ᖃᔅᓯᐊᕐᔪᖕᓂ ᖁᕕᐊᖅᑐᖃᓚᐅᖅᐳᖅ ᒥᒥᑯ ᑲᓇᑕᒥᐅᑕᓂᑦ ᒥᒥᑯ, ᐋᓐᑎᐊᕆᐅᒥ. ᕿᒪᐃᖕᒪᑕ ᑲᖏᖅᖠᓂᕐᒥ ᐅᓪᓗᓂᑦ-10-ᓂ ᓄᓇᓕᐅᔪᒥ ᐱᓇᓱᐊᕈᓯᐅᓚᐅᖅᑐᒥ.
ᒥᒥᑯ ᒪᒃᑯᒃᑐᑦ, ᐊᖓᔪᖅᑳᖏᓪᓗ ᐃᓚᐅᖃᑎᒋᔭᖏᓪᓗ ᑲᖏᖅᖠᓂᕐᒦᓚᐅᖅᑎᓪᓗᒋᑦ ᒪᕐᕈᖓᓂ ᓇᑉᐸᖓᓂ ᐅᐊᖕᓇᒥ ᑕᐅᖅᓰᓂᕐᒧᑦ ᐱᓕᕆᐊᖑᔪᒥ, ᑮᓇᐅᔭᖃᖅᑎᑕᐅᓪᓗᐊᑕᓚᐅᖅᑐᒥ ᐊᑐᖅᑕᐅᓂᑯᓂ ᑲᓇᑕᒥ ᐅᕘᓇ ᐃᑦᑕᕐᓂᓴᓕᕆᓂᕐᒧᑦ ᑲᓇᑕᒥ
ᒥᒥᑯ ᕼᐋᑭᒧᑦ ᐊᑖᑕᒋᔭᐅᔪᖅ ᐊᒻᒪ ᐊᔪᕆᖅᓱᐃᕙᒃᑐᖅ ᓖ ᐹᑯᕐ ᐅᖃᓚᐅᖅᐳᖅ ᓯᕗᓪᓕᖅᐹᒥ ᐃᓱᒪᓂᖓᓂ ᑲᖏᖅᖠᓂᕐᒥ ᑐᙵᓱᒃᑎᑕᐅᕐᔪᐊᕐᓂᖏᓐᓂ ᓄᓇᓕᐅᔪᒥᑦ.
ᐅᖃᓚᐅᖅᐳᖅ ᑕᒪᕐᒥᒃ ᒥᒥᑯ ᑲᑎᙵᓂᐅᔪᑦ ᐊᖏᕐᕋᖅᓯᒪᔫᔮᓚᐅᖅᐳᑦ ᑎᑭᑐᐊᕋᒥᒃ ᑲᖏᖅᖠᓂᕐᒥ ᒥᑦᑕᕐᕕᖓᓐᓄᑦ.
“ᓄᓇᓕᐅᔪᖅ ᐃᒻᒥᖕᓂ ᑲᔾᔮᕐᓇᖅᑐᐊᓗ – ᐃᓄᒃᓱᒃ, ᓯᓛᓗᖓ ᐊᒻᒪ ᑲᔾᔮᕐᓇᖅᑐᖅ ᑕᐅᑦᑐᖓ – ᑭᒃᑯᓕᒫᑦ ᑲᑎᙵᓂᐅᔪᓂ ᐅᖃᐅᓯᖄᓂᒍᓐᓇᐃᓪᓕᓯᒪᕗᑦ ᑲᔾᔮᕐᓇᕐᓂᖓᓂ ᓄᓇᐅᕗᒥᑦ ᐊᒻᒪ ᐃᓄᖕᓂ ᐊᒻᒪ ᐅᕙᑦᑎᓐᓄᑦ ᑐᙵᓇᕐᓂᖏᓐᓄᑦ,” ᐅᖃᓚᐅᖅᐳᖅ ᐹᑯᕐ
“ᕼᐋᑭᒐᓛᓲᖑᕗᒍᑦ ᒥᒥᑯᒥ ᐊᒻᒪ ᕼᐋᑭᒐᓛᓚᐅᖅᐳᒍᑦ ᐅᕙᓂ – ᕼᐋᑭᖅᑎᐅᕗᒍᑦ ᐊᒻᒪ ᑕᐃᒪᐃᓕᐅᓲᖑᕗᒍᑦ – ᐊᒻᒪᓗ ᑲᒪᕗᖓ ᑭᒡᓕᐅᓂᖓᓂ ᕼᐋᑭᒥᑦ ᐱᙳᐊᖅᑕᐅᓲᒥ ᑲᖏᖅᖠᓂᕐᒥ.
“ᐊᒻᒪᓗ ᑲᒪᕗᖓ ᖃᓄᑎᒋ ᐊᓕᐊᓇᐃᒋᔭᐅᕐᔪᐊᕐᓂᖓᓂ – ᓄᓇᓕᓕᒫᖑᔫᔮᖅᑐᒥ – ᑭᓇᓕᒫᑦ ᐊᓕᐊᓇᐃᒋᔭᖃᕐᓂᖏᓐᓂ ᐱᙳᐊᕐᓂᐅᔪᒥ; ᐱᙳᐊᖅᑏᑦ, ᐊᖓᔪᖅᑳᑦ, ᐃᑲᔪᖅᓱᐃᔪᑦ; ᑕᒪᕐᒥᓗᒃᑖᑦ ᐊᓕᐊᓇᐃᒋᔭᖃᑦᑎᐊᖅᑐᑦ ᐱᙳᐊᕐᓂᐅᔪᒥ.”
ᑕᐅᖅᓰᓂᐅᔪᖅ ᐱᓕᕆᐊᖑᔪᖅ ᐅᓇᑐᐊᖑᙱᑦᑐᖅ ᒪᕐᕉᖕᓂ ᑲᑎᙵᓂᐅᔪᓂ ᒪᒃᑯᒃᑐᓂ ᐱᙳᐊᖅᑎᓂᑦ ᐊᓯᖏᓐᓂᙶᖅᑐᓂ ᑲᓇᑕᒥ ᐱᙳᐊᖅᑐᓂ ᖃᔅᓯᐊᕐᔪᖕᓂ ᐱᙳᐊᕐᓂᖃᕐᓂᐅᔪᓂᑦ.
ᒪᒃᑯᒃᑐᑦ ᐃᓚᐅᖃᑕᐅᔪᑦ ᐱᓕᕆᐊᖑᔪᒥ ᓴᖅᑭᔮᕐᕕᐅᕗᑦ ᓄᑖᖑᔪᒥ ᐃᓕᖅᑯᓯᐅᔪᒥ, ᐊᒻᒪ ᐱᕕᒃᓴᖃᖅᐳᑦ ᐅᓪᓗᓂ 10-ᓂ ᐊᕙᑎᐅᔪᒥ ᓯᓚᑖᓃᑦᑐᒥ ᓄᓇᒋᕙᒃᑕᒥᓂᑦ.
ᐋᓐᑎᐊᕆᐅᒥ ᒪᒃᑯᒃᑐᑦ ᐅᑭᐅᓖᑦ 10-ᓂ ᐊᒻᒪ 14-ᓄᑦ. ᐅᖃᖃᑎᖃᖅᓯᒪᕗᑦ ᓇᓕᒧᖃᑎᒥᓂᑦ ᑲᖏᖅᖠᓂᕐᒥ ᑕᐃᒪᙵᓂ ᐅᑎᓚᐅᕐᒪᑕ ᑐᕌᓐᑐᒥ ᑕᖅᑭᓪᓗᐊᖑᓕᖅᑐᓂ ᑎᓴᒪᓂᑦ; ᐅᖃᓘᑎᒥᓄᑦ ᐊᒻᒪ ᖃᕋᓴᐅᔭᑎᒍᑦ ᑲᑎᙵᖃᑎᖃᕐᓂᕐᒧᑦ.
“ᐃᓚᒌᖑᔪᑦ ᐱᓕᕆᑦᑎᐊᖅᓯᒪᕐᔪᐊᖅᓯᒪᕗᑦ ᑭᓇᓕᒫᓂᒃ ᑐᙵᓱᒃᑎᑕᐅᓂᖏᓐᓂ, ᐊᖏᕐᕋᖅᓯᖅᑐᖃᑐᐊᖅᐸᑦ, ᕿᓚᒥᑯᓗᒃ ᐊᓯᐅᕙᓚᐅᖅᐳᖅ,” ᐅᖃᓚᐅᖅᐳᖅ. “ᐊᒥᓱᐃᑦ ᓄᑕᕋᕗᑦ ᐊᑐᓚᐅᖅᓯᒪᙱᓚᑦ ᓯᓚᒥ ᐃᓅᓯᐅᔪᒥ ᐊᖑᓇᓱᖕᓂᕐᒥ-ᐊᒻᒪ-ᐃᖃᓗᒐᓱᖕᓂᕐᒥ ᐊᔪᙱᓐᓂᐅᔪᓄᑦ. ᐃᓚᖓ ᐱᕐᔪᐊᖑᓂᐅᔪᒥ ᐱᕈᖅᓴᓪᓗᓂ ᑲᖏᖅᖠᓂᕐᒥ ᐱᓲᖑᒐᕕᑦ ᑕᒃᑯᓂᖓ ᐊᑑᑎᖃᑦᑎᐊᖅᑐᒥ ᐊᔪᙱᓐᓂᐅᔪᓂᑦ ᑭᓯᐊᓂ ᖃᐅᔨᒪᓂᖃᕐᓂᕐᒥ ᓄᓇᐅᑉ ᐊᑖᒎᕐᓂᐅᔪᒥ ᐃᖏᕐᕋᓂᐅᕙᒃᑐᒥ ᓱᕈᓯᖅ ᑲᖏᖅᖠᓂᕐᒥ ᖃᐅᔨᒪᓗᐊᕋᔭᙱᓚᖓᑦ ᓱᕈᓯᐅᔪᒥ ᑐᕌᓐᑐᒥ.”
“ᐊᓕᐊᓇᐃᒻᒪᕆᒃᓯᒪᕗᖅ ᐃᓕᑦᑎᖃᑦᑕᐅᑎᓪᓗᓂ,” ᐅᖃᕆᐊᓪᓚᓚᐅᖅᐳᖅ.
ᐹᑯᕐ ᐅᖃᓚᐅᖅᐳᖅ ᓇᓕᐊᑐᐃᓐᓇᐃᑦ ᓄᓇᓕᐅᔪᑦ ᐊᐅᓪᓛᕐᓂᖃᕈᓐᓇᕋᔭᓚᐅᙱᓚᑦ ᑮᓇᐅᔭᖃᖅᑎᑕᐅᙱᒃᑯᑎᒃ ᐊᑐᕐᓂᑯᓂ ᑲᓇᑕᒥ.
ᑲᑐᔾᔨᖃᑎᒌᖑᔪᑦ ᑐᓂᓯᓚᐅᕆᕗᑦ ᐊᒥᓱᐊᓗᖕᓂ ᐃᓱᒪᒃᓴᖅᓯᐅᕈᑎᒃᓴᓂᑦ ᐊᒻᒪ ᐅᖃᐅᔾᔨᓂᐅᔪᓂ ᖃᓄᖅ ᐋᖅᑭᒃᓱᐃᓂᕐᒧᑦ ᐊᐅᓪᓛᕐᓂᕆᓂᐊᖅᑕᒥᓂᑦ, ᐅᖃᓚᐅᖅᐳᖅ.
“ᐊᔾᔨᐅᙱᑦᑑᕗᖅ ᐊᒻᒪ ᐱᒻᒪᕆᐅᓪᓗᓂ ᑮᓇᐅᔭᖃᖅᑎᑦᑎᓂᐅᕗᖅ, ᐊᒻᒪᓗ ᖁᕕᐊᑦᑎᐊᖅᐳᖓ ᐱᑕᖃᕐᓂᖓᓂ ᐊᒻᒪᓗ ᐱᕕᒃᓴᖃᓚᐅᕐᓂᑦᑎᓐᓂ ᐃᓚᐅᖃᑕᐅᓂᕐᒧᑦ,” ᐅᖃᓚᐅᖅᐳᖅ.