Skip to content

ᐅᖓᓯᒃᑐᒥᒃ ᑕᐅᑐᒃᑐᒍᑦ ᐊᓯᐊᓂᒃ ᐅᕐᓱᐊᓘᑉ ᐊᐅᓚᐅᑎᖃᕈᑏᑦ

ᐅᖓᓯᒌᒃᑐᐊᓘᑎᓪᓗᒋᑦ ᓄᓇᕗᒥ ᓄᓇᓖᑦ ᐊᒻᒪᓗ ᐊᖅᑯᓴᖃᑦᑕᐅᑎᔪᑕᐅᕙᒃᑐᑦ ᐊᖅᑯᑏᑦ ᐱᑕᖃᖏᑎᓪᓗᒋᑦ, ᓄᓇᕗᒥ ᐱᔭᕆᑐᖕᒪᑦ ᐃᓄᑑᓪᓗᑎᒃ ᓄᓇᓕᖃᖅᑐᓄᑦ ᐃᓄᐃᓚᕐᒥ ᓄᓇᓕᓕᕆᔪᑎᓂᒃ ᐱᑕᖃᖅᑎᑦᑎᓇᓱᐊᕆᐊᒃᓴᖅ ᑕᒪᐃᓐᓄᑦ.

ᐱᔭᕆᑐᓂᖅᐹᖑᖃᒃᑕᕐᒪᑦ ᐊᑭᑐᓂᖅᐹᖑᓪᓗᓂᓗ ᓄᖑᑦᑕᖅᑐᓂᒃ ᐃᑯᒪᖅᑯᑎᖃᕋᓱᐊᕆᐊᒃᓴᖅ ᐅᕐᓱᐊᓗᒃᑐᖅᑐᓂᒃ ᐊᐅᓚᐅᑎᓕᖕᓂᒃ. ᐊᐅᓚᐅᑏᓪᓗ ᐱᑐᖃᐅᓕᖅᓴᕋᐃᖢᑎᒃ ᐊᑭᑐᓂᖅᓴᐅᓕᕐᒪᑕ ᓴᓇᔭᐅᒋᐊᖃᐃᓐᓇᓕᖃᑦᑕᕐᒪᑕ ᐊᓯᔾᔨᖅᑕᐅᒋᐊᖃᖃᑦᑕᖅᖢᑎᒃᓗ ᐃᓚᔭᐅᒋᐊᖃᖃᑦᑕᖅᖢᑎᒃᓗ ᓲᖃᐃᒻᒪ ᑕᐃᒪᖓᓂᑦ ᐊᑭᑭᓐᓂᖅᓴᓂᒃ ᕿᓂᖃᖅᑕᓴᕋᓗᐊᖅᐳᑦ ᐃᑯᒪᖅᑯᑎᖃᕆᐊᒃᓴᖅ.

ᐊᒥᓱᓂᒃ ᐅᑭᐅᓂᒃ ᑕᑯᖃᑦᑕᖅᓯᒪᓕᕋᑦᑕ ᓄᓇᓕᖕᓂ ᓄᓇᕗᑦ ᒐᕙᒪᖓ ᐋᕿᒃᓱᐃᓇᓱᐊᖅᑎᓪᓗᒍ ᐊᔾᔨᐅᖏᑦᑐᓂᒃ ᐃᑯᒪᖅᑯᑎᓄᑦ ᐊᐅᓚᐅᑎᓂᒃ - ᒪᑯᓂᖓ ᓯᕿᓂᕐᒥᑦ ᐹᑐᓖᖃᖅᑐᑦ, ᐊᓄᕆᒥᑦ, ᑕᕆᐅᓪᓗ ᐅᓕᑦᑕᕐᓂᖓᓂᑦ - ᐱᔭᕆᑐᓈᖅᓯᕙᒃᖢᑎᒃ. ᓯᕗᓪᓕᖅᐹᒥ ᐆᒃᑐᖅᑕᐅᖃᑦᑕᖅᓯᒪᔪᑦ ᐊᒥᓱᑦ ᐃᓚᖏᑦ ᐱᒃᑯᒥᓇᖅᑐᑦ ᐃᓚᖏᓪᓗ ᓱᕙᓕᑭᐊᑦ ᕿᒪᒃᑕᐅᖃᑦᑕᑦᓯᒪᖕᒪᑕ ᐆᒃᑐᕋᑦᑕᐅᓚᐅᕋᓗᐊᖅᖢᑎᒃ.

ᑕᐃᒪᖓᓂᑦ ᒐᕙᒪᑎᒃᑯᑦ ᐅᕐᓱᐊᓗᖕᓂᒃ ᐊᑐᖃᑦᑕᖅᑕᒥᓂᒃ ᐊᑭᑐᓈᖅᓯᒑᖓᒥᒃ ᓄᑖᓂᒃ ᐆᒃᑐᕋᖃᑦᑕᖅᓯᒪᖕᒪᑕ ᐅᕐᓱᐊᓗᒃ ᐊᑭᑐᖕᒪᑦ ᓱᕈᔪᐃᓲᖑᓪᓗᓂᓗ, ᑭᓯᐊᓂᓕ ᐊᑭᑭᓐᓂᖅᐹᖑᖃᑕᐅᖕᒪᑦ ᐃᑯᒪᖅᑯᑎᒋᓪᓗᒍ.

ᐃᓚᖏᑦ ᕼᐊᒪᓚᐃᑦ ᐊᓄᕆᒧᑦ ᐊᐅᓚᐅᑎᖃᕈᓯᕐᓂᒃ ᐆᒃᑐᕋᖃᑦᑕᖅᓯᒪᖕᒥᔪᑦ ᓄᓇᕗᒥ, ᑭᓯᐊᓂᓕ ᐊᑭᑐᒋᓪᓗᓂ, ᑕᑯᒥᓇᖏᓱᓂᓗ, ᐊᒻᒪᓗ ᓱᕋᒃᓴᕋᐃᖃᑦᑕᖅᖢᑎᒃ ᑭᓯᐊᓂᓕ ᑭᖑᓂᖓᓂ ᐱᒃᑯᒥᒋᔭᐅᔪᖅ ᐅᕐᓱᐊᓗᒃᑐᖅᑐᓂᑦ. ᑕᕆᐅᑉ ᐅᓕᑦᑕᕐᓂᖓᓄᑦ ᐊᐅᓚᐅᑎᖃᕆᐊᒃᓴᖅ ᐃᖃᓗᖕᓂ ᐃᓱᒪᒋᔭᐅᖃᑦᑕᖅᓯᒪᔪᖅ ᑭᓯᐊᓂᓕ ᐆᒃᑐᖅᑕᐅᓚᐅᖅᓯᒪᖏᑦᑐᖅ ᓱᓕ.

ᖃᐅᔨᓴᕈᑕᐅᓯᒪᖏᒻᒪᑦ ᓱᓕ, ᐱᒃᑯᒥᒋᔭᐅᖃᑦᑕᕐᒥᔪᖅ ᓯᕿᓂᕐᒥᒃ ᐹᑐᓖᓄᑦ ᐆᒻᒪᖅᑯᑎᖃᕆᐊᒃᓴᖅ ᐱᐅᓇᔭᖏᒻᒪᑦ ᓄᓇᕗᒥ ᐅᑭᐅᒃᑯᑦ ᓯᕿᓂᖃᖏᓗᐊᕐᓂᖓᓄᑦ. ᑭᓯᐊᓕᑦᑕᐅᑦ ᐊᒥᓱᑦ ᓄᓇᓖᑦ ᐊᑐᖃᑦᑕᓕᕐᒪᑕ ᐅᑭᐅᑉ ᐃᓚᐃᓐᓇᖓᓂ ᖁᑦᑎᒃᑐᒥᐅᓂ ᓄᓇᓕᖕᓂ ᐊᐅᔭᒃᑯᑦ ᐅᐱᕐᖔᒃᑯᓪᓗ ᓯᕿᓂᕐᒥᒃ ᐃᑯᒪᖅᑯᑎᖃᕆᐊᒃᓴᖅ ᐊᔪᕐᓇᖏᒻᒥᔪᖅ. ᓱᓕ ᐅᕐᓱᐊᓗᒃᑐᖅᑐᓂᒃ ᐊᐅᓚᐅᑎᓂᒃ ᐃᑯᒪᖅᑯᑎᖃᐅᕐᒪᑕ.

ᐃᓅᕕᒃᒥ, ᓄᓇᓯᐊᒥᐅᓂᓕ - 200-ᑭᓚᒥᑐᒥᒃ ᐅᖓᓯᖏᓂᖃᖅᑐᒥ ᐅᑭᐅᖅᑕᖅᑐᒥᐅᑦ ᕿᑎᐊᓂᑦ - ᐊᑕᐅᓯᖅ ᐊᖑᑎ ᐃᓕᐅᖅᑲᐃᔪᕕᓂᑦ $33,000-ᕌᖅᑎᓪᓗᒋᑦ ᓯᕿᓂᕐᒥᑦ ᐹᑐᓖᓄᑦ ᐆᒻᒪᖅᑯᑎᓂᒃ ᐊᖏᕐᕋᒥᓄᑦ ᐃᑯᒪᖅᑯᑎᒋᓂᐊᖅᑕᒥᓂᒃ.

ᓄᓇᕗᒥ ᕼᐊᒪᓚᓂ ᐆᒃᑐᕋᖃᑦᑕᖅᓯᒪᖕᒥᔪᑦ ᐊᔾᔨᒋᖏᑦᑐᓂᒃ ᐊᐅᓚᐅᑎᓂᒃ ᐊᑐᖅᖢᑎᒃ ᐅᑭᐅ ᐃᓚᖓᓂ ᐊᒡᓚᒡᕕᓂ ᐱᖑᐊᕐᕕᓂᓗ, ᐃᓚᐅᑎᓪᓗᒋᑦ ᓄᓇᓕᖕᒥᐅᑦ ᖁᐊᖃᐅᑎᖏᓐᓄᑦ.

ᐊᒻᒪᓗ ᓄᓇᕗᑦ ᒐᕙᒪᖓᓂ ᐃᑲᔪᖅᓴᕈᓐᓇᕐᓂᕋᖅᖢᑎᒃ ᐅᖃᖃᑦᑕᖅᓯᒪᖕᒥᔪᑦ ᐃᓚᓕᐅᑎᔪᓐᓇᕐᓂᕋᖅᓗᑎᒃ ᐆᒃᑐᕋᐅᑎᓂᒃ ᖃᓄᑎᒋ ᐃᒡᓗᒥ ᐃᑯᒪᖅᑯᑎᑐᕐᓂᖏᓐᓂᒃ ᒪᓕᒃᓗᑎᒃ, ᐊᖏᕐᕋᖃᖅᑐᑦ ᐊᑐᕐᓂᖏᑕᒥᓂᒃ ᐃᓕᓯᕕᒋᔪᓐᓇᕐᓂᐊᖅᑕᖏᓐᓂᒃ ᓇᖕᒥᓂᖃᖅᑐᓪᓗ ᓯᕿᓂᕐᒥᑦ ᐹᑐᓖᓂᒃ ᐆᒻᒪᖁᑎᓂᒃ ᐊᖏᓗᐊᖅᑐᓂᒃ ᐱᓯᒪᔪᑦ ᐊᓄᕆᒥᓪᓘᓐᓃᑦ ᐊᐅᓚᐅᑎᓕᖕᓂᑦ ᐹᑐᓖᒥᓕᖅᑎᓪᓗᒋᑦ ᑭᖑᓂᖓᓂ ᐱᔪᓐᓇᕈᓛᕐᓗᒋᑦ.

ᒫᓐᓇ ᑐᓴᖃᑦᑕᓕᕐᒥᒐᑦᑕ ᓄᓇᐅᑉ ᐊᑖᓂ ᐃᒪᕐᒧᑦ ᐆᓇᖅᑐᒧᑦ ᐊᐅᓚᐅᑎᓕᐅᕈᒪᔪᓂᒃ, ᑕᐃᒫᓴᐃᓐᓇᖅ ᐊᐃᔅᓛᓐᒥᐅᓂᒃ ᐃᔾᔪᐊᖅᓯᓗᑕ ᑕᕙᓂ ᐊᖏᕐᕋᖏᑦ ᐃᑯᒪᖅᑯᑎᖃᕐᒪᑕ ᐃᒪᕐᒧᑦ ᐊᐅᓚᐅᑎᓂᑦ, ᕿᒥᕈᔭᐅᖃᑦᑕᓕᕐᒥᔪᑦ ᓄᓇᕗᒥ ᑕᐃᒪᓐᓇ ᐱᔪᓐᓇᕐᒥᖕᒪᑕ. ᐅᓐᓃᑦ ᓄᓇᖓᓂ ᐃᒐᕐᔪᐊᖃᐅᖏᒃᑲᓗᐊᖅᑎᓪᓗᒍᓕ, ᐊᒥᓱᓂ ᓄᓇᓂ ᐆᓇᖅᑐᓂᒃ ᐃᒪᖃᐅᖏᓐᓇᐅᔭᕐᒪᑦ ᓄᓇᒥᑦ ᑎᖕᒥᑳᖅᑐᓂᒃ ᑲᓇᑕᒥ ᐊᐅᓚᐅᑎᓕᐅᕈᓐᓇᖅᐸᑕ ᑖᒃᑯᓇᓂ ᓄᓇᓂ ᐃᒪᕐᒧᑦ ᐃᑯᒪᖅᑯᑎᖃᕈᓐᓇᕐᒥᔪᑦ ᑕᒫᓂ. ᑐᓴᖃᑦᑕᖅᓯᒪᒐᑦᑕ ᐊᑭᑐᒐᓗᐊᖅᑎᓪᓗᒍ ᐃᓕᐅᖅᑲᖅᑕᐅᓂᖓ ᑭᓯᐊᓂᓕ, ᑭᖑᓂᖓᒍᑦ ᐊᑯᓂ ᐊᑐᖅᑕᐅᓂᐊᖅᑐᑦ ᐅᕐᓱᐊᓗᖕᒥᒃ ᐊᑭᑭᓐᓂᖅᓴᐅᓕᕈᓐᓇᕐᒪᑦ ᑖᒃᑯᓇᓂ ᓄᓇᓕᖕᓂ. ᑲᔪᓰᓐᓇᕈᓐᓇᖅᖢᓂᓗ.

ᒫᓐᓇᒧᑦ ᑎᑭᖢᒍ ᓱᓕ ᓄᓇᕗᑦ ᒐᕙᒪᖓᓂ ᐊᑭᓖᔪᑎᖃᖏᒻᒪᑕ ᓄᓇᕗᒥ ᐃᓗᐊᕐᓂᖅᓴᒧᑦ ᐋᕿᒃᓱᐃᓇᓱᐊᖅᑐᓂᒃ ᐊᖏᕐᕋᒋᔭᐅᔪᓂ ᐃᑯᒪᖅᑯᑎᓕᕆᔪᑎᓄᑦ ᐃᑲᔪᖅᓴᕈᑎᓂᒃ - ᐊᑐᓂ ᐃᓚᖓᓂᒃ ᐊᑐᖅᑐᐊᖅᑐᑦ ᐃᑲᔪᖅᑕᐅᔪᓐᓇᖅᐸᑕ ᐊᒥᓲᓂᖅᓴᓄᑦ ᑕᒪᓐᓇ ᐆᒃᑐᖅᑕᐅᖃᑦᑕᕈᓐᓇᖅᓯᓇᔭᕐᒪᑦ ᐊᑭᖏᑕ ᐃᓚᖏᓐᓄᑦ ᐃᑲᔫᓯᐊᕈᓐᓇᖅᐸᑕ. ᐊᖏᕋᖃᑦᑐᑦ ᐃᑯᒪᖅᑯᑎᓂᒃ ᐊᑐᕐᓂᖅᐹᖑᖕᒪᑕ ᓄᓇᓕᖕᓂ 20-ᐳᓴᐅᓲᖑᓴᕐᒪᑕ ᐊᒻᒪᓗ ᐊᑐᖅᑐᐊᒐᓂᒃ ᐊᖏᕐᕋᖃᑦᑐᑦ 50-ᐳᓴᐅᓪᓗᑎᒃ, ᑕᐃᒪᓐᓇ ᐊᓯᐊᓄᖔᑦ ᓄᒃᑎᕋᓱᐊᕈᒪᒐᓗᐊᕈᑎᒃ ᐊᔪᕐᓇᑦᑎᐊᕋᔭᕐᒪᑦ ᐃᓄᑑᓗᓂ ᐱᓇᓱᐊᕐᓗᒍ.

ᑮᓇᐅᔭᑦ ᐆᒃᑐᕈᒪᔪᓄᑦ ᐱᑕᖃᖅᑎᑕᐅᔪᒃᓴᐅᔪᑦ ᒫᓐᓇᒥᑦ ᐱᒋᐊᕐᓗᑎᒃ ᐅᕐᓱᐊᓗᒃᑐᖅᑐᓂᒃ ᐊᑐᕈᓐᓃᖅᐸᓪᓕᐊᔪᓐᓇᕐᓂᐊᕈᑦᑕ. ᓯᕿᓂᕐᒥᑦ ᐹᑐᓖᑦ ᐆᒻᒪᖅᑯᑎᖃᖅᑐᑦ ᐱᒃᑯᒥᓇᕐᓂᖅᐸᖑᓪᓗᑎᒃ ᐊᑭᖏᑦ ᑕᑯᓪᓗᒋᑦ ᐊᑕᐅᓯᖅ kWh-ᒥᒃ ᐆᒃᑑᑎᖃᖅᖢᓂ ᐊᑭᑭᓐᓂᖅᐹᖑᔮᖅᑐᖅ ᓴᐱᕐᓇᕈᓐᓃᕋᔭᖅᑐᑦ ᐅᑭᐅᖅ 2020-ᒥ. ᓄᓇᐅᑉ ᐊᑖᓂᑦ ᐆᓇᖅᑐᒥᑦ ᐃᒪᕐᒥᑦ ᐊᐅᓚᐅᑎᖃᕆᐊᒃᓴᖅ ᐊᒃᓱᐊᓗᒃᑕᐅᖅ ᐱᒃᑯᒥᓇᕋᔭᕐᒥᔪᖅ ᐊᖏᕐᕋᑦᑎᓐᓂ.

ᑭᓯᐊᓂᓕ ᓄᓇᕗᑦ ᒐᕙᒪᖓ ᒫᓐᓇᐅᓂᖓᓂ ᑕᐃᒪᖓᓄᓪᓗ ᑮᓇᐅᔭᓂᒃ ᑕᒫᓂᕆᔪᖃᖏᒻᒪᑕ ᑕᒪᒃᑯᓂᖓ ᐊᐅᓚᐅᑎᓕᐅᕈᑕᐅᔪᓐᓇᕐᑐᓂᒃ ᐆᒃᑐᕈᑕᐅᓂᐊᖅᑐᓄᑦ. ᐊᓱᐃᓛᒃ ᐋᑐᕚᒥᐅᑦ ᐃᑲᔪᕐᓗᑎᒃ ᑭᓯᐊᓂ ᐱᒋᐊᖓᖅᑎᑦᑎᓇᓱᐊᕆᐊᖃᓕᖅᑐᑦ, ᐱᓗᐊᖑᐊᖅᑐᒥᒃ ᐸᐅᖃᑦᑐᓂᒃ ᐃᑯᒪᖅᑯᑎᖃᖅᑐᑦ ᐊᑭᓖᑎᑕᐅᓂᐊᓕᖅᑎᓪᓕᒋᑦ ᐅᕐᓱᐊᓗᖕᒥᑦ ᐱᓗᐊᖑᐊᖅᑐᑦ ᕿᔪᒃᓴᓂᓪᓗ ᓄᓇᕗᒥ ᑖᒃᑯᑑᖏᒪᑕ.

ᐋᑐᕚᒥᐅᑦ ᐱᕝᕕᒃᓴᖃᖅᑎᑦᑎᒋᐊᖃᓕᖅᑐᑦ ᑮᓇᐅᔭᑎᒍᑦ ᑕᒪᒃᑯᓇᓂᑦ ᐃᑲᔪᖅᓴᕈᑕᐅᓂᐊᖅᑐᓂᒃ ᓴᓇᖅᑯᑎᓕᐅᕈᒪᔪᓄᑦ ᐊᑐᖅᑕᐅᒋᐊᖃᐃᓐᓇᐅᔭᖅᑐᓂᒃ ᖃᐅᑕᒫᑦ ᓄᓇᓕᖕᓂ ᐅᕐᓱᐊᓗᖕᓂᑦ ᓄᒃᑎᖅᐸᓪᓕᐊᓂᑦᑎᓐᓂ. ᓄᓇᑦᑎᓐᓂᑦ ᐊᑐᕈᓐᓇᖔᖅᑐᓂᒃ ᕿᓂᕆᐊᖃᓕᕋᑦᑕ ᐊᒻᒪᓗ ᐊᕙᑎᑦᑎᓐᓂᒃ ᓱᕈᔪᐃᓗᐊᖏᓐᓂᖅᓴᓂᒃ.