ᖁᕕᐊᓐᓂᖃᕈᓘᔭᖅᐳᖅ ᒪᑐᐃᓛᕐᓂᖓᓄᑦ ᕿᓐᓄᐊᔭᖅ ᐃᓕᖅᑯᓯᓕᕆᕝᕕᖓᓐᓂ ᐊᒻᒪ ᑎᑎᕋᐅᔭᖅᑐᒐᖃᕐᕕᖕᒥ, ᐊᒻᒪ ᓗᐃᓴ ᐹᕐ ᕿᑎᐊᓃᓐᓂᖃᖅᐳᖅ ᐱᓕᕆᓂᐅᔪᒥ.
ᐹᕐ, ᐃᒡᓗᕐᔪᐊᑉ ᐊᐅᓚᑦᑎᔨᖓ, ᐅᖃᓚᐅᖅᐳᖅ ᐊᒃᓱᕈᕐᓂᐅᔪᒥ ᐃᒃᐱᒍᓱᖕᓂᖓᓂ ᐅᓪᓗᕐᔪᐊᒃᓴᖓ ᖃᓂᒡᓕᕙᓪᓕᐊᓂᖓᓂ– ᓯᑎᐱᕆ. 5−ᒥ ᓄᓇᓕᖕᒥᐅᑕᓄᑦ ᐊᒻᒪ ᓯᑎᐱᕆ 8−ᒥ ᐳᓚᕋᖅᑐᓄᑦ ᒐᕙᒪᓕᕆᔨᐅᔪᓄᑦ.
"ᐱᔭᒃᓴᖃᕐᔪᐊᕐᓇᖅᓯᒪᕗᖅ," ᐅᖃᓚᐅᖅᐳᖅ, ᓄᕚᓗᒃᖢᓂᓗ ᐱᓇᓱᐊᕈᓯᕐᓂ ᒪᕐᕉᖕᓂ ᒪᑐᐃᓛᓕᖅᑎᓪᓗᒍ. "ᐅᐃᒻᒪᒐᓚᓕᖅᐳᖓ. ᖃᓂᒡᓕᕙᓪᓕᐊᓗᐊᖅᑐᖅ ᕿᓚᒻᒥᐅᓗᐊᖅᑐᒥ."
ᐹᕐ ᑕᒪᕐᒥᒐᓚᖕᓂ ᐱᓕᕆᑎᓪᓗᒍ, ᑐᕌᖅᑎᑕᐅᓲᖑᕗᖅ ᐊᒻᒪ ᐃᑲᔪᖅᓯᖅᑕᐅᓂᕐᒥ ᐅᖃᐅᔾᔨᐅᔪᓂ ᑲᑎᒪᔨᕋᓛᖑᔪᓂᑦ ᐃᓚᖃᖅᑐᓂ ᕼᐋᒻᓚᒃᑯᑦ ᑭᙵᕐᓂ ᐱᓕᕆᔨᐅᔪᓄᑦ ᐊᒻᒪ ᑯᐊᐸᒃᑯᓐᓂ ᑭᒡᒐᖅᑐᐃᔨᐅᔪᓂᑦ. ᐅᖃᖅᑎᐅᖃᑕᐅᔪᖅ ᐅᐃᓕᐊᒻ ᕼᐊᕝᒪᓐᓗ, ᑭᙵᕐᓂ ᓴᓇᐅᒐᓕᕆᓂᑦᑎᐊᕙᐅᔪᓄᑦ, ᐃᑲᔪᖅᑐᒥ ᐋᖅᑭᒃᓱᐃᓂᕐᒧᑦ ᐃᓚᖏᓐᓂ ᕿᓄᐊᔪᐊᖅ ᐋᓯᕙᐅᑉ ᑕᑯᔭᐅᓚᐅᖅᓯᒪᙱᑦᑐᓂ ᓴᓇᙳᐊᒐᖏᑦ ᐊᒻᒪ ᑎᑎᕋᐅᔭᕐᓂᑯᖏᓐᓂ.
ᐊᒥᓱᓂ ᐊᔪᙱᑦᑐᒻᒪᕆᐊᓗᖕᓂ ᑭᙵᕐᒥᐅᓂ ᓴᓇᐅᒐᓕᕆᔨᑕᖃᖅᐳᖅ ᓴᖅᑭᔮᖅᑎᑕᐅᓂᐊᖅᑐᓂ ᓯᕗᓂᒃᓴᐅᔪᒥ ᐊᒻᒪᓗ ᐱᔪᓐᓇᕐᓂᐅᔪᒥ ᓴᓇᐅᒪᓂᖓᓂ ᐊᓯᔾᔨᖅᓱᐃᔪᓐᓇᕐᓂᕐᒥ ᓂᐱᑦᑕᖅᑑᔪᒥ ᓴᓂᕋᖏᓐᓂᑦ – ᓴᓇᔭᐅᓂᖓᓂ ᓴᖅᑭᑕᐅᓯᒪᓂᐅᔪᒥ ᐃᒡᓗᕐᔪᐊᒥ – ᐱᔪᓐᓇᖅᑎᑦᑎᓂᐊᖅᐳᖅ ᐊᖏᐸᓗᒃᑐᒥ ᓴᖑᓴᕋᐃᓐᓂᖓᓂ ᖃᓄᖅ ᑕᑯᓐᓇᒐᖃᕐᕕᖓ ᑕᑯᒃᓴᐅᓂᖓᓂ, ᐹᕐ ᐅᖃᓚᐅᕆᕗᖅ.
ᐋᖅᑭᒃᓱᖅᑕᐅᓂᖓ ᐃᒡᓗᕐᔪᐊᑉ ᐃᓗᐊᓂ ᐊᖏᔪᒻᒪᕆᐅᓯᒪᕗᖅ ᑕᐃᒪᙵᓂ ᐱᓕᕆᐊᖑᔪᒥ ᐱᓕᕆᒋᐊᕋᒥ ᑕᖅᑭᑦ ᐱᖓᓲᓕᖅᑐᓂ.
"ᐃᓗᓕᖃᙱᑲᓴᓚᐅᖅᐳᖅ ᐱᒋᐊᖅᑎᓪᓗᖓ. ᑕᒪᕐᒥᒃ ᑎᑎᕋᕐᕕᖕᒥᐅᑕᒃᑲ ᐱᓕᕆᔾᔪᑎᑦ ᓱᓕ ᐴᖅᓯᒪᓚᐅᖅᐳᑦ. ᖁᕕᐊᓱᕖᐅᖅᑰᔨᓚᐅᖅᐳᖅ ᑭᓱᓕᒫᑦ ᒪᑐᐃᖅᐸᓪᓕᐊᓕᕋᒃᑭᑦ," ᐅᖃᓚᐅᖅᐳᖅ, ᐃᒡᓚᖅᖢᓂ.
ᐹᕐ ᑲᑕᔾᔭᖅᑎᐅᒐᓗᐊᖅᑎᓪᓗᒍ, ᐅᖃᓚᐅᖅᐳᖅ ᓴᓇᐅᒐᓕᕆᔨᐅᙱᓐᓂᖓᓂ.
"ᓴᓇᙳᐊᕈᓐᓇᙱᓚᖓ. ᑎᑎᕋᐅᔭᕈᓐᓇᙱᓚᖓ ᐅᕙᓐᓂᑦ ᓴᐳᔾᔨᓇᓱᐊᕐᓗᖓ," ᐃᔪᓚᐅᖅᐳᖅ.
ᑭᓯᐊᓂ, ᐊᔪᙱᑦᑐᐊᓗᖕᓂᙶᖅᓯᒪᕗᖅ ᓴᓇᐅᒐᓕᕆᔨᓂᑦ ᐃᒡᓗᒃᑐᑦ ᐃᓚᖏᓐᓂ−ᐃᓚᖃᖅᑐᒥ ᐊᑖᑕᑦᑎᐊᖓ ᑲᓈᖏᓐᓇᖅ ᐳᑐᒍᖅ ᐱᓕᕆᖃᑕᐅᓚᐅᖅᓯᒪᔪᒥ ᓇᓂᓯᖃᑕᐅᓂᕐᒧᑦ ᑯᐊᐸᒃᑯᓐᓂ – ᐹᕐ ᐱᕙᓪᓕᐊᑎᑦᑎᓯᒪᕗᖅ ᐱᐅᒃᓴᕐᔪᐊᕐᓂᖓᓂ ᓴᓇᐅᒐᓕᕆᓂᕐᒧᑦ.
$10.2-ᒥᓕᐊᓐᑐᖅᑐᒥ, 10,400-ᑭᑉᐹᕆᒃᑐᒥ ᐃᓯᒐᓪᓗᐊᓂ ᐊᖏᓂᓕᖕᒥ ᐃᒡᓗᕐᔪᐊᖅ ᑲᒪᒋᔭᖃᖅᓯᒪᕗᑦ ᐅᐸᒃᓯᒪᔪᓄᑦ. ᐃᓄᑐᖃᕐᓂ ᑲᑎᙵᓂᐅᔪᓂ ᑲᑎᓚᐅᖅᐳᑦ ᓯᕗᓂᐊᓂ ᑕᖅᑭᐅᔪᒥ ᐊᒻᒪ ᑐᓂᓯᔨᐅᔪᓂᑦ ᐃᑲᔪᖅᓱᐃᕐᔪᐊᓚᐅᖅᑐᓂ $3.2 ᒥᓕᐊᓐᓂ ᓇᖕᒥᓂᖅ ᑐᓐᓂᖅᑯᓯᐊᓂᑦ ᑭᙵᕐᓄᐊᓚᐅᖅᐳᑦ ᐅᖓᓯᒃᑎᒋᔪᒥ ᔫᓇᐃᑎᑦ ᔅᑕᐃᑦᔅᓂ ᑕᑯᔭᖅᑐᖅᖢᑎᒃ ᐃᒡᓗᕐᔪᐊᒥ ᐊᒻᒪ ᐃᓗᓕᖏᓐᓂᑦ.
"ᐊᒥᓱᐊᓗᖕᓂ ᐃᓄᖕᓂ ᑐᓐᓂᕆᓚᐅᖅᑐᓂ ᐆᒧᖓ ᐃᒡᓗᕐᔪᐊᕐᒧᑦ ᐊᒻᒪ ᑕᐃᒃᑯᐊᖑᓚᐅᙱᒃᑯᑎᒃ ᐆᒥᖓ ᐱᐅᔪᐊᓗᖕᒥ ᐃᒡᓗᕐᔪᐊᖃᕋᔭᙱᓚᒍᑦ," ᐹᕐ ᐅᖃᓚᐅᖅᐳᖅ.