Skip to content

ᐃᓄᓕᒫᓂᑦ ᐃᒡᓗᖃᖅᑎᑕᐅᔪᓂ ᐃᓱᒫᓗᒃᐳᑦ ᐅᖁᖕᒥ, ᑯᕕᖅᑕᕐᕕᖕᒥ ᑕᑕᐅᔾᔨᓗᐊᖃᑦᑕᕐᓂᐅᔪᒥ

ᐃᓄᓕᒫᓄᑦ ᐃᒡᓗᖃᖅᑎᐅᔪᑦ ᔪᐊᔾ ᖃᔮᕐᔪᐊᖅ ᐊᒻᒪ ᔮᔅ ᐊᓗᕈᑦ ᐃᓱᒫᓗᒃᐳᑦ ᖃᔅᓯᒐᓚᖕᓄᑦ ᓈᒻᒪᙱᓐᓂᐅᔪᓄᑦ ᐃᒡᓗᒋᔭᖏᓐᓂ, ᐃᓚᖃᖅᑐᒥ ᐅᖁᖃᕐᓂᕐᔪᐊᖑᔪᒥ, ᐊᒻᒪ ᐅᖃᖅᐳᑦ ᖃᔅᓰᖅᓱᒐᓚᒃᑐᒥ ᐅᖃᐱᓗᒃᓯᒪᕗᑦ ᓄᓇᓕᖕᓂ ᐃᒡᓗᓕᕆᔨᒃᑯᓐᓄᑦ ᐱᑎᑦᑎᓯᒪᙱᓚᖅ ᖃᓄᐃᓕᐅᕐᓂᐅᔪᒧᑦ.

ᐅᓇ ᐅᖁᒃ ᐊᑕᐅᓯᕐᒥ ᐱᖓᓱᓂᑦ ᐃᒡᓗᕈᓯᐅᔪᓂ ᔪᐊᔾ ᖃᔮᕐᔪᐊᑉ ᐄᑎᑐᑦ ᐋᖅᑭᒃᓯᒪᓂᐅᔪᒥ ᓴᓂᕋᔭᖕᒥ. ᐃᓱᒫᓗᒃᐳᖅ ᐅᖁᕐᔪᐊᖑᓂᐅᔪᖅ ᐃᒡᓗᒥ ᐱᐅᔪᓐᓃᖅᑎᑦᑎᕙᓪᓕᐊᓂᖓᓂ ᒪᕐᕉᖕᓂ-ᐅᑭᐅᓕᖕᒥ ᐃᕐᙳᑕᖓᑕ ᐊᓂᖅᓵᖅᑐᕈᑎᖏᑦ ᒥᑭᒡᓕᓯᒪᓂᖓᓐᓂ. "ᐃᒡᓗᒋᔭᕋ ᐃᒡᓗᑦᑎᐊᕙᐅᙱᓛᑦᑎᐊᖑᕗᖅ," ᐅᖃᖅᐳᖅ ᖃᔮᕐᔪᐊᖅ.

ᖃᔮᕐᔪᐊᖅ ᐊᒻᒪ ᐊᓗᕈᑦ ᐃᓱᒫᓗᒃᑭᕗᑦ ᐃᓚᖏᑕ ᐋᓐᓂᐊᖃᕐᓇᙱᑦᑐᓕᕆᓂᖏᓐᓂ. ᖃᔮᕐᔪᐊᑉ ᒪᕐᕉᖕᓂ ᐅᑭᐅᓕᒃ ᐃᕐᙳᑕᖓ, ᐊᓂᖅᓵᖅᑐᕈᑎᖏᑦ ᒥᑭᒡᓕᓯᒪᓂᖃᕐᔪᐊᓲᖑᕗᖅ, ᐃᒡᓗᒥᐅᑕᖃᑎᒋᕙᖓ. ᖃᔮᕐᔪᐊᖅ ᐅᖃᓚᐅᖅᐳᖅ ᑎᑎᖅᑲᐅᓯᐊᓚᐅᕐᓂᖓᓂ ᓘᒃᑖᒥᒃ ᓇᓗᓇᐃᖅᓯᔪᒥᒃ ᐃᕐᙳᑕᖓᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑲᐅᙱᓕᐅᕈᑎᖓᓐᓂ, ᐱᐅᙱᒋᐊᓪᓚᒃᑎᑕᐅᔪᓐᓇᖅᑐᒥ ᐅᖁᖕᒧᑦ. ᑐᓂᓚᐅᖅᐸᖓ ᑎᑎᖅᑲᖅ ᓄᓇᓕᖕᓄᑦ ᐃᒡᓗᓕᕆᔨᒃᑯᓐᓄᑦ ᑲᑎᒪᔨᕋᓛᖏᓐᓄᑦ ᑕᖅᑭᐅᓕᖅᑐᓂ ᐱᖓᓱᓂ ᖄᖏᖅᓯᒪᓕᖅᑐᓄᑦ, ᐅᖃᓚᐅᖅᐳᖅ.

"ᑭᐅᓚᐅᖅᓯᒪᙱᓚᑦ ᐅᖃᓗᓚᐅᖅᓯᒪᙱᓚᓪᓗ," ᐅᖃᓚᐅᖅᐳᖅ ᖃᔮᕐᔪᐊᖅ.

ᐊᓯᐊᓂ ᐅᖁᕐᓂᐅᔪᒥ ᐃᒡᓗᕈᓯᐅᑉ ᓴᓂᕋᖓᓂ ᔪᐊᔾ ᖃᔮᕐᔪᐊᑉ ᐃᒡᓗᒋᔭᖓᓂ ᓴᓂᕋᔭᖕᒥ. ᐅᖃᓚᐅᖅᐳᖅ ᐅᖃᐅᔾᔭᐅᓚᐅᕐᓂᖓᓂ ᐃᒡᓗᒋᔭᖓ ᓄᑖᙳᕆᐊᖅᑎᑕᐅᓚᐅᕐᓂᖓᓂ ᓅᓚᐅᖅᑳᕋᓂ ᐊᕐᕌᒍᒥ ᓇᑉᐸᓪᓗᐊᒥᓗ, ᑭᓯᐊᓂ ᕿᑐᑦᑐᒐᐅᔭᕐᓚᖕᒥ ᓱᓇᒃᑯᑖᒥᒃ ᐊᒥᐊᖅᑕᐅᓯᒪᓪᓗᓂ ᐃᓕᓯᓚᐅᖅᐳᑦ, ᐊᒥᐊᕆᑐᐃᓐᓇᖅᑐᒥ ᐅᖁᖕᒥ, ᐅᖃᐅᓯᐅᓪᓗᓂ ᖃᔮᕐᔪᐊᕐᒧᑦ. ᓇᑎᖓ ᑯᕕᖅᑕᕐᕕᖓᑕ ᐃᒡᓗᕈᓯᐊᓂ ᐊᒻᒪ ᐃᓂᐅᔪᒥ ᓂᕿᓕᐅᕐᕕᖓᑕ ᐅᐊᓴᕐᕕᖓᑕ ᐊᑖᓂ ᐅᖂᓂᐅᒋᕗᑦ, ᐅᖃᓚᐅᖅᐳᖅ.

ᐊᓗᕈᑦ ᐊᒻᒪᓗ ᐊᐃᑉᐸᖓ ᑎᓴᒪᓂᒃ ᕿᑐᕐᙵᖃᖅᐳᑦ, ᐅᑭᐅᓕᖕᓂ ᐊᑕᐅᓯᕐᒥ 6-ᓄᑦ ᐅᑭᐅᓕᖕᓄᑦ. ᐅᐱᕐᙶᑕᒫᑦ, ᐃᒡᓗᒥᐅᖃᑎᖏᑦ ᐅᖓᓚᖕᓂᖃᖃᑦᑕᖅᐳᑦ ᐊᒻᒪ ᐊᐅᐸᒐᓛᓕᓲᖑᕗᑦ. ᐊᓗᕈᑦ ᐅᖃᓚᐅᖅᐳᖅ ᐃᓚᖏᑦ ᐃᓗᐊᖅᓴᐃᔨᐅᔪᑦ ᐋᓐᓂᐊᕕᖓᓐᓂ ᐃᓱᒪᕗᑦ ᐅᖁᒃ ᐱᔾᔪᑕᐅᔪᓐᓇᕐᓂᖓᓂ ᑭᓯᐊᓂ ᐃᓚᖏᑦ ᖃᐅᔨᒪᓗᐊᙱᓚᑦ. ᓇᓕᐊᒃᑎᒍᑐᐃᓐᓇᖅ, ᐃᓱᒫᓗᒃᐳᖅ ᐱᕈᖅᐸᓪᓕᐊᔪᒥ ᐅᖁᖕᒥ ᐃᒡᓗᖓᑕ ᐊᑖᓂ ᑕᓪᓕᒪᓂᒃ-ᑲᑎᙵᔪᓂ ᐃᒡᓗᒋᔭᐅᔪᓄᑦ. ᐃᒡᓘᑉ ᐊᓂᐊᑎᑦᑎᕕᖓᑕ ᓱᐴᕈᑎᖓ ᐊᒻᒪ ᐊᓂᐊᑎᑦᑎᕝᕕᐅᔪᒥ ᐊᔪᖅᐳᑦ ᐊᒻᒪ ᑕᒪᕐᒥᒃ ᐱᖓᓱᓄᑦ-ᒪᑐᐃᖅᓯᔾᔪᑎᓕᖕᓂ ᐃᒐᓛᓂᑦ ᐃᒡᓗᒥᑦ ᒪᑐᐃᕈᓐᓇᙱᓚᑦ. ᐊᑕᐅᓯᖅ ᐃᒐᓛᒥᒃ ᓯᖁᒥᓯᒪᔪᖃᖅᑎᓪᓗᒍ ᐊᒻᒪ ᐊᖕᒪᔪᖃᕐᓂᖃᖅᑐᒥ ᐃᓯᕐᕕᖕᒥ ᐹᒥᒃ ᐊᒻᒪ ᐹᑉ ᐊᕙᓗᖓᓐᓂ, ᐊᓂᐊᑎᑦᑎᓂᖃᑦᑎᐊᙱᓚᖅ, ᐊᓗᕈᑦ ᐅᖃᕆᐊᓪᓚᓚᐅᖅᐳᖅ.

"ᐃᒡᓗᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᖏᓐᓄᑦ ᐅᖃᐅᔾᔨᓯᒪᒐᓗᐊᖅᐳᖓ ᐋᖅᑭᒃᑕᐅᖁᓪᓗᒍ ᑭᓯᐊᓂ ᐋᖅᑭᒃᑕᐅᓚᐅᖅᓯᒪᙱᓚᖅ," ᐅᖃᓚᐅᖅᐳᖅ. "ᐊᑦᑕᓇᖅᑐᖅ."

ᖁᐱᓯᒪᐅᖅᑐᓂ ᓇᑎᖓᓐᓂ ᐱᐅᔪᓐᓃᖅᐸᓪᓕᐊᒋᕗᑦ ᔮᔅ ᐊᓗᕉᑉ ᐃᓄᓕᒫᓄᑦ ᐃᒡᓗᒋᔭᐅᔪᓄᑦ ᓴᓂᕋᔭᖕᒥ ᑕᓪᓕᒪᓂᒃ-ᑲᑎᙵᔪᓄᑦ ᐃᒡᓗᖁᑎᐅᔪᒥ. "ᐅᓇ ᖁᐱᓯᒪᓂᐅᔪᖅ ᒥᑭᑦᑐᒻᒪᕆᑯᓘᓚᐅᖅᐳᖅ ᓅᓵᖅᑎᓪᓗᖓ, ᒫᓐᓇ ᒪᑐᐃᖅᐸᓪᓕᐊᓕᖅᐳᖅ," ᐅᖃᖅᐳᖅ ᐊᓗᕈᑦ. ᐅᖃᓚᐅᖅᐳᖅ ᐊᖏᔪᒥ ᐱᕈᖅᐸᓪᓕᐊᓂᖃᖅᐳᖅ ᐅᖁᖕᒥ ᓇᑎᐅᑉ ᐊᑖᓂ ᐊᒻᒪ ᐅᒃᐱᕈᓱᒃᐳᖅ ᐃᓚᖏᓐᓂ ᐅᕕᓂᖓᓐᓂ ᐊᐅᐸᒐᓛᒃᑎᑦᑎᖃᑦᑕᕐᓂᖓᓂ ᐊᒻᒪ ᐅᖓᓕᖅᑎᑦᑎᓲᖑᓂᖓᓂ, ᐱᓗᐊᖅᑐᒥ ᐅᐱᕐᙶᒥ.

ᔨᕉᒻ ᓰᕝᔅ, ᐊᐅᓚᑦᑎᔨᐅᔪᖅ ᓴᓂᕋᔭᖕᒥ ᐃᒡᓗᓕᕆᔨᒃᑯᓐᓄᑦ ᑲᑐᔾᔨᖃᑎᒌᖑᔪᓄᑦ (LHO), ᓂᓪᓕᕈᒪᓚᐅᙱᓚᖅ ᓇᓗᓇᐃᖅᑕᐅᓯᒪᔪᓄᑦ ᖃᓄᐃᓐᓂᐅᔪᓄᑦ.

"ᐅᖃᕈᓐᓇᖅᑕᑐᐊᕋ ᑕᒪᕐᒥᒃ ᐱᓕᕆᓂᐅᔪᓄᑦ ᑎᓕᐅᕈᑕᐅᔪᓂ ᐱᓕᕆᐊᖑᓲᖑᓂᖏᓐᓂ ᕿᓚᒻᒥᐅᔪᒃᑯᑦ ᐊᒻᒪ ᐱᓇᓱᐊᓲᖑᕗᒍᑦ ᐱᔪᓐᓇᕐᓂᓕᒫᑦᑎᓐᓂ ᐃᑲᔪᕈᑎᒃᓴᐅᔪᓄᑦ ᐱᓯᒪᔭᑦᑎᓐᓂ ᐋᖅᑭᒃᓯᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ ᐅᕙᑦᑎᓐᓄᑦ ᑐᓂᔭᐅᔪᓄᑦ," ᓰᕝᔅ ᐅᖃᓚᐅᖅᐳᖅ, ᑐᕌᖅᑎᑦᑎᓪᓗᓂ ᐊᐱᖅᑯᑕᐅᔪᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᐱᓕᕆᔨᒻᒪᕆᐅᔪᓄᑦ ᐃᖃᓗᖕᓄᑦ.

ᐊᒥᑦᑐᕐᒥ ᒪᓕᒐᓕᐅᖅᑎ ᔪᐃᓕ ᖃᐃᕐᓂᖅ ᐅᖃᓚᐅᖅᐳᖅ ᐸᕐᓇᒃᐸᓪᓕᐊᕗᖅ ᓴᖅᑭᑎᑦᑎᓂᖓᓂ ᖃᓄᐃᓕᖓᓂᐅᔪᓄᑦ ᑕᒪᒃᑭᓄᑦ ᐃᒡᓗᖃᖅᑎᐅᔪᓄᑦ ᒪᓕᒐᓕᐅᕐᕕᖕᒧᑦ ᐅᐱᕐᙶᒥ ᐃᒃᓯᕚᕐᓂᐅᔪᒥ, ᐱᒋᐊᕐᓂᐊᖅᑐᒥ ᑕᒪᑐᒪᓂ ᐱᓇᓱᐊᕈᓯᐅᔪᒥ.

"ᐱᔪᓐᓇᕐᓂᓕᒫᓐᓂ ᐱᓕᕆᓂᐊᖅᐳᖓ ᐅᑯᓄᙵ ᐃᓄᖕᓄᑦ ᐃᓱᒫᓘᑎᖏᓐᓂ ᑐᓴᖅᑕᐅᔪᓐᓇᖁᓪᓗᒋᑦ. ᐅᓇ ᐱᒻᒪᕆᐅᓪᓗᓂ ᐊᑲᐅᙱᓕᐅᕈᑕᐅᕗᖅ, ᐱᓗᐊᖅᑐᒥ ᓱᕈᓯᕐᓄᑦ ᐋᓐᓂᐊᖃᕐᓇᙱᑦᑐᓕᕆᓂᖏᓐᓄᑦ," ᖃᐃᕐᓂᖅ ᐅᖃᓚᐅᖅᐳᖅ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ.

ᑎᐊᕆ ᐊᐅᓪᓚ, ᐊᖓᔪᖅᑳᖑᔪᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᐅᖃᓚᐅᖅᐳᖅ ᐊᔭᐅᕆᕗᖅ ᐃᒡᓗᖃᖅᑎᐅᔪᓂ ᐅᖃᐅᔾᔨᒐᔪᖕᓂᖏᓐᓂ ᓄᓇᓕᖕᓂ ᐃᒡᓗᓕᕆᔨᒃᑯᓐᓄᑦ ᑲᑐᔾᔨᖃᑎᒌᖑᔪᓄᑦ ᖃᐅᔨᒪᒍᑎᒃ ᐃᒡᓗᒋᔭᖏᓐᓂ ᓈᒻᒪᙱᓐᓂᐅᓂᖃᕐᓂᖏᓐᓂ ᐊᒃᑐᐃᓂᖓᓪᓕ ᐃᓅᓯᖏᓐᓂ ᐅᕝᕙᓘᓐᓃᑦ ᐋᖅᑭᒃᓯᒪᓂᖓᓂ ᓴᙱᓂᖓᓂ ᐃᒡᓗᕐᔪᐊᖑᔪᓄᑦ.

ᐊᓂᐊᑎᑦᑎᕕᐅᔪᒥ ᓱᐴᕈᑎᖓᓂ ᐊᒻᒪ ᐊᓂᐊᑎᑦᑎᕝᕕᓕᐊᔾᔪᑎᖓᓂ ᓱᕋᒃᓯᒪᕗᑦ ᔮᔅ ᐊᓗᕉᑉ ᐃᒡᓗᖓᓂ ᓴᓂᕋᔭᖕᒥ. ᐊᓂᕐᓂᒃᓴᒥ ᐃᖏᕐᕋᓂᖓᓂ ᐱᔪᓐᓇᓗᐊᙱᓚᖅ, ᑭᓯᐊᓂ ᓂᒡᓕᓇᖅᑐᒥ ᐊᓂᕐᓂᒃᓴᒥ ᓱᐴᓲᖑᕗᖅ ᐊᖕᒪᖅᓯᒪᓂᐅᔪᒥ ᐹᑉ ᕿᑎᐊᓂ ᐊᒻᒪ ᐊᕙᓗᖓᓐᓂ. "ᐄ, ᐃᒃᑮᖑᒃᑲᒻᒪᕆᐅᕗᖅ ᐅᑭᐅᒃᑯᑦ," ᐊᓗᕈᑦ ᐅᖃᓚᐅᖅᐳᖅ.

ᓄᓇᓕᖕᓂ ᐃᒡᓗᓕᕆᔨᒃᑯᑦ ᑲᑐᔾᔨᖃᑎᒌᖑᔪᑦ ᓯᕗᓪᓕᐅᔾᔭᐅᑎᑦᑎᔭᕆᐊᖃᖅᐳᑦ ᑐᐊᕕᕐᓇᖅᑐᓂ ᓱᓪᓗᓕᕆᓂᕐᓄᑦ, ᐅᖅᑰᓴᐅᑎᖏᓐᓂ ᐊᒻᒪ ᐅᖅᓱᐊᓗᖃᐅᑎᖏᓐᓄᑦ ᖃᑦᑕᓄᑦ ᐊᑲᐅᙱᓕᐅᕈᑕᐅᔪᓂ ᐱᓕᕆᓚᐅᖅᑳᕋᑎᒃ ᐅᖁᖕᓂᑦ, ᐱᓗᐊᖅᑐᒥ ᒥᑭᓐᓂᖅᓴᐅᔪᓄᑦ ᐱᓂᐅᔪᓄᑦᐃᓗᐊᓂ 70 ᓴᓐᑕᒦᑕᒥ 30 ᓴᓐᑕᒦᑕᒧᑦ ᐃᓂᐅᔪᒧᑦ. ᑕᐃᒪᐃᑦᑐᓄᑦ, ᐃᒡᓗᖃᖅᑎᐅᔪᑦ ᐊᓪᓚᖅᑎᕆᔪᓐᓇᖅᐳᑦ ᐅᖁᖓᓐᓂ ᐃᒻᒥᖕᓂᒃ ᐃᒡᓗᒧᑦ ᓴᓗᒻᒪᖅᓴᐅᑎᓄᑦ ᐅᕝᕙᓘᓐᓃᑦ ᐅᐊᓴᐅᒻᒧᑦ ᐊᒻᒪ ᐃᒪᕐᒧᑦ, ᐊᐅᓪᓚ ᐅᖃᓚᐅᖅᐳᖅ. ᐅᖁᒃ ᐃᒡᓘᑉ ᓯᓚᑖᓂ ᑐᐊᕕᕐᓇᙱᓐᓂᖅᓴᐅᕗᑦ ᐅᖁᖕᓂ ᐃᒡᓘᑉ ᐃᓗᐊᓃᑦᑐᓂᑦ, ᐃᓚᒋᐊᖅᓯᓚᐅᖅᐳᖅ.

"ᖃᖓᒃᑲᓐᓂᐊᔪᒥ (ᓄᓇᓕᖕᓂ ᐃᔨᓗᓕᕆᔨᒃᑯᓐᓂ ᑲᑐᔾᔨᖃᑎᒌᖑᔪᓄᑦ ᐃᖅᑲᓇᐃᔭᖅᑎᖏᑦ) ᑭᐅᓛᖅᐳᑦ ᐅᖁᖕᒧᑦ ᓴᓗᒻᒪᖅᓴᐃᓂᐅᔪᒥ ᐱᓕᕆᓂᖓᓐᓂ," ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐅᖁᖕᒥ ᐲᔭᐃᓂᐅᔪᒥ ᐱᓕᒻᒪᒃᓴᕐᓂᐅᔪᒥ ᑐᓂᔭᐅᓯᒪᕗᑦ ᐃᒡᓗᒥᒃ ᐋᖅᑭᐅᒪᑎᑦᑎᔨᐅᔪᓄᑦ ᓄᓇᓕᖕᓂ ᐊᒻᒪ ᓄᑖᓂ ᐃᒡᓗᓂᑦ ᐱᐅᓯᒋᐊᖅᓯᒪᔪᓂ ᐊᓂᐊᑎᑦᑎᔾᔪᑕᐅᔪᓂ ᐱᑎᑦᑎᑦᑕᐃᓕᒪᓂᕐᒧᑦ ᐅᖁᖕᒥ.

ᑕᒪᓐᓇ ᐊᑲᐅᓯᑎᑦᑎᕚᓪᓕᕐᓇᙱᓚᖅ ᖃᔮᕐᔪᐊᕐᒧᑦ, ᐅᖁᖃᕐᔪᐊᖅᑐᒦᑐᐃᓐᓇᙱᖦᖢᓂ ᑭᓯᐊᓂ ᑯᕕᖅᑕᖅᑕᐅᒻᒥ ᖃᑦᑕᖓ ᑕᑕᓗᐊᖅᓯᒪᕗᖅ ᑯᕕᓪᓗᓂ ᖃᔅᓰᖅᓱᒐᓚᓕᖅᑐᒥᓱᓕᒃᑲᓐᓂᖅ ᒪᐃ 19-ᒥᐊᒻᒪᓗ ᑯᕕᖅᑕᖅᑕᐅᓂᑯᖃᙱᓗᐊᕐᓂᐅᒨᙱᑦᑐᖅ ᕼᐋᒻᓚᒃᑯᓐᓂ, ᐅᖃᓚᐅᖅᐳᖅ. ᐊᒻᒪᓗᑦᑕᐅᖅ, ᐳᔪᖅ ᐊᓂᐊᕙᓪᓕᐊᓲᖑᕗᖅ ᐳᔫᕐᕕᖓᓐᓂ, ᐅᖅᑰᓴᐅᒻᒥ ᐅᖅᓱᐊᓗᖓᓐᓂ ᑯᑐᓲᖑᕗᖅ ᓇᑎᕐᒧᑦ ᐊᒻᒪ ᑯᑐᓲᓂᒃ ᐃᒐᓛᓂᑦ ᒪᖁᖕᒥ ᑲᑎᑎᕆᓲᖑᕗᖅ ᐃᒐᓛᑉ ᐃᓗᐊᒍᑦ.

"ᐅᓇ ᐃᒡᓗ ᓄᑖᙳᕆᐊᖅᑎᑕᐅᕐᔪᐊᕆᐊᖃᖅᐳᖅ," ᖃᔮᕐᔪᐊᖅ ᐅᖃᓚᐅᖅᐳᖅ. "ᐃᒡᓗᖃᕐᕕᒋᔭᕋ ᐃᒡᓗᑦᑎᐊᕙᐅᙱᓐᓂᖅᐹᖑᕗᖅ."