ᔪᐊᑕᓐ ᑕᒃᑭᕉᑉ ᖃᓄᐃᓕᐅᕐᓂᖃᑦᑎᐊᖅᑐᒥ ᐊᐅᔭᖓᓂ

773

“ᑕᒪᕐᒥᒃ ᐅᓪᓗᐃᑦ ᑕᑖᖅᐳᑦ.”

ᑕᐃᒪᓐᓇ ᐅᖅᓱᖅᑑᕐᒥᐅᑕᖅ ᔪᐊᑕᓐ ᑕᒃᑭᕈᖅ ᐅᓂᒃᑳᕆᓚᐅᖅᐸᖓ ᖃᓄᐃᓐᓂᖃᑦᑎᐊᖅᑐᒥ ᐅᐸᒃᓯᒪᓂᖓᓂ SHAD-ᒥ, ᑕᖅᑭᓕᒫᒥ ᓇᒻᒥᓂᖃᕈᓐᓇᕐᓂᕐᒧᑦ ᐱᓕᕆᐊᖑᔪᒥ ᒪᐅᓐᑦ ᐋᓕᓴᓐ ᓯᓚᑦᑐᖅᓴᕐᕕᒡᔪᐊᕐᒧᐊᖅᑎᑦᑎᓚᐅᖅᑐᒥ ᓵᒃᕕᐅᓪ. ᓅ ᐳᕋᓐᔅᐅᐃᒃᒧᑦ ᔫᓂᒥ. ᐳᐃᔾᔪᕌᖅᖢᓂ ᐊᑦᓛᓐᑎᒃ ᐃᒪᖓᓂ; ᓇᓗᓇᐃᒃᑯᓯᖅᓯᓂᖅ ᐃᖃᓗᖕᓂ; ᓂᕆᓪᓗᓂ ᐳᔾᔪᑎᓂᑦ; ᓇᓗᓇᐃᖅᓯᓂᖅ ᕿᒥᕐᓗᖃᙱᑦᑐᓂᑦ; ᐆᒃᑑᖅᖢᓂ ᐃᖅᑲᑦᑕᕐᓂᕐᒧᑦ; ᐊᑕᐅᓯᕐᒥ ᐊᒃᓴᓗᐊᓕᖕᓂ ᐸᐃᓯᑰᕐᓂᖅ; ᓇᑉᐸᖅᑐᓕᐅᕐᓂᕐᒥᑦ; ᐃᓕᑦᑎᓂᕐᒥ ᐃᖃᓗᒃᐱᓂᑦ ᐅᓄᕐᓂᖏᓐᓂ, ᑕᕆᐅᑉ ᑭᒡᓕᖏᓐᓂ ᐊᒻᒪ ᑎᓂᓐᓂᕐᓂ ᐅᓕᓐᓂᕐᓂ; ᐅᓪᓗᕐᒥ ᐊᐅᓪᓛᕐᓂᐅᔪᓄᑦ ᕼᐆᑉᕕᐅᓪ, ᓅ ᐳᕋᓐᔅᐅᐃᒃᒧᑦ, ᕙᓐᑎ ᑲᓇᑕᒥ ᒥᕐᙳᐃᖅᓯᕐᕕᖓᓄᑦ ᐊᒻᒪ ᐳᕆᓐᔅᐃᐊᑦᕗᑦ ᕿᑭᖅᑕᖓᓄᑦ-ᐅᑯᐊ ᐃᓚᐃᓐᓇᖏᑦ ᐊᒥᓱᓂ ᐊᓕᐊᓇᐃᓐᓂᐅᔪᑦ ᑕᒃᑭᕈᖅ ᐊᑐᖅᓯᒪᔭᖏᓐᓂ. ᖃᔅᓯᒐᓚᖕᓂᑦᑕᐅᖅ ᐅᖃᓪᓚᖕᓂᖅᑕᖃᓚᐅᕐᒥᔪᖅ ᖃᐅᔨᓴᕈᑕᐅᔪᒥ ᓱᓇᑐᐃᓐᓇᓂ, ᐆᒻᒪᖅᑯᑎᓄᑦ, ᓴᙱᓂᖓᓂ ᐊᒻᒪ ᐃᖏᕐᕋᓂᐅᔪᒥ, ᐆᒪᔪᐃᑦ ᐃᓕᖅᑯᓯᖏᓐᓂ ᖃᐅᔨᓴᕐᓂᕐᒧᑦ, ᖃᐅᔨᓴᕐᓂᖅ ᓂᔾᔮᑎᑦᑎᓂᕐᒧᑦ ᐊᒻᒪ ᓇᖕᒥᓂᖃᕐᓂᕐᒧᑦ ᐃᒪᓐᓇᐃᓕᖓᔾᔪᑕᐅᔪᓄᑦ, ᐊᓯᖏᓐᓂᓪᓗ.

Jordan Takkiruq has spent most of July in Sackville, N.B. with SHAD, an entrepreneurial program. photo courtesy of Jordan Takkiruq

ᑕᒪᕐᒥᒐᓚᑦ ᐅᖃᐅᓯᐅᓂᐅᔪᓂ ᑲᒪᒋᕐᔪᐊᖅᓯᒪᕙᖏᑦ ᑐᑭᓕᐊᕐᓂᖃᕐᒪᑦ ᓯᕗᓂᒃᓴᖓᓄᑦ ᑐᕌᕐᕕᒋᔪᒪᓇᔭᖅᑕᖓᓄᑦ.

“ᐱᓇᓱᒍᒪᕗᖓ ᐃᖅᑲᓇᐃᔮᒥ ᖃᐅᔨᓴᕐᓂᐅᔪᒧᑦ, ᐱᓗᐊᖅᑐᒥ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒥᑦ,” ᐅᖃᓚᐅᖅᐳᖅ ᑕᒃᑭᕈᖅ, ᐊᕐᕌᒍᓕᒃ 17-ᓂ ᖁᑦᑎᖕᓂᓕᖕᒧᑦ 12-ᒧᐊᕐᓂᐊᓯᔪᒥ ᕿᕿᖅᑕᖅ ᐃᓕᕼᐊᒃᕕᖕᒧᑦ ᑕᒪᑐᒥᖓ ᐊᕐᕌᒎᔪᒥ.
ᐃᓚᖏᑦ ᖃᓄᐃᓕᐅᕈᑕᐅᔪᑦ, ᓲᕐᓗ ᐊᑕᐅᓯᕐᒥ ᐊᒃᓴᓗᐊᓕᖕᒥ ᐸᐃᓯᑰᕐᓂᕐᒥ ᐱᔪᒥᒋᓚᐅᙱᓚᖏᑦ, ᐃᓛᒃ ᓯᕗᓪᓕᐊᓂ, ᐅᖃᓚᐅᖅᐳᖅ.

“ᑖᒃᑯᐊ SHAD ᖁᕝᕙᖅᓴᐃᓪᓚᕆᓲᖑᕗᑦ – ᐊᓂᑎᑦᑎᓂᕐᒥ ᐃᓗᐊᕆᔭᒥ ᐃᓂᒋᔭᕐᓂᑦ,” ᐅᖃᓚᐅᖅᐳᖅ.

ᐃᓅᖃᑎᒌᖕᓂᐅᔪᖅ ᐊᔭᐅᕆᔭᐅᕐᔪᐊᕆᕗᖅ, ᐅᖃᓚᐅᖅᐳᖅ, ᐅᖃᐅᓯᕆᓪᓗᓂᒋᑦ 47-ᖑᔪᑦ ᐃᓚᒋᔭᖏᓐᓂ ᑐᔪᕐᒥᕕᐅᔪᒥ.

“ᐊᓕᐊᓇᐃᒋᑦᑎᐊᖅᓯᒪᔭᕋ. ᓇᑉᐸᓪᓗᐊᖓᓃᓕᖅᐳᒍᑦ ᐱᓕᕆᓂᐅᔪᒥ ᐊᒻᒪ ᖃᐅᔨᒪᕗᖓ ᓱᓕ ᐊᒥᓱᓂ ᐱᖃᓐᓇᕆᔭᓕᐅᕆᐊᖃᕐᓂᓐᓂ ᐊᒻᒪ ᑲᑎᙵᖃᑎᖃᕐᓂᐅᔪᓂ ᓴᓇᓂᕐᒧᑦ, ᑭᓯᐊᓂ ᖃᐅᔨᒪᕗᖓ ᑎᑭᐅᑎᓂᐊᕐᓂᓐᓂ,” ᐅᖃᓚᐅᖅᐳᖅ.

ᑕᒃᑭᕈᖅ SHAD-ᒥ ᐃᓚᐅᖃᑕᐅᔪᑑᕗᖅ ᓄᓇᕗᒻᒥ. ᖃᔅᓯᐊᕐᔪᖕᓂ ᐊᐱᕆᔭᐅᓯᒪᕗᖅ ᐃᒡᓗᕕᒐᕐᒥ ᓯᓂᖕᓂᐅᔪᒥ ᐊᒻᒪ ᕿᒧᒃᓯᒃᑰᕐᓂᕐᒧᑦ, ᑭᓯᐊᓂ ᐅᖃᓚᐅᖅᐳᖅ ᐃᓚᖏᑦ ᐃᓚᒋᔭᖏᑦ ᑐᓴᐅᒪᓯᒪᕗᑦ ᒫᓐᓇᐅᔪᓂ ᖃᓄᐃᓐᓂᐅᔪᓂ ᐊᒻᒪ ᒐᕙᒪᓕᕆᓂᕐᓄᑦ ᐅᑭᐅᖅᑕᖅᑐᒥ ᐊᒻᒪ ᐊᐱᖅᓱᓲᖑᕗᑦ ᓂᕿᐅᑉ ᐊᑭᖏᓐᓂ, ᐃᒡᓗᖃᕐᓂᐅᔪᓄᑦ ᐊᑲᐅᙱᓕᐅᕈᑕᐅᔪᓂ, ᐆᒻᒪᖅᑯᑎᓄᑦ ᐃᖏᕐᕋᓂᐅᔪᓄᑦ, ᐅᖃᐅᓯᕐᒥ ᐊᒻᒪ ᐃᓕᖅᑯᓯᖓᓐᓂ.

“ᓄᓇᓕᖕᒥᐅᑕᐅᓪᓗᖓ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐅᕙᓐᓂ ᖃᓄᖅ ᐊᒃᑐᐃᓯᒪᕙ, ᑕᒪᓐᓇ ᖃᐅᔨᒋᐊᖅᑎᑦᑎᒃᑲᓐᓂᕈᒪᓲᖑᕗᖓ ᐃᓄᖕᓂ,” ᐅᖃᓚᐅᖅᐳᖅ.

ᐃᐊᕆᓐ ᐸᓂ, ᐱᓕᕆᐊᖑᔪᒧᑦ ᑐᑭᒧᐊᒃᑎᑦᑎᔨ SHAD-ᑯᓐᓂ, ᐊᓕᐊᓇᐃᒍᓱᑦᑎᐊᖅᐳᖅ ᑕᒃᑭᕉᑉ ᐃᓚᐅᓂᖓᓂ ᐊᒻᒪ ᐃᓱᒪᒋᓯᒪᔭᖏᓐᓂ, ᐅᖃᐅᓯᕆᓪᓗᓂᐅᒃ ᐃᓕᓐᓂᐊᒃᑲᐅᓂᖓᓂ, ᐊᒃᓱᕈᕐᔪᐊᓲᖑᓂᖓᓂ ᐊᒻᒪ ᐃᓱᒪᑐᓪᓗᓂ.

“ᔪᐊᑕᓐ ᑭᓱᓕᒫᓂ ᐃᓚᓕᐅᔾᔨᓲᖑᕗᖅ ᑕᑯᔪᒪᔭᑦᑎᓐᓂ SHAD ᐃᓚᐅᖃᑕᐅᔪᓄᑦ. ᐊᒥᓱᐃᑦ ᐃᓕᓐᓂᐊᖅᑎᐅᔪᑦ ᖃᔅᓯᐊᕐᔪᖕᓂ ᐅᓪᓗᓂ ᓱᖏᐅᑎᓴᖕᓂᕐᒧᑦ ᐱᓕᕆᓂᐅᔪᒧᑦ ᐊᒻᒪ ᐊᒃᓱᕈᕐᓂᐅᔪᒥ ᐱᓕᕆᐊᖑᔪᒧᑦ, ᔪᐊᑕᓐ ᖁᕕᐊᓱᑦᑎᐊᖅᖢᓂ ᐃᓚᐅᖃᑕᐅᓯᑲᐅᑎᒋᓚᐅᖅᐳᖅ,” ᐅᖃᓚᐅᖅᐳᖅ ᐸᓂ. “(ᔪᐊᑕᓐ) ᑎᔅᓯᓈᕿᕈᓘᔭᓲᖑᕗᖅ. ᖁᕕᐊᕈᓘᔭᓲᖑᕗᖅ ᐊᒻᒪ ᐃᔪᕈᑎᖏᑦ ᐅᕙᑦᑎᓐᓂ ᖁᖓᔮᖅᑎᑦᑏᓐᓇᓲᖑᕗᑦ.”

ᑕᒃᑭᕈᖅ ᐃᓕᑦᑎᓚᐅᖅᐳᖅ SHAD-ᒥ ᐊᕐᕌᓂ ᐃᓚᐅᖃᑕᐅᑎᓪᓗᒍ ᑲᓇᑕᓕᒫᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᕆᔭᐃᓇᒥ. ᐱᕈᖅᑎᑦᑎᓇᓱᐊᕐᓂᕐᒧᑦ ᖃᔅᓯᒐᓚᖕᓂ ᑕᐅᓴᓐᓂ ᑮᓇᐅᔭᓂᑦ ᐃᓚᐅᖃᑕᐅᓂᕐᒧᑦ, ᓂᐅᕕᐊᒃᓴᖃᖃᑦᑕᓚᐅᖅᐳᖅ Rice Krispie squares, ᐃᒪᒐᒃᓴᓂ ᐊᒻᒪ ᐃᒥᒐᕐᓂ. ᐃᓚᒋᐊᖅᓯᓚᐅᕆᕗᖅ ᖁᔭᓕᑦᑎᐊᕐᓂᖓᓂ ᓇᖕᒥᓂᖃᖅᑎᐅᔪᓄᑦ ᑐᓐᓂᖅᑯᓯᐊᖃᓚᐅᖅᑐᓄᑦᑕᐅᖅ.

ᐱᓕᕆᐊᖑᔪᖅ ᐊᐅᓚᓂᖃᖅᐳᖅ ᐊᑭᓕᐅᑎᓄᑦ, ᒐᕙᒪᒃᑯᓐᓂ ᑐᓂᕐᕈᑎᓂᑦ ᐊᒻᒪ ᐃᓄᓕᒫᓄᑦ ᐊᒻᒪ ᑎᒥᐅᔪᓄᑦ ᑐᓐᓂᖅᑯᓯᐊᓂ. ᖃᐅᔨᔪᒪᔪᓄᑦ, SHAD ᓇᐃᒡᓕᒋᐊᖅᓯᒪᓂᐅᙱᓚᖅ ᐅᖃᐅᓯᕐᓂᑦ. ᐊᑦᑎᖅᑕᐅᓚᐅᖅᐳᖅ ᑰᕋᓛᒥ ᐊᕈᐊᕋ, ᐋᓐᑎᐊᕆᐅᒥ, ᐱᓕᕆᐊᖑᔪᖅ ᐱᒋᐊᓚᐅᕐᓂᖓᓂ 1980-ᒥ.

ᑕᒃᑭᕈᖅ ᐊᓕᐊᓇᐃᒋᓯᒪᕐᔪᐊᖅᐸᖓ ᐊᑐᕐᓂᑯᖏᓐᓂ ᓅ ᐳᕋᓐᔅᐅᐃᒃᒥ ᐸᕐᓇᒃᐳᖅ ᑐᑭᒧᐊᒃᑎᑦᑎᔨᒧᑦ ᐃᑲᔪᖅᑎᙳᓛᕈᒪᕗᖅ SHAD-ᑯᓐᓄᑦ ᓯᕗᓂᒃᓴᐅᔪᒥ.

“ᐊᓕᐊᓇᐃᒋᕐᔪᐊᖅᑕᕋ ᐱᓕᕆᓂᐅᔪᖅ,” ᐅᖃᓚᐅᖅᐳᖅ.