ᐱᖑᐊᖅᑎ ᐊᒻᒪᓗ ᐅᓂᒃᑳᓂᒃ ᐃᔾᔪᐊᕆᔨ ᑯᕆᔅᑏᓐ ᑐᑐ, 22-ᓂᒃ ᐊᕐᕌᒍᓕᒃ, ᓇᒃᓴᖃᑦᑕᕐᒪᑦ ᐃᔾᔪᔪᒥᒃ ᖃᓄᐃᓕᐅᓚᐅᕈᓯᕐᒥᓂᒃ ᐅᓂᒃᑳᑦᓯᒪᔪᒥᒃ, ᐃᓕᑕᕆᔭᐅᔪᓯᖏᓐᓂᒃ ᑲᑎᖅᓱᐃᕕᒋᓯᒪᓪᓗᓂᐅᒃᓗ ᓄᓇᕐᔪᐊᒥᐅᑦ ᐅᑭᐅᖅᑕᖅᑐᒥᐅᓂᑦ ᑲᓇᑕᒥᐅᓂᓪᓗ ᑕᑯᕋᓐᓈᖅᑎᑦᑎᔨᓄᑦ ᐱᖑᐊᕐᕕᐅᖃᑦᑕᖅᑐᓂᑦ ᒫᓐᓇᕋᑖᖅ ᐃᓕᑕᕆᔭᐅᕋᑖᕐᒥᔪᖅ ᕿᕕᐅᖅ ᐅᑎᖅᐳᖅ ᐱᖑᐊᖅᑎᖏᑦ.
ᑖᒃᑯᐊ ᑕᑯᕋᓐᓈᖅᑎᑦᑎᔨᐅᓪᓗᑎᒃ ᐱᖅᑯᓯᑐᖃᖅᑎᑐᑦ ᐱᖑᐊᖅᑏᑦ ᖃᒡᒋᐅᒃᑯᓐᓂ, ᑐᑐᒃᑯᑦ ᐱᖑᐊᖃᑦᑕᖅᓯᒪᓕᑉᒪᑕ ᑲᓇᑕᒥ ᐱᖑᐊᖅᑏᑦ ᑕᑯᕋᓐᓈᕐᕕᐊᓂ ᐋᑐᕚᒥ ᐊᒻᒪᓗ ᐊᓕᐊᓇᐃᒃᑯᑦ ᑕᑯᕋᓐᓈᕐᕕᐊᓂ ᐃᖃᓗᖕᓂ, ᐊᒻᒪᓗ ᒫᓐᓇ ᓄᓇᓕᖕᓄᑦ ᓂᐅᕈᑲᑕᖕᒪᑕ ᐱᖑᐊᕐᕕᖏᓐᓂ ᑕᑯᕋᓐᓈᖅᑎᑦᑎᒋᐊᖅᑐᖃᑦᑕᖅᖢᑎᒃ ᑲᖏᖅᓗᒑᐱᖕᒧᑦ, ᐸᖕᓂᑦᑑᒧᑦ ᑲᖏᖅᖠᓂᕐᒧᓪᓗ ᑎᑭᓯᒪᓕᖅᑐᑦ.
ᐃᖅᑲᐅᒪᒋᔭᖃᕐᓂᕋᖅᖢᓂ ᐅᓂᒃᑳᓚᐅᕐᒥᔪᖅ ᓯᕗᓪᓕᖅᐸᒥ ᖃᐅᔨᒋᐅᕋᒥ ᑕᑯᕋᓐᓈᖅᑎᑦᑎᒋᐊᒃᓴᖅ ᖁᕕᐊᒋᔭᖃᕐᓂᕐᒥᓂᒃ ᐃᓕᓴᒻᒫᕐᒥ ᑲᑎᒪᓂᖃᖅᑎᓪᓗᒋᑦ ᑲᑕᔾᔭᖅᑏᑦ ᑲᖏᖅᖠᓂᕐᒥ, ᖁᔭᓇᖅᑐᑦ ᑕᐃᒃᑯᐊ ᐃᓄᒃᓱᒃᒥ ᐃᓕᓴᕐᕕᐊᓂ ᐊᖅᓴᕐᓂᒃᑯᑦ ᐱᖑᐊᖅᑎᖏᑦ ᐊᒻᒪᓗ ᑖᐃᓐᓇ ᓯᑎᕚᓂ ᓚᓵᓐᔅ.
“ᑲᑕᔾᔭᕐᓂᕐᒥᒃ ᐃᓕᓴᖅᑕᐅᓪᓗᑎᒃ ᐃᖅᑲᐅᒪᔪᖅ ᑖᒃᑯᐊ ᒪᒃᑯᒃᑐᐃᑦ ᐊᕐᓇᐃᑦ ᓂᑭᑦᑖᕐᓗᑎᒃ ᐃᓐᖏᕆᐅᒃᓴᔭᐅᔪᑦ. ᐊᒃᓱᐊᓗᒃ ᖁᕕᐊᓇᓚᐅᖅᑐᖅ ᐃᒡᓚᑲᑕᒃᖢᑕ,” ᐅᖃᕆᓪᓗᓂ, ᐃᓚᓪᓗᓂᐅᒃ ᐃᒻᒪᖄ ᖁᓕᓂᒃ ᐅᑭᐅᖃᖅᑎᓪᓗᖓ ᑕᐃᒪᐃᓚᐅᖅᓯᒪᔪᒍᑦ.
ᑭᓯᐊᓂᓕ ᓄᒃᑎᖅᓯᒪᓕᖅᖢᓂ ᐃᖃᓗᖕᓄᑦ ᐊᒻᒪᓗ ᐃᓄᒃᓱᒃ ᑐᖓᓕᖓᓂ ᐃᓕᓴᕐᕕᒃᔪᐊᒥ ᐃᓕᓴᓕᖅᖢᓂ ᐱᒋᐊᓪᓚᒃᑲᓐᓂᓚᐅᖅᓯᒪᔪᖅ ᐊᔪᖏᑕᒥᓂᒃ ᐱᖑᐊᕈᓯᕐᒥᒃ ᐆᒃᑑᑎᖃᖅᖢᓂ ᑐᑭᒧᐊᖅᑎᑦᑎᔨᖃᖅᖢᑎᒃ ᒥᐊᓕ ᐱᐅᓯ-ᓘᐃᔅᒥᒃ. ᑐᑐ ᐃᓚᐅᓕᓚᐅᕐᓂᕐᒪᑦ ᐱᐅᓯᒃᑯᓐᓄᑦ ᓯᕗᓪᓕᖅᐹᒥ ᑎᑕᒃᑎᓂ, ᐊᒻᒪᓗ ᑭᖑᓂᖓᒍᑦ ᕿᓚᐅᔾᔭᖅᑎᓂ ᐱᒋᐊᓕᖅᑎᓪᓗᒋᑦ ᒧᒥᖅᑏᑦ.
“ᑕᐃᒪᓐᓇ ᑕᕝᕙ ᐱᒋᐊᖓᕈᑎᖃᓚᐅᖅᑐᖓ ᐱᖑᐊᖅᑎᓂ. ᐊᒥᓱᓂᒃ ᐆᒃᑐᖅᓯᒪᓕᖅᑐᖓ ᐃᓄᒃᑎᑐᑦ ᐱᖑᐊᕈᓯᕐᓂᒃ - ᐊᒥᓱᑲᓪᓚᖕᓂᒃ ᑭᓯᐊᓂᓕ ᐆᒃᑐᕋᖃᑦᑕᖅᖢᓂ ᓇᓗᔪᓐᓃᖅᐸᓪᓕᐊᓐᓇᕐᒪᑦ ᐃᖃᕈᓐᓃᖅᖢᓂ ᒧᒥᕈᓯᕐᓂᒃ ᐃᓐᖏᕈᓯᕐᓂᒃᓗ ᐊᔪᕈᓐᓃᖅᓴᖃᖅᑕᖅᖢᓂ. ᑕᒪᒃᑯᓂᖓ ᐊᖅᑯᑎᖃᖅᖢᖓ ᐃᓗᓐᓂᑦ ᐊᓂᑎᖢᒋᑦ ᐱᖑᐊᖅᑎᐅᔪᖓ,” ᐃᖅᑲᐅᒪᔭᒥᓂᒃ ᐅᓂᒃᑳᓚᐅᖅᑐᖅ ᑐᑐ.
ᐱᐅᓯ-ᓘᐃᔅ ᑎᑭᑦᑐᕕᓂᖅ ᐃᓄᒃᓱᒃ ᐃᓕᓴᕐᕕᒃᔪᐊᖓᓄᑦ 2008-ᒥ ᑎᑕᐅᓯᕐᓂᒃ ᐃᓕᓴᐃᔨᐅᒋᐊᖅᑐᖅᖢᓂ. ᑐᑐᓕ ᑕᒪᐅᖓᖅᑐᕕᓂᖅ ᒍᕇᑦ 9-ᒥᒃ ᐃᓕᓴᕆᐊᖅᑐᖅᖢᓂ 2009-ᒥ.
“ᑕᐃᓱᒪᓂ ᑕᑯᒋᐅᖅᖢᒍ ᐊᒃᓱᐊᓗᒃ ᑎᑕᐅᓯᕐᓂᒃ ᐊᔪᖏᓚᐅᕐᒪᑦ ᓇᓗᓇᓚᐅᖏᑦᑐᖅ ᑕᐃᒫᑎᒋ ᒪᒃᑯᒃᑎᒋᓪᓗᓂ ᓱᓕ,” ᐅᓂᒃᑳᓚᐅᖅᑐᖅ ᐱᐅᓯ-ᓘᐃᔅ. “ᓱᐴᒐᕐᔪᐊᓂᒃ ᑐᖅᖢᐊᕈᑎᓂᒃ ᑎᑕᐅᑎᓂᒃ ᐊᑐᖃᑦᑕᖅᑐᖅ. ᐃᓐᖏᐅᓰᓪᓗ ᕿᒥᖏᓐᓂᒃ ᐅᖃᓕᒫᕈᓐᓇᖅᖢᓂ.”
ᐅᑭᐅᖅᑎᓪᓗᒍ 2009-ᒥ, ᐱᐅᓯ-ᓘᐃᔅ ᐱᖑᐊᖅᑎᑦᑎᓐᓂᕐᒪᑦ ᑕᑯᒐᓐᓈᒐᒃᓴᒥᒃ ᐅᓂᒃᑳᒥᒃ Fiddler on the Roof-ᒥᒃ.
“ᑕᐃᓱᒪᓂᐅᑎᓪᓗᒍᓘᓐᓃᑦ ᓇᓗᓇᓚᐅᖏᑦᑐᖅ ᐅᑭᐅᖃᖅᖢᓂ 14-ᓂᒃ ᓱᓕ, ᐱᖑᐊᖅᑎᓂ ᐃᓚᐅᔪᒪᓂᖓᓂᒃ. ᐃᓚᐅᓪᓗᓂ ᑕᕐᕆᔭᕐᕕᖕᒥ ᑕᑯᒐᓐᓈᒐᒃᓴᓂ ᓴᓇᔪᓂ, ᐃᓐᖏᖅᑎᓂ ᒧᒥᖅᑎᓂᓗ.”
ᐊᐅᔭᐅᓕᖅᑎᓪᓗᒍ, ᐱᐅᓯ-ᓘᐃᔅ ᓇᒃᓴᓚᐅᕐᓂᕐᒪᑦ ᑐᑐᒥᒃ ᐊᐅᓪᓚᖅᓯᒪᑎᓪᓗᒍ ᑲᓇᑕᒥ ᐊᐅᔭᒃᑯᑦ ᐱᖑᐊᖅᑏᑦ ᑲᑎᒪᕕᒃᔪᐊᖓᓄᑦ ᐱ.ᐃ.ᐊᐃᒧᑦ.
“ᑖᕙᓃᓚᐅᖅᑐᒍᖅ ᐱᓇᓱᐊᕈᓰᖕᓂᒃ ᒪᕐᕉᖕᓂᒃ ᐊᒃᓱᐊᓗᒃ ᖁᕕᐊᓇᖅᑐᒥ ᐱᐅᔪᒥᓗ ᐱᖑᐊᕐᕕᖃᕐᒪᑕ… ᑎᑕᒃᑏᑦ, ᑕᑯᕋᓐᓈᖅᑎᑦᑎᔩᑦ, ᒧᒥᖅᑏᑦ ᖃᓄᑐᐃᓐᓇᖅ ᑕᑯᕋᓐᓈᖅᑎᑦᑎᔨᐅᔪᑦ ᑐᓴᕋᓐᓈᖅᑎᑦᑎᔨᐅᔪᓪᓗ ᑲᑎᒪᓚᐅᖅᓯᒪᖕᒪᑕ ᓯᓚᑦᑐᒃᓴᕐᕕᒃᔪᐊᒥ ᐃᓕᓴᖅᑐᑦ. ᑯᕆᔅᑏᓪᓕ ᓇᖕᒥᓂᖅ ᐊᔪᖏᓐᓂᕐᒥᓂᒃ ᒪᓕᒃᖢᓂ ᑖᕙᓃᔪᑎᖃᓚᐅᖅᑐᖅ ᑕᒪᐃᓐᓂᓕᒫᖅ ᐆᒃᑐᖅᑕᒥᓂᒃ ᐊᔪᖏᒻᒪᑦ,” ᐅᓂᒃᑳᕆᓪᓗᓂ ᐱᐅᓯ-ᓘᐃᔅ.
“ᐊᕐᕋᒍᖃᓕᖅᖢᓂ 15-ᓂᒃ ᑕᐃᑲᓂ ᐃᓚᐅᓚᐅᕐᒥᔪᖅ ᐊᖓᔪᖅᖠᒻᒪᕆᖕᓂ ᐃᓚᐅᖃᑕᐅᓪᓗᓂ.”
ᑕᐃᑯᖓ ᐱᖑᐊᖃᑕᐅᒋᐊᖅᑐᖅᓯᒪᔪᑦ ᑲᑐᔾᔨᓪᓗᑎᒃ ᐅᓂᒃᑳᖅᑐᐊᒥᒃ ᑕᑯᒐᓐᓈᒐᒃᓴᓕᐅᓚᐅᕐᒪᑕ ᐊᑕᐅᓯᕐᒥ ᐅᓐᓄᒥ ᑕᑯᒃᓴᐅᑎᑕᐅᓪᓗᓂ ᒪᑐᓕᖅᑎᓪᓗᒍ.
“ᑕᐅᑐᖑᐊᓕᖅᐸᕋ ᑕᐃᓱᒪᓂᐅᓚᐅᖅᑐᖅ ᐅᖃᓗᒃᑐᖅ ᐊᓈᓇᒥᓄᑦ, ᐃᓄᒃᑎᑐᑦ ᐅᖃᓪᓚᒃᖢᓂ ᐱᓯᕐᒥᒃ ᓴᓇᓇᓱᐊᖅᑐᖅ ᑎᑎᕋᖅᐸᓪᓕᐊᓗᓂᒋᑦ ᐃᓐᖏᕈᓯᕐᓂ ᐃᓯᖏᓐᓂᒃ. ᑎᑎᕋᓚᐅᕆᓪᓗᓂ ᐅᓂᕐᑳᖓᓂᒃ ᐱᓯᐅᑉ ᐃᓐᖏᖅᑕᐅᓂᐊᖅᑐᒥᒃ Courage-ᒥᒃ ᑕᐃᓪᓗᓂᐅᒃ. ᐊᔪᖏᒻᒪᕆᓚᐅᖅᑐᖅ, ᓴᓇᖃᑕᐅᓪᓗᓂ ᑕᐃᒃᑯᓇᓂ ᐊᑯᓂ ᐃᓕᓴᖅᓯᒪᓕᖅᑐᓂ, ᐊᒃᓱᐊᓗᒃ ᐱᒃᑯᒥᓇᓚᐅᖅᓯᒪᔪᖅ.
ᐅᑭᐅᑦ ᒪᕐᕉᒃ ᓈᓯᒪᓕᖅᑎᓪᓗᒋᑦ ᓄᓇᕗᑦ ᓯᕗᓂᒃᓴᕗᒃᑯᓐᓃᓕᖅᖢᓂ - ᐃᓕᓴᓕᕐᓂᕐᒥᖕᒪᑦ ᐃᓐᖏᕈᑎᒥᒃ ᐱᖑᐊᕆᐊᒃᓴᖅ - ᑐᓂᔭᐅᓐᓂᕋᒥ ᐃᓄᐃᑦ ᐱᖅᑯᓯᖏᓐᓂᒃ ᐃᓕᓴᖁᔭᐅᓪᓗᓂ ᐃᓐᖏᕈᑎᒥᒃ ᐊᑐᕐᓗᓂ ᑕᐃᓱᒪᖓᓂᓂᑦ ᒫᓐᓇᒧᑦ ᐱᖅᑯᓯᕆᓕᖅᑕᖏᓐᓂᒃ. ᑖᓱᒧᖓ ᐃᓕᓴᕆᔭᐅᔪᑎᑖᓚᐅᖅᑐᖅ ᕗᐃᓂᐲᒃᒥᐅᑦ ᓯᓚᑦᑐᒃᓴᕐᕕᒃᔪᐊᖓᓂᑦ ᓄᓇᖃᖅᑳᖅᑐᑦ ᑎᑕᒍᓯᖏᓐᓂᒃ ᐃᓕᓴᖅᑐᓂᑦ, ᐊᒻᒪᓗ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᐃᓕᓴᖃᑕᐅᒋᓪᓗᓂ.
ᑐᑐ ᑕᒪᑐᒪᓂ ᐅᑭᐅᓕᒫᒥᒃ ᓄᖅᑲᖓᓚᐅᑲᒃᑐᖅ, ᐃᖅᑲᓇᐃᔭᒥᓂᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᑦ. ᑭᓯᐊᓂᓕ ᓯᕗᓂᕆᓂᐊᖅᑕᑦᑎᓐᓂ ᕿᓚᓈᕆᔭᖃᖅᑐᖅ, ᐃᓕᓴᕐᕕᖕᒥ ᓇᓗᓇᐃᒃᑯᑕᖅᑖᕆᔪᒪᔭᓂ ᐱᓇᓱᐊᕈᒪᓪᓗᓂᐅᒃ ᕗᐃᓂᐲᒃᒥ ᐋᑐᕚᒥᓗ, ᓇᓕᐊᖕᓂᑐᐃᓐᓇᖅ ᓄᓇᖃᖅᑳᖅᑐᓂᒃ ᐃᓕᓴᖅᕕᐊᓂ ᐃᓄᓕᒫᓄᓪᓗ ᐱᔪᓐᓇᐅᑎᓂᒃ ᐃᓕᓴᕐᕕᐊᓂ.
“ᒫᓐᓇ ᓇᓗᓇᖅᑐᖅ ᓇᓕᐊᖕᓄᑦ ᓵᓐᓂᐊᕐᒪᖔᓐᓂᒃ, ᐊᒃᓱᐊᓗᒃ ᓇᓗᓕᖅᓯᒪᖃᑦᑕᕋᒪ ᐃᓱᒪᓕᐅᕈᑎᖃᕆᐊᖃᓕᕌᖓᒪ ᓇᓕᐊᖕᓂᑐᐃᓐᓇᖅ ᓂᕈᐊᕆᐊᖃᖅᖢᖓ. ᐊᑖᑕᒃᑯᒃᑲ ᐅᖃᖃᑦᑕᖅᑕᖅᑐᓪᓕ ᐃᓕᓴᕐᕕᖕᒥᑦ ᓇᓗᓇᐃᑯᑕᖅᑖᓴᑐᐊᕈᕕᑦ ᐊᔪᖏᓐᓂᕐᓂᒃ,” ᐅᖃᕆᓪᓗᓂ ᐃᒡᓚᖅᖢᓂ.
ᑕᒪᑐᒪᓂᐅᓂᖓᓂᓕ ᐊᑯᓐᓂᖓᓂ, ᐱᖑᐊᖅᑎᐅᓪᓗᓂ ᐃᒻᒥᓄᑦ ᒪᒥᓴᐅᑕᐅᖕᒪᑦ ᓴᒃᑯᐃᔪᑕᐅᔪᓐᓇᖅᖢᓂᓗ ᐊᒃᓱᕈᕐᓇᖅᑐᓂᒃ, ᐃᑲᔪᕈᓐᓇᕐᒪᑦ ᐊᒥᓱᓂᒃ ᒪᒃᑯᒃᑐᓂᒃ ᐃᓐᖏᖅᑎᐅᓪᓗᓂ ᐊᒃᓱᕈᕐᓇᖅᑐᓂᒃ ᕿᒪᐃᓯᒪᒻᓇᕐᒪᑦ. ᐃᓚᐅᖃᑕᐅᖕᒪᑦ ᖃᒡᒋᐊᒃᑯᓐᓂ ᐃᖃᓗᖕᓂ ᐊᔪᐃᓐᓇᐅᑎᖃᖅᑐᓂ ᐱᖑᐊᕐᕕᓕᐅᖁᔨᔪᓂ ᑕᕐᕆᔭᕐᕕᐅᔪᓐᓇᕐᓂᐊᖅᑐᒥᒃ ᐱᖑᐊᖅᑏᑦ ᓴᓇᔭᖏᓐᓂᒃ.
“ᑐᓴᖃᑦᑕᖅᓯᒪᒐᒪ ᑭᒃᑯᑐᐃᓐᓇᓂᑦ ᐱᒻᒪᕆᐅᓂᖅᓴᓂᒃ ᑲᒪᓇᓱᐊᖅᑐᒃᓴᐅᔪᓯ ᐱᖑᐊᕈᑎᑐᐃᓐᓇᐅᖏᑦᑐᓂᒃ ᑭᓯᐊᓂᓕ ᐃᓚᖏᑦ ᒪᑯᐊ ᖃᐅᔨᒪᖏᒻᒪᑕ ᑕᒪᒃᑯᐊ ᐱᖑᐊᕈᓰᑦ ᓴᐃᒻᒪᖅᓴᐅᑕᐅᔪᓐᓇᕐᒪᑕ ᐊᒃᓱᕈᖅᑐᓄᑦ ᓴᐃᓕᓴᐅᑎᐅᓗᑎᒃ ᐃᓚᓕᐅᑎᔪᓐᓇᕋᑦᑎᒍ ᐆᒻᒪᑎᒃᑯᑦ ᒪᒥᓴᕈᑎᓂ ᓴᐃᒻᒪᖅᓴᕈᑎᓂᓗ ᐃᓐᖏᕈᓐᓇᕐᒪᑕ ᐊᒃᓱᕈᑦᑎᐊᕐᓗᑎᒃ ᐊᓂᑦᑎᔪᓐᓇᕐᒪᑕ ᓯᐊᓛᕆᔭᐅᑎᓪᓗᑕ ᖃᓪᓗᓈᓄᑦ ᑕᐃᓱᒪᖓᓂᓂᑦ ᓱᒃᑯᓯᒪᑎᑕᐅᕙᒃᑲᑦᑕ ᐱᐅᓂᖅᓴᒧᑦ ᐋᕿᒃᓱᐃᓇᓱᐊᖅᓗᑕ ᒪᑭᑉᐹᓪᓕᕐᓇᕐᒪᑦ ᐊᐃᑦᑖᖑᒐᓗᐊᖅ ᑕᒪᐅᖓᑐᐃᓐᓇᖅ ᐊᒃᓱᕈᖅᑎᑕᐅᓯᒪᒐᑦᑕ ᐃᓅᓯᒃᑯᑦ,” ᐅᖃᕆᓪᓗᓂ ᑐᑐ.
“ᒪᑐᐃᖅᓯᔪᑕᐅᔪᓐᓇᕐᒪᑦ ᐊᔪᖏᓐᓂᑦᑎᓐᓂᒃ. ᑕᑯᒃᓴᐅᑎᑦᑎᓗᓂ. ᖃᖓᑐᐃᓐᓇᖅ ᐃᓅᖃᑎᓐᓄᑦ ᖃᐅᔨᔭᐅᒑᖓᒪ ᓱᓕᕆᓂᓐᓂᒃ ᐱᕚᓪᓕᐅᑎᒋᖃᑦᑕᕋᒃᑯ ᓴᓐᖏᓂᖅᑖᕆᓪᓗᒍ. ᐅᐊᑲᓪᓚᖔ - ᐊᔪᖏᑕᕋ ᑖᓐᓇ ᐅᕙᓐᓂᒃ ᐱᕙᓪᓕᐊᑎᑦᑐᓐᓇᖅᑕᕋ. ᐊᒻᒪᓗ ᐱᐅᓪᓗᓂ ᑕᑯᕋᓐᓈᕆᓪᓗᒍ ᖁᕕᐊᓇᖅᖢᓂ ᐊᓯᑦᑎᓐᓄᑦ ᐃᓅᓂᕗᑦ ᑕᑯᖅᑯᔾᔨᐅᑎᒋᓪᓗᒍ, ᐊᒃᓱᕈᓚᐅᕈᓯᖅᐳᑦ ᐃᓅᓪᓗᑕ ᓯᐊᓛᕆᔭᐅᓪᓗᑕ ᐃᓚᓐᓂᒃᑯᓪᓗ ᐃᓕᓴᕐᕕᓂ ᐃᓖᔭᕆᔭᐅᓪᓗᑕ ᓄᓇᑦᑎᓐᓂ ᐊᖅᓵᒻᑕᐅᓯᒪᓪᓗᑕ ᐱᕙᓪᓕᐊᓯᒪᓂᑰᔪᒍᑦ. ᑭᓯᐊᓂᓕ ᑕᑯᑎᑦᑎᓇᓱᐊᕆᐊᒃᓴᖅ ᐃᓅᖃᑎᑦᑎᓐᓂᒃ ᑕᒪᑐᒥᖓ ᐱᔭᕆᑐᔪᒥᒃ ᑲᖑᓇᕐᒪᑦ ᐃᓅᓂᑦᑎᓐᓄᑦ ᕿᒃᓵᖕᓇᖅᑐᓂᒃ ᐊᓂᑦᑎᕕᒋᔪᓐᓇᕋᑦᑎᒍ ᐃᑲᔪᕈᓐᓇᕐᒪᑦ ᐅᕙᑦᑎᓐᓂᒃ ᐊᒃᓱᕉᑎᒋᔭᑦᑎᓐᓂᒃ ᐊᓂᑦᑎᓪᓗᑕ ᐊᔪᖏᓐᓇᑦᑕ ᐊᓂᒍᐃᔪᓐᓇᕋᑦᑕ ᐊᒃᓱᕈᕐᓇᖅᑐᓂᒃ ᑕᐃᒪᓐᓇ ᐱᐅᓗᐊᕈᑎᒋᔭᖓ ᐱᖑᐊᖅᑎᐅᓪᓗᓂ.”
ᑐᑐ ᐅᓂᒃᑳᕆᓪᓗᓂ ᐱᐅᓯ-ᓘᐃᔅᒧᒎᖅ ᐃᑲᔪᖅᑕᐅᓯᒪᔪᖅ ᐊᒃᓱᐊᓗᒃ ᐱᖑᐊᖅᑎᐅᓪᓗᓂ ᑕᑯᒐᓐᓈᒐᓂᒃ/ᓴᓇᔨᐅᓪᓗᓂ ᑕᑯᒐᓐᓈᒐᒃᓴᓂᒃ ᑖᓐᔭ ᑕᒑᖅᑎᑐᑦ ᓴᓇᖃᑦᑕᖅᑐᖅ. ᓛᑯᓗᒃ ᕗᐃᓕᐊᒻᓴᓐ-ᐹᑐᕆ ᐊᒻᒪᓗ ᓯᓕᓇ ᑲᓪᓗᒃᑯᑦ - ᑖᒃᑯᐊ ᑕᕝᕙ ᑕᑯᒃᓴᐅᓪᓗᑎᒃ ᐱᖑᐊᖃᑦᑕᖅᑐᑦ ᐅᓂᒃᑲᓂᒃ ᓴᓇᓪᓗᑎᒃ ᑕᑯᒃᓴᐅᑎᑕᐅᓂᐊᖅᑐᓂᒃ. ᖁᕕᐊᓇᖅᑐᑦ ᖁᔭᓕᔭᐅᔪᒃᓴᐅᔪᑦ ᑕᒪᐃᑕ.
ᑐᑐ ᐅᓂᒃᑳᕆᓪᓗᓂ ᐱᐅᓯ-ᓘᐃᔅᒧᒎᖅ ᐃᑲᔪᖅᑕᐅᓯᒪᔪᖅ ᐊᒃᓱᐊᓗᒃ ᐱᖑᐊᖅᑎᐅᓪᓗᓂ ᑕᑯᒐᓐᓈᒐᓂᒃ/ᓴᓇᔨᐅᓪᓗᓂ ᑕᑯᒐᓐᓈᒐᒃᓴᓂᒃ ᑖᓐᔭ ᑕᒑᖅᑎᑐᑦ ᓴᓇᖃᑦᑕᖅᑐᖅ. ᓛᑯᓗᒃ ᕗᐃᓕᐊᒻᓴᓐ-ᐹᑐᕆ ᐊᒻᒪᓗ ᓯᓕᓇ ᑲᓪᓗᒃᑯᑦ - ᑖᒃᑯᐊ ᑕᕝᕙ ᑕᑯᒃᓴᐅᓪᓗᑎᒃ ᐱᖑᐊᖃᑦᑕᖅᑐᑦ ᐅᓂᒃᑲᓂᒃ ᓴᓇᓪᓗᑎᒃ ᑕᑯᒃᓴᐅᑎᑕᐅᓂᐊᖅᑐᓂᒃ. ᖁᕕᐊᓇᖅᑐᑦ ᖁᔭᓕᔭᐅᔪᒃᓴᐅᔪᑦ ᑕᒪᐃᑕ.