐᓂᒃ ᓈᓯᓪᓗᑎᒃ ᐃᖃᓗᖕᓂᑦ ᑕᓯᐅᔭᖓᓂ ᐊᐅᔭᖅ. ᖃᐅᑎᓪᓗᒍ ᐃᖅᑯᒻᒪᕋᒥ ᑐᐱᕐᒥᑦ ᐃᑦᑐᐊᖅᖢᓂ ᐅᓕᓯᒪᖕᒪᑦ ᐅᒥᐊᖅᑐᕆᐊᔮᖏᑦᑐᒍᑦ ᓇᓗᓇᖏᒻᒪᑦ. ᐊᓱᐃᓛᒃ ᖁᑭᐅᑎᓂ ᑎᒍᓯᓪᓗᖓ ᐱᓱᕋᔭᓯᒋᐊᓚᐅᖅᑐᖓ ᓯᑕᒪᓂᒃ ᐱᖑᖕᓂᒃ ᓈᓯᓪᓗᖓ. ᐊᓱᐃᓛᒃ ᑕᑯᓕᕐᓂᖅᐳᖅ ᑐᒃᑐᒥᒃ ᐊᒻᒪᓗ ᖁᑭᖅᖢᓂᐅᒃ, ᐅᑎᒧᑦ ᓇᖕᒥᓂᖅ ᐅᕿᖏᑦᑐᒥᒃ ᑲᑲᒋᐊᖃᖅᑐᕕᓂᖅ ᐱᖑᐊᕐᔪᑎᒍᑦ ᓄᓇᕐᓗᒃᑐᒃᑯᑦ, ᐅᑎᓕᖅᖢᓂ ᑐᐱᖅᓯᒪᕕᒋᔭᒥᓄᑦ.
“ᑕᒪᕐᒥᓕᒫᑦᑎᐊᖅ ᑐᒃᑐᑕᕋ ᓇᖕᒪᓚᐅᖅᑕᕋ. ᐱᓚᒃᑐᖅᓯᒪᒐᓗᐊᖅᑎᓪᓗᒍ ᐴᖅᖢᒋᑦ ᑐᓕᒫᖏᑦ ᕿᒥᖅᖢᐊᓄᑦ ᑲᑎᖓᑎᓪᓗᒋᑦ ᓱᓕ. ᓂᐅᖏᑦ ᐲᕋᓗᐊᖅᖢᒋᑦ ᑎᒥᖓᑕ ᐃᓗᐊᓄᖅᖢᒋᑦ ᑕᐃᒪᓐᓇ ᕿᓚᒃᑐᖅᓯᒪᓚᐅᖅᑐᖅ. ᐊᒻᒪᓗ ᓇᖕᒥᓂᖅ ᑐᒃᑐᑕᕋ ᓇᖕᒪᒋᐊᖃᖅᖢᒍ,” ᐅᓂᒃᑳᕆᓪᓗᓂ, ᐃᒻᒪᖄ ᐅᕿᖏᓐᓂᖃᓚᐅᖅᑐᖅ 200 ᐸᐃᓐᔅᓗᐊᓂᒃ.
“ᐊᒃᓱᐊᓗᓕ ᖁᕕᐊᓇᓚᐅᖅᑐᖅ,” ᐅᓂᒃᑳᕆᓪᓗᓂ ᐃᒡᓚᒐᓚᒃᖢᓂ.
ᑖᓐᓇ ᑐᒃᑐᑕᓂ ᐊᖏᕐᕋᕋᒥᒃ ᑐᓂᐅᖃᖅᑕᕕᓂᐊ ᐃᓐᓇᕐᓄᑦ ᐊᒻᒪᓗ ᑖᓐᓇ ᑕᐃᒫᓴᐃᓐᓇᖅ ᓇᓄᖅᑕᓂ ᖃᑕᖑᑎᒥᓄᑦ ᑐᓂᐅᖅᑲᓚᐅᕆᓪᓗᓂᐅᒃ ᐃᓐᓇᕐᓄᓪᓗ.
ᕕᓐᓴᓐᑦ, ᐊᖑᓇᓱᒋᐅᖅᓴᖅᑐᕕᓂᖅ ᐃᑲᔪᖅᑕᐅᖃᑦᑕᖅᖢᓂ ᐃᓚᒥᓄᑦ, ᐊᒥᓱᓂᒃ ᐆᒪᔪᓂᒃ ᐊᖑᓯᖃᑦᑕᖅᓯᒪᓕᖅᑐᕉᖅ ᒪᑯᓂᖓ ᐊᕿᒡᒋᓂᒃ, ᒥᑎᕐᓂᒃ, ᐅᑲᓕᕐᓂᒃᓗ, ᐊᐃᕕᓚᐅᖅᓯᒪᒋᓪᓗᓂ ᐊᒻᒪᓗ ᑎᕆᒐᓂᐊᓐᓂᐊᖃᑦᑕᖅᖢᓂ. ᐃᓚᖏᑦ ᑎᕆᒐᓂᐊᖅᑕᒃᑲ ᐊᓐᓄᕌᒃᓴᓕᐊᖑᓯᒪᓕᖅᑐᑦ, ᔭᐸᓄᑦ ᓄᐃᓚᓕᐅᕆᔭᐅᓪᓗᑎᒃ, ᐊᒻᒪᓗ ᐃᓚᖏᑦ ᓂᐅᕕᖅᑕᐅᑎᖃᑦᑕᖅᖢᒋᑦ, ᐅᖃᕆᓪᓗᓂ.
ᑲᓃᑎᐊᓐ ᓄᐊᒃᑯᓐᓂ ᐃᖅᑲᓇᐃᔭᖅᑎᐅᔪᖅ, ᑖᓐᓇ ᕕᓐᓴᓐᑦ ᐃᓛᓐᓂᒃᑯᑦ ᐊᑭᖃᖏᑦᑐᓂᒃ ᖃᖓᑦᑕᐅᑎᑖᕈᓐᓇᖃᑦᑕᕐᒪᑦ ᑕᐃᒪ ᐃᒡᓗᓕᖕᒧᖓᐅᓂᐊᓚᐅᖅᑐᖅ ᐱᓇᓱᐊᕈᓯᐅᓚᐅᖅᑐᒥ ᐃᓚᒥᓄᑦ ᐅᒡᓚᖅᓯᒪᒋᐊᖅᓯᒪᓚᖓᔪᖅ, ᓲᖃᐃᒻᒪᓗ, ᐊᖑᓇᓱᒋᐊᖃᑎᒋᓂᐊᖅᖢᓂᒋᑦ ᐃᓚᓂ.