Skip to content

ᐃᓱᒪᖅᓱᕈᓐᓇᕐᓂᖅ ᓂᕈᐊᕐᓂᕐᒧᑑᖓᖏᒻᒪᑦ

ᑖᒃᑯᓄᖓ ᐃᓱᒻᒥᖅᓯᒪᕙᒌᖅᑐᓄᑦ ᐃᓚᐅᓂᐊᕐᓂᕐᒥᓂᒃ ᓯᕗᓂᕆᓂᐊᖅᑕᑦᑎᓐᓂ ᓄᓇᕗᒥ ᒐᕙᒪᑎᒃᓴᓂᒃ ᓂᕈᐊᓕᕈᑦᑕ ᓄᓇᕗᒥ ᓂᕈᐊᖅᑎᓪᓗᒋᑦ, ᖃᐅᔨᒪᖕᒪᑕ ᓂᕈᐊᖅᑐᑦ ᐊᑐᕐᓂᖃᖅᑐᒥᒃ ᐋᕿᒃᓱᐃᓂᐊᕐᒪᑕ ᓯᕗᓂᒃᓴᑦᑎᓐᓂᒃ ᑲᑎᒪᔨᒋᓂᐊᖅᑕᑦᑎᓐᓂ ᐃᓚᐅᓗᑎᒃ.

ᑖᒃᑯᐊ 22 ᐃᓄᐃᑦ ᑲᑎᒪᔨᑖᕆᓂᐊᖅᑕᕗᑦ ᒪᓕᒐᓕᐅᕐᕕᖕᒥ ᐊᑭᓕᐅᓯᐊᖃᑦᑕᕐᒪᑕ $120,000-ᓂᑦ  $220,000-ᒧᑦ - ᐊᑭᓕᖅᓱᖅᑕᐅᓂᖅᐹᖑᖃᑕᐅᖕᒪᑕ ᐃᖅᑲᓇᐃᔭᖅᑎᓂ ᓄᓇᕗᒥ, ᑲᓇᑕᒥᐅᓂᓗ ᓲᖃᐃᒻᒪ. ᐊᒻᒪᓗ ᓇᓗᓇᖏᑦᑐᒥᒃ ᐃᖅᑲᓇᐃᔮᒥᓃᑦᑐᓐᓇᖅᖢᑎᒃ ᐅᑭᐅᓂᒃ ᓯᑕᒪᓂᒃ. ᐃᓚᖏᑦ ᑕᐃᒪᐃᑦᑐᒥᒃ ᐃᖅᑲᓇᐃᔮᖃᖅᖢᓂ ᐊᑲᐅᒃᓴᖃᑦᑕᖅᑐᑦ ᑭᓯᐊᓂᓕ ᖃᐅᔨᒪᒋᐊᖃᕐᒥᔪᒍᑦ ᐊᒃᓱᕈᕐᓇᖅᑐᒥᒃ ᐃᖅᑲᓇᐃᔮᖃᕐᒪᑕ ᐊᓯᖏᓐᓄᑦ ᐊᔭᐅᖅᑕᐅᔪᒥᒃ ᑕᑯᒃᓴᕈᖅᑎᑦᑎᒋᐊᖃᖃᑦᑕᖅᖢᑎᒃ ᐱᒃᑯᒥᒋᔭᐅᔪᓂᒃ ᓄᓇᕗᒥᐅᓄᑦ.

ᑕᐃᒪᐃᓐᓂᖓᓄᑦ, ᖁᔭᓕᕙᕗᑦ ᑖᒃᑯᐊ 72 ᓄᓇᕗᒥᐅᑦ ᓂᕈᐊᒐᒃᓴᖑᑲᐃᓐᓇᖅᑐᑦ ᓇᖕᒥᓂᖅ ᑲᖑᓲᑎᖃᖏᓱᑎᒃ ᐊᑎᕐᒥᓂᒃ ᐃᓕᓯᓚᐅᖅᑐᑦ ᐃᓱᒪᒋᔭᒥᓂᒃ ᐊᑐᕐᓂᖃᖅᑎᑦᑎᓂᐊᕋᒥᒃ ᓄᓇᕗᒥᐅᑦ ᓯᕗᓂᒃᓴᖓᓂ ᐋᕿᒃᓱᐃᔨᐅᓂᐊᕋᒥᒃ ᐊᓱᐃᓛᒃ ᑕᖅᑭᓕᒫᒥ ᑕᕝᕙ ᐱᕝᕕᒃᓴᖃᖅᑎᑕᐅᕗᑦ ᐃᖅᑲᓇᐃᔮᕆᓂᐊᖅᑕᒥᓂᒃ ᐃᓂᓪᓚᒃᓴᐃᓂᐊᕐᒪᑕ ᐊᒻᒪᓗ ᖃᐅᔨᒪᔪᒪᒐᑦᑎᒍ ᑭᒃᑰᖕᒪᖔᑕ ᑲᑎᒪᔨᒋᓂᐊᖅᑕᕗᑦ ᒐᕙᒪᑎᑦᑎᓐᓄᑦ ᓄᓇᓕᖕᒥᐅᓄᑦ ᓂᕈᐊᖅᑕᐅᔪᑦ  ᒪᓕᒐᓕᐅᖅᑎᐅᖁᔭᐅᓗᑎᒃ. ᖁᔭᓐᓇᒦᖑᔪᓯ ᑕᒪᑉᓯ.

ᑭᓯᐊᓂᓕ ᑕᒪᑐᒪᓂ ᐱᓇᓱᐊᕈᓯᕐᒥ ᓄᓇᕗᒥᐅᑦ ᓂᕈᐊᕐᓂᐊᓕᕐᒥᖕᒪᑕ ᒫᓐᓇ ᒪᓕᒐᓕᐅᖅᑎᖏᑕ ᑭᖑᓪᓕᖅᑎᒋᓂᐊᖅᑕᖏᓐᓂᒃ ᐊᒃᓱᕉᑎᒋᔭᖏᑦ ᑲᔪᓯᑎᓐᓇᓱᐊᕆᐊᖃᕐᓂᐊᖅᑕᖏᑦ ᑲᑎᒪᕕᖕᒥ ᑕᑯᒃᓴᐅᓗᑎᒃ. ᑲᒪᒋᔭᐅᓗᑎᒃ ᒐᕙᒪᑎᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐱᓕᕆᐊᒃᓴᖏᑦ ᐋᕿᒃᓱᖅᑕᐅᕙᒌᖅᓯᒪᖕᒪᑕ ᓄᓇᕗᒥᒃ ᐊᐅᓚᑦᑎᔨᒋᓂᐊᖅᑕᕗᑦ.

ᖃᐅᔨᒪᓕᕋᑦᑕ - ᐊᑲᐅᓂᖅᓴᒧᑦ ᐊᑲᐅᖏᓐᓂᖅᓴᒧᓪᓘᓐᓃᑦ ᐃᖏᕐᕋᔪᓐᓇᕐᒪᑕ - ᖃᓄᑎᒋ ᐱᒻᒪᕆᐅᓂᖓᓂᒃ ᓱᓕᔪᕐᓇᕆᐊᖃᕐᒪᑕ ᓄᓇᓕᖕᒥᐅᓄᑦ ᒐᕙᒪᑎᒃᑯᑦ ᐱᓕᕆᕝᕕᖏᓐᓂ. ᓄᓇᕗᑦ ᐱᑕᖃᕋᔭᖏᒻᒪᑦ ᑭᓯᐊᓂ ᐊᐅᓚᑦᑎᔨᒋᔭᖏᑦ ᓱᓕᔪᕐᓇᕐᓂᐊᖅᐸᑕ ᐊᖑᑏᑦ ᐊᕐᓇᐃᓪᓗ ᑲᑎᒪᔨᖁᑎᒋᓂᐊᖅᑕᕗᑦ ᓄᓇᕗᒥᐅᓄᑦ ᐱᒃᑯᒥᒋᔭᐅᔪᑦ ᓴᖅᑭᑎᑕᐅᖃᖅᑕᕈᓐᓇᕐᓂᐊᖅᐸᑕ, ᐊᒻᒪᓗ ᑕᐃᒃᑯᓄᖓ ᑕᒪᑐᒧᖓ ᑎᑭᕕᒋᔭᑦᑎᓐᓄᑦ ᐊᒃᓱᕉᑎᖃᖅᓯᒪᔪᓄᑦ. ᒫᓐᓇ ᓄᑖᓂᒃ ᑮᓇᓂᒃ ᑕᐅᑐᒐᖃᕐᓂᐊᓕᖅᑐᒍᑦ ᒪᕐᕉᖕᓂ ᐱᒻᒪᕆᐅᔪᓂ ᐃᖅᑲᓇᐃᔮᖃᕐᓗᑎᒃ - ᓯᕗᓕᖅᑎᐅᓂᕐᒥᒃ ᑮᓇᐅᔭᓕᕆᔨᐅᓂᕐᒥᒃᓗ - ᓇᓗᓇᖏᑦᑐᖅ ᐊᓯᖔᖓᓄᑦ ᓵᖓᓂᖅᓴᐅᓂᐊᖅᑐᒃᓴᐅᖕᒪᑕ ᑖᒃᑯᐊ ᐃᓇᖏᖅᑎᒋᔭᐅᔪᑦ ᐅᑭᐅᖑᓂᐊᖅᑐᓂ ᓯᑕᒪᓂ ᐊᐅᓚᑦᑎᔨᒋᓂᐊᖅᑕᕗᑦ ᒐᕙᒪᑎᑦᑎᓐᓂᒃ, ᐊᒻᒪᓗ ᐅᒃᐱᕆᓗᑎᒍ ᑭᓯᐊᓂᐅᖕᒪᑦ ᐃᑲᔪᖅᓴᑦᑎᐊᕐᓗᑎᒍ.

ᑭᓯᐊᓂᓕ ᐃᓛᓐᓂᓚᐅᓱᖓᒃᑯᑦ ᐅᒃᐱᕐᓇᖏᑦᑐᖃᓚᐅᑲᓲᖑᖕᒥᖕᒪᑦ - ᐃᓚᖏᑦ ᒪᓕᒐᓕᐅᖅᑏᑦ ᑲᑕᒍᑎᖃᐅᖃᑦᑕᓕᕌᖓᑕ ᐱᑲᒻᒪᖃᑦᑕᖅᓯᒪᔪᑦ - ᐃᖅᑲᐅᒪᔭᒃᓴᕆᕙᕗᑦ ᐃᓗᐊᕐᓂᖅᓴᒧᑦ ᐋᕿᒃᑕᐅᓲᖑᖕᒪᑕ ᑖᒃᑯᐊ ᓂᕈᐊᕐᓂᐊᖅᑕᕗᑦ 22 ᒪᓕᒐᓕᐅᖅᑎᑖᕆᓂᐊᖅᑕᕗᑦ. ᓯᕗᕚᖏᑦ ᓇᓗᓇᖃᑦᑕᖏᓯᒪᖕᒪᑕ, ᐃᓚᖏᑦ ᐊᒃᓱᕈᖅᑎᑕᐅᖃᑦᑕᕐᓂᐊᖅᑐᑦ ᓇᓗᓇᖏᒻᒥᔪᖅ ᒪᓕᒐᑎᒍᑦ ᐱᖅᑯᓯᖏᑎᒍᓪᓗ ᐊᑐᐊᒐᕆᔭᐅᔪᑦ ᐊᓯᖏᑎᒎᓕᕌᖓᑕ, ᐊᒻᒪᓗ ᓱᓕᔪᕐᓇᕐᓂᖏᑦ ᖃᐅᔨᓴᖅᑕᐅᓕᕌᖓᑕ ᐃᓛᓐᓂᓗ ᐃᓚᖏᑦ ᐃᒋᑕᐅᒻᒪᕆᖃᑦᑕᖅᓯᒪᓪᓗᑎᒃ ᒪᓕᒐᓕᐅᕐᕕᖕᒥᑦ ᑭᓯᐊᓂᓕ ᖁᔭᓐᓇᒦᒃ ᑕᒪᒃᑯᐊ ᐊᒃᓱᕈᕐᓇᖅᑐᑦ ᐃᓚᐃᓐᓇᖓᓂ ᐱᖃᑦᑕᕐᒪᑕ.

ᖃᐅᔨᕙᓪᓕᐊᓂᐊᓕᖅᑐᒍᑦ ᐅᓪᓘᓂᐊᖅᑐᓂ ᖃᓄᑎᒋ ᐅᓄᖅᑎᒋᓂᐊᕐᓂᖏᑦ ᓂᕈᐊᕆᐊᖅᑐᖅᑐᑦ, ᑭᓯᐊᓂᓕ ᑕᐃᒪᖓᓂᓂᑦ ᓄᓇᕗᒥᐅᑦ ᓂᕈᐊᕆᐊᖅᑐᖃᑦᑕᕐᓂᖏᑦ ᐅᓄᖏᓕᖅᐸᓪᓕᐊᖏᓐᓇᕐᒪᑕ 1999-ᒥᑦ. ᑲᔪᓰᓐᓇᕐᓂᐊᖅᐸᑦ, ᐅᓄᖏᓐᓂᖅᓴᓄᑦ ᑐᑭᑖᕈᑕᐅᓯᒪᔪᓂᒃ ᒐᕙᒪᑎᖃᑐᐃᓐᓇᕆᐊᖃᖅᑐᒍᑦ ᐃᓅᓯᑦᑎᓐᓄᑦ ᐃᒃᐱᖕᓇᕐᓂᖃᕐᓂᐊᖅᑐᓂᒃ ᐱᓕᕆᐊᖃᕐᒪᑕ ᐅᑭᐅᖑᓂᐊᖅᑐᓂ ᓯᑕᒪᓂ ᓇᓗᓇᖏᑦᑐᖅ.

ᐊᓱᐃᓛᒃ ᑕᕝᕙ ᑕᒪᑐᒪᓂ ᓱᓕᔪᕆᓪᓗᒋᑦ ᒪᓕᒐᓕᐅᖅᑎᒋᓂᐊᖅᑕᕗᑦ ᒐᕙᒪᑎᑦᑎᓐᓂᒃ ᐊᐅᓚᑦᑎᔨᒋᓂᐊᓕᕐᒥᔭᕗᑦ, ᐃᓱᒪᒋᑦᑕᐃᓕᒪᒋᐊᖃᖅᑕᕗᑦ ᑕᐃᒃᑯᐊ ᐅᖃᐅᓯᐅᖃᑦᑕᖅᑐᖅ ᓂᕈᐊᖏᒃᑯᕕᑦ ᐅᓐᓂᕐᓗᒃᓴᕈᓐᓇᖏᑦᑐᑎᑦ. ᑕᐃᒪᐃᖏᒻᒪᑦ ᑕᒻᒪᖅᖢᓂᓗ ᑭᒃᑯᑐᐃᓐᓇᐃᑦ ᓄᓇᕗᒥᐅᑦ ᓂᕈᐊᕈᓐᓇᖏᒃᑲᓗᐊᕐᓗᑎᒃ ᐃᓅᓱᒃᑐᑦ ᓱᓕ ᒐᕙᒪᑎᑦᑎᓐᓂ ᐃᓚᐅᔪᓐᓇᕐᒪᑕ ᓂᐱᖏᑦ ᑲᑎᒪᕕᓂ ᒪᒃᑯᓗᐊᕋᓗᐊᖅᑎᓪᓗᒋᑦ, ᐃᒫᖓᐃ, ᑕᒻᒪᕋᔭᕐᒥᒐᑦᑕ ᓂᕈᐊᖏᑦᑐᑦ ᐃᓱᒪᖏᑦ ᐃᓚᑎᑕᐅᒋᐊᖃᕐᒥᖕᒪᑕ ᓂᕈᐊᕈᓐᓇᖏᑦᑑᒐᓗᐊᓪᓗ ᖃᖓᑐᐃᓐᓇᖅ ᐃᓱᒪᖏᑦ ᐊᓯᔾᔨᖅᑕᕈᓐᓇᕐᒪᑕ. ᑭᓇᑐᐃᓐᓇᖅ ᓂᕈᐊᖅᑐᓂ ᐃᓚᐅᖏᒃᑲᓗᐊᖅᐸᑦ ᓱᓕ ᐃᓱᒪᒋᔭᒥᓂᒃ ᑕᑯᖅᑯᔾᔨᔪᖅ ᓇᖏᖅᓯᓗᓂ, ᐅᓐᓂᕐᓗᒃᓴᕈᓐᓇᖅᑐᖅ ᐃᓱᒪᖅᓱᕐᓗᓂ. ᑕᐃᒪᐃᒻᒪ, ᓂᕈᐊᕐᓂᖅ ᐃᓱᒪᖅᓲᑎᒋᔭᑦᑎᓐᓂᒃ ᒐᕙᒪᑎᖃᕐᓂᑐᐊᒧᑦ ᐱᖏᒻᒪᑦ ᐱᔪᓐᓇᐅᑎᒋᔭᐅᖕᒪᑦ ᐃᓄᓕᒫᓄᑦ ᑲᓇᑕᒥ ᐊᑐᖅᑕᐅᔪᓐᓇᖅᖢᓂ. ᐊᑐᕐᓂᖃᓪᓗᑐᕐᒪᑦ ᑖᓐᓇ ᐊᖅᑯᑎᒋᖃᑦᑕᖅᑕᕗᑦ ᐃᓄᖁᑎᑦᑎᓐᓄᑦ ᐃᓱᒪᖅᓲᑕᐅᖕᒪᑕ ᓇᒧᑦ ᓵᖓᓗᑎᒃ ᐃᖏᕐᕋᖔᕆᐊᖃᕐᓂᖏᑦ ᒐᕙᒪᑎᕗᑦ.

ᐊᓱᐃᓛᒃ ᑕᕝᕙ ᐃᖅᑲᓇᐃᔮᒃᓴᖅᓯᐅᖅᑐᑦ ᒪᓕᒐᓕᐅᖅᑎᐅᓂᕐᒥᒃ ᐱᐊᓂᒃᑲᓗᐊᖅᑎᓪᓗᒋᑦ - ᑭᓯᐊᓂᓕ ᐅᑭᐅᖑᓂᐊᖅᓂ ᓯᑕᒪᓂ ᖃᒡᒋᖅᑐᓂ ᒫᓐᓇᒥᑦ ᑲᑎᒪᔨᒋᓂᐊᓕᕋᑦᑎᒍ ᒪᓕᒐᓕᐅᕐᕕᖕᒥ ᐅᓪᓗᒥᓂᑦ ᓯᑕᒪᓄᑦ ᐅᑭᐅᓄᑦ. ᐊᑐᓂ ᐱᓕᕆᐊᕆᔭᐅᔪᑦ ᐊᒻᒪᓗ ᓂᕈᐊᕈᑕᐅᔪᑦ ᒪᓕᒐᓕᐅᕐᕕᐅᑉ ᐃᓗᐊᓂ ᕿᒥᕈᔭᐅᔪᓐᓇᕐᓂᐊᖅᖢᑎᒃ, ᐅᕙᑦᑎᓐᓄᑦ ᐊᒻᒪᓗ ᐃᓕᓯᓐᓄᑦ. ᐊᒻᒪᓗ ᓱᕚᓪᓕᐅᑕᐅᔪᓂ ᑕᑯᒃᓴᐅᓂᐊᖅᖢᑎᒃ ᓇᓕᐊᒃ ᐱᒃᑯᒥᒍᓱᓚᐅᖅᑐᖅ ᓵᓚᒃᓴᓚᐅᕐᓂᖓᓂᒃ ᒫᓐᓇᐅᖏᑉᐸᑦ ᑭᖑᓂᖓᓂ ᓂᕈᐊᓕᕈᑦᑕᖃᐃ.