Skip to content

ᐅᔭᕋᖕᓂᐊᕐᕖᑦ ᓄᓇᕗᒻᒥ ᐃᖅᑲᓇᐃᔭᖅᑎᐅᔪᓂ ᐊᖏᕐᕋᖅᑎᑦᑎᕗᑦ ᐊᑦᑕᓇᔾᔭᐃᖅᓯᒪᓂᕐᒧᑦ

ᐅᔭᕋᖕᓂᐊᕐᕕᖕᒥ ᓴᓇᔨᐅᔪᑦ ᐊᑐᓂ ᓄᓇᕘᑉ ᐊᕕᒃᑐᖅᓯᒪᓂᐅᔪᓂ ᐊᖏᕐᕋᐅᔪᓐᓇᖅᑎᑕᐅᕗᑦ ᐊᑭᓕᖅᓱᖅᑕᐅᓗᑎᒃ ᒥᒃᖠᒋᐊᖅᑎᑦᑎᓂᕐᒧᑦ ᐱᕕᖃᕐᓂᐅᔪᒥ ᓄᕙᒡᔪᐊᕐᓇᖅ-19–ᒥ ᐊᐃᑦᑐᖅᑕᐅᓂᖓᓂ ᓄᓇᓕᖕᓄᑦ.

ᐹᕙᓐᓛᓐ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᒃ, TMAC ᐃᑲᔪᕈᑎᒃᓴᓂ ᐊᒻᒪ ᐊᒡᓂᑯ ᐄᒍᓪᑯᑦ ᓯᕗᒻᒧᑦ ᐊᔭᐅᕆᕗᑦ ᓴᖅᑭᑎᑦᑎᓂᐅᔪᒥ ᐅᔭᕋᖕᓂᐊᕐᕕᖏᓐᓂ ᐊᑐᖅᖢᑎᒃ ᖃᓪᓗᓈᑦ ᓄᓇᖓᓐᓂ ᐃᖅᑲᓇᐃᔭᖅᑎᓂᑦ. ᑲᒻᐸᓂᐅᔪᑦ ᐸᕐᓇᒃᐳᑦ ᐅᐸᒃᓯᒃᑲᓐᓂᓛᕐᓂᖏᓐᓂ ᖃᓄᐃᓕᖓᓂᐅᔪᒥ ᓄᓇᕗᒻᒥᐅᓄᑦ ᐃᖅᑲᓇᐃᔭᖅᑎᖏᓐᓄᑦ ᐱᓇᓱᐊᕈᓯᕐᓂ ᑎᑭᑉᐸᓪᓕᐊᔪᓄᑦ.

ᖃᔅᓯᒐᓚᐃᑦ ᓄᓇᓯᐅᑏᑦ ᐃᑳᕈᓐᓇᐃᔾᔨᑎᑦᑎᓚᐅᖅᐳᑦ ᐊᖅᑯᒻᒥ ᕿᑎᐊᓂ ᑲᖏᖅᖠᓂᕐᒥ ᐊᒻᒪ ᐃᖃᓗᒑᕐᔪᖕᒥ ᐅᔭᕋᖕᓂᐊᕐᕕᖓᓂ ᐅᓐᓄᖓᓂ ᒫᔾᔨ 18–ᒥ, ᐅᖃᐅᓯᐅᓪᓗᓂ ᒫᕕᓐ ᑎᐋᓐᒧᑦ. ᐃᓚᖏᑦ ᑭᕙᓪᓕᕐᒥᐅᑕᓂ ᐊᑭᕋᖅᑐᓚᐅᖅᐳᑦ ᓄᓇᕗᒻᒥ ᓴᓇᔨᐅᔪᓂ ᐃᖅᑲᓇᐃᔭᕆᐊᖃᐃᓐᓇᕐᓂᖏᓐᓂ ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᖕᓇᐅᔪᒥ ᐊᓯᖏᑦ ᐅᔭᕋᖕᓂᐊᕐᕕᖕᒥ ᒪᑐᓚᐅᑲᖁᔨᓪᓗᑎᒃ.

ᐹᕙᓐᓛᓐ ᐊᒻᒪ TMAC ᐃᑲᔪᕈᑎᒃᓴᓂ ᐅᖃᐅᓯᖃᓚᐅᖅᐳᑦ ᐱᓕᕆᐊᕆᓂᐊᕐᓂᖏᓐᓂ ᑐᓂᓯᓂᕐᒥ ᓄᓇᕗᒻᒥᐅᓂ ᓴᓇᔨᐅᔪᓂ ᐊᑭᓕᖅᓱᖅᑕᐅᓗᑎᒃ ᓄᖅᑲᖓᓚᐅᑲᖕᓂᖏᓐᓂ ᐱᓇᓱᐊᕈᓯᐅᓚᐅᖅᑐᒥ.

ᐊᒡᓂᑯ ᐄᒍᓪ ᓯᕗᓪᓕᖅᐹᒥᒃ ᐃᓱᒪᓕᐅᕆᓚᐅᖅᐳᑦ ᐸᐸᑦᑎᓂᖏᓐᓂ ᐃᖅᑲᓇᐃᔭᖅᑎᖏᓐᓂ ᓄᓇᕗᒻᒥ ᑲᒻᐸᓂᐅᑉ ᐃᓄᖕᓂ ᐃᖅᑲᓇᐃᔭᖅᑎᖏᓐᓂ ᓇᖏᕐᓂᖃᕐᓂᖏᓐᓂ 37 ᐳᓴᓐᑎᐸᓗᖕᒥ, ᑐᑭᖃᖅᑐᒥ ᕿᑎᐊᓂ 400-500–ᓂ ᐃᓄᖕᓂ. ᐹᕙᓐᓛᓐᒧᑦ, ᐃᓄᐃᑦ ᐋᖅᑭᒃᓱᖅᓯᒪᒐᓚᒃᐳᑦ 13 ᐳᓴᓐᑎᒥ ᑕᒪᒃᑭᓄᑦ ᓴᓇᔨᐅᔪᓄᑦ TMAC ᐃᑲᔪᕈᑎᒃᓴᓂ ᐃᓗᓕᖃᑐᐃᓐᓇᖅᖢᑎᒃ 11 ᐳᓴᓐᑎᒥ ᐃᓄᖕᓂ – ᐅᕝᕙᓘᓐᓃᑦ 60–ᓂ ᓴᓇᔨᓂᑦ – ᐃᓗᐊᓂ ᐊᐅᓚᑕᐅᓂᐅᔪᒥ.

ᑭᓯᐊᓂ, ᐊᒡᓂᑯ ᐄᒍᓪ–ᑯᑦ ᑐᕌᒐᕆᔭᖓ ᐱᓚᐅᖅᐳᑦ ᐊᑲᖅᓴᙱᓐᓂᐅᔪᒥ ᐃᓅᖃᑎᒌᖕᓄᑦ ᓯᐊᒻᒪᖅᑎᑦᑎᔨᐅᔪᓂ ᓄᓇᕗᒻᒥᐅᓂ ᐊᑲᖅᓴᓚᐅᙱᑦᑐᓂ ᓄᓇᓕᖕᓂ ᐃᖅᑲᓇᐃᔭᖅᑎᐅᔪᓂ ᐃᖅᑲᓇᐃᔭᕆᐊᖃᐃᓐᓇᓚᐅᖅᑐᓂ, ᐊᖏᒡᓕᒋᐊᖅᑎᑦᑎᓇᔭᓚᐅᖅᑐᒥ ᑲᑎᖃᑎᖃᕐᓂᐅᔪᒥ ᖃᓪᓗᓈᓂ ᓄᓇᖃᖅᑎᐅᔪᓄᑦ ᖃᖓᑕᓲᒃᑰᖅᐸᒃᑐᓂ ᐃᖅᑲᓇᐃᔭᕐᓂᕆᓂᐊᖅᑕᖏᓐᓄᑦ – ᐊᒻᒪ ᑕᐃᒪᐃᓂᖓᓄᑦ ᖁᕝᕙᕆᐊᖅᑎᑦᑎᓗᓂ ᐱᓂᖏᓐᓂ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥᑦ ᐊᒻᒪ ᐊᐃᑦᑐᖅᓯᓂᕐᒥ ᖃᓂᒋᔭᖏᓐᓄᑦ ᓄᓇᓕᐅᔪᓄᑦ.

ᑭᕙᓪᓕᕐᒥᐅᑕᖅ ᒫᕕᓐ ᑎᐋᓐ, ᒪᐃᔭᐅᓚᐅᖅᓯᒪᔪᖅ ᓴᓪᓕᓂᑦ, ᓴᖅᑭᑎᑦᑎᓚᐅᖅᐳᖅ ᐊᔾᔨᓕᐊᖏᓐᓂ ᕙᐃᔅᐳᒃᑯᑦ ᒫᔾᔨ 18–ᒥ ᑕᑯᒃᓴᐅᑎᑦᑎᔪᒥ ᖃᔅᓯᒐᓚᖕᓂ ᓄᓇᓯᐅᑎᓂᑦ ᐃᓕᓯᒪᔪᓂ ᐊᖅᑯᒻᒥ ᕿᑎᐊᓂ ᑲᖏᖅᖠᓂᕐᒥ ᐊᒻᒪ ᐃᖃᓗᒑᕐᔪᖕᒥ ᒎᓗᒧᑦ ᐅᔭᕋᖕᓂᐊᕐᕕᖕᒥ. ᑎᐋᓐ ᐅᖃᓚᐅᖅᐳᖅ ᐃᑳᕈᓐᓇᐃᔾᔨᑎᑕᐅᓂᐅᓚᐅᖅᐳᖅ ᓄᓇᓕᖕᒥᐅᑕᓂ ᐋᖅᑭᒃᑕᐅᓪᓗᓂ.

ᑭᖑᓂᐊᒍᑦ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒥᓂᔅᑕᖓ ᐅᖃᓚᐅᖅᑎᓪᓗᒍ ᐃᓄᓕᒫᓄᑦ ᑐᐊᕕᕐᓇᕐᓂᓪᓚᕆᐅᓂᖓᓂ ᒫᔾᔨ 18–ᒥ, ᐊᒡᓂᑯ ᐄᒍᓪ ᐊᓯᔾᔩᓚᐅᖅᐳᑦ ᓇᖏᕐᓂᕆᔭᖓᓐᓂ ᖃᐅᑎᓪᓗᒍ, ᐅᖃᖅᖢᑎᒃ ᓄᓇᕗᒻᒥᐅᑦ ᓴᓇᔨᐅᔪᑦ ᓴᖅᑭᑦᑕᕆᐊᖃᙱᓐᓂᖏᓐᓂ ᐱᓇᓱᐊᕈᓯᕐᓄᑦ ᑎᓴᒪᓄᑦ.

ᑲᒻᐸᓂᐅᔫᑉ ᐊᐅᓚᑦᑎᔨᒻᒪᕆᖓ ᐅᖃᓚᐅᕆᕗᖅ ᑲᑎᒪᖃᑎᖃᕐᓂᐊᕐᓂᖏᓐᓂ ᑳᓐᑐᕌᒃᑎᖏᓐᓂ ᐅᖃᐅᓯᖃᕐᓂᕐᒧᑦ ᐊᔾᔨᐸᓗᐊᓂ ᐱᓕᕆᓂᐅᔪᓂ ᓄᓇᕗᒻᒥᐅᓄᑦ ᐃᖅᑲᓇᐃᔭᖅᑎᐅᔪᓄᑦ ᑳᓐᑐᕌᒃᑰᖅᑐᓂ.

"ᐱᓐᓇᕆᕙᕗᑦ ᐱᓕᕆᖃᑎᒋᓂᑦᑎᓐᓂ ᐃᓄᖕᓂ ᓄᓇᕗᒻᒥ ᐊᒻᒪᓗ ᐊᖏᖅᓯᒪᓂᖃᖅᐳᒍᑦ ᐱᓕᕆᓂᕐᒥ ᐱᐅᓛᖑᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐊᑦᑕᓇᔾᔭᐃᖅᓯᒪᓂᕐᒧᑦ ᐊᒻᒪ ᖃᓄᐃᙱᑦᑎᐊᕐᓂᕐᒧᑦ ᑕᒪᒃᑭᓄᑦ ᐃᖅᑲᓇᐃᔭᖅᑎᑦᑎᓐᓄᑦ ᐊᒻᒪ ᓄᓇᓕᐅᔪᓄᑦ," ᐅᖃᓚᐅᖅᐳᖅ ᓵᓐ ᐳᐊᐃᑦ, ᐊᒡᓂᑯ ᐄᒍᓪᑯᑦ ᐊᐅᓚᑦᑎᔨᒻᒪᕆᖓ. "ᐅᓇ ᐱᑎᑦᑎᑦᑕᐃᓕᒪᓂᐅᔪᖅ ᐱᓕᕆᓂᐅᔪᒥ ᐊᑐᓕᖅᑎᑕᐅᓂᐊᖅᐳᖅ ᐲᖅᓯᓂᕐᒥ ᐱᑕᖃᑐᐃᓐᓇᕆᐊᓕᖕᒥ ᐅᓗᕆᐊᓇᕐᓂᖓᓂ ᑐᓂᓯᓂᕐᒥ ᓄᕙᒡᔪᐊᕐᓇᖅ-19–ᒥ ᖃᓪᓗᓈᓂ ᓄᓇᖓᓐᓂ ᓴᓇᔨᐅᔪᒥ ᓄᓇᕗᒻᒧᑦ ᓴᓇᔨᐅᔪᒧᑦ, ᐅᓗᕆᐊᓇᕐᓂᖓᓂ ᓅᑎᕆᓂᕐᒥ ᓄᓇᓕᖕᓄᑦ."

ᑎᑎᕋᕐᕖᑦ ᒪᑐᕗᒃ

ᐹᕙᓐᓛᓐ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᒃ, ᐊᐅᓚᑦᑎᕙᒃᑐᒥ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ 160 ᑭᓚᒦᑐᒥ ᓂᒋᕐᒥ ᒥᑦᑎᒪᑕᓕᖕᒥ, ᓂᕈᐊᓚᐅᖅᐳᑦ ᒪᑐᓯᓂᖏᓐᓂ ᑎᑎᕋᕐᕕᖏᓐᓂ ᐃᖃᓗᖕᓂ, ᐃᒃᐱᐊᕐᔪᒃ, ᑲᖏᖅᖢᒑᐱᒃ, ᐃᒡᓗᓕᒃ, ᒥᑦᑎᒪᑕᓕᒃ ᐊᒻᒪ ᓴᓂᕋᔭᖕᒥ (Hall Beach).

ᐊᓯᐅᔨᓂᖃᔾᔮᙱᓚᖅ ᐊᑭᓕᖅᓱᖅᑕᐅᓂᕐᒥ, ᖁᑦᑎᖕᓂᖅᓴᐅᓂᐅᔪᓂ, ᐅᕝᕙᓘᓐᓃᑦ ᐃᖅᑲᓇᐃᔮᖃᐃᓐᓇᕐᓂᕐᒧᑦ ᓄᓇᕗᒻᒥᐅᓄᑦ ᓴᓇᔨᐅᔪᓄᑦ ᐃᖅᑲᓇᐃᔭᙱᑦᑐᓄᑦ ᐅᕙᓂ ᐊᒥᓱᓄᑦ ᖃᓂᒻᒪᖕᓇᐅᔪᒥ ᐱᓕᕆᓂᐅᔪᒥ, ᑲᒻᐸᓂ ᐅᖃᓚᐅᖅᐳᖅ.

"ᐅᓇ ᖃᓄᐃᓕᐅᕐᓂᐅᔪᖅ ᐃᑲᔪᕐᓂᖃᕐᓂᐊᖅᐳᖅ ᓄᖅᑲᖅᑎᑦᑎᓂᕐᒥ ᐹᕙᓐᓛᓐᑯᑦ ᐃᓂᒋᔭᖓᓂ ᐃᓯᕐᕕᐅᔪᓐᓇᑐᐃᓐᓇᕆᐊᖃᕐᓂᖓᓂ ᓄᕙᒡᔪᐊᕐᓇᖅ-19–ᒥ ᐅᑭᐅᖅᑕᖅᑐᒧᑦ," ᐹᕙᓐᓛᓐᑯᑦ ᑐᓴᒐᒃᓴᓕᐊᖓ ᐅᖃᓕᒫᖅᐳᖅ, ᐃᓚᒋᐊᖅᓯᓪᓗᓂ ᖃᓄᐃᓐᓂᐅᔪᖅ ᖃᐅᔨᓴᖅᑕᐅᒃᑲᓐᓂᕐᓂᐊᖅᐳᖅ ᐱᓇᓱᐊᕈᓰᑦ ᒪᕐᕉᒃ ᐊᓂᒍᕈᑎᒃ.

TMAC ᐃᑲᔪᕈᑎᒃᓴᓂ, ᐊᐅᓚᑦᑎᕙᒃᑐᒥ ᑐᐊᕆᔅ ᐅᐊᖕᓇᒥ ᒎᓗᒥ ᐅᔭᕋᖕᓂᐊᕐᕕᖕᒥ 125 ᑭᓛᒥᑐᒥ ᓂᒋᕐᒥ ᐱᓇᖕᓇᕐᒥ ᐃᖃᓗᒃᑑᑦᑎᐊᕐᒥ, ᐱᓕᕆᓂᖃᓚᐅᖅᐳᖅ ᐱᓕᕆᒃᑲᓐᓂᕐᓂᐅᔪᒥ ᐊᑦᑐᖏᖅᓯᓂᖏᓐᓂ ᐅᖅᑯᐊᖑᔪᒥ Roberts Bay–ᒥ, ᐊᑐᐃᓐᓇᐅᒐᔪᒃᑐᒥ ᓄᓇᓕᖕᓄᑦ ᐊᖑᓇᓱᒃᑎᓄᑦ ᐊᐅᓪᓛᖅᑐᓄᑦ ᐃᖃᓗᒃᑑᑦᑎᐊᕐᒥ Hope Bay ᐃᓂᒋᔭᖓᓄᑦ ᐅᕝᕙᓘᓐᓃᑦ ᕿᙵᐅᑦ ᐅᒥᖕᒪᖅᑑᒧᑦ.

"ᐅᓇ ᐱᓕᕆᐊᖑᕗᖅ ᓄᖅᑲᖅᑎᑦᑎᓂᖓᓂ ᐅᓗᕆᐊᓇᕐᓂᐅᔪᒥ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ-19–ᒥ ᐊᑕᐅᓯᕐᒥ ᐃᓂᒋᔭᐅᔪᒥ ᓴᓇᔨᐅᔪᒥ ᐊᐅᓪᓛᖅᑐᒧᑦ ᐊᖑᓇᓱᒃᑎᒧᑦ," ᐅᖃᓚᐅᖅᐳᖅ ᓛᓇ ᐱᓴᕆᖕᑯ, ᑮᓇᐅᔭᓕᐅᕈᑎᖃᒃᑲᓐᓂᕋᓱᐊᖅᑎᐅᔪᒥ ᐱᓕᕆᔨᐅᔪᒥ ᐃᓚᒋᔭᐅᔪᒥ TMAC ᐃᑲᔪᕈᑎᒃᓴᓂ, ᑭᓯᐊᓂ ᐃᓚᒋᐊᖅᓯᓚᐅᖅᐳᖅ TMAC–ᑯᑦ ᓱᓕ ᐃᑲᔪᖅᓱᐃᖃᑦᑕᕐᓂᐊᖅᐳᑦ ᓄᓇᒥ ᑐᐊᕕᕐᓇᖅᑑᓂᐅᔪᓂ ᐅᕝᕙᓘᓐᓃᑦ ᐸᖅᓴᐃᓂᐅᔪᓂ.

ᕿᑎᕐᒥᐅᓂ ᑎᒥᖁᑕᐅᔪᑦ, ᐊᐅᓚᑦᑎᕙᒃᑐᓂ ᑎᓴᒪᓂ ᑲᒻᐸᓂᐅᔪᒥ ᐊᐅᓚᑕᐅᔪᓂ ᑎᒍᒥᐊᖅᑎᐅᔪᓄᑦ ᑲᒻᐸᓂᒥ ᐃᖅᑲᓇᐃᔭᖅᑎᑦᑎᕙᒃᑐᓂ ᓄᓇᕗᒻᒥ–ᑐᙵᕕᖃᖅᑐᒥ ᓴᓇᔨᐅᔪᓂ Hope Bay ᓇᖕᒥᓂᖁᑎᖓᓐᓂ, ᓂᕈᐊᖅᓯᒪᕗᑦ ᓴᓇᔨᖏᓐᓂ ᐊᖏᕐᕋᖅᓯᒪᓂᖏᓐᓂᑦᑕᐅᖅ, ᐱᓴᕆᖕᑯ ᐃᓚᒋᐊᖅᓯᓚᐅᖅᐳᖅ.

ᑕᒪᒃᑭᑦ ᐱᖓᓱᑦ ᐅᔭᕋᖕᓂᐊᕐᕕᖕᓄᑦ ᑲᒻᐸᓂᐅᔪᑦ ᐅᖃᓚᐅᖅᐳᖅ ᐊᖏᒡᓕᒋᐊᖅᓯᓂᖏᓐᓂ ᖁᐱᕐᕈᐃᔭᐃᓂᕐᒥ ᓴᓗᒻᒪᖅᓴᐃᓂᕐᓂ ᐱᓕᕆᔾᔪᓯᐅᔪᓂ ᐅᔭᕋᖕᓂᐊᕐᕕᖕᒥ ᐃᓂᒋᔭᐅᔪᓂᑦ ᐊᒻᒪᓗ ᖃᖓᑕᓲᓂᑦ ᓴᓇᔨᐅᔪᓂ ᐃᑭᒪᕝᕕᒋᕙᒃᑕᖏᓐᓂ ᖃᖓᑕᓂᕐᒧᑦ ᑕᐃᑯᖓ ᑕᐃᑲᙵᓪᓗ ᐅᔭᕋᖕᓂᐊᕐᕕᖕᓂᑦ. ᐃᖅᑲᓇᐃᔭᖅᑏᑦ ᖃᐅᔨᓴᖅᑕᐅᖃᑦᑕᕐᓂᐊᕆᕗᑦ ᐃᓱᒪᓕᐅᕆᓂᕐᒥ ᐋᓐᓂᐊᕈᑕᐅᖃᑦᑕᕐᒪᖔᑕ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥᑦ ᐅᕝᕙᓘᓐᓃᑦ ᐃᓚᐅᖃᑕᐅᓯᒪᓂᖏᓐᓂ ᖃᓄᐃᓕᐅᕐᓂᐅᔪᓂ ᐊᖏᒡᓕᒋᐊᖅᑎᑦᑎᔪᓐᓇᖅᑐᒥ ᐅᓗᕆᐊᓇᕐᓂᖓᓂ ᓴᖅᑭᔮᕐᕕᐅᔪᕕᓂᐅᓂᕐᒥᑦ.