ᖁᕐᓗᖅᑐᒥ ᐊᑲᐅᓂᖅᓴᐅᓕᖅᑎᑦᑎᔪᖅ ᒪᒃᑯᒃᑐᓄᑦ

1048

ᑉᕆᔅᑕᓐ ᑲᐸᑲᑐᐊᖅ ᑕᒪᑐᒪᓂ ᐅᑭᐅᑦᑎᓐᓂ ᐱᓕᕆᔭᒃᓴᖃᓗᐊᖅᑕᐃᓕᒪᓕᖅᑐᖅ ᐊᒃᓱᕉᑎᖃᕈᒪᒧᑦ ᐃᓕᓴᐅᑎᒥᓂᒃ.

ᑉᕆᔅᑕᓐ ᑲᐸᑲᑐᐊᖅ ᖁᕐᓗᖅᑐᒥᐅᖅ ᒪᒃᑯᒃᑐᖅ ᑲᑎᒪᔨᐅᖃᑕᐅᔪᖅ ᓄᓇᓕᖓᓂ, ᐊᐅᔭᐅᓕᕌᖓᓪᓗ ᑕᖕᒪᖅᓯᒪᕕᖕᒥ ᐃᑲᔪᖃᑦᑕᖅᖢᓂ, ᑲᑎᒪᔨᐅᖃᑕᐅᖕᒪᑦ ᓄᓇᕗᒥ ᐱᖑᐊᖅᑐᓕᕆᔨᒃᑯᓐᓂ ᒥᕐᖑᐃᖅᓯᕕᓕᕆᔨᒃᑯᓐᓂᓗ ᑲᑐᔾᔨᖃᑎᒌᖓᓐᓂ ᐊᒻᒪᓗ ᐃᓕᓴᖅᑎᐅᓪᓗᓂ ᒍᕇᑦ 12-ᒥ ᐃᓐᓇᕈᕈᓂ ᕿᓚᓈᕆᔭᖃᖅᑐᖅ ᐃᓕᓵᓂᒃᑯᓂ ᐅᐊᔭᓕᕆᔨᐅᓂᕐᒥᒃ ᐃᖅᑲᓇᐃᔭᖅᑖᕈᒪᔪᖅ.

ᑐᕌᒐᖃᖅᑐᖅ ᐃᓕᓵᓂᒃᑯᓂ ᖁᕐᓗᖅᑐᕐᒥᑦ ᑐᖓᓕᖓᓂ ᐃᓕᓴᕐᕕᐊᓂᑦ ᐊᕐᕌᒍᓂᐊᖅᑐᖅ, ᑕᒪᑐᒪᓂ ᐃᓕᓴᐅᑎᓂ ᓯᕗᓪᓕᐅᑎᑕᖏᑦ ᐊᓯᖏᓐᓂᑦ ᐱᓕᕆᐊᒥᓂᑦ, ᑭᓯᐊᓂᓕ ᐊᐅᔭᖅ ᐊᒃᓱᐊᓗᒃ ᐱᔭᒃᓴᖃᓚᐅᖅᑐᖅ.

ᑖᓐᓇ 17-ᓂᒃ ᐅᑭᐅᓕᒃ ᐊᐅᓚᖅᓯᒪᓚᐅᕐᒪᑦ ᕗᐃᓂᐲᒃᒧᑦ ᐃᓚᐅᓪᓗᓂ ᓄᓇᕗᒥᐅᑦ ᐱᖑᐊᖅᑎᖏᓐᓄᑦ ᐊᑭᓕᖅᓱᖅᑕᐅᖏᓱᓂ ᐱᔨᑦᓯᕋᖅᑎᐅᓪᓗᓂ ᐊᒻᒪᓗ ᒪᒃᑯᒃᑐᓄᑦ ᓄᓇᕗᒥ ᑭᒡᒐᖅᑐᖅᑎᐅᓪᓗᓂ ᑲᓇᑕᒥ ᐱᖑᐊᕕᒃᔪᐊᖅᑎᓪᓗᒋᑦ ᔪᓚᐃ ᐃᓱᓕᓕᖅᑎᓪᓗᒍ ᐊᒻᒪᓗ ᐋᒋᓯ ᐱᒋᐊᓕᖅᑎᓪᓗᒍ. ᒪᒃᑯᒃᑐᓄᑦ ᑭᒡᒐᖅᑐᖅᑎᐅᓪᓗᓂ, ᓄᓇᕗᒥ ᐱᖑᐊᖅᑎᓂᒃ ᑐᓴᐅᒪᑎᑦᑎᔨᐅᖃᑦᑕᕐᒪᑦ ᐃᑲᔪᖅᑎᖏᓐᓄᓪᓗ ᑲᓇᑕᓕᒫᒥ ᐱᕙᓪᓕᐊᑎᑕᐅᔪᓂᒃ ᐊᔾᔨᒌᖏᑦᑐᓂ ᐱᖅᑯᓯᓕᖕᓄᑦ ᓄᓇᕗᒥ.

“ᐊᒃᓱᐊᓗᒃ ᖁᕕᐊᓇᖅᑐᖅ ᑐᓴᕌᖓᒥᒃ ᖃᓄᐃᓕᐅᖅᐸᓐᓂᕐᓂᑦᑎᓐᓂᒃ ᓄᓇᕗᒥ. ᑕᐃᒪᓐᓇ ᐃᓱᒪᖃᑦᑕᖏᒻᒪᑕ ᓄᓇᕗ ᐊᐅᔭᐅᓕᕌᖓᑦ ᐅᖅᑰᖃᑦᑕᕐᓂᖓᓂᒃ,” ᐅᖃᕆᓪᓗᓂ, ᐃᒫᖓᐃ, ᐃᓚᓕᐅᑎᓪᓗᓂᐅᒃ ᐅᑭᐅᒃᑯᑦ -30-ᒧᑦ ᑎᑭᓚᐅᓲᖅ ᖁᕐᓗᖅᑐᒥ ᑕᖅᑭᐅᕋᑖᖅᑐᓂ ᐅᖅᑰᑲᐃᓐᓇᕐᒪᑦ.

ᑲᐸᑲᑐᐊᖅ ᓂᕈᐊᖅᑕᐅᓚᐅᕐᒥᔪᖅ ᑎᒍᒥᐊᖅᑎᐅᓂᐊᕐᒪᑦ ᓄᓇᕗᒥᐅᑦ ᓴᐃᒻᒪᖅᑯᑎᖓᓂᒃ ᓯᕗᓪᓕᐅᓗᓂ ᐱᓱᓕᖅᐸᑕ ᐱᖑᐊᕕᒃᔪᐊᖓᑦ ᒪᑐᐃᓕᖅᑎᓪᓗᒍ, ᒪᑐᓕᖅᑎᓪᓗᒍᓗ, ᐊᒃᓱᐊᓗᒃ ᑕᒪᓐᓇ ᐱᒃᑯᒥᒋᓚᐅᖅᑕᖓ ᓂᕈᐊᖅᑕᐅᔪᓯᒋᔭᓂ.

“ᑕᓐᓇ ᐊᒃᓱᐊᓗᒃ ᐱᐅᓂᖅᐹᖑᓚᐅᖅᑐᖅ ᐊᑐᖅᑕᓐᓂ ᑖᕙᓂ ᐊᐅᓪᓚᖅᓯᒪᓂᓐᓂ,” ᐅᖃᕆᓪᓗᓂ. “ᖁᖓᐃᓐᓇᓕᓚᐅᖅᑐᖓ ᐅᔾᔨᕆᖏᒃᑲᓗᐊᖅᖢᖓ, ᐊᒃᓱᐊᓗᒃ ᖁᕕᐊᓱᓗᐊᒧᑦ ᓄᓇᕗᒥᐅᑦ ᓴᐃᒻᒪᖅᑯᑎᐊᓂᒃ ᐊᒡᔭᖅᓯᔨᐅᓪᓗᖓ. ᐊᒥᓱᑦ ᐃᓅᓯᕐᒥᓂ ᑕᐃᒪᓐᓇ ᐱᓚᐅᖅᓯᒪᖏᒻᒪᑕ. ᐊᒃᓱᐊᓗᒃ ᑐᓱᒋᔭᓐᓂᒃ ᐊᑐᓚᐅᖅᑐᖓ.”

ᑲᐸᑲᑐᐊᕐᓕ ᑖᕙᓂ ᐱᖑᐊᖅᑎᐅᖃᑕᐅᓚᐅᖏᑦᑑᒐᓗᐊᖅ ᑲᓇᑕᒥ ᐱᖑᐊᕕᒃᔪᐊᖅᑐᓂ, ᑭᓯᐊᓂᓕ ᑕᒪᐃᓐᓂ ᐱᖑᐊᕈᓯᕐᓂ ᓄᓇᓕᖓᓂ ᐃᓚᐅᔪᖅ ᐊᖅᓴᖅᑎᓂ ᓵᑯᒥᒃ ᐊᒻᒪᓗ ᕼᐊᕿᖅᑎᓂ. ᒪᒃᑯᒃᑑᓪᓗᓂ ᓄᓇᓕᖓᑕ ᑲᑎᒪᔨᖏᓐᓂ ᐃᓚᐅᖕᒥᔪᖅ ᐊᒻᒪᓗ ᓄᓇᕗᒥ ᐱᖑᐊᖅᑐᓕᕆᔨᒃᑯᑦ ᒥᕐᖑᐃᖅᓯᕕᓕᕆᔨᒃᑯᓪᓗ ᑲᑐᔾᔨᖃᑎᒌᖓᓐᓂ ᐃᓚᐅᒋᓪᓗᓂ, ᑭᒡᒐᖅᑐᖅᑎᐅᓪᓗᓂ ᒪᒃᑯᒃᑐᓄᑦ ᐱᖑᐊᕈᓰᑦ ᐱᑕᖃᕐᓂᖅᓴᐅᓕᖁᓪᓗᒋᑦ ᓄᓇᓕᖕᓂ. ᐊᒻᒪᓗ ᓄᓇᕗᒥ ᐸᐃᑕᒃᑏᑦ ᐱᒋᐊᖅᑎᑦᑐᒪᔭᖏᑦ ᓄᓇᓕᖓᓂ ᑖᒃᑯᐊ ᐱᖑᐊᕈᓯᖏᓐᓂᒃ ᐱᒃᑯᒥᒍᓱᒃᑲᒥ.

“ᐆᒃᑐᕋᕈᒪᔪᖓ ᑕᐃᒪᓐᓇ ᓄᓇᓕᕗᑦ ᐱᒃᑯᒥᓇᕐᓂᖅᓴᐅᓕᕐᓂᐊᕐᒪᑦ ᒪᒃᑯᒃᑐᓄᑦ ᐊᖏᕐᕋᕆᔭᐅᒋᐊᒃᓴᖅ – ᐅᓄᕐᓂᖅᓴᓂᒃ ᐱᖑᐊᕈᓯᕐᓂᒃ ᐱᓕᕆᐊᓂᒃᓗ ᒪᒃᑯᑦᑐᓄᑦ ᐊᔪᐃᓐᓇᖅᑐᖓ ᑕᒪᐃᓐᓂ ᑲᑎᒪᕕᓂ ᑎᒥᖁᑎᒋᔭᐅᔪᓂᓗ,” ᐅᓂᒃᑳᕆᓪᓗᓂ, ᐅᖃᕆᓪᓗᓂ ᐊᕐᓇᐃᑦ ᒪᒃᑯᒃᑐᑦ ᑕᐃᓱᒪᓂ ᐊᓐᓄᕌᕆᔭᐅᕙᔪᔪᓂᒃ ᒥᖅᓱᕆᐅᓴᖅᑕᐅᓚᐅᕐᒥᔪᑦ ᑕᒪᓐᓇ ᐊᒃᓱᕉᑎᒋᓚᐅᕋᒃᑯ ᐊᓱᐃᓛᒃ ᑲᔪᓯᑎᑕᐅᓚᐅᖅᐳᑦ ᐱᒋᐊᖓᕐᕕᐊᓂᑦ ᐃᑲᔪᓚᐅᕋᒪ.

ᐊᒻᒪᓗᑦᑕᐅᖅ ᑕᒪᒃᑯᓇᓂ ᐃᓚᐅᖕᒥᔪᖅ, ᑲᐸᑲᑐᐊᖅ ᐃᑲᔪᖅᑎᐅᓚᐅᕐᓂᕐᒪᑦ ᐊᐅᔭᖅ ᑕᖕᒫᖅᓯᒪᕕᐅᔪᒥ ᓄᓇᓕᖓᑕ ᓯᓚᑎᑦᑎᐊᖓᓂ ᖁᕐᓗᖅᑐᒥ ᑕᒪᑐᒪᓂ ᑭᖑᓂᕆᓕᖅᑕᖓ ᐊᐅᔭᒥ ᑕᖕᒫᖅᓯᒪᑎᑦᑎᓪᓗᑎᒃ.

ᐊᐅᔭᖅ ᑕᒪᓐᓇ ᐳᐃᒍᔮᖏᑕᕋ, ᒍᕇᑦ 12-ᒦᓕᖅᑐᖅ ᐃᓕᓴᖅᑎ ᑕᐃᒪᓐᓇ ᐅᓂᒃᑳᓚᐅᖅᑐᖅ, ᑕᐃᑲᓂ ᐃᓕᓴᕐᕕᖕᒥ ᓴᓇᔨᐅᓂᕐᒥᒃ ᐃᓕᓴᖅᑐᖅ. ᐅᖃᖅᖢᓂ ᕿᓚᓈᕆᔭᒥᓂᒃ ᑕᐅᑐᖑᐊᖅᖢᓂ ᐃᖅᑲᓇᐃᔭᒻᒫᕐᒥ ᐃᓕᓴᕈᒪᔪᕉᖅ ᓴᓇᔨᒻᒪᕆᐅᓂᕐᒥᒃ ᓴᓇᔩᑦ ᐃᓕᓴᕐᕕᐊᓂ ᐃᓕᓴᕆᐊᕈᒪᔪᖅ.

ᖃᖓᑐᐃᓐᓇᖅ ᐱᕝᕕᒃᓴᖃᓕᕌᖓᒥ ᑕᒪᑐᒪᓂ ᑕᖅᑭᐅᓂᐊᖅᑐᓂ, ᑲᐸᑲᑐᐊᖅ ᐃᖏᕐᕋᑲᑕᖕᓂᐊᖅᑐᖅ ᓄᑖᒥᒃ ᖃᒧᑕᐅᔭᖃᓕᕋᒥ ᓄᓇᓕᖓᓂ.

“ᐊᒃᓱᐊᓗᒃ ᖁᕕᐊᒋᔭᕋ ᖃᒧᑕᐅᔭᕆᐊᒃᓴᖅ ᐅᑭᐅᒃᑯᑦ ᓇᒧᑐᐃᓐᓇᖅ,” ᐅᖃᕆᓪᓗᓂ.

ᓱᒃᑲᓕᓴᐅᑎᔪᓂᒎᖅ ᓯᕗᓪᓕᖅᐸᒥᒃ ᐃᓚᐅᓚᐅᕋᒥ ᐅᐱᕐᖔᖅ ᓱᒃᑲᓕᓴᐅᑎᑎᓪᓗᒋᑦ ᖃᒧᑕᐅᔭᒃᑯᑦ ᓄᓇᒥ ᓇᑦᑎᖅ ᕗᕌᓕᒃᔅᑎᓪᓗᒋᑦ ᐅᐱᕐᖔᖅᓯᐅᖅᖢᑎᒃ ᓄᓇᓕᖕᒥᐅᑦ ᐱᖑᐊᕕᒃᔪᐊᖃᑦᑕᕐᒪᑕ ᐃᐳᓗᒥ ᐊᒻᒪᓗ ᓱᒃᑲᓕᓴᐅᑎᔪᓂ ᐃᓚᐅᓪᓗᓂ ᖃᓄᐃᖏᑦᑎᐊᓚᐅᖅᑐᖅ ᑭᓯᐊᓂ ᐊᖅᑯᑎᐊᓂ ᖁᑦᑎᖕᓂᖅᓴᒥᒃ ᑐᓗᖅᓯᓐᓂᕋᒥ ᓱᒃᑲᓕᓴᐅᑎᑎᓪᓗᒋᑦ, ᖃᒧᑕᐅᔭᒥᓂᒃ ᓱᕋᐃᓐᓂᕐᒪᑦ ᑎᒍᒥᐊᕈᑎᖏᓐᓂᒃ ᓴᖑᑎᑦᑐᓐᓇᐃᓪᓕᓪᓗᓂᐅᒃ.

“ᑕᒪᐅᖓᑐᐃᓐᓇᖅ ᓄᖅᑲᕆᐊᖃᓕᓚᐅᖅᑐᖓ ᓱᒃᑲᓕᓴᐅᑎᔪᓂ ᐱᐊᓂᖏᑎᓪᓗᒋᑦ ᓱᓕ ᐊᔪᕐᓇᕐᒪᑦ ᐊᐃᑦᑖᖑᓚᐅᕋᓗᐊᖅᐳᖅ,” ᐅᖃᕆᓪᓗᓂ. “ᐃᓱᒪᒃᑯᑦ ᐊᐃᑦᑕᕈᓘᓚᐅᖅᑐᖅ.”

ᑭᓯᐊᓂᓕ ᓄᑖᒥᒃ ᖃᒧᑕᐅᔭᖃᓕᕐᒥᔪᖅ ᓱᓕ ᖃᐅᔨᒪᖏᑕᒥᓂᒃ ᐆᒃᑐᕆᐅᕐᓂᐊᖅᑕᖓ ᐅᑭᐅᖅ ᐊᐳᑎᓕᖅᐸᑦ.

“ᑕᐃᒪ ᓯᓚᒦᑲᑕᖕᓂᐊᓕᖅᐳᖓ ᓱᖏᐅᓴᕐᓗᖓ ᓄᑖᒥᒃ ᖃᒧᑕᐅᔭᓐᓂᒃ,” ᐅᖃᕆᓪᓗᓂ, ᐃᓚᐅᒃᑲᓐᓂᕐᓂᐊᕋᒥᒎᖅ ᑭᖑᓪᓕᕐᒥ ᓇᖅᑎᖅ ᕗᕌᓕᒃᔅᓕᖅᐸᑕ ᓄᓇᓕᖓᓂ ᐅᐱᕐᖔᖑᓂᐊᖅᑐᖅ.