ᐊᕐᕕᐊᓂ ᐅᓇᑕᖑᐊᖅᑎᑦ ᐊᔪᖏᖃᑕᐅᓚᐅᖅᐳᑦ 2018-ᒥ ᐅᓇᑕᕐᓂᕐᒧᑦ ᐆᒃᑐᖅᑎᑕᐅᑎᓪᓗᒋᑦ ᐃᖃᓗᖕᓂ ᑕᒡᕙᓂ ᑕᖅᑭᒥ ᐊᑐᖅᑐᒥ.
ᔭᓐᓄᐊᕆ 20-ᒥ ᑲᑎᑎᑕᐅᓚᐅᕐᒪᑕ ᓂᕈᐊᓚᐅᖅᖢᑎᒡᓗ ᐊᑐᖅᑕᐅᓂᐊᖅᑐᒥᒃ 2018-ᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᓐᖑᐊᕐᔪᐊᕐᓇᐅᓂᐊᖅᑐᒧᑦ ᕼᐃᕆᕗᒥ ᐊᒻᒪ ᕗᐊᑦ ᓯᒥᑦᒥᑦ, ᓄᓇᑦᓯᐊᒥ.
ᐊᕐᕕᐊᑦ ᑭᒡᒐᖅᑐᖅᑕᐅᑦᓯᐊᖅᐳᖅ ᐆᒃᑐᖃᑕᐅᔪᓂ ᐅᓇᑕᖑᐊᕐᓂᕐᒧᑦ ᑖᑉᓱᒧᖓ ᓯᐅᕕᐊ ᖃᑉᓗᑦᓯᐊᒧᑦ, ᓇᑕᓕ ᐲᑯ, ᒪᐃᑯ ᐃᕐᓂᖅ ᐊᒻᒪ ᒫᑎᐅ ᐃᑉᓚᐅᒃ, ᖃᑉᓗᑦᓯᐊᒃ ᒎᓗᑎᑖᓚᐅᖅᖢᓂ, ᐊᒻᒪ ᑕᒪᕐᒥᒃ ᐲᑯ ᐊᒻᒪ ᐃᕐᓂᖅ ᓯᐅᕙᑖᓚᐅᖅᖢᑎᒃ.
ᐊᕐᕕᐊᓂ ᐅᓇᑕᖑᐊᖅᑎᑦ ᐃᓕᓐᓂᐊᖅᑎᑕᐅᕗᑦ ᐊᕐᕌᒍᒥ ᐱᖓᔪᖓᓂ ᐃᓕᓐᓂᐊᖅᑎᑎᔨᖃᖅᖢᑎᒃ Patricia Luciani−ᒥᒃ ᓯᕗᓪᓕᕐᒥ ᐅᑭᐅᒥ ᐃᓕᓐᓂᐊᖅᑎᑎᓕᓵᖅᖢᓂ ᑖᓐᓇ Andrew Fawcett.
Luciani ᐅᖃᓚᐅᖅᐳᖅ ᐊᕐᕌᒍᒥ ᐊᑐᖅᑐᒥ ᐆᒃᑐᖅᑎᑕᐅᓚᐅᖅᑐᑦ ᓴᓐᖏᔫᓚᐅᖅᐳᑦ ᑕᒪᐃᑎᒍᑦ, ᐱᓗᐊᖅᑐᒥᒃ ᐊᕐᓇᖏᑦ.
ᐅᖃᓚᐅᖅᐳᖅ ᐲᑯ ᐅᓇᑕᖑᐊᖃᑕᐅᓂᖅᓴᐅᓚᐅᖅᖢᓂ 60ᓂᑦ 65-ᓄᑦ ᑭᓗ ᐅᖁᒪᐃᓐᓂᖃᖅᑐᓂ ᐊᑯᓂ ᑕᐃᒪᓐᓇᐃᓚᐅᖅᓯᒪᖏᒃᑲᓗᐊᖅᖢᓂ.
“ᐃᒻᒪᖄ ᐱᖓᓱᐃᓐᓇᐅᓯᒪᖕᒪᑕ ᐃᓄᐃᑦ ᐃᓚᐅᔪᑦ ᐊᕐᕌᒎᓯᒪᓕᖅᑐᓂ, ᑭᓯᐊᓂ ᑕᒡᕙᓂ ᐊᕐᕌᒍᒥ 6-ᖑᓚᐅᖅᓗᑎᒃ,” ᐅᖃᓚᐅᖅᐳᖅ Luciani.
“ᐊᔾᔨᒌᖏᑦᑐᓂᑦ ᓄᓇᓕᖕᓂᖔᓚᐅᖅᖢᑎᒃ, ᖁᕕᐊᓇᓚᐅᖅᖢᓂᓗ ᑕᑯᑉᓗᒋᑦ ᐅᓇᑕᖑᐊᖃᑕᐅᔪᑦ ᐊᒥᓱᖑᖅᐸᓪᓕᐊᓯᒪᓕᕐᓂᖏᓐᓄᑦ.
“ᖁᕕᐊᒋᕙᕋ ᑕᒪᓐᓇ ᐊᑕᐅᓯᕐᒧᑦ ᐱᓐᖑᐊᕈᑕᐅᔪᓐᓇᕐᓂᖓᓄᑦ, ᑕᐃᒪᓐᓇ ᐊᒥᓲᓗᐊᕆᐊᖃᖏᓐᓇᕐᒪᑦ ᑕᐃᒪᓐᓇ ᐱᓐᖑᐊᖃᑕᐅᓂᐊᖅᑐᓄᑦ.
“ᐃᓚᐅᓕᓚᐅᖅᐳᖓ ᓯᐊᐱ ᐊᖓᓕᒃ ᒍᕇᑦ 12-ᒥ ᐃᓕᓐᓂᐊᖅᑎᓪᓗᒍ ᐊᕐᕕᐊᓂ ᐊᒻᒪ ᐃᓕᓐᓂᐊᖅᑎᑕᐅᒋᐊᖃᓚᐅᕐᒪᑦ ᑲᔪᓯᒍᒪᑉᓗᓂ ᐅᑭᐅᒃᑯᑦ ᐅᑭᐅᖅᑕᖅᑐᒥ ᐱᓐᖑᐊᕐᔪᐊᖃᑕᐅᓂᕐᒧᑦ, ᑕᐃᒪ ᐱᒋᐊᖃᑕᐅᓕᓚᐅᖅᐳᖓ ᑕᐃᒪᓐᓇᓗ ᐃᓚᐅᑎᑦᓯᓕᖅᖢᑕ ᓯᐅᕕᐊ (ᖃᑉᓗᑦᓯᐊᒥᒃ), ᒍᕇᑦ 9-ᒥ ᐃᓕᓐᓂᐊᖅᑎᓪᓗᒍ ᒫᓐᓇ ᒍᕇᑦ 11-ᒥ ᐃᓕᓐᓂᐊᓕᖅᐳᖅ ᐱᓐᖑᐊᖃᑕᐅᓕᖅᖢᓂᓗ ᑕᐃᒪᖓᓂᑦ.”
Fawcett, ᐊᖅᓴᖅᑎᐅᖃᑕᐅᓂᕐᒧᑦ ᖃᐅᔨᒪᔭᖃᖅᖢᓂ ᕗᑦᐹᖑᓂᕋᖅᑕᐅᔪᓂᒃ, ᐅᖃᓚᐅᖅᐳᖅ ᐅᐱᓚᐅᕋᒥ ᑕᐱᕇᒃᑐᒻᒪᕆᐅᓂᖏᓐᓄᑦ ᑕᐃᑲᓂ ᐃᖃᓗᖕᓃᑦᖢᑎᒃ ᐅᔾᔨᕆᓚᐅᖅᑕᖏᑦ.
ᐅᖃᓚᐅᖅᖢᓂᓗ ᐅᐱᓚᐅᕋᒥᓗ ᖃᓂᒌᒍᑎᓚᐅᕐᓂᖏᓐᓄᑦ ᐃᑲᔪᖃᑦᑕᐅᑎᑉᓗᑎᒡᓗ ᐊᑐᓂ ᐱᓐᖑᐊᖃᑎᒌᑦᓯᐊᖅᖢᑎᒃ.
“ᐱᐅᓚᐅᖅᐳᖅ ᑲᑎᑎᑕᐅᑉᓗᑎᒃ ᐅᓇᑕᖑᐊᖅᑎᑦ ᑕᓪᓕᒥᕐᒥ (ᔭᓐᓄᐊᕆ 19) ᐊᒻᒪ ᐃᓕᓐᓂᐊᖅᑎᖃᑦᑕᐅᑎᑎᑕᐅᑉᓗᑎᒃ,” ᐅᖃᓚᐅᖅᐳᖅ Fawcett.
"ᑕᐃᒪᓗ, ᓴᓇᑦᑕᐃᓕᐊᕈᓯᐅᓕᖅᑎᓪᓗᒍ, ᐱᖃᓐᓇᕇᑦᓯᐊᖅᖢᑎᒃ ᐱᓐᖑᐊᖃᑎᒌᓕᓚᐅᖅᐳᑦ ᑎᒎᑎᖃᑦᑕᐅᑎᑉᓗᑎᒡᓗ, ᑲᔪᖏᖅᓴᐃᖃᑦᑕᐅᑎᑉᓗᑎᒡᓗ ᐃᑲᔪᖅᑐᐃᑉᓗᑎᒡᓗ ᑐᓴᖅᑕᐅᑉᓗᑎᒃ.
“ᑕᑯᒥᓇᓚᐅᖅᐳᖅ ᑕᐃᒪᓐᓇ.”
ᖃᒪᓂ'ᑐᐊᒥᐅᑕᖅ ᑕᑯᒃᓴᐅᖅᑳᕐᓂᐊᖅᖢᑎᒃ ᐅᑭᐅᒃᑯᑦ ᐅᑭᐅᖅᑕᖅᑐᒥ ᐱᓐᖑᐊᕐᔪᐊᕐᓂᕐᒧᑦ, 2018−ᒥ ᖃᑉᓗᑦᓯᐊᖅ ᑐᖏᓕᐊᓂ ᐃᓚᐅᓂᐊᖅᖢᓂ, ᐊᕐᓇᓂ ᐃᓚᐅᖃᑕᐅᓯᒪᖃᑕᐅᑉᓗᓂ ᐱᓐᖑᐊᕐᔪᐊᖅᑐᓂ.
Luciani ᐅᖃᓚᐅᖅᐳᖅ ᖃᑉᓗᑦᓯᐊᒃ ᐱᖓᔪᒋᔭᐅᑉᓗᓂ ᓵᓚᒃᓴᐅᑎᑖᓚᐅᖅᖢᓂ ᓯᕗᓪᓕᖅᐹᒥ ᐅᑭᐅᒃᑯᑦ ᐅᑭᐅᖅᑕᖅᑐᒥ ᐱᓐᖑᐊᕐᔪᐊᕐᓇᐅᓚᐅᖅᓯᒪᑎᓪᓗᒍ 2016-ᒥ, ᑭᓯᐊᓂ ᐊᒃᓱᕈᕆᐊᖃᕐᓂᐊᕈᒪᑉᓗᓂ ᕼᐃᕆᕗᒧᐊᓚᐅᖏᓐᓂᕐᒥᖕᓂ ᐊᔪᖏᓴᑦᓯᐊᕆᐊᖃᖅᐳᖅ.
“ᐊᒃᓱᕈᕐᓇᑦᓯᐊᕐᒪᑦ ᓵᓚᒃᓴᐅᑎᖃᑦᑕᐅᑎᑉᓗᓂ ᑕᒪᒃᑯᐊ ᐱᓐᖑᐊᖃᑎᒋᒐᑉᑎᒍ ᐅᑭᐅᖅᑕᖅᑐᖓᓂ ᐃᐊᐴᑕᒥᐅᑕᐃᑦ, ᐊᒻᒪ ᐊᓛᔅᑲᒥᐅᑕᐃᑦ ᓴᓐᖏᔪᒻᒪᕆᐅᕙᒃᖢᑎᒃ, ᑕᐃᒪᓐᓇ ᖃᓂᒌᖃᑦᑕᖅᐳᒍᑦ.
“ᑭᓯᐊᓂ ᓯᐅᕕᐊ ᖃᐅᔨᒪᕗᖅ ᐊᑐᖅᓯᒪᑉᓗᒋᓪᓗ, ᐅᑭᐅᒃᑯᑦ ᐅᑭᐅᖅᑕᖅᑐᒥ ᐱᓐᖑᐊᕐᔪᐊᖃᑕᐅᓯᒪᑉᓗᓂ, ᓵᓚᒋᔭᐅᓚᐅᖅᓯᒪᒐᓗᐊᖅᖢᓂ ᐊᑭᕋᒥᓂᒃ ᐃᓚᖓᒍᑦ ᐊᔪᖏᓚᐅᖅᐳᖅ, ᑕᐃᒪᓐᓇ ᖁᕕᐊᓇᓚᐅᖅᖢᓂᓗ.
“ᐊᔪᖏᑦᓯᐊᖅᑑᔮᖃᑦᑕᖅᐳᒍᑦ ᐅᑭᐅᒃᑯᑦ ᐱᓐᖑᐊᕐᔪᐊᕐᓇᐅᔪᒥ ᐃᓄᒃᑎᑐᑦ−ᐅᓇᑕᖑᐊᕐᓂᕐᒧᑦ, ᐱᓗᐊᖅᑐᒥᒃ ᐊᖑᑎᑦ, ᐅᔭᒥᒃᑖᖅᖢᑕ ᐱᐊᓂᖃᑕᐅᖃᑦᑕᖅᐳᒍᑦ.”
Fawcett ᐅᖃᓚᐅᖅᐳᖅ ᓴᐱᓕᕈᓐᓇᖏᓐᓂᖏᓐᓄᑦ ᐱᐅᒋᑉᓗᓂᒋᑦ ᐅᓇᑕᖑᐊᖅᑎᑦ ᑕᓐᓇᓗ Luciani ᐱᓕᕆᓯᒪᓕᖅᖢᑎᒃ ᐊᕐᕕᐊᓂ.
ᐅᖃᓚᐅᖅᖢᓂᓗ ᑲᔪᓯᑦᓯᐊᕈᒪᓂᕐᒧᑦ ᐃᓱᒪᓚᐅᕐᒪᑕ, ᓵᓚᒃᓴᕋᓗᐊᕈᑎᒡᓘᓐᓃᑦ ᓵᓚᐅᒐᓗᐊᕈᑎᒡᓘᓐᓃᑦ.
“ᑕᐃᒪᓐᓇ ᑲᔪᓯᑦᓯᐊᕈᒪᓂᖏᑦ ᐃᖅᑲᐅᒍᑎᒋᕙᒃᐸᒃᑲ ᑕᒪᒃᑯᓂᖓ ᐃᖃᐃᓕᓴᕐᓂᕐᒧᑦ ᐱᓐᖑᐊᖅᑎᓂᒃ, ᓄᓇᕗᒥ ᐊᑐᕚᒥᓘᓐᓃᑦ ᑕᒡᕙᓂᒥᐅᑕᐅᑉᓗᖓ ᐊᑐᕚᒥ.
“ᐃᑲᔪᖅᑐᖅᑕᐅᑦᓯᐊᖅᖢᑕ ᓄᓇᓕᖕᓂᒥᐅᓄᑦ ᖁᔭᓐᓇᒦᕈᒪᑉᓗᒍᓗ ᐅᓕᕕᐊ ᑕᕐᕋᓕᒃ ᐊᕐᕕᐊᓂ.
“ᐃᑲᔪᖃᑦᑕᓚᐅᕐᒪᑦ ᓇᒧᖓᐅᒋᐊᖃᓕᕌᖓᑉᑕ, ᐃᑲᔪᖅᑐᐃᕙᒃᖢᓂᓗ ᐊᒃᓱᕈᑦᓯᐊᖅᓗᓂ ᐃᖃᐃᓕᓴᖅᑎᑉᑎᓂᒃ, ᐃᖏᕐᕋᔭᐅᑕᐅᓂᐊᖅᑐᓄᓪᓘᓐᓃᑦ ᒪᑦᑐᓯᖅᑐᐃᓂᕐᓘᓐᓃᑦ ᐊᒡᒐᖏᓐᓂᒃ.”