ᖃᕆᑕᐅᔭᒃᑯᑦ ᐊᐅᓚᑕᐅᔪᓂᒃ ᐃᓅᓯᖃᕐᓂᖅ

by harrymaksagak- December 5, 2018

ᐅᓪᓗᒥᐅᓕᖅᑐᖅ ᖃᕆᑕᐅᔭᒃᑰᖅᑐᓂᒃ ᐊᑐᐃᓐᓇᖃᑦᑕᓕᖅᑎᓪᓗᑕ, ᖃᕆᑕᐅᔭᒃᑯᑦ ᓇᓗᓇᐃᖅᑕᐅᔪᓐᓇᖃᑦᑕᓕᖅᐳᒍᑦ ᓇᓃᓐᓂᑦᑎᓐᓂᒃ.

ᐅᖄᓚᐅᑎᑦ ᓇᕿᓪᓗᒍ ᑐᓴᖅᑎᑕᐅᓂᐊᖅᐳᑎᑦ ᓂᓪᓕᐊᔪᒥᒃ ᐅᖃᖅᖢᓂᓗ ‘ᑐᓴᒐᒃᓴᖃᖏᑦᑐᖅ’.

ᑮᓇᐅᔭᓂᒃ ᐊᒧᓯᓪᓗᓂ ᑮᓇᐅᔭᒃᑯᕕᖕᒥᑦ ᐅᖃᐅᑎᔭᐅᓂᐊᖅᐳᑎᑦ ᓄᖅᑲᖅᑎᑕᐅᓯᒪᓕᕐᓂᖓᓄᑦ ᑮᓇᐅᔭᓂᒃ ᐊᒧᓯᓂᖅ ᑮᓇᐅᔭᐃᕈᑎᒃᑲᕕᑦ, ᐊᓯᖏᓐᓂᒡᓗ.

ᑕᐃᒪᓐᓇ ᐃᖕᒥᓂᒃ ᐱᒍᓐᓇᖅᑐᓂᒃ ᐃᓅᓯᖃᓕᖅᐳᒍᑦ ᓇᕿᑦᓯᑐᐃᓐᓇᕐᓗᓂ. ᐅᖃᓪᓚᒃᑐᖃᕐᓇᓂᓗ, ᐅᖃᓪᓗᕆᒃᓴᖅᑐᖃᖏᒻᒪᑦ ᐃᖅᑲᓇᐃᔭᕐᕕᖕᓂ ᖃᓄᐃᓕᐅᖅᐸᓪᓕᐊᓂᖏᓐᓄᑦ, ᐊᖑᓇᓱᐊᖅᑎᓪᓗᒋᑦ ᖃᓄᐃᓕᐅᕐᓂᖓᓄᓪᓗ ᐊᓯᖏᓪᓗ. ᑕᒪᒃᑯᐊ ᑭᓯᐊᓂ ᐱᓕᕆᖃᑎᒋᓪᓗᒋᑦ ᑕᒪᒃᑯᐊ ᐃᓄᖑᐊᑦ, ᐃᓄᓪᓚᕆᐅᖏᑦᑐᑦ.

ᐃᓚᖏᑦ ᐅᖃᕈᓐᓇᖅᐳᓪᓗ ᐃᓄᓪᓚᕆᑦ, ‘ᕿᓚᒥᐊᓗᒃ ᐱᐊᓂᒃᐳᖓ, ᖃᓄᐃᖏᑦᓯᐊᖅᖢᖓ, ᐅᕙᓘᓐᓃᑦ ᓄᖅᑲᖓᑎᑕᐅᓇᖓ ᑕᐃᒪᐃᓕᐅᓚᐅᖅᐳᖓ’ ᑕᐃᒪᓐᓇᐃᓕᐅᓚᐅᖅᖢᑎᑦ ᓴᒡᓗᖏᑦᖢᑎᑦ. ᖃᐅᔨᒪᕗᒍᑦ

ᑕᐃᒪᓐᓇ ᖃᐅᒻᒪᐅᑎᑦ ᐊᐅᓚᖏᓕᕌᖓᑕ, ᓄᖅᑲᖓᓕᖅᐸᒃᐳᑦ ᑕᒪᒃᑯᐊ ᐊᑐᒐᒃᓴᕗᑦ. ᓂᐅᕕᕐᕕᖕᒦᒃᑯᑦᑕ, ᐸᓚᖓᖅᓯᒪᓕᑲᐅᑎᒋᕙᒃᐳᑦ ᒪᑐᐃᑦ ᖃᐅᒻᒪᖁᑎᑦ ᐅᑕᕿᓪᓗᑎᒍ ᐃᑭᓐᓂᐊᕐᓂᖏᑦ. ᐃᖅᑲᓇᐃᔭᕈᑦᑕ, ᖃᐅᒻᒪᖁᑎᑦ ᖃᒥᒃᑳᖓᑕ ᖃᕆᑕᐅᔭᕗᑦ ᓄᖅᑲᖓᓕᑲᐅᑎᒋᕙᒃᐳᖅ.

ᐅᖃᐅᓯᖃᖅᖢᑕᓗ ᐃᖅᑲᓇᐃᔭᕐᕕᑦᑎᓐᓂ, ᐅᓪᓗᑕᒫᑦ ᐊᑐᖃᑦᑕᖅᖢᒋᓪᓗ ᐅᖃᐅᓯᑦ ᐊᓈᓇᒃᑯᒃᑎᓐᓄᑦ ᐊᑖᑕᒃᑯᑦᑎᓐᓄᓪᓗ ᐊᑖᑕᑦᑎᓯᐊᒃᑯᓐᓄᓪᓗ ᑐᑭᓯᐊᔭᐅᖏᑦᑐᓂᒃ. ᐅᖃᓪᓚᖃᑦᑕᖅᖢᑕᓗ ᓇᐃᒡᓕᒋᐊᖅᓯᒪᔪᒃᑯᑦ: ᖃᐃᓂᐊᖅᐳᖓ ASAP (ᖃᐃᒍᓐᓇᖅᓯᑐᐊᕈᒪ).

ᑕᑯᓯᒪᓪᓗᖓ ᐃᓕᓐᓂᐊᖅᓯᒪᓪᓗᖓᓗ ᑐᓴᐅᒪᑎᑎᒍᑎᒃᓴᑦᓯᐊᕙᖕᓂᒃ ᐊᑐᕆᐊᒃᓴᖅ ᑖᓐᓇ ᑐᓴᖅᑎᑕᕋ ᐱᐊᓂᖁᓪᓗᒍ ᐱᓕᕆᐊᒥᓂᒃ ᐅᓗᕆᐊᓇᖏᑦᑐᒦᓪᓗᓂ ᐱᑦᓯᐊᕐᓗᓂᓗ.

ᑕᐃᒪᓐᓇ ᐃᖅᑲᐃᒍᑎᒋᓪᓗᒍ ᐅᔭᕋᖕᓂᐊᕐᕕᖕᒥ ᐃᖅᑲᓇᐃᔭᓚᐅᖅᓯᒪᓂᓐᓄᑦ. ᐃᖅᑲᒪᕗᖓ ᐅᖃᐅᑎᔭᐅᓚᐅᖅᓯᒪᓂᓐᓄᑦ ᐃᖅᑲᓇᐃᔭᖅᑎᑦ ᐱᓕᕆᓂᐊᕐᓂᖏᓐᓄᑦ ᐃᑎᓂᖃᖅᑐᒥ 1130 ᐃᑎᓂᖃᖅᑐᒥ ᑕᐃᒪ ᐃᖅᑲᓇᐃᔭᖅᑎᑕᐅᓕᖅᖢᖓ ᐃᑎᓂᖃᖅᑐᒥ 250-ᒦᑕᓂᒃ ᐅᖃᐅᑎᔭᐅᓪᓗᖓᓗ ᓄᓇᓯᐅᑎᑦ ᐅᓯᖃᑦᑕᖅᑐᑦ ᐊᒡᔭᖅᓯᓂᐊᕐᓂᖏᓐᓄᑦ ᓯᐅᕋᕐᓂᒃ ᓄᓇᓂᒃ ᒪᕋᖕᓂᒃ ᐴᖅᑲᐃᓗᑎᒃ, ᑕᐃᒪᓐᓇ ᑕᒡᕙ ᖄᖅᑕᔫᖃᕆᐊᖃᖅᐳᑎᑦ ᐃᖅᑲᓇᐃᔭᕐᓂᕐᓂ. ᑕᐃᒪ ᑕᐃᒪᓐᓇ ᖄᖅᑎᕆᓕᖅᖢᖓ.

ᓈᓚᑦᓯᐊᕋᓱᐊᖅᐸᒃᐳᒍᑦ ᓄᖅᑲᖓᑎᑦᓯᓂᐊᖏᓐᓇᑦᑕ ᑐᑭᓂᕐᓂᕐᓗᒃᑎᑦᓯᓂᐊᖏᓐᓇᑦᑕᓗ. ᑕᐃᒪᓐᓇᓗ ᐅᖃᐱᓗᖕᓂᐊᖏᓐᓇᑦᑕ.

ᐅᓪᓗᒥᐅᓕᖅᑐᖅ ᑕᐃᒪᓐᓇ ᑕᒪᒃᑯᐊ ᕙᐃᔭᒃᑰᖅᑐᑦ ᐊᑐᕈᒪᖃᑦᑕᖅᐸᕗᑦ ᖃᕆᑕᐅᔭᐃᓪᓗ, ᐅᕙᓘᓐᓃᑦ ᒪᑐᐃᖔᕐᓂᑦᑎᓐᓄᑦ ᖃᐅᔨᒪᖁᔨᓪᓗᑕ ᓱᓇᑐᐃᓐᓇᕐᒧᑦ, ᑐᓐᖓᓱᒃᑎᑦᓯᓗᑕᓗ ᐃᓚᐅᑦᓯᐊᕐᓗᑕᓗ. ᑕᐃᒪᓐᓇ, ᐊᔾᔨᒌᖏᑦᑐᓂᒃ ᐃᓱᒪᖃᕋᓗᐊᖅᑎᓪᓗᑕ ᐃᖅᑲᓇᐃᔭᖃᑎᒌᑦᓯᐊᕈᓐᓇᖅᐳᒍᑦ ᑕᒪᑦᑕ ᑲᔪᓯᑦᓯᐊᕈᓐᓇᖁᓪᓗᑕ.

Leave a Comment: