ᓯᕗᓕᖅᑎ ᔫ ᓴᕕᑲᑖᖅ, ᓯᕗᓪᓕᖅᐹᖑᔪᒥ ᑭᕙᓪᓕᖅ ᐊᕕᒃᑐᖅᓯᒪᓂᐅᔪᒥ, ᓯᕗᓪᓕᖅᐹᒥ ᓄᖅᑲᕐᓂᕆᓚᐅᖅᐸᖓ ᑲᖏᖅᖠᓂᕐᒥ ᑕᐃᒪᙵᓂ ᐱᓚᐅᖅᑎᓪᓗᒍ ᓄᓇᕘᑉ ᖁᑦᑎᓛᖓᓂ ᐃᓂᐅᔪᒥ ᐱᓇᓱᐊᕈᓯᐅᓚᐅᖅᑐᒥ.
ᓴᕕᑲᑖᖅ ᒪᑐᐃᖅᓯᓪᓚᕆᓚᐅᖅᐳᖅ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ ᐳᓚᕋᕐᕕᖓᓂ ᐊᒻᒪ ᐅᖃᖃᑎᖃᖅᖢᓂ ᐃᓚᒋᔭᐅᔪᓄᑦ ᑭᕙᓪᓕᕐᒥ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᓐᓂ ᓇᐃᑦᑐᒥ, ᐱᔭᒃᓴᖃᐅᖅᑐᒥ, ᓄᖅᑲᕐᓂᕆᔭᖓᓂ
Nunavut's first Kivalliq Premier, Joe Savikataaq, had a brief but busy stop in Rankin Inlet that saw him officially open the Kivalliq Regional Visitor's Centre and address the Kivalliq Chamber of Commerce on June 18, 2018. Darrell Greer/NNSL photo
ᓴᕕᑲᑖᖅ ᓴᓂᖅᑯᖦᖢᓂᐅᒃ ᐅᖃᓕᒫᒐᒃᓴᐅᔪᖅ ᐅᖃᐅᓯᒃᓴᒥᓂᑦ ᐊᒻᒪ ᐅᖃᓪᓚᒃᖢᓂ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᓐᓂ ᐃᓚᒋᔭᐅᔪᓄᑦ ᐆᒻᒪᑎᖓᓐᓂᙶᖅᑐᒥ.
“ᐅᐱᕐᔪᐊᖅᐳᖓ ᓂᕈᐊᖅᑕᐅᓚᐅᕋᒪ ᓯᕗᓕᖅᑎᒧᑦ ᐊᒻᒪ ᐅᐱᕐᔪᐊᖅᐳᖓ ᓯᕗᓪᓕᐅᓪᓗᖓ ᑭᕙᓪᓕᕐᒥ ᓯᕗᓕᖅᑎᐅᓂᕐᒧᑦ,” ᐅᖃᓚᐅᖅᐳᖅ. “ᐱᓕᕆᑦᑎᐊᕋᓱᐊᕐᓂᐊᖅᐳᖓ ᓄᓇᕗᑦ ᐱᕈᖅᐸᓪᓕᐊᓂᐊᕐᓂᖓᓂ. ᐊᔾᔨᒋᙱᑕᖓᓂ ᐱᓕᕆᓲᖑᕗᖓ ᐊᓯᖏᓐᓂ ᓯᕗᓕᖅᑎᓂᑦ – ᐱᐅᔫᙱᑦᑐᖅ ᐱᐅᙱᑦᑑᓇᓂᓗ, ᓱᓕᓂᑐᐃᓐᓇᐅᔪᖅ – ᐊᔾᔨᒋᙱᑕᖓᓂ ᐃᓱᒪᒋᔭᖃᕐᓂᕐᒥ ᑭᓱᑐᐃᓐᓇᓄᑦ ᐊᒻᒪ ᐊᔾᔨᒋᙱᑕᖓᓂ ᐱᓕᕆᓂᖃᖅᐸᖕᓂᕐᒥ.”
ᓄᓇᕗᒻᒥ ᒐᕙᒪᒃᑯᑦ (GN) ᐃᖏᕐᕋᐃᓐᓇᕐᓂᐊᖅᐳᑦ ᒫᓐᓇᐅᔪᒥ ᐱᓕᕆᐊᒃᓴᒥᓂᑦ, ᐅᖃᓚᐅᖅᐳᖅ.
“ᑐᑭᖃᕋᔭᙱᒻᒪᑦ ᓴᖑᑎᑦᑎᓇᓱᐊᕐᓂᖓᓂ,” ᐅᖃᓚᐅᖅᐳᖅ ᓴᕕᑲᑖᖅ.
ᓴᕕᑲᑖᖅ ᐅᖃᐅᔾᔨᓚᐅᖅᐳᖅ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᓐᓂ ᒐᕙᒪᒃᑯᑦ ᐅᕙᓃᑉᐳᑦ ᐃᑲᔪᖅᓯᖅᑕᐅᓂᖏᓐᓄᑦ ᐊᒻᒪ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᓐᓂ ᐃᓚᒋᔭᐅᔪᑦ ᐱᓪᓚᕆᐅᔪᒥ ᐊᑐᕐᓂᖃᐅᑎᖃᖅᐳᑦ ᐃᖅᑲᓇᐃᔮᖃᕐᓂᕐᒧᑦ ᐊᒻᒪ ᑮᓇᐅᔾᔭᒃᓴᓂᕐᒧᑦ ᐊᔾᔨᒌᙱᑦᑐᓂ ᓄᓇᓕᐅᔪᓂᑦ. ᐅᖃᐅᓯᖃᓚᐅᖅᐳᖅ ᐱᔭᕆᐊᖃᕐᓂᐅᔪᒥ ᐱᓕᒻᒪᓴᐃᓂᐅᔪᒥ ᐃᓄᖕᓂ ᐱᔪᓐᓇᖁᓪᓗᒋᑦ ᐱᕕᒃᓴᖃᕐᓂᐅᔪᓄᑦ ᐅᔭᕋᖕᓂᐊᕐᓂᕐᒧᑦ ᐱᓕᕆᔨᐅᔪᓄᑦ.
“ᐅᔭᕋᖕᓂᐊᕐᓂᕐᒧᑦ ᐱᓕᕆᓂᐅᔪᖅ ᐅᕙᓂ ᐱᕈᖅᐸᓪᓕᐊᑐᐃᓐᓇᖅᐳᖅ ᐊᒻᒪ ᐱᔪᓐᓇᕐᓂᕐᒧᑦ ᐃᖅᑲᓇᐃᔮᖑᔪᓂ ᑎᑭᑉᐸᓪᓕᐊᓂᐅᔪᓄᑦ, ᐱᓕᒻᒪᒃᓴᐃᔭᕆᐊᖃᖅᐳᒍᑦ ᐃᓄᖕᓂ ᐸᕐᓇᒃᓯᒪᓗᑎᒃ, ᐅᑕᖅᑭᒍᑦᑕ, ᐱᖏᓐᓂᖃᕐᓂᐊᖅᐳᒍᑦ ᐊᒻᒪ ᐱᕕᒃᓴᐅᔪᓄᑦ ᐃᖅᑲᓇᐃᔮᖅᑖᕐᓂᕐᒧᑦ ᐊᓯᐅᓂᐊᖅᐳᑦ, ᒥᒃᖠᒋᐊᕐᔪᐊᕐᓗᑎᒡᓘᓐᓃᑦ,” ᐅᖃᓚᐅᖅᐳᖅ.
ᐱᔭᕇᓚᐅᖅᑎᓪᓗᒍ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᓐᓂ ᐅᖃᓪᓚᖕᓂᖓᓂ, ᓴᕕᑲᑖᖅ ᐊᖏᓚᐅᖅᐳᖅ ᓯᕗᓪᓕᖅᐹᒥ ᓇᖕᒥᓂᖅ ᑎᑎᕋᖅᑕᐅᓂᐊᖅᑐᒧᑦ ᐊᐱᖅᓱᖅᑕᐅᓂᖓᓂ ᐊᖏᕐᕋᕆᔭᖓᓂ ᐊᕕᒃᓯᒪᓂᐅᔪᒧᑦ ᑭᕙᓪᓕᖅ ᓂᐱᕗᒻᒧᑦ.
ᓴᕕᑲᑖᖅ ᐅᖃᓚᐅᖅᐳᖅ ᕿᓚᒻᒥᐅᓯᒪᖕᒪᑦ ᑕᐃᒪᙵᓂ ᐅᐃᒪᓇᕐᓂᐅᔪᒥ ᐱᓇᓱᐊᕈᓯᐅᓚᐅᖅᑐᒥ ᑕᑯᓚᐅᖅᑐᒥ ᓯᕗᓕᖅᑎᐅᓚᐅᖅᑐᒥ ᐹᓪ ᖁᐊᓴ ᓵᓚᐅᓂᖓᓂ ᐅᒃᐱᕆᔭᐅᔪᓐᓃᕐᓂᖓᓂ ᓂᕈᐊᕐᓂᐅᔪᒧᑦ, ᐱᔪᓐᓇᖅᑎᑦᑎᓚᐅᖅᑐᒥ ᓄᓇᕗᒻᒥ ᓯᕗᓪᓕᖅᐹᖑᓪᓗᓂ ᑭᕙᓪᓕᕐᒥ ᓯᕗᓕᖅᑎᙳᕐᓂᖓᓂ – ᑭᓯᐊᓂ ᐅᕙᙵᑦ, ᐅᖃᓚᐅᖅᐳᖅ, ᐱᐅᓯᕙᓪᓕᐊᑐᐃᓐᓇᕐᓂᐊᖅᐳᖅ ᑕᒪᒃᑭᓂ ᓯᕗᓕᐅᖅᑎᓄᑦ ᐊᒻᒪ ᒪᓕᒐᓕᐅᖅᑎᑐᐃᓐᓇᐅᔪᓄᑦ.
“ᐅᖃᖃᑎᒌᖕᓂᖃᑦᑎᐊᓚᐅᙱᑉᐳᒍᑦ ᐊᐅᓪᓚᓚᐅᕐᒪᑕ ᖃᐅᑐᐊᕐᒪᑦ,” ᐅᖃᓚᐅᖅᐳᖅ ᓴᕕᑲᑖᖅ. “ᑭᓯᐊᓂ ᐅᖃᐅᑎᓚᐅᖅᑕᒃᑲ ᑲᑎᙵᓂᐅᔪᓂ ᐱᓕᕆᔨᐅᒐᒪ, ᐊᒻᒪ ᐱᓕᕆᖃᑎᒋᓂᐊᖅᐸᒃᑲ ᐅᒃᐱᕈᓱᒃᐳᖓ ᐱᓕᕆᖃᑎᖃᑦᑎᐊᕐᓂᐅᓂᐊᕐᓂᖓᓂ.”
ᓴᕕᑲᑖᖅ ᐅᖃᐅᓯᖃᕈᒪᓚᐅᙱᓚᖅ ᓯᕗᓪᓕᖅᐸᐅᔪᒥ ᐱᓕᕆᓂᓪᓚᕆᒋᔭᖓᓐᓂ, ᐅᓇᐅᔪᖅ ᐲᖅᑕᐅᓚᐅᕐᓂᖓᓂ ᐹᓪ ᐅᑲᓕᕐᒥ ᓄᓇᕗᒻᒥ ᐋᔩᖃᑎᒌᒐᓱᐊᖅᑎᒻᒪᕆᐅᔪᒧᑦ ᓅᑕᐅᓂᖏᑦ ᐱᔪᓐᓇᐅᑎᓄᑦ, ᐊᒻᒪ ᐅᑎᖅᑎᑦᑎᓂᖓᓂ ᓴᐃᒪᓐ ᐊᕙᒥ ᐃᓂᐅᔪᒧᑦ ᐱᓯᒪᓚᐅᖅᑕᖓᓂ ᐊᕐᕌᒍᓄᑦ ᑎᓴᒪᓄᑦ ᐲᖅᑕᐅᓚᐅᖅᑳᕋᓂ ᖁᐊᓴᒧᑦ ᐱᓇᓱᐊᕈᓯᐅᓚᐅᖅᑐᒥ.
ᐅᖃᓚᐅᖅᐳᖅ ᖁᑦᑎᓛᖏᑦ ᓯᕗᓪᓕᐅᔾᔭᐅᖁᔭᖏᓐᓂ ᐃᓄᑐᖃᕐᓂ ᐊᖏᕐᕋᖅᑎᑕᐅᓂᖏᓐᓂ ᐸᖅᑭᔭᐅᖁᓪᓗᒋᑦ ᓄᓇᕗᒻᒥ ᐊᒻᒪ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᖅ, ᖃᓄᐃᓕᕐᔪᐊᖅᓯᒪᔪᓄᑦ ᐊᒻᒪ ᐅᐃᕆᓯᒪᓂᐅᔪᓄᑦ ᐱᓕᕆᕕᓂᑦ ᓴᖅᑭᑕᐅᓂᖏᓐᓂ ᓄᓇᕗᒻᒥ.
“ᓯᕗᓪᓕᐅᔾᔭᐅᖁᖕᒥᔭᕋ ᐃᒡᓗᒃᓴᖅᑖᒃᑲᓐᓂᕐᓂᕐᒧᑦ, ᐊᑲᐅᙱᓕᐅᕈᑕᐅᓯᒪᔪᖅ ᑕᐃᒪᙵᓂ ᓄᓇᕗᖃᓕᕐᒪᑕ,” ᐅᖃᓚᐅᖅᐳᖅ. “ᐃᒡᓗᒃᓴᖃᙱᓗᐊᖅᐳᒍᑦ ᐊᒻᒪ ᐊᒃᓱᕈᕐᓇᖅᓯᒪᕐᔪᐊᖅᐳᖅ ᐊᒥᓱᐊᓗᖕᓄᑦ ᐃᓄᖕᓄᑦ ᐃᓄᑭᑦᑑᑕᐅᓂᐅᔪᓂᑦ.”
ᓴᕕᑲᑖᖅ ᐅᖃᓚᐅᖅᐳᖅ ᐃᒃᐱᒍᓱᒃᐳᖅ ᑕᒪᕐᒥᒐᓚᐃᑦ ᓄᓇᕗᒻᒥᐅᑕᑦ ᐅᒃᐱᕆᔭᖃᕐᓂᐊᕐᓂᖏᓐᓂ ᓱᓕ ᒐᕙᒪᒃᑯᓐᓂ ᒪᓕᓚᐅᖅᑐᒥ ᐅᒃᐱᕆᔭᐅᔪᓐᓃᕐᓂᐅᔪᒥ ᓂᕈᐊᕐᓂᐅᓚᐅᖅᑐᒥ ᖁᐊᓴᒧᑦ.
“ᑕᒪᕐᒥᒃ ᑕᑯᓚᐅᖅᐳᑦ ᐅᓄᕐᓂᐅᔪᓂ ᓂᕈᐊᕐᓂᐅᔪᒥ, ᐊᒻᒪ ᐃᓱᒪᓕᐅᕆᓂᐅᓚᐅᖅᐳᖅ ᒪᓕᒐᓕᐅᕐᕕᖕᒥ ᐃᒻᒥᓂᒃ ᒪᓕᒐᓕᐅᖅᑎᓄᑦ,” ᐅᖃᓚᐅᖅᐳᖅ.
ᐊᐱᕆᔭᐅᒐᒥ ᐊᑕᐅᓯᕐᒥ ᐅᖃᐅᓯᒃᓴᖃᕐᒪᖔᑦ ᓄᓇᓄᒻᒥᐅᓄᑦ ᐱᒋᐊᓕᖅᑎᓪᓗᒍ ᐃᓂᒋᓂᐊᖅᑕᒥᓂᑦ ᓯᕗᓕᖅᑎᐅᓗᓂ,, ᓴᕕᑲᑖᖅ ᐅᖃᓚᐅᖅᐳᖅ, “ᐅᕙᑦᑎᓐᓂ ᐃᑲᔪᕆᑦᑎ ᒐᕙᒪᐅᔪᓄᑦ ᓄᓇᕗᒻᒥᐅᑦ ᐃᖅᑲᓇᐃᔭᕈᓐᓇᖅᓯᓂᕐᓄᑦ.”
“ᐃᓕᓐᓂᐊᕆᐊᕐᓗᓯ, ᐃᓕᓐᓂᐊᖏᓐᓇᕐᓗᓯ, ᐱᓕᒻᒪᒃᓴᕐᓗᓯ-ᐃᓕᓐᓂᐊᕆᑦᑎ ᐃᖅᑲᓇᐃᔭᕈᓐᓇᕐᓂᐊᕋᔅᓯ ᒐᕙᒪᒃᑯᓐᓄᑦ, ᐊᓯᖏᓐᓂᓪᓘᓐᓃᑦ ᐃᖅᑲᓇᐃᔭᕐᕕᒋᔪᒪᔭᔅᓯᓐᓂ,” ᐅᖃᓚᐅᖅᐳᖅ. “ᐊᒻᒪ ᐅᖃᕈᒪ ᐃᓕᓐᓂᐊᕐᓂᕐᒥ ᖁᑦᑎᖕᓂᓕᖕᒥ 12-ᑐᐃᓐᓇᐅᙱᑦᑐᒥ, ᒪᔪᕋᕈᑎᒃᓴᑐᐃᓐᓇᐅᕗᖅ ᐃᓚᐅᖅᓴᐃᔨᙳᕐᓂᕐᒧᑦ, ᓘᒃᑕᒧᑦ, ᕿᔪᓕᕆᔨᒧᑦ, ᑮᓇᐅᔭᓕᕆᔨ, ᓇᓕᐊᑐᐃᓐᓇᐃᑦ ᐱᓕᕆᓂᐅᔪᓄᑦ-ᑭᓱᑐᐃᓐᓇᒥᑦ ᐱᔪᒪᔭᕐᓂᑦ.”