ᐊᐅᐸᔮᖓᔪᕐᒥ ᐅᕕᓂᕈᕐᒥ ᐅᓪᓗᖓ, ᓇᓗᓇᐃᖅᑕᐅᓯᒪᕙᒃᑐᖅ ᓯᑎᐱᕆ 30–ᑕᒫᒥ, ᑕᑯᔭᐅᑐᐃᓐᓇᓪᓗᐊᙱᓚᖅ ᕿᑲᕐᓇᐅᓂᖓᓂ, ᖁᕕᐊᓱᒍᑕᐅᓪᓗᐊᕆᕗᖅ, ᐅᖃᖅᐳᖅ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.
ᐅᓪᓗᖓ ᑭᒡᒐᖅᑐᐃᒐᓗᐊᖅᑎᓪᓗᒍ ᐊᑐᖅᑕᐅᓂᑯᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᓇᓗᓇᐃᖅᓯᓯᒪᒋᕗᖅ ᓵᓚᖃᕐᓂᐅᔪᒥ ᐃᓄᖕᓂ ᐱᐅᓯᖃᓕᖅᑎᑕᐅᓂᕐᒥ ᒐᕙᒪᐅᔪᓂ ᐱᓇᓱᐊᕐᓂᖏᓐᓂ ᐃᓕᖅᑯᓯᒥᒃ ᐊᖅᓵᖅᑕᐅᓇᓱᐊᕐᓂᕐᒥ.
"ᐃᓱᒪᒋᓇᒍ ᐃᓄᓕᒫᓄᑦ ᐊᑐᐊᒐᔅᓯᓐᓂ ᓄᖑᓴᐃᓇᓱᐊᕐᓂᔅᓯᓐᓂ ᐃᓕᖅᑯᓯᕆᔭᑦᑎᓐᓂ, ᐃᓅᓪᓗᑕ, ᓱᓕ ᐅᕙᓃᑉᐳᒍᑦ ᓄᓇᖃᖅᑳᖅᓯᒪᓪᓗᑕ ᐃᓅᓪᓗᑕ ᐊᒻᒪᓗ ᐅᕙᑦᑎᓐᓂ ᑕᑯᓂᐊᖅᐳᓯ ᖃᐅᒪᔪᓂ, ᐅᐱᐅᖅᑲᓪᓗᑕ ᐊᑐᖅᑐᒍᑦ ᐊᐅᐸᔮᖓᔪᓂᑦ ᑕᒪᑐᒪᓂ ᐅᓪᓘᔪᒥ ᑮᓇᖕᓃᓐᓂᒐᓚᖕᓂᕐᒥ ᐊᒻᒪ ᐅᖃᕐᓗᑕ, 'ᑐᖁᕋᐃᓇᓱᕐᓂᕐᓂ, ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓇᓱᐊᕐᓂᕐᒧᑦ ᐊᑐᐊᒐᐃᑦ ᐱᔪᓐᓇᓚᐅᙱᓚᑦ,'" ᑰᑦᑎᖅ ᐅᖃᖅᐳᖅ. "ᐱᐅᒋᓂᖅᓴᐅᔭᕋ ᖁᕕᐊᓱᒍᑎᖃᕐᓂᕐᒥ ᐅᓪᓗᖃᕐᓂᕐᒥ, ᐊᔾᔨᐸᓗᐊᓂ ᓄᓇᕘᑉ ᓇᓪᓕᐅᓐᓂᖅᓯᐅᕐᓂᖓᓂ. ᖁᕕᐊᓚᐅᖅᐳᖓ (ᓄᓇᕘᑉ ᓇᓪᓕᐅᓐᓂᖅᓯᐅᕐᕕᖓ) ᑲᓇᑕᒥ ᕿᑲᕐᓂᙳᕐᓂᖓᓂ, ᐅᕙᓐᓄᑦ, ᖁᕕᐊᓱᒍᑎᖃᕐᒪᑦ ᐃᓄᐃᑦ ᐱᓇᓱᐊᖏᓐᓇᓚᐅᕐᓂᖏᓐᓂ ᐊᒻᒪᓗ ᑎᑭᐅᑎᔪᓐᓇᓚᐅᕐᓂᖏᓐᓂ ᐊᑎᓕᐅᕆᓂᕐᒥ ᓄᓇᕗᒻᒥ ᐊᖏᕈᑕᐅᔪᒥᒃ ᔪᓚᐃ 9 (1993)–ᒥ ᐊᒻᒪᓗ ᐊᖏᖅᑕᐅᔪᓐᓇᖅᓯᓂᖓᓂ ᑲᓇᑕᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂᑦ."
ᐊᐅᐸᔮᖓᔪᕐᒥ ᐅᕕᓂᕈᕐᒥ ᐅᓪᓗᖓ, ᐱᒋᐊᓚᐅᖅᑐᒥ 2013–ᒥ, ᓴᖅᑭᓚᐅᖅᓯᒪᕗᖅ ᐅᓂᒃᑳᓕᐊᖑᔪᒥ ᕕᓕᔅ ᐅᐃᑉᔅᑕᑦᒥ, ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᒥ ᐆᒪᔪᓐᓇᓚᐅᖅᑐᒥ ᐳᕆᑎᔅ ᑲᓚᒻᐱᐊᒥᐅᑕᖅ ᐊᐅᐸᔮᖓᔪᒥᒃ ᐅᕕᓂᕈᖓᓂ ᐊᖅᓵᖅᑕᐅᓚᐅᖅᓯᒪᔪᒥ ᓯᕗᓪᓕᖅᐹᖓᓂ ᐅᓪᓗᖓᓂ ᐃᓕᓐᓂᐊᕐᓂᕐᒧᑦ 1973–ᒥ.
NDP–ᑯᓐᓂ ᐃᓚᒋᔭᐅᓚᐅᖅᓯᒪᔪᖅ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᔪᐊᔾᔩᓇ ᔪᓕᐳᐊᐃ, ᓴᔅᑳᑦᓱᐊᓐᒥᐅᑕᖅ, ᓴᖅᑭᑎᑦᑎᓚᐅᖅᐳᖅ ᑲᑎᒪᔨᑐᐃᓐᓇᓄᑦ ᐃᓚᒋᔭᐅᔪᓄᑦ ᐱᖁᔭᒃᓴᖓᓂ 2017–ᒥ ᐊᐅᐸᔮᖓᔪᕐᒥ ᐅᕕᓂᕈᕐᒥ ᐅᓪᓗᖓᓂ ᑲᓇᑕᒥ ᕿᑲᕐᓂᐅᓂᖓᓂ. ᐱᖁᔭᒃᓴᖅ ᖄᖏᐅᑎᓚᐅᕋᓗᐊᖅᑎᓪᓗᒍ ᐱᖓᔪᖓᓐᓂ ᐅᖃᓕᒫᖅᑕᐅᓂᖓᓂ ᐊᒻᒪᓗ ᑐᓂᔭᐅᓚᐅᖅᖢᓂ ᒪᓕᒐᓕᐅᖅᑎᓄᑦ ᖃᐅᔨᓴᖅᑎᐅᔪᓄᑦ, ᕿᑲᕐᓇᐅᔪᖅ ᓱᓕ ᐱᓪᓚᕆᙳᖅᓯᒪᙱᓚᖅ.
ᓄᓇᕗᒻᒧᑦ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓚᒋᔭᐅᔪᖅ ᒧᒥᓛᖅ ᖃᖅᑲᖅ ᑕᑯᔪᒪᓇᔭᖅᐸᖓ ᐊᑐᓕᖅᑎᑕᐅᓂᖓᓂ.
"ᐄ, ᕿᑲᕐᓇᐅᓪᓗᐊᖅᐳᖅ, ᑭᓯᐊᓂ ᑕᐃᒪᓐᓇᑐᐃᓐᓇᖅ ᓈᒻᒪᙱᓚᖅ. ᑐᙵᕕᖃᑦᑎᐊᖅᑐᒥ ᖃᓄᐃᓕᐅᕐᓂᖃᕆᐊᖃᖅᐳᖅᑕᐅᖅ," ᖃᖅᑲᖅ ᐅᖃᖅᐳᖅ.
ᐃᓄᐃᑦ ᑕᐱᕇᑦ ᑲᓇᑕᒥ, ᑲᑐᔾᔨᖃᑎᒌᖑᔪᑦ ᐃᑲᔪᖅᓱᐃᔨᐅᔪᓂ ᐃᓄᖕᓄᑦ ᑲᓇᑕᓕᒫᒥ, ᐅᖃᓪᓚᖕᓂᖃᖅᓯᒪᕗᑦ ᒐᕙᒪᑐᖃᒃᑯᓐᓂ ᐱᔾᔪᑎᖃᖅᑐᒥ ᑲᓇᑕᒥ ᕿᑲᕐᓇᐅᓂᐅᔪᒥ ᐃᓕᓴᖅᓯᓂᕐᒧᑦ ᐊᑐᖅᑕᐅᕙᓚᐅᖅᓯᒪᔪᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᑭᓯᐊᓂ ᓇᓗᓇᐃᖅᓯᒪᓂᖃᙱᓚᖅ ᐊᐅᐸᔮᖓᔪᕐᒥ ᐅᕕᓂᕈᕐᒥ ᐅᓪᓗᖓᓄᑦ.
ᐃᖃᓗᐃᑦ-ᓂᐊᖁᙴᒧᑦ ᒪᓕᒐᓕᐅᖅᑎᐅᖃᑕᐅᔪᖅ ᐹᑦ ᐊᕐᓇᒃᑲᖅ ᐅᖃᖅᐳᖅ ᐱᐅᒋᓂᖅᓴᐅᓇᔭᖅᐸᖓ ᑕᑯᓂᕐᒥ ᕿᑲᕐᓇᐅᔪᒥ ᐅᕙᓃᓐᓂᖓᓂ ᓄᓇᖃᖅᑳᖅᓯᒪᔪᓄᑦ ᐅᓪᓗᖓᓂ. ᑰᑦᑎᖅᑎᑐᑦ, ᐅᒃᐱᕈᓱᖕᓂᖓᓂ ᖁᕕᐊᓱᒍᑕᐅᖁᓪᓗᓂᐅᒃ.
"ᐃᒃᐱᒍᓱᒃᐳᖓ ᖁᕕᐊᓱᒍᑎᖃᕐᓂᖅ ᓄᓇᖃᖅᑳᖅᓯᒪᓂᐅᔪᒥ ᖁᕕᐊᓱᒍᑎᖃᖅᐸᖕᓂᖓᓂ ᓱᓕᓂᐅᔪᒥ ᐃᓄᐃᑦ, ᐃᓕᖅᑯᓰᑦ ᐊᒻᒪ ᐅᖃᐅᓯᖅ ᖄᖏᐅᑎᔪᓐᓇᕐᓂᖓᓂ ᑕᐃᒪᐃᑦᑐᓄᑦ ᑲᑉᐱᐊᓇᕐᓂᐅᓚᐅᖅᑐᓄᑦ ... ᐅᖃᓪᓚᐅᓯᖃᖅᐳᖅ ᓴᙱᓂᐅᔪᒥ ᐊᒻᒪ ᐱᔪᒪᓂᐅᔪᒥ ᑕᐃᒃᑯᓄᖓ ᖄᖏᐅᔾᔨᓯᒪᔪᓄᑦ ᐅᕝᕙᓘᓐᓃᑦ ᕿᑎᐊᓃᑦᑐᓂ ᖄᖏᐅᑎᓇᓱᕐᓂᖏᓐᓂ ᐱᓂᕐᓗᒃᑕᐅᓂᐅᔪᓂ ᐃᒻᒥᖕᓄᑦ ᐃᓕᔭᐅᓂᑯᓂ ᐊᒻᒪᓗ ᐃᓚᖏᓐᓄᑦ," ᐊᕐᓇᒃᑲᖅ ᐅᖃᓚᐅᖅᐳᖅ. "ᐃᓱᒪᕗᖓ ᐱᒻᒪᕆᐅᓂᖓᓂ ᑲᓇᑕᒥᐅᑕᓕᒫᓄᑦ ᐅᔾᔨᕈᓱᖕᓂᖏᓐᓂ ᖃᓄᐃᓐᓂᐅᓚᐅᖅᑐᒥ ᐃᓄᖕᓄᑦ ᐊᒻᒪᓗ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐅᓇᐅᑎᓪᓗᒍ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐊᑐᖅᑕᐅᓂᑯᓂ, ᑭᓯᐊᓂ ᓇᓕᒧᑕᖓᓂ ᐱᒻᒪᕆᐅᒋᕗᖅ ᑲᓇᑕᒥᐅᑕᓕᒫᓄᑦ ᑕᑯᓂᖏᓐᓂ ᓴᙱᓂᐅᔪᒥ ᐊᒻᒪᓗ ᐱᓕᕆᕙᓪᓕᐊᓂᖏᓐᓂ ᐊᐅᓚᑦᑎᓇᓱᐊᕐᓂᐅᔪᒥ ᓇᖕᒥᓂᖅ ᓯᕗᓂᒃᓴᖓᓄᑦ ᖁᕕᐊᓱᒍᑕᐅᓪᓗᐊᕐᓂᖓᓂ ᑕᑯᓗᒍ ᖃᓄᐃᓐᓂᐅᓚᐅᖅᑐᒥ."
ᐊᒡᒍᒧᑦ ᒪᓕᒐᓕᐅᖅᑎᐅᖃᑕᐅᔪᖅ ᐹᓪ ᖁᐊᓴ, ᓯᕗᓕᖅᑎᐅᓚᐅᖅᓯᒪᔪᖅ ᓄᓇᕗᒻᒥ ᐊᒻᒪᓗ ᐊᖓᔪᖅᑳᖑᓚᐅᖅᓯᒪᔪᒥ ᓄᓇᕗᒻᒥ ᑐᙵᕕᒃᑯᓐᓄᑦ, ᐅᖃᖅᐳᖅ ᐊᖏᖃᑕᐅᓂᖓᓂ ᐃᓱᒪᓂᐅᔪᒥ ᕿᑲᕐᓇᐅᓂᖃᕐᓂᐅᔪᒥᑦᑕᐅᖅ.
"ᐊᒥᓱᐃᑦ ᐃᓅᔪᓂ (ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ) ᐃᓅᔪᓐᓃᖅᓯᒪᓕᖅᐳᑦ. ᐃᓱᒪᕗᖓ ᐃᖅᑲᐅᒪᓂᐅᓕᕐᓂᐅᕗᖅ ᖃᓄᐃᓐᓂᐅᓚᐅᖅᑐᒥ ᑕᐃᔅᓱᒪᓂᐅᓚᐅᖅᑐᒥ ᐊᒻᒪᓗ ᐱᓯᒪᐃᓐᓇᕆᐊᖃᖅᐸᕗᑦ ᐆᒻᒪᑎᑦᑎᓐᓂ, ᓲᖃᐃᒻᒪ, ᑭᓯᐊᓂ ᑲᑕᒃᑎᑦᑎᓂᐅᙱᓪᓗᓂ," ᖁᐊᓴ ᐅᖃᖅᐳᖅ. "ᐃᓱᒪᕗᖓ (ᕿᑲᕐᓇᐅᔪᒥ) ᐱᐅᕐᔪᐊᕋᔭᖅᐳᖅ ᑕᑯᒃᓴᐅᑎᑦᑎᒃᑲᓐᓂᕐᓂᐊᕐᒪᑦ ᐃᓚᖓᓐᓂ ᐊᑐᖅᑕᐅᓂᑯᓂ ᓄᓇᕗᒻᒥ ᐊᒻᒪᓗ ᐱᒻᒪᕆᐅᓇᓱᒋᕙᕋ ᓯᕗᓂᒃᓴᒥ ᐱᐅᓯᖃᑎᒌᖑᔪᓄᑦ ᑖᔅᓱᒥᖓ ᖃᐅᔨᒪᓂᕐᒧᑦ. ᑕᒪᓐᓇ ᐸᐸᑦᑎᓂᐅᕗᖅ ᑕᐃᔅᓱᒥᖓ ᐊᑐᖅᑕᐅᓂᑯᓂ ᐆᒪᑎᑕᐅᓂᖓᓂ."