ᓴᖅᑭᑎᑦᑎᒃᑲᓐᓂᕐᓂᖅ ᐃᓄᐃᑦ ᓄᓇᒋᕙᓚᐅᖅᓯᒪᔭᖓᓐᓂ

144

ᖃᓂᒋᔭᖓᓂ 100-ᓂ ᐃᓄᖕᓂ ᐃᓚᐅᖃᑕᐅᓂᐊᖅᐳᑦ ᓴᖅᑭᑎᑦᑎᓂᕐᒥ ᐱᖅᑯᓯᑐᖃᖅᑎᒍᑦ ᐃᓄᐃᑦ ᓄᓇᒋᕙᓚᐅᖅᓯᒪᔭᖓᓐᓂ ᐃᒡᓗᓕᐅᑉ ᓯᓚᑎᑦᑎᐊᖓᓂ ᑕᖅᑭᐅᓂᐊᖅᑐᒥ.

ᐱᓕᕆᐊᒃᓴᐅᔪᖅ, ᐋᖅᑭᒃᓱᖅᑕᐅᓪᓗᓂ ᕼᐋᒻᓚᒃᑯᓐᓂ ᑮᓇᐅᔭᖃᖅᑎᑕᐅᓂᕐᒧᑦ ᐃᑲᔪᖅᓯᖅᑕᐅᓪᓗᓂ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓂᑦ, ᐃᓕᖅᑯᓯᕐᒥ ᐊᒻᒪ ᑮᓇᐅᔭᓕᐅᕈᑎᒃᓴᐅᔪᓂ ᐃᓚᖃᕐᓂᐊᖅᐳᖅ.

ᐃᓂᒋᔭᐅᔪᖅ – ᐃᓂᓕᒃ ᐃᒡᓗᓕᐅᑉ ᓄᕗᐊᓂ, ᖃᔅᓯᐊᕐᔪᖕᓂ ᑭᓛᒥᑑᔪᓂ ᓄᓇᓕᖕᓂ – ᑕᑯᒃᓴᐅᑎᑦᑎᓂᐊᖅᐳᖅ ᖃᔅᓯᒐᓚᖕᓂ ᐃᒡᓗᕕᒐᕐᓂ, ᐃᓚᖏᑦ ᖃᔅᓯᒐᓚᖕᓂ ᐃᒡᓗᖃᖅᑐᓄᑦ ᐊᔾᔨᒌᙱᑦᑐᓄᑦ ᐃᒡᓗᕈᓯᐅᔪᓄᑦ. ᐊᖏᓛᖑᔪᖅ ᐃᒡᓗᕕᒐᖅ ᐱᔨᑦᑎᕋᕐᓂᐊᖅᐳᖅ ᑐᔪᕐᒥᕕᒃᓴᐅᔪᒥ ᐱᓕᕆᐊᒥᓄᑦ ᐳᓚᕋᖅᑎᐅᔪᓄᑦ ᐃᒡᓗᓕᓕᐊᖅᑐᓄᑦ.

ᐃᓂᐅᓂᐊᖅᐳᖅ ᐅᐸᒃᑐᓄᑦ ᑕᑯᔪᓐᓇᕐᓂᐊᖅᑐᓂ ᐃᓕᖅᑯᓯᑎᒍᑦ ᖁᙱᐊᖅᑎᓂᑦ, ᐅᖃᓚᐅᖅᐳᖅ ᒨᕐᓕᓐ ᕆᓯᓄᔅ, ᐃᒡᓗᓕᐅᑉ ᐱᕙᓪᓕᐊᔪᓕᕆᔨᖓ.

ᐃᓄᑐᖃᐃᑦ ᐃᑲᔪᕐᓂᐊᖅᐳᑦ ᐊᔪᕆᖅᓱᐃᓂᕐᒥ ᒪᒃᑯᒃᑐᓂ ᐊᒻᒪ ᐃᓐᓇᕐᓂ ᓇᑉᐸᖅᑎᕆᓂᕐᓂ
ᐃᒡᓗᕕᒐᐅᔪᓂᑦ.

“ᓄᑕᖅᑲᑦ ᐃᓕᑦᑎᓂᐊᖅᐳᑦ ᑲᑕᔾᔭᕐᓂᕐᒥ ᐊᒻᒪ ᕿᓚᐅᔾᔭᕐᓂᕐᒥ ᐅᑎᖅᑎᕆᔪᓐᓇᕐᓂᐊᕋᑦᑕ ᖃᐅᔨᒪᓂᐅᔪᒥ ᐊᒻᒪ ᑖᒃᑯᓇᓂ ᐱᖅᑯᓯᑐᖃᐅᔪᓂᑦ. ᐊᑐᖅᑕᐅᓂᐊᖅᐳᖅ ᑕᑯᒃᓴᐅᑎᑦᑎᓂᕐᒥ ᐃᓕᖅᑯᓯᑦᑎᓐᓂ ᐊᒻᒪ ᐱᖅᑯᓯᑦᑎᓐᓂ ᐃᓄᖕᓄᑦ ᐃᓚᒋᔭᐅᖃᑕᐅᔪᒪᔪᓄᑦ,” ᕆᓯᓄᔅ ᐅᖃᓚᐅᖅᐳᖅ.