Skip to content

ᐃᓗᐊᖅᓴᐃᔨᓂᑦ ᐊᒻᒪ ᓘᒃᑖᓂᑦ ᐊᒥᒐᓗᐊᕐᓂᐅᔪᑦ ᐱᔭᕆᐊᖃᖅᑎᑦᑎᕗᖅ ᐃᓱᒪᑐᔪᓂ ᐋᖅᑭᒍᑎᒃᓴᓂᑦ

ᓄᓇᕗᑦ ᐊᑲᐅᙱᑦᑐᒦᑉᐳᑦ ᐃᓅᓕᓴᐃᓂᕐᓄᑦ ᐃᖅᑲᓇᐃᔭᖅᑎᑭᒃᓴᓗᐊᕐᓂᕐᒧᑦ, ᐊᒻᒪ ᑭᓇᑐᐃᓐᓇᖅ ᐋᖅᑭᒍᑎᒃᓴᖃᖅᑑᔮᙱᓚᑦ.

ᐊᕐᕕᐊᑦ ᐅᐊᖕᓇᒧᑦᑎᑭᕋᕐᔪᐊᕐᒥ ᒪᓕᒐᓕᐅᖅᑎᖓ ᔮᓐ ᒪᐃᓐ ᐅᖃᐅᓯᖃᖅᐳᖅ ᖃᓄᖅ ᐃᖅᑲᓇᐃᔭᖅᑎᖃᖅᑎᑦᑎᓂᕐᒧᑦ ᐊᒥᒐᓗᐊᕐᓂᖓᓂ ᐊᒃᑐᐃᓂᖓᓂ ᓂᕈᐊᖅᑕᐅᕝᕕᖓᓐᓂᐊᒻᒪ ᐊᒥᐊᒃᑯᖓᓂ ᓄᓇᕗᒻᒥ-ᐅᕙᓂ ᐱᓇᓱᐊᕈᓯᐅᔪᒥ ᑎᑎᕋᖅᑕᐅᓂᖓᓂ (ᑎᑎᕋᖅᑕᐅᓂᐅᔪᖅ ᓯᕗᓪᓕᖅᐹᒥ ᓴᖅᑭᓚᐅᖅᐳᖅ ᑭᕙᓪᓕᕐᒥ ᑐᓴᒐᒃᓴᓂ), ᐊᒻᒪ ᐅᖃᖅᐳᖅ ᑲᒪᓇᖅᑐᒥ ᓱᓇᒐᖃᙱᓚᖅ ᓄᖅᑲᖅᑎᑦᑎᔪᓐᓇᖅᑐᒥ ᐊᑲᐅᙱᓕᐅᕈᑕᐅᔪᒥ.

ᑲᓇᑕᒥ ᐃᓗᐊᖅᓴᐃᔨᓄᑦ ᑲᑐᔾᔨᖃᑎᒌᖑᔪᑦ ᐅᖃᓚᐅᖅᐳᑦ ᐊᑐᐊᒐᓄᑦ ᓄᖅᑲᖅᑎᑦᑎᓂᖃᙱᓪᓗᓂ, ᑲᓇᑕ ᐊᒥᒐᕐᓂᐊᖅᐳᑦ 60,000-ᓂ ᓇᓗᓇᐃᖅᑕᐅᓯᒪᔪᓂ ᐃᓗᐊᖅᓴᐃᔨᓂᑦ 2022-ᒥ. ᐃᓐᓇᕈᖅᐸᓪᓕᐊᔪᓂ ᐃᓄᒋᐊᖕᓂᓂ ᑲᓇᑕᓕᒫᒥ (ᓄᓇᕗᑦ ᐊᔾᔨᒋᔭᐅᓇᓂ ᐅᕙᓂ), ᓄᓇᕗᑦ (ᐊᒻᒪ ᐊᒥᓱᐊᓗᖕᓂ ᓄᓇᕐᔪᐊᓕᒫᒥ) ᐱᔭᕆᐊᖃᐃᓐᓇᕐᓂᐊᖅᐳᑦ ᐅᓄᖅᓯᕙᓪᓕᐊᔪᓂ ᐱᓕᒻᒪᒃᓴᖅᓯᒪᑦᑎᐊᖅᑐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒻᒪᕆᐅᔪᓂ.

ᐃᓗᐊᖅᓴᐃᔨᓄᑦ ᐃᓕᓐᓂᐊᕐᕖᑦ ᐊᖑᒻᒪᑎᔪᓐᓇᙱᓚᑦ ᐱᔭᕆᐊᖃᕐᓂᐅᔪᒥ. ᓇᓗᓇᐃᖅᓯᒪᔪᓄᑦ ᐃᓗᐊᖅᓴᐃᔨᓄᑦ ᑲᑐᔾᔨᖃᑎᒌᖑᔪᑦ ᐋᓐᑎᐊᕆᐅᒥ ᐅᖃᓚᐅᖅᐳᑦ ᓯᓚᑦᑐᖅᓴᕐᕕᒡᔪᐊᑦ ᐃᓱᓕᑦᑎᑎᑦᑎᔪᓐᓇᖅᐳᑦ ᐊᒥᓲᓂᐅᔪᓂ ᐃᓗᐊᖅᓴᐃᔨᓂᑦ ᑮᓇᐅᔭᖃᖅᑎᑕᐅᓂᖏᓐᓄᑦ, ᐊᒻᒪ ᐊᒥᒐᓗᐊᕐᓂᖃᖅᐳᑦ ᐃᓗᐊᖅᓴᐃᔨᓂᑦ ᓘᒃᑖᖑᓂᕐᒧᑦ ᐃᓱᒪᓕᐅᕐᓂᕐᒧᑦ ᐱᔪᓐᓇᖅᑐᓂ ᐃᓕᓴᐃᓂᕐᒧᑦ ᐃᓗᐊᖅᓴᐃᔨᓄᑦ ᐃᓕᓐᓂᐊᖅᑎᓂᑦ.

ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᒃ ᐱᓕᒻᒪᒃᓴᐃᕗᑦ ᓄᓇᕗᒻᒥᐅᓂ ᐃᓗᐊᖅᓴᐃᔨᙳᕐᓂᕐᒧᑦ ᐃᖃᓗᖕᓂ ᐃᓕᓐᓂᐊᕐᕕᒋᔭᐅᔪᒥ ᑭᓯᐊᓂ ᐱᓕᕆᐊᖑᔪᖅ ᐃᓐᓄᒃᓯᔪᓐᓇᔾᔮᙱᓚᖅ ᑕᒪᒃᑭᓂ ᐃᓗᐊᖅᓴᐃᔨᓄᑦ ᐃᓂᐅᔪᓄᑦ ᓄᓇᕗᒻᒥ. ᐊᑐᕆᐊᖃᐃᓐᓇᕆᐊᖃᕐᓂᐊᖅᐳᒍᑦ ᖃᓪᓗᓈᓂ ᓄᓇᖓᓐᓂᙶᖅᑐᓂ ᑎᑭᑎᑕᐅᔪᓄᑦ ᐊᑯᓂᒻᒪᕆᐊᓗᒃ.

ᐊᑐᐃᓐᓇᖃᖅᑎᑦᑎᒐᓗᐊᖅᑎᓪᓗᒋᑦ ᐱᐅᓂᖅᐹᖑᖃᑕᐅᔪᓂ ᐊᑭᓕᖅᓱᖅᑕᐅᓂᐅᔪᒥ ᑲᑎᙵᔪᓄᑦ ᑲᓇᑕᒥ, ᐊᒻᒪ ᒐᕙᒪᑐᖃᒃᑯᑦ ᐊᑐᐃᓐᓇᖃᖅᑎᑦᑎᓂᖓᓂ ᐊᑐᖅᑐᐊᕐᓂᐅᔪᒥ ᐃᓱᒪᒋᔪᓐᓃᖅᑕᐅᔪᓐᓇᕐᓂᖏᓐᓂ ᐃᓗᐊᖅᓴᐃᔨᓄᑦ ᐊᒻᒪ ᓘᒃᑖᓄᑦ ᐱᓕᕆᓲᓄᑦ ᐅᖓᓯᒃᑐᒥ ᓄᓇᓕᐅᔪᓂᑦ, ᐊᒥᓱᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔨᒻᒪᕆᐅᔪᑦ ᓄᓇᕗᒻᒥ ᐃᓱᒪᒋᔭᖃᙱᑦᑎᐊᖅᐳᑦ.

ᐊᒥᓱᐃᑦ ᓄᓇᕗᓕᐊᖅᐸᒃᑐᑦ ᐊᖏᖅᓯᒪᕗᑦ ᑐᓂᓯᓂᕐᒥ ᐱᐅᑦᑎᐊᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᓄᓇᕗᒻᒥᐅᓄᑦ. ᐊᓕᐊᓇᐃᒋᔭᖃᑦᑎᐊᖅᐳᑦ ᐱᓕᕆᐊᒥᓂᑦ ᐊᒻᒪ ᓄᓇᕗᑦ ᖁᕕᐊᒋᑦᑎᐊᖅᖢᓂᔾᔪᒃ. ᐅᑎᖅᑎᕆᓂᕐᒧᑦ, ᐅᖓᑖᓄᓗᐊᖅ ᐃᖅᑲᓇᐃᔭᖅᑎᓲᕆᕙᕗᑦ (ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᓚᐅᖅᐳᑦ $13 ᒥᓕᐊᓐᓂ ᐃᑲᕐᕋᖏᑕ ᐅᖓᑖᓅᕈᔾᔨᓂᐅᔪᓄᑦ ᐊᑭᓕᐅᑎᓂᑦ 2016-17-ᒥ) ᐊᒻᒪ ᑐᓂᔭᐅᕙᒃᖢᑎᒃ ᓈᒻᒪᙱᓗᐊᖅᑐᒥ ᐃᑲᔪᖅᓱᐃᓂᐅᔪᓂ ᑕᒫᓃᓐᓂᖏᓐᓂ ᐱᐅᓗᓂ ᐊᑐᖅᑕᐅᓂᑰᔪᒥ.

ᖄᖏᐅᔾᔨᓗᐊᕐᓂᐅᓗᐊᖅᑐᐊᓗᖕᒥ ᐱᓕᕆᐊᒃᓴᖏᓐᓂ ᐱᑎᑦᑎᓂᖃᖅᓯᒪᕗᖅ ᑕᒻᒪᖃᑦᑕᕐᓂᐅᔪᓂ ᓇᓗᓇᐃᖅᓯᓂᕐᒥ ᐋᓐᓂᐊᕆᔭᐅᔪᓂ ᐊᒻᒪ ᐸᖅᑭᓂᐅᔪᒥ. ᐅᑭᐅᖑᓚᐅᖅᑐᒥ, ᐃᒡᓗᓕᐅᑉ ᒪᐃᔭᖓ ᓴᖅᑭᑎᑦᑎᓚᐅᖅᐳᖅ ᓄᓇᓕᖓᑕ ᐃᓱᒫᓘᑎᒋᔭᖏᓐᓂ ᐱᔭᒃᓴᖃᓗᐊᕐᓂᐅᔪᓄᑦ ᓱᕈᓯᕐᒥ ᑐᖁᔪᖃᓚᐅᖅᑎᓪᓗᒍ ᐋᓐᓂᐊᕈᑕᐅᔪᒥ ᐱᑕᖃᓗᐊᓕᖅᓯᒪᔪᖃᖅᑎᓪᓗᒍ.

ᒥᖕᓂᓂᕐᒧᑦ ᐊᒻᒪ ᐃᓅᖃᑎᒥᒃ ᐊᑭᕋᖅᑐᕐᓂᕐᒥᐊᐃᑦᑖᖑᒐᓗᐊᖅ ᑕᑯᒃᓴᐅᓂᐅᔪᖅ ᐃᓚᖏᓐᓂ ᖃᓪᓗᓈᓂ ᓄᓇᖓᓐᓂ ᑎᑭᑎᑕᐅᓯᒪᔪᓄᑦᐱᑎᑦᑎᓯᒪᒋᕗᖅ ᐋᓐᓂᕐᓂᐅᔪᓂ ᐊᒻᒪ ᐃᓛᓐᓂᒃᑯᑦ ᑐᖁᓂᐅᔪᓂ ᐸᖅᑭᑦᑎᐊᙱᓗᐊᕐᓂᐅᔪᓄᑦ.

ᑕᑯᒃᓴᐅᔪᒥ ᑕᑯᔭᕆᐊᖃᕈᕕᑦ ᑕᒪᓐᓇ ᒪᕐᕈᖓᓂ ᐱᔾᔪᑕᐅᓂᖓ ᐱᑕᖃᕐᓂᖓᓂ, ᑕᑯᒋᐊᕆᑦ ᕙᐃᔅᐳᒃᒧᑦ, ᐊᑕᐅᓯᖅ ᐃᖃᓗᖕᓂᕐᒥᐅᑕᖅ ᐅᓂᒃᑳᕆᓚᐅᕐᓂᖓᓂ ᑐᓵᓂᐅᔪᒥ ᐱᖓᓱᓂ ᒪᒃᑯᒃᑐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔨᐅᔪᓂ ᐱᓕᕆᔨᒻᒪᕆᐅᔪᓂᐅᒃᐱᕆᔭᐅᔪᒥ ᐃᓇᖏᖅᓯᓚᐅᑲᖕᓂᐅᔪᓂ ᐃᓂᖃᖅᑎᑕᐅᓚᐅᑲᒃᑎᑕᐅᔪᓂ-ᕿᒪᐃᔪᓂ ᐊᖓᔪᖅᑳᖃᕐᕕᖕᒥ ᐊᒻᒪ ᑕᒫᓂᑐᐃᓐᓇᖅ ᐃᔪᒐᓚᒃᖢᑎᒃ ᐋᓐᓂᐊᖃᕐᓇᙱᑦᑐᓕᕆᓂᖓᓐᓂ ᓄᓇᕗᒻᒥᐅᓂ.

ᓄᓇᓕᖅᐸᐅᔭᖅ ᐃᓅᓕᓴᐅᑎᓂᒃ ᐃᒪᖓᓐᓄᐊᖅᓯᓪᓗᐊᖅᐳᑦ, ᐊᕐᓇᖅ ᑐᓴᓚᐅᖅᐳᖅ, ᐱᔾᔪᑎᖃᖅᖢᓂ "ᑭᒃᑯᓕᒫᑦ ᑯᔭᖕᓂᒃᑯᑦ ᖁᐱᕐᕆᓯᒪᓂᖃᕐᒪᑕ," ᐊᒻᒪ ᐊᑕᐅᓯᐅᔫᑉ ᐱᖓᓱᓂ ᐱᓇᓱᐊᕈᓯᕐᓂ-ᐱᖓᓱᓂ ᖃᓂᒪᓂᖓ ᐱᑎᑕᐅᓂᖃᓚᐅᕐᓂᖓᓂ "ᐳᕙᒡᓗᖕᓂᕐᒧᑦ ᕼᐊᕼᐊᕼᐊ."

ᑎᑎᕋᖅᑕᐅᓂᐅᔪᖅ ᑕᑯᔭᐅᓚᐅᖅᐳᖅ ᐃᖃᓗᖕᓂ ᒪᓕᒐᓕᐅᖅᑎᒧᑦ ᐋᑕᒻ ᐋᕆᐊᖅ ᓚᐃᑦᔅᑑᓐᒧᑦ, ᐊᒻᒪ ᐊᕐᓇᖅ ᐅᓂᒃᑳᕆᓚᐅᖅᐳᖅ ᖃᓄᐃᓐᓂᐅᔪᒥ ᓄᓇᕗᒻᒥ ᒐᕙᒪᒃᑯᓐᓄᑦ, ᓱᓕᓂᕋᐃᓪᓗᑎᒃ ᖃᓄᐃᓕᐅᕐᓂᐊᕐᓂᖏᓐᓂ.

ᓇᓗᓇᙱᓚᖅ ᓄᓇᕗᑦ ᐱᔭᕆᐊᖃᕐᓂᖏᓐᓂ ᐃᓄᒃᑲᓐᓂᕐᓂ ᐅᕙᓃᑦᑐᒪᔪᓂ ᐊᒻᒪ ᑕᒫᓃᑦᑐᒪᔪᓂ ᐊᑯᓂᐅᔪᒥ.

ᓯᕗᓪᓕᖅᐹᒥ, ᑐᑭᖃᖅᐳᖅ ᐃᓄᐃᑦ, ᐊᔭᐅᕆᔭᐅᔭᕆᐊᖃᖅᑐᓂ ᐱᓇᓱᐊᕐᓂᖏᓐᓂ ᐆᒥᖓ ᐃᖅᑲᓇᐃᔮᕆᔭᐅᖏᓐᓇᕐᓂᐊᖅᑐᒥ. ᑭᓯᐊᓂ ᒪᕐᕈᖓᓂ ᐃᓱᒪᓂᕆᔭᕗᑦ ᑐᕌᖓᓂᖃᖅᐳᖅ ᑎᑭᑦᑕᖅᑐᓄᑦ ᐱᕈᖅᓴᐃᕙᓪᓕᐊᕌᓂᒃᑐᓂ ᓴᙱᔪᓂ ᓄᓇᓕᖕᓂ ᑲᑎᙵᓂᖃᕐᓂᐅᔪᓂ ᐅᕙᓂ. ᐊᓯᖏᑦ ᐱᔪᓐᓇᕐᓂᖃᕐᓂᐅᔪᑦ ᕿᓂᖅᐳᑦ ᕕᓕᐲᓐᓄᑦ, ᐊᖏᓛᖑᓪᓗᓂ ᑎᑭᑎᑦᑎᓲᓂᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᕐᒧᑦ ᐱᓕᕆᔨᒻᒪᕆᐅᔪᓂᑦ. ᐃᓱᒪᒋᓪᓗᒍ ᓄᓇᕘᑉ ᓴᙱᔪᒥ ᕕᓕᐲᓄᓄᑦ ᓄᓇᓕᖓᓐᓂ, ᑐᑭᖃᑦᑎᐊᖅᐳᖅ ᓄᓇᕗᑦ ᐊᑐᕐᓂᖃᑦᑎᐊᕋᔭᕐᓂᖏᓐᓂ ᑮᓇᐅᔭᖏᓐᓄᑦ ᐃᖅᑲᓇᐃᔭᖅᑎᑦᑎᒃᑲᓐᓂᕐᓂᕐᒧᑦ ᕕᓕᐲᓄᒃᑲᓐᓂᕐᓂ.

ᐅᓇ ᐊᑲᐅᙱᓕᐅᕈᑕᐅᔪᖅ ᐱᔭᕆᐊᖃᖅᐳᖅ ᐃᓱᒪᑐᔪᒥ ᐊᒻᒪ ᐊᒃᓱᕈᕐᓂᐅᔪᒥ ᐋᖅᑭᒍᑎᒃᓴᐅᔪᓂᑦ. ᓄᓇᕗᒻᒥᐅᑕᒃᑲᓐᓂᕐᓂ ᑐᖁᔪᖃᒃᑲᓐᓂᓪᓗᐊᙱᓚᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔨᐅᔪᓂ ᐃᑲᔪᖅᓯᖅᑕᐅᓂᖃᕐᓂᖏᓐᓄᑦ ᐱᔭᕆᐊᖃᖅᑕᒥᓂᑦ.