Skip to content

ᐃᒡᓗᓕᖕᒥ ,ᐃᔭᖓ ᐃᑲᔪᖅᓱᐃᕗᖅ ᐃᓄᑐᖃᕐᒥ ᖁᑭᖅᓯᓚᐅᖅᑐᒥ ᐊᑎᖅᑕᓕᖕᒥ, ᐊᑎᖅᑕᖓᓂᓪᓗ

ᐃᒡᓗᓕᖕᒥ ᐃᓄᑐᖃᖅ ᖁᑭᖅᓯᓚᐅᖅᑐᒥ ᐊᑎᖅᑕᓕᒃ ᐊᒻᒪ ᐊᑎᖅᑕᖓᓂ ᐃᓗᐊᓂ ᓄᓇᓕᐅᔫᑉ ᑭᒡᓕᒋᔭᖓᓐᓂ ᐱᓕᕆᓂᖃᑦᑎᐊᓚᐅᖅᐳᖅ, ᐅᖃᖅᐳᖅ ᐃᒡᓗᓕᐅᑉ ᒪᐃᔭᖓ ᓯᓚᔅᑎᓅ ᐅᔭᕋᒃ.

ᐊᑎᖅᑕᓕᒃ ᐊᒻᒪ ᐊᑎᖅᑕᖓ ᖁᑭᖅᑕᐅᓚᐅᖅᐳᑦ ᐃᒡᓗᓕᖕᒥ ᑎᓯᐱᕆᒥ, ᓴᖅᑭᑎᑦᑎᔪᒥ ᐊᐃᕙᔾᔪᑕᐅᓂᐅᔪᒥ ᑕᐃᒪᐃᓪᓗᐊᓚᐅᕐᓂᖓᓄᑦ ᐋᒃᑲᓘᓐᓃᑦ. ᐃᒡᓗᓕᐅᑉ ᒪᐃᔭᖓ ᐅᖃᓚᐅᖅᐳᖅ ᓇᖏᖃᑎᖃᖅᐳᖅ ᖃᓄᐃᓕᐅᕐᓂᐅᔪᒥ ᐃᓄᑐᖃᕐᒧᑦ ᑐᖂᑦᑎᓚᐅᖅᑐᒥ ᓂᕿᑐᖅᑎᐅᔪᓄᑦ ᐃᓗᐊᓂ ᓄᓇᓕᐅᔪᓂ ᑭᒡᓕᐅᔪᓄᑦ.

ᒪᕐᕉᒃ ᓇᓅᔪᑦ ᑐᖁᑕᐅᓚᐅᖅᐳᑦ ᖁᕕᐊᓱᖕᓇᐅᑎᓪᓗᒍ ᕿᑲᕐᓂᐅᔪᒥ ᐊᒻᒪ ᐃᓄᑐᖃᖅ ᑭᖑᓂᐊᒍᑦ ᐅᖃᓗᒡᕕᐅᑲᑕᓕᓚᐅᖅᐳᖅ ᓄᓇᓕᐅᑉ ᓯᓚᑖᓂ ᐊᑭᕋᖅᑐᖅᑐᓂ ᖃᓄᐃᓕᐅᕐᓂᕆᓚᐅᖅᑕᖓᓐᓂ, ᐅᖃᐅᓯᐅᓪᓗᓂ ᒪᐃᔭᒧᑦ.

"ᓇᓄᓕᒫᑦ, ᐊᑎᖅᑕᓕᐅᕋᓗᐊᖅᐸᑕ ᐋᒃᑲᓘᓐᓃᑦ, ᑲᑉᐱᐊᓵᕆᔪᒥ ᓄᓇᓕᖕᒥᐅᓂ ᐃᓄᖕᓂ, ᐊᖑᓇᓱᒡᕕᖓᓂ ᐃᒡᓗᕋᓛᒥᓪᓘᓐᓃᑦ, ᓇᓄᖅ ᑐᖁᑕᐅᔭᕆᐊᖃᕋᔭᖅᐳᖅ," ᐅᔭᕋᒃ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐸᒡᕕᓵᕆᔨᐅᔪᑦ ᐃᓯᓚᐅᖅᐳᑦ ᓄᓇᖃᖅᑎᐅᕘᑉ ᑐᖅᓲᖓᓐᓄᑦ ᓯᕗᓂᐊᓂ ᖁᑭᖅᑕᐅᓚᐅᖅᑳᕋᑎᒃ. "ᐃᑲᔪᖅᓱᐃᓇᔭᓚᐅᖅᐳᖓ ᐆᒥᖓ ᐃᓄᑐᖃᕐᒥ ᐊᓯᖓᓂᓪᓘᓐᓃᑦ ᐃᓄᖕᒥ ᓴᐳᔾᔨᓯᒪᓂᕐᒧᑦ ᑐᖂᑦᑎᔪᒥᒃ."

ᓇᓄᐃᑦ ᐊᒃᓱᕈᕐᓇᖅᑐᒃᑰᖅᑎᑦᑎᓲᖑᒋᕗᑦ ᓴᐅᓯᒪᔪᓂ ᐲᔭᐃᓪᓗᑎᒃ ᐊᓐ, ᓂᕆᓪᓗᑎᒃ ᐊᖑᓇᓱᒃᑏᑦ ᐊᐃᕕᕐᓂ ᐃᒍᓇᓕᐊᖏᓐᓂᑦ ᓴᐅᓯᒪᔪᓂ ᓄᓇᓕᐅᑉ ᓯᓚᑖᓂ, ᒪᐃᔭ ᐅᖃᓚᐅᖅᐳᖅ.

ᓇᐅᔮᕐᒥᐅᒥ ᐊᖑᒻᒥ ᐊᒻᒪ ᐊᕐᕕᐊᓂᑦ ᐊᖑᒻᒥ ᑐᖁᑕᐅᓚᐅᖅᐳᑦ ᐊᓯᐊᒎᖃᑦᑕᐅᑎᔪᓂ ᐹᖅᓯᓂᐅᔪᓂ ᓇᓄᕐᓂᑦ ᐊᕐᕌᓂᐅᓚᐅᖅᑐᒥ.

ᐊᕙᑎᓕᕆᔨᒃᑯᑦ ᐱᓕᕆᓚᐅᖅᐳᑦ ᓇᖕᒥᓂᖅ ᖃᐅᔨᓴᕐᓂᐅᔪᒥ ᐃᒡᓗᓕᖕᒥ ᖃᓄᐃᓐᓂᐅᔪᒥ ᐊᒻᒪ ᐆᒪᔪᓕᕆᔨᒥ ᐅᖃᓚᐅᖅᐳᖅ ᓈᒻᒪᒃᑑᓪᓗᓂ ᓴᐳᔾᔨᓯᒪᓂᕐᒧᑦ ᑐᖂᑦᑎᓂᐅᓂᖓᓂ, ᒪᐃᔭ ᐅᖃᓚᐅᖅᐳᖅ.

ᐃᒡᓗᓕᖕᒥ ᐆᒪᔪᓕᕆᔨᑕᖃᕋᓗᐊᖅᑎᓪᓗᒍ, ᐅᔭᕋᒃ ᐅᖃᓚᐅᖅᐳᖅ ᐅᖃᐅᔾᔨᓂᖃᕐᓂᕐᒧᑦ ᐅᑕᖅᑭᔭᕆᐊᖃᕐᓂᕐᒧᑦ ᐆᒪᔪᓕᕆᔨᐅᔪᓂ ᐅᐸᖕᓂᐊᕐᓂᖏᓐᓄᑦ ᐊᑲᐅᓲᖑᙱᓚᖅ ᓇᓄᐃᑦ ᐃᕐᙲᓐᓇᑲᐅᑎᒋᒥᑦ ᑲᑉᐱᐊᓇᖅᑐᒦᑎᑦᑎᒍᓂ ᐃᓅᑉ ᐃᓅᓯᖓᓄᑦ. ᐅᖃᐅᓯᐅᓪᓗᓂ, ᐱᒻᒪᕆᐅᕗᖅ ᓄᓇᖃᖅᑎᐅᔪᓄᑦ ᐅᔾᔨᖅᓱᑦᑎᐊᕐᓂᐅᔪᒻᒪᕆᐅᔪᒥ ᖁᑭᕆᐊᕐᓂᖏᓐᓂ ᖁᑭᐅᒻᒥ ᓄᓇᓕᐅᔪᓂᑦ, ᒪᐃᔭ ᐅᖃᓚᐅᖅᐳᖅ. ᑎᓯᐱᕆᒥ ᖃᓄᐃᓐᓂᐅᔪᒥ, ᓇᓄᐃᑦ ᑐᖁᑕᐅᓚᐅᖅᐳᑦ ᐃᓕᓴᐃᔨᐅᑉ ᐃᒡᓗᒋᔭᖓᑕ ᖃᓂᒋᔭᖓᓐᓂ, ᓄᓇᓕᐅᑉ ᓯᓂᖓᓐᓂ.

ᐃᓄᑐᖃᖅ ᐅᖃᓪᓚᒡᕕᐅᔪᓐᓇᓚᐅᙱᓚᖅ ᐅᖃᐅᓯᒃᓴᒥᓄᑦ. ᑭᓯᐊᓂ, ᒫᓐᓇᓕᓴᒥ ᐅᖃᓪᓚᒡᕕᒃᑰᓚᐅᖅᐳᖅ ᐅᓂᒃᑳᕆᓂᕐᒧᑦ ᖃᓄᐃᓕᖓᓂᐅᓚᐅᖅᑐᓂ ᓄᓇᓕᖕᒥᐅᑦ ᑐᑭᓯᑦᑎᐊᒃᑲᓐᓂᕈᓐᓇᖁᓪᓗᒋᑦ ᖃᓄᐃᓕᖓᓚᐅᕐᓂᖓᓂ, ᐅᖃᐅᓯᐅᓪᓗᓂ ᐅᔭᕋᖕᒧᑦ.

"ᐅᖃᖃᑎᖃᓚᐅᖅᐳᖓ ᐆᒧᖓ ᐃᓄᑐᖃᐅᔪᒧᑦ ᐊᒻᒪ ᐅᖃᓚᐅᖅᐳᖅ ᓄᖅᑲᕐᔫᒥᓂᖏᓐᓂ, ᐱᐅᓯᕚᓪᓕᖅᐳᖅ," ᐅᖃᓚᐅᖅᐳᖅ.

ᐆᒪᔪᓕᕆᔨ ᐱᓚᐅᕋᓗᐊᖅᑎᓪᓗᒍ ᓂᕿᑐᖅᑎᐅᑉ ᐊᒥᖏᓐᓂ, ᓇᓅᑉ ᓂᕿᖓ ᑐᓐᓂᖅᓴᖅᑕᐅᓚᐅᖅᐳᖅ ᓄᓇᓕᐅᑉ ᐃᓗᐊᓂ.

"ᐃᓄᑐᖃᐃᑦ ᖁᔭᓕᕐᔪᐊᓚᐅᖅᐳᑦ, ᐃᓄᑐᖃᑐᐊᖑᙱᑦᑐᑦ ᑭᓯᐊᓂ ᑭᒃᑯᓕᒫᑦ ᖁᔭᓕᓚᐅᖅᐳᑦ ᐆᒧᖓ ᓂᕿᐅᔪᒧᑦ."