ᖃᓄᐃᙱᑦᑎᐊᕐᓂᐅᔪᑦ ᓱᕈᓯᕐᓂ ᐊᓯᐅᔪᓄᑦ ᐸᓯᒧᑦ ᑮᓇᐅᔭᖃᖅᑎᑕᐅᓂᕐᒥ ᑭᐅᓘᑎᓂᐅᔪᒥ

315

ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᐃᓄᑐᖃᐃᑦ ᐅᕙᑦᑎᓐᓄᑦ ᐅᖃᕌᖓᑕ ᐱᓱᒃᐸᓚᐅᕐᓂᖏᓐᓂ ᐃᓕᓐᓂᐊᕐᕕᖕᒧᑦ -40–ᒥ ᓯᓚᒥ, ᐱᖓᓱᓂ ᐃᓯᒐᓪᓗᐊᓂ ᐊᐳᒻᒥ, ᐱᓱᒃᖢᑎᒃ ᑕᑉᐸᐅᖓᖓᔪᒥ ᑕᐃᑯᖓ ᐅᑎᒧᓪᓗ, ᐊᒥᓱᐃᑦ ᓱᖏᐅᑎᓯᒪᓗᐊᖅᐳᑦ ᐃᓗᐊᕐᓂᐅᔪᒥ ᐃᓕᓐᓂᐊᕐᕕᖕᒧᑦ ᐸᓯᒥ ᐊᑐᐃᓐᓇᐅᓂᖓᓂ.

ᑕᐃᒪᐃᑦᑐᓐᓃᖅᐳᖅ ᐃᖃᓗᒃᑑᑦᑎᐊᕐᒥ ᓄᓇᓕᖕᓂ ᐃᓕᓐᓂᐊᕐᕕᖕᒧᑦ ᐸᓯᖓ ᒥᑭᓐᓂᖅᓴᓄᑦ ᐃᓕᓐᓂᐊᕐᕕᖕᒧᑦ–ᐅᑭᐅᓕᖕᓂ ᓱᕈᓯᓄᑦ ᓱᕋᖅᓯᒪᖕᒪᑦ ᐊᒻᒪ ᑕᒪᒃᑭᑦ ᐃᓕᓐᓂᐊᕐᓂᓕᕆᓂᕐᒧᑦ ᐊᒻᒪ ᓄᓇᕗᒻᒥ ᒐᕙᒪᒃᑯᓐᓂ ᑎᒥᐅᔪᑦ ᑭᐅᓘᑎᕗᑦ ᑭᓇ ᐊᑭᓖᓂᐊᕐᓂᖓᓂ ᐊᑭᓕᒐᒃᓴᐅᔪᒥ ᐋᖅᑭᒃᓱᖅᑕᐅᓂᖓᓄᑦ.

ᐋᓕᓐ ᓯᒻ, ᐃᒃᓯᕙᐅᑕᐅᔪᖅ ᐃᖃᓗᒃᑑᑦᑎᐊᕐᒥ ᐊᕕᒃᑐᖅᓯᒪᔪᓄᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᑲᑎᒪᔨᐅᔪᓄᑦ (DEA), ᐅᖃᓚᐅᖅᐳᖅ “ᐸᓯ ᓱᓕ ᐃᖏᕐᕋᔪᓐᓇᖅᑐᖅ ᑭᓯᐊᓂ ᐊᑦᑕᕐᓇᖅᐳᖅ ᐊᑐᕆᐊᒃᓴᖅ” ᐊᒻᒪ ᐊᐱᕆᕗᑦ ᓄᓇᕗᒻᒥ ᒐᕙᒪᒃᑯᓐᓂ ᐊᑭᓖᓂᖏᓐᓄᑦ ᐋᖅᑭᒃᓱᖅᑕᐅᓂᖓᓄᑦ.

“ᐊᑲᐅᙱᓕᐅᕈᑕᐅᔪᖅ ᐋᖅᑭᒃᓱᖅᑕᐅᑎᑦᑎᒍᑦᑕ ᐊᒥᐊᒃᑯᐊᕐᔪᑐᐃᓐᓇᕋᔭᖅᐳᒍᑦ ᐊᑭᓖᓂᕐᒧᑦ ᐊᖁᑎᒥᒃ ᐊᒻᒪ ᑲᒪᔨᐅᔪᓄᑦ,” ᓯᒻ ᐅᖃᓚᐅᖅᐳᖅ. “ᖄᒃᑲᓐᓂᐊᒍᑦ, ᐋᖅᑭᒃᓱᐃᓂᖃᓚᐅᖅᑎᓪᓗᑕ, ᐊᐅᓚᐅᑎᖓ ᐊᔪᓕᑐᐃᓐᓇᕆᐊᖃᖅᐳᖅ ᐊᒻᒪᓗ ᑕᐃᒃᑯᐊ ᑮᓇᐅᔭᓕᒫᑦ ᐊᓯᐅᑐᐃᓐᓇᕋᔭᖅᐳᑦ” (ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ, ᔭᓄᐊᕆ 20–ᒥ ᑎᑎᕋᖅᑕᐅᔪᖅ, ᐃᖃᓗᒃᑑᑦᑎᐊᕐᒥ ᐊᕕᒃᑐᖅᓯᒪᔪᓄᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᑲᑎᒪᔨᐅᔪᑦ ᓄᓇᕗᒻᒥ ᒐᕙᒪᒃᑯᓐᓂ ᑲᒪᒋᔭᖃᖔᖁᔨᕗᑦ ᐃᓕᓐᓂᐊᕐᕕᐅᑉ ᐸᓯᖓᓂ ᐱᔨᑦᑎᕋᕐᓂᕐᒥ).

ᓇᓚᐅᖦᖢᓂ ᑕᐃᔭᐅᓂᐅᓚᐅᖅᐳᖅ ᐊᕕᒃᑐᖅᓯᒪᔪᓄᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᑲᑎᒪᔨᐅᔪᓄᑦ ᐃᓕᓯᓂᕐᒥ ᐱᐅᑦᑎᐊᙱᑦᑐᒥ ᐸᓯᒥ ᐊᑐᕈᓐᓃᖅᑎᑕᐅᓂᖓᓂ ᓱᕈᓯᕐᓄᑦ ᐊᑦᑕᓇᔾᔭᐃᖅᓯᓯᒪᓂᕐᒧᑦ, ᑭᓯᐊᓂ ᐱᑕᖃᙱᓗᐊᕐᓂᖓᓂ ᖃᓄᐃᓕᐅᕐᓂᐅᔪᒥ ᖃᓄᐃᓐᓂᐅᔪᒧᑦ ᐱᑎᑦᑎᓯᒪᕗᖅ ᓱᕈᓯᓂᑦ ᐱᓱᒃᑐᒥ ᑎᑭᐅᒪᔪᒧᑦ ᑭᓛᒥᑐᒧᑦ ᐃᓕᓐᓂᐊᕐᕕᖕᒧᑦ ᓂᒡᓚᓱᕐᔪᐊᖅᑐᒥ ᓯᓚᐅᔪᒥ. ᖃᐅᔨᒪᔭᐅᕌᓂᒃᐳᖅ ᐃᖃᓗᒃᑑᑦᑎᐊᖅ ᒪᕐᕈᒋᔭᐅᓪᓗᓂ ᓂᒡᓚᓱᓛᖑᓂᖓᓂ ᓄᓇᓕᐅᔪᒥ ᕿᑎᕐᒥᐅᓂ ᑕᐃᒫᒃ ᐃᓱᒫᓘᑎᕐᔪᐊᖑᓪᓗᐊᖅᐳᖅ ᐃᓕᓐᓂᐊᖅᑏᑦ ᐱᓱᖕᓂᖏᓐᓂ ᐃᓕᓐᓂᐊᕐᕕᖕᒧᑦ ᔭᓄᐊᕆᒥ ᑕᐃᒪᐃᒐᔪᒃᑐᒥ ᖁᑦᑎᖕᓂᖓᓂ -27 C–ᖑᕙᖕᓂᖓᓂ.

ᐊᒥᓱᓂ ᖃᓄᐃᑦᑐᖃᕈᓐᓇᖅᐳᖅ ᐊᑕᐅᓯᕐᒥ ᑭᓛᒥᑐᒥ. ᑕᒪᒃᑭᑦ ᐃᓚᐅᖃᑕᐅᔪᓂ ᐅᓂᒃᑳᕆᓂᖃᕐᔪᐊᕆᐊᖃᕋᔭᖅᐳᑦ ᐃᓕᓐᓂᐊᖅᑎᒥ ᐊᓯᐊᓄᑦ ᐱᓱᓕᕐᓂᕈᓂ, ᐋᓐᓂᕐᓗᓂ, ᕿᕿᓐᓂᖃᕐᓗᓂ ᐱᐅᙱᓐᓂᖅᓴᒥᒡᓘᓐᓃᑦ.
ᐅᖃᐅᓯᒃᓴᓕᐊᒥᓂᑦ, ᑕᐃᕕᑦ ᔪᐊᓇᓯ, ᒥᓂᔅᑕᐅᔪᖅ ᐃᓕᓐᓂᐊᖅᑐᓕᕆᔨᒃᑯᓐᓂ, ᐃᓱᒪᒃᓴᖅᓯᐅᕆᔫᔮᕐᓂᖓᓂ ᑐᒃᓯᕋᕐᓂᐅᔪᒥ ᐊᕕᒃᑐᖅᓯᒪᔪᓄᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᑲᑎᒪᔨᐅᔪᓂᑦ ᐋᖅᑭᒃᓯᓂᕐᒧᑦ ᐸᓯᒥᑦ, ᑭᓯᐊᓂ ᑕᐃᓐᓇ ᑐᒃᓯᕋᕐᓂᐅᓚᐅᖅᐳᖅ ᐅᒃᑐᐱᕆᒥ, ᒥᑭᑦᑐᒥ ᐅᕗᖓ ᐃᖏᕐᕋᓂᖃᙱᑦᑎᐊᒻᒪᕆᒃᑐᒥ ᑕᑯᒃᓴᐅᓂᐅᔪᒥ ᐃᓄᓕᒫᓄᑦ ᐸᕐᓇᒃᐸᓪᓕᐊᑎᓪᓗᑕ ᕕᕈᐊᕆᒧᐊᖅᐸᓪᓕᐊᓂᑦᑎᓐᓂ.

ᑕᐃᒪᐃᑦᑐᒥ ᐃᓱᒪᓂᐅᔪᒥ, ᑎᒃᑯᐊᕐᓂᐅᔪᓂ ᐊᒻᒪ ᑐᓂᓯᓇᓱᐊᕐᓂᐅᔪᒥ ᑲᒪᒋᔭᖃᕐᓂᐅᔪᒥ ᓇᓗᓇᐃᖅᓯᓂᐅᕗᖅ ᓈᒻᒪᑦᑎᐊᙱᓐᓂᐅᔪᓂ ᓂᕈᐊᖅᑕᐅᓯᒪᓇᑎᒃ ᒐᕙᒪᓂᒃ ᐊᐅᓚᑦᑎᔨᐅᔪᓄᑦ, ᐊᒻᒪᓗ ᒐᕙᒪᒃᑯᓐᓄᑦ ᑐᕌᖏᓐᓇᐅᔭᕐᓂᐅᔪᓄᑦ ᐋᖅᑭᒍᑎᒃᓴᓄᑦ.

ᐅᓇ ᖃᓄᐃᓐᓂᐅᔪᖅ ᐊᔾᔨᐸᓗᒋᕙᐅᒃ ᖃᓄᐃᓐᓂᐅᓚᐅᖅᑐᒥ ᐃᖃᓗᒃᑑᑦᑎᐊᒥ ᐊᓐᓂᑭᑕᕐᕕᖓᓂ, ᐅᖁᖕᒥ ᓇᓂᓯᓚᐅᖅᑎᓪᓗᒋᑦ 2011–ᒥ ᐊᒻᒪᓗ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᐅᔪᖅ ᐅᖃᐅᓯᐅᓚᐅᖅᑎᓪᓗᒍ, ᐱᓕᕆᐊᖅᑐᖁᕈᑏᑦ ᒐᕙᒪᓕᕆᓂᕐᒧᑦ ᐱᓕᕆᓂᐅᔪᑦ ᓱᒃᑲᐃᒡᓕᒋᐊᕐᓂᖃᓚᐅᖅᐳᖅ ᓄᖅᑲᑲᓴᑦᑎᐊᕐᓂᐅᔪᒧᑦ ᐊᒻᒪ ᑐᑭᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᖅ ᐋᖅᑭᒃᑕᐅᕌᓂᓚᐅᙱᓐᓂᖓᓐᓂ ᐊᕐᕌᒍᓄᑦ 8–ᓄᑦ.

ᖃᓄᐃᒻᒪᑦ ᐃᖃᓗᒃᑑᑦᑎᐊᕐᒥᐅᑕᑦ ᒪᕐᕈᐃᕐᓗᑎᒃ ᐊᒃᓱᕈᕈᕆᐊᖃᖅᐸᑦ ᐸᒃ–ᖓ ᑐᓂᔭᐅᕙᒃᑎᓪᓗᒍ ᐊᑕᐅᓯᕐᒥ ᑲᑐᔾᔨᖃᑎᒌᖑᔪᒥ ᐊᓯᐊᓄᑦ ᑲᑐᔾᔨᖃᑎᒌᖑᔪᒧᑦ?

ᐸᓯᒧᑦ ᖃᓄᐃᓐᓂᐅᔪᖅ ᐱᕐᔪᐊᖑᙱᑎᓪᓗᒍ, ᐱᑕᖃᓪᓗᐊᙱᑦᑐᒥ ᐅᓗᕆᐊᓇᖅᑐᒦᑎᑦᑎᓂᐅᔪᒥ ᓴᖅᑭᑎᑦᑎᕗᑦ ᐃᒻᒪᖄ ᐊᕕᒃᑐᖅᓯᒪᔪᓄᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᑲᑎᒪᔨᐅᔪᑦ ᓴᓂᕐᕙᐃᓯᒪᓚᐅᑲᒍᓐᓇᖅᐳᑦ ᑕᒪᑐᒪᓂ ᑮᓇᐅᔭᓕᕆᓂᕐᒧᑦ ᐊᕐᕌᒎᔪᒥ ᐋᖅᑭᒃᓯᓂᕐᒧᑦ ᐊᑲᐅᙱᓕᐅᕈᑕᐅᔪᒥ ᓄᓇᕗᒻᒥ ᒐᕙᒪᒃᑯᑦ ᐃᓱᒪᒍᑎᒃ ᐸᓯᒧᑦ ᑮᓇᐅᔭᖃᖅᑎᑦᑎᓂᐅᔪᒥ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᕐᒧᐊᖅᓯᓂᕐᒥ ᐱᔭᕆᐊᑐᒋᔭᐅᙱᒃᑯᓂ.

ᓄᓇᓕᖕᓂ ᐊᑲᐅᙱᓕᐅᕈᑕᐅᔪᑦ ᖃᐃᖁᔨᓂᖃᕆᕗᑦ ᐃᓱᒪᑐᔪᓂ ᓄᓇᓕᖕᓂ ᐋᖅᑭᒍᑎᒃᓴᓄᑦ ᓲᕐᓗ ᑮᓇᐅᔭᓂᒃ ᐱᕈᖅᑎᑦᑎᓇᓱᐊᕐᓂᐅᔪᓂ ᓄᓇᕗᒻᒥᐅᓂ ᐅᕝᕙᓘᓐᓃᑦ ᖁᑦᑎᖕᓂᖅᓴᒧᑦ ᓴᖑᑎᑦᑎᓇᓱᐊᕐᓂᐅᔪᓂ ᓇᖕᒥᓂᖃᖅᑎᐅᔪᓂᑦ ᐊᐅᓚᕙᒃᑐᓂ ᕿᑎᕐᒥᐅᓂ ᑕᒪᒃᑭᐅᒪᔪᓄᑦ.

ᑭᓱᑐᐃᓐᓇᐅᒐᓗᐊᖅᐸᑦ ᐋᖅᑭᒍᑎᒃᓴᖓ, ᐱᒻᒪᕆᐅᓂᖅᐹᖑᔪᖅ ᐆᒪᙵ ᑭᐅᓘᑎᓂᐅᔪᒥ, ᐊᑦᑕᓇᔾᔭᐃᖅᓯᒪᑎᑦᑎᓂᕐᒥ ᓱᕈᓯᕐᓂᑦ, ᐊᓯᐅᔨᔭᐅᓪᓗᐊᙱᓚᑦ ᑕᐅᑐᒃᑕᒥ. ᓲᖃᐃᒻᒪ ᐊᑐᕐᓂᖃᐅᑎᒋᕙᖓ ᑕᒪᒃᑭᓂ ᐊᕕᒃᑐᖅᓯᒪᔪᓄᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᑲᑎᒪᔨᐅᔪᓂᑦ ᐊᒻᒪᓗ ᓄᓇᕗᒻᒥ ᒐᕙᒪᒃᑯᓐᓂ ᐱᔨᑦᑎᕋᕐᓂᕐᒧᑦ ᐱᐅᓂᖅᐹᓂ ᐱᔪᒪᔭᐅᓂᐅᔪᓄᑦ ᐃᓄᖕᓄᑦ.