ᖃᐅᔨᒋᐊᖅᑏᑦ ᐊᒻᒪ ᑲᒡᒋᐊᕘᑦ ᐱᓕᕆᖃᑎᒌᒃᐳᑦ ᐊᑐᐃᓐᓇᖃᖅᑎᑦᑎᓂᕐᒧᑦ ᐱᓕᕆᔾᔪᑎᓂᑦ ᖃᓄᐃᙱᑦᑎᐊᖅᑐᓄᑦ ᐊᐃᑉᐸᕇᖕᓂᕐᒧᑦ

by Michele LeTourneau- December 5, 2018

ᑐᓂᓯᓂᖅ ᒪᒃᑯᒃᑐᓂ ᐃᓱᒪᑐᓂᐅᔪᓂ ᐱᓕᕆᔾᔪᑎᓂᑦ ᓴᖅᑭᑎᑦᑎᓂᕐᒧᑦ ᑭᓇᐅᓂᖏᓐᓂ ᐊᒻᒪ ᐱᕙᓪᓕᐊᑎᑦᑎᓂᕐᒧᑦ ᖃᓄᐃᙱᑦᑎᐊᖅᑐᓂ ᐊᐃᑉᐸᖃᕐᓂᕐᒧᑦ ᐆᒻᒪᑎᒋᔭᐅᕗᖅ ᑎᒥᒐ, ᐃᑯᒪᔪᕐᒥ (My Body, Light Within), ᑲᑐᔾᔭᐅᓪᓗᓂ ᑲᒡᒋᐊᕘᒥ ᐊᒻᒪ ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᕐᕕᖕᒥ.

photo courtesy Qaujigiartiit Health Research Centre
ᑲᒡᒋᐊᕘᑯᓐᓂ ᓛᑯᓗᒃ ᐅᐃᓕᐊᒻᓴᓐ ᐹᑐᕇ ᑎᑎᕋᖅᐸᓪᓕᐊᕗᖅ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑏᑦ ᐃᓱᒪᒃᓴᖅᓯᐅᕆᑎᓪᓗᒋᑦ ᖃᓄᐃᙱᑦᑎᐊᖅᑐᒥ ᐅᖃᐅᓯᖃᕐᓂᐅᔪᒥ ᓇᒡᓕᖕᓂᕐᒥ ᑲᑎᙵᓪᓗᑎᒃ ᑕᐃᑲᓂ ᑎᒥᒐ, ᐃᑯᒪᔪᖅ (My Body, Light Within), ᑲᑐᔾᔭᐅᓪᓗᓂ ᐱᓕᕆᐊᖑᔪᒥ ᑲᒡᒋᐊᕘᒻᒥ ᐊᒻᒪ ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᕐᕕᖕᒥ, ᓄᕕᐱᕆᐅᑉ−ᕿᑎᖅᐸᓯᐊᓂ.

ᒪᕐᕉᒃ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᑐᐃᓐᓇᖃᖅᑎᑦᑎᓯᒪᕗᑦ ᐃᓕᓐᓂᐊᕐᓂᐅᔪᓂ, ᐊᑐᓲᒥ ᑕᐃᒧᖔᖅᓯᓂᕐᒥ, ᐅᓂᒃᑳᖅᑐᐊᕐᓂᕐᒥ, ᓂᔾᔮᑎᑦᑎᓂᕐᒥ, ᒧᒥᕐᓂᕐᒥ ᐊᒻᒪ ᑮᓇᑉᐸᓂ ᐱᕈᖅᓴᐃᓂᕐᒧᑦ ᐃᓱᒪᑐᓂᕐᒥ, ᐃᒻᒥᓂᒃ−ᐅᖃᐅᓯᖃᕐᓂᕐᒥ ᐊᒻᒪ ᖃᓄᐃᙱᑦᑎᐊᕐᓂᕐᒥ ᑕᐃᒪᙵᓂ 2016−ᒥ ᖁᑦᑎᖕᓂᓕᖕᓄᑦ 8−ᒥ 12−ᒧᑦ.
“ᐃᓱᐊᓂ ᐱᒻᒪᕆᐅᕐᔪᐊᖅᐳᖅᔭ ᓇᐃᓴᐃᓂᐅᔪᓂ, ᖃᐅᔨᒪᕗᒍᑦ ᖁᑦᑎᖕᓂᖓᓂ ᖁᓄᔪᕐᓂᐊᕐᓂᐅᔪᓂ ᐅᓄᕐᓂᖏᓐᓂ. ᐊᒻᒪ ᖃᐅᔨᒪᕗᒍᑦ ᖃᓄᑎᒋ ᒪᒃᑯᒃᑐᑦ ᐋᓐᓂᐊᖅᐸᖕᓂᖏᓐᓂ, ᐃᒻᒥᓃᕐᓂᒃᑯᑦ ᐅᓄᕐᓂᖏᑎᒍᑦ. ᐊᒻᒪ ᖃᐅᔨᒪᕗᒍᑦ ᐋᔩᖃᑎᒌᖕᓂᕐᒧᑦ ᐊᐃᑉᐸᕇᖕᓂᒃᑯᑦ ᖃᓄᑎᒋ ᖃᓄᐃᕐᔪᐊᕐᓂᐅᔪᑦ ᐃᓚᒌᑦ ᐊᑐᕐᓂᖏᓐᓂ,” ᐅᖃᓚᐅᖅᐳᖅ ᑲᒡᒋᐊᕘᑦ ᓛᑯᓗᒃ ᐅᐃᓕᐊᒻᓴᓐ ᐹᑐᕇ, ᐊᑐᐃᓐᓇᖃᖅᑎᑦᑎᓚᐅᖅᑐᒥ ᐃᓕᓐᓂᐊᕐᓂᐅᔪᒥ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖕᒧᑦ ᓄᕕᐱᕆᐅᑉ−ᕿᑎᖅᐸᓯᐊᓂ.
“ᐱᓕᕆᕝᕕᖃᕐᓂᕐᒧᑦ ᐊᒻᒪ ᐊᑦᑕᓇᙱᑦᑐᓂ ᐃᓂᐅᔪᓂ ᐃᓄᖕᓂᑦ ᐃᒻᒥᖕᓂᒃ ᐅᖃᐅᓯᕆᔪᓐᓇᕐᓂᖏᓐᓄᑦ ᐱᐅᓂᐅᔪᒥ ᐊᒻᒪ ᐃᒻᒥᒃᑯᑦ ᐱᓕᕆᓂᐅᔪᒥ ᑲᑎᙵᓂᐅᔪᒥ … ᐱᒻᒪᕆᐅᕐᔪᐊᖅᐳᖅ.”
ᐃᓕᓐᓂᐊᕐᓂᖅ ᑐᕌᖓᕗᖅ ᐃᓅᓱᒃᑐᓄᑦ, ᑐᕌᖓᓗᐊᖅᖢᓂ ᐃᓄᖕᓄᑦ ᐃᓅᓱᒃᑐᓄᑦ, ᑭᓯᐊᓂᑦᑕᐅᖅ ᐊᓯᖏᓐᓂ ᓄᓇᕗᒻᒥᐅᓄᑦ ᒪᒃᑯᒃᑐᓄᑦ.
“ᑐᓂᓯᓂᐅᕗᖅ ᐃᓕᖅᑯᓯᑎᒍᑦ ᖃᓄᐃᙱᑦᑎᐊᖅᑐᒥ ᐊᕙᑎᐅᔪᒥ ᐊᑦᑕᓇᙱᑦᑐᒥ ᐊᒻᒪ ᒪᑐᐃᖓᔪᒥ ᒪᒃᑯᒃᑐᓄᑦ ᓄᓇᕗᒻᒥᐅᓄᑦ ᐃᓕᑦᑎᓂᖏᓐᓂ ᖃᓄᐃᙱᐊᑦᑎᐊᖅᑐᒥ ᑕᑯᒃᓴᐅᑎᑦᑎᓂᐅᔪᒥ ᑭᓇᐅᓂᖏᓐᓂ, ᐊᐃᑉᐸᕇᖕᓂᕐᒧᑦ ᐊᒻᒪ ᐱᖃᑎᖃᕐᓂᐅᔪᓂᑦ,” ᐅᖃᓚᐅᖅᐳᖅ ᐅᐃᓕᐊᒻᓴᓐ ᐹᑐᕇ.
“ᑲᑎᙵᓂᐅᕗᖅ ᐅᕙᑦᑎᓐᓂ ᐊᑐᕐᓂᕐᒥ ᖁᙱᐊᖅᑕᐅᓂᐅᔪᒥ ᓴᓇᐅᒐᓕᕆᓂᕐᒥ ᐱᓕᕆᔾᔪᑕᐅᓪᓗᓂ ᐅᑯᓄᖓ ᑕᑯᒃᓴᐅᑎᑦᑎᓂᐅᔪᓂ, ᐊᒻᒪᓗᑦᑕᐅᖅ ᖃᐅᔨᓴᕐᓂᕐᒧᑦ, ᓴᖅᑭᑎᑦᑎᔪᓐᓇᕐᓂᕐᒧᑦ ᐱᕈᖅᓴᐃᓂᐅᔪᓂ ᑲᑎᙵᓂᐅᔪᓄᑦ ᒪᒃᑯᒃᑐᓄᑦ ᐃᑲᔪᖅᓯᖅᑕᐅᓂᖏᓐᓄᑦ.”
ᐃᓕᓐᓂᐊᕐᓂᐅᔪᑦ ᐅᓪᓗᕐᒧᑦ ᐊᑕᐅᓯᑐᐊᖑᒐᓗᐊᖅᑎᓪᓗᒍ, ᐅᐃᓕᐊᒻᓴᓐ ᐹᑐᕇ ᐅᖃᓚᐅᖅᐳᖅ ᑲᒪᓇᕋᔭᖅᐳᖅ ᓴᖑᑎᑕᐅᓗᓂ ᐊᕐᕌᒍᓕᒫᒧᑦ ᐃᓕᓐᓂᐊᕐᕕᐊᕈᓯᐅᓗᓂ.
“ᒪᒃᑯᒃᑐᓄᑦ ᖁᙱᐊᖅᑕᐅᓂᐅᔪᓄᑦ ᐱᕙᓪᓕᐊᑎᑕᐅᔪᓐᓇᖅᐳᑦ ᑕᑯᒃᓴᐅᑎᑦᑎᓂᑐᐃᓐᓇᐅᙱᑦᑐᒥ ᐅᓪᓘᑉ ᐃᓱᖓᓐᓂ. ᐊᑐᕈᓐᓇᖁᓪᓗᒋᑦ ᖁᙱᐊᖅᑕᐅᓂᐅᔪᒥ ᓴᓇᐅᒐᓕᕆᓂᕐᒥ ᕿᒥᕐᕈᓇᕐᓂᕐᒧᑦ ᐊᒥᓱᒻᒪᕆᐊᓗᖕᓂ ᐊᔾᔨᒌᙱᑦᑐᓂ ᐅᖃᐅᓯᐅᓂᐅᔪᓂ ᐱᐅᔪᒻᒪᕆᐅᓇᔭᖅᐳᖅ,” ᐅᖃᓚᐅᖅᐳᖅ.
“ᑭᓯᐊᓂ ᐅᓪᓗᖅ ᐊᑕᐅᓯᑐᐊᖅ ᐱᒻᒪᕆᐅᕐᔪᐊᖅᐳᖅ. ᖃᓄᐃᑉᐸᓚᐅᖅᓯᒪᓂᑦᑎᓐᓂ ᑕᐃᔅᓱᒪᓂᒃᑲᓐᓂᖅ, ᐃᖅᑲᐅᒪᓲᖑᕗᑦ ᐊᒥᐊᒃᑯᖓᓂ ᖁᑦᑎᒃᑐᒥ−ᐃᓕᓐᓂᐊᕐᕕᖕᒥ ᐊᕐᕌᒎᔪᓄᑦ.”
ᐅᐃᓕᐊᒻᓴᓐ ᐹᑐᕇ ᑕᑯᓯᒪᕗᖅ ᐊᓯᔾᔨᕐᓂᐅᔪᒥ ᐱᐅᓂᖅᓴᒧᑦ ᒪᒃᑯᒃᑐᓂ.
“ᐊᒻᒪ ᑕᑯᑐᐃᓐᓇᓲᕆᙱᑉᐸᕋ, ᑭᓯᐊᓂ ᑭᖑᓂᐊᒍᑦ ᐊᒥᓱᐃᑦ ᓄᑕᖅᑲᐃᑦ ᐅᖃᕐᓂᐊᖅᐳᑦ, ‘ᐅᐊᑲᓪᓚᖔ, ᐃᓱᒪᒋᓚᐅᖅᓯᒪᙱᑦᑎᐊᖅᑕᒃᑲ ᐅᑯᓂᖓ ᓯᕗᓂᐊᓂ, ᐃᒪᓐᓇ ᐱᓕᕆᓂᐅᔪᑎᒍᑦ. ᒪᑐᐃᖓᓂᖅᓴᐅᔫᔮᖅᐳᖓ ᐊᒻᒪ ᐊᑦᑕᓇᙱᑦᑐᒦᖦᖢᖓ.’ ᐱᓕᕆᓂᖃᖅᐳᖅ ᑖᒃᑯᐊ ᐃᒻᒥᖕᓂᒃ ᐅᖃᐅᓯᖃᖅᖢᑎᒃ ᐱᓕᕆᓂᐅᔪᒥ ᑐᓴᖅᑕᐅᓂᖏᓐᓂ ᐊᒻᒪ ᐱᓐᓇᕆᔭᐅᓪᓗᑎᒃ. ᐊᓱᐃᓛᒃ ᐱᓕᕆᓂᖃᖅᐳᖅ ᐃᓕᑦᑎᓪᓗᑎᒃ ᐊᐃᑉᐸᖃᕐᓂᕐᒧᑦ ᖃᐅᔨᒪᓚᐅᙱᑕᒥᓂᑦ ᓯᕗᓂᐊᓂ,” ᐅᖃᓚᐅᖅᐳᖅ.
ᑕᒪᓐᓇ ᐃᓚᖃᖅᐳᖅ ᐅᖃᐅᓯᖃᕐᓂᕐᒥ ᐊᑦᑕᓇᙱᑦᑐᒥ ᑯᔭᖕᓂᕐᒥ ᐊᒻᒪ ᐅᓲᑉ ᐴᖓᓂ ᐊᑐᕐᓂᕐᒧᑦ.
ᐊᒻᒪ ᐃᒡᓚᕐᓂᖃᖅᐳᖅ ᐊᒻᒪ ᐃᔪᕆᕈᓘᔭᕐᓂᕐᒥ.
ᐃᓕᓐᓂᐊᕐᓂᖅ ᐱᒋᐊᓚᐅᖅᑳᕋᓂ, ᒪᒃᑯᒃᑐᑦ ᑕᑕᑎᕆᓲᖑᕗᑦ ᐊᐱᖅᑯᑎᐅᔪᒥ ᖃᐅᔨᒪᓂᖏᓐᓂ ᐊᐃᑉᐸᕇᖕᓂᕐᒧᑦ, ᐱᖃᑎᒌᖕᓂᕐᒧᑦ, ᐊᒻᒪ ᓇᒦᓐᓂᖏᓐᓂ ᐃᓱᒪᒥᑎᒍᑦ. ᖁᙱᐊᖅᑕᐅᓂᕐᒧᑦ ᐱᙳᐊᕐᓂᐅᔪᑦ ᐊᓱᐃᓛᒃ ᑐᓂᓯᓲᖑᕗᖅ ᐱᕕᒃᓴᖃᕐᓂᐅᔪᒥ ᒪᑐᐃᖓᓂᕐᒧᑦ ᐊᒻᒪ ᐃᔪᕐᓇᕈᓘᔭᕐᓗᑎᒃ.
“ᐱᙳᐊᕐᓂᖃᓚᐅᖅᐳᒍ ᑲᑎᙵᓂᐅᔪᑦ ᓇᓂᓯᔭᕆᐊᖃᖅᖢᑎᒃ ᑎᓴᒪᓂᒃ ᑭᓱᑐᐃᓐᓇᓂᑦ ᐊᔾᔨᒌᖕᓂᕆᔭᖏᓐᓂᑦ, ᐊᓱᐊᓛᒃ ᑕᒪᕐᒥᒃ ᓂᕈᐊᖅᖢᑎᒃ ᑭᒃᑯᑦ ᑲᑎᙵᓂᐅᔪᓂ ᓱᖏᐅᓐᓇᙱᓛᖑᓂᖏᓐᓂ. ᑕᐃᒪᓐᓇᒐᓚᒃ, ᐊᔭᐅᕆᓂᕐᒧᑦ ᒪᒃᑯᒃᑐᓂ ᖃᐅᔨᒪᑎᑕᐅᓂᕐᒧᑦ ᑕᒪᑦᑕ ᐊᔾᔨᐅᙱᑦᑐᐃᓐᓇᐅᓂᑦᑎᓐᓂ ᐊᒻᒪ ᓱᖏᐅᓐᓇᙱᑦᑐᐃᓐᓇᐅᓂᑦᑎᓐᓂ ᖁᕕᐊᓇᖅᑐᒥ ᐱᓕᕆᓂᐅᔪᒥ,” ᐅᖃᓚᐅᖅᐳᖅ ᐅᐃᓕᐊᒻᓴᓐ ᐹᑐᕇ.
ᐃᓄᐃᑦ ᐅᓂᒃᑳᖅᑐᐊᖏᑦ ᐃᓚᓕᐅᔾᔭᐅᓲᖑᕗᖅ.
“ᑕᐃᑲᙵᑦ ᐃᓕᓐᓂᐊᕐᓂᖃᓲᖑᕗᒍᑦ ᑲᓛᖦᖠᐅᑉ ᓄᓈᓐᓂ ᑮᓇᑉᐸᒃᓯᒪᔪᓄᑦ ᒧᒥᕐᓂᕐᒥ, ᐱᔾᔪᑎᖃᖅᑐᒥ ᒪᑐᐃᖓᓂᐅᓂᕐᒥ, ᕿᒥᕐᕈᓇᖕᓂᕐᒥ ᐊᐃᑉᐸᖃᕐᓂᐅᔪᒥ, ᐃᔪᕐᓇᕐᓂᕐᒥ, ᑲᑉᐱᐊᓱᖕᓂᕐᒥ ᐊᒻᒪ ᐱᐅᓱᒋᙱᓐᓂᐅᔪᒥ. ᒪᒃᑯᒃᑐᑦ ᐃᓕᓯᕗᑦ ᐊᒥᐊᕈᑎᓂᑦ ᐊᒻᒪ ᓇᒧᙵᐅᕈᓘᔭᖅᑎᖦᖢᒋᑦ ᐃᓕᓐᓂᐊᕐᕕᖕᒥ,” ᐅᖃᓚᐅᖅᐳᖅ ᐅᐃᓕᐊᒻᓴᓐ ᐹᑐᕇ.
“ᑭᐅᓂᐊᒍᑦ, ᑐᓂᓪᓗᒋᑦ ᑲᒪᒋᔭᖃᕐᓂᐅᔪᒥ ᒪᒃᑯᒃᑐᓄᑦ ᐊᒻᒪ ᖁᙱᐊᖅᑕᐅᔪᒃᓴᓕᐅᖅᖢᑎᒃ ᖃᓄᑐᐃᓐᓇᑦᑎᐊᖅ. ᐱᙳᐊᕐᓂᐅᔪᓐᓇᖅᐳᖅ, ᑕᐃᒧᖔᕈᓯᕐᒥ – ᑎᑎᕋᐅᔭᕈᓐᓇᖅᑐᓪᓘᓐᓃᑦ ᑳᑑᓐ−ᖑᐊᓂ – ᒪᒃᑯᒃᑐᓄᑦ ᐊᐃᑉᐸᖃᕐᓂᕐᒧᑦ ᐊᒻᒪ ᐱᖃᑎᖃᕐᓂᕐᒧᑦ ᐱᕈᖅᓴᐃᓂᐅᔪᒥ.”
ᐅᐃᓕᐊᒻᓴᓐ ᐹᑐᕇ ᐅᖃᓚᐅᖅᐳᖅ ᐊᑯᓂᐅᔪᒥ ᐱᕙᓪᓕᐊᑎᑦᑎᓂᖃᓲᖑᕗᖅ ᐅᒃᐱᕆᔭᖃᕐᓂᕐᒥ ᐊᒻᒪ ᒪᑐᐃᖓᓂᐅᔪᒥ.
“ᑕᒪᓐᓇ ᐱᒻᒪᕆᐅᕗᖅ ᐃᓱᐊᓂ ᓴᖅᑭᑎᑕᒥᓂᑦ ᑲᒪᓇᕐᔪᐊᓲᖑᖕᒪᑕ. ᑲᒪᓇᐃᓐᓇᐅᔭᖅᑐᖅ, ᐅᖃᓚᐅᖅᐳᖅ.
ᐃᓕᓐᓂᐊᕐᓂᐅᔪᖅ ᐊᑐᐃᓐᓇᐅᑎᑕᐅᓯᒪᒋᕗᕈᖅ ᐃᓄᒃᓱᐃᑦ ᐅᓕᓐᓂᐊᕐᕕᖓᓂ ᕿᑭᖅᑕᕐᔪᐊᒥ, ᐃᓕᓐᓂᐊᕐᕕᓄᑦ ᐊᕐᕕᐊᓂᑦ, ᐃᖃᓗᒃᑑᑦᑎᐊᕐᒥ ᐊᒻᒪ ᓄᓇᑦᓯᐊᕗᒻᒥᐅᑦ ᐅᖃᐅᓯᖃᖅᓯᒪᕗᑦ ᐱᖃᑕᐅᔪᒪᓂᖏᓐᓂ ᐃᓕᓐᓂᐊᕐᓂᐅᔪᒥ, ᐅᖃᓚᐅᖅᐳᖅ ᐅᐃᓕᐊᒻᓴᓐ ᐹᑐᕇ.
“ᑭᓯᐊᓂ ᐱᐅᔪᒻᒪᕆᐅᔪᖅ ᐱᓕᕆᓯᒪᖕᒥᒐᑦᑕ ᐱᓕᒻᒪᒃᓴᐃᓂᕐᒥ−ᐱᓕᒻᒪᒃᓴᐃᔨᐅᔪᒥ ᐱᓕᕆᐊᖑᔪᓂ, ᑕᐃᒫᒃ ᒪᒃᑯᒃᑐᓂ ᐃᓄᖕᓂ ᐱᓕᕆᓲᖑᔪᓂ ᑲᒡᒋᐊᕘᒥ ᒫᓐᓇ, ᐊᒻᒪ ᐊᓯᖏᓐᓂ ᐃᓂᐅᔪᓂᑦ, ᐱᓕᕆᔾᔪᑎᒃᓴᖃᖅᑐᓄᑦ ᐃᓕᓐᓂᐊᖅᑎᑦᑎᔪᓐᓇᕐᒥᔪᓂᑦᑕᐅᖅ (ᐃᓕᓐᓂᐊᕐᓂᐅᔪᒥ),”ᐅᖃᓚᐅᖅᐳᖅ.
ᐃᓕᓐᓂᐊᕐᕖᑦ ᐱᔪᒪᔪᓂ ᑐᓂᓯᓂᕐᒥ ᑎᒥᒐ, ᐃᑯᒪᔪᖅ ᐃᓕᓐᓂᐊᕐᓂᐅᔪᒥ ᐃᓕᓐᓂᐊᖅᑎᖏᓐᓄᑦ ᖃᐅᔨᒋᐊᕈᓐᓇᖅᐳᑦ ᑲᒡᒋᐊᕘᒧᑦ ᐅᕝᕙᓘᓐᓃᑦ ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᕐᕕᖕᒥ ᐃᖃᓗᖕᓂ.

Leave a Comment: