ᓯᕗᒻᒧᒃᐸᓪᓕᐊᓂᖅ ᐱᔾᔪᑎᖃᖅᐳᖅ ᐱᕙᓪᓕᐊᑦᓯᐊᕐᓂᕐᒥᒃ ᐊᒻᒪ ᖃᐅᔨᒪᑦᓯᐊᕐᓂᕐᒥᒃ ᐱᓕᕆᐊᕆᒍᒪᔭᒥᒃ ᐱᓕᕆᐊᖃᕐᓂᕐᒧᑦ ᐸᕐᓇᐅᑕᐅᓯᒪᔪᓂᒃ. ᐊᑕᐅᓯᐅᖏᑦᑐᒧᓪᓗ ᐱᓕᕆᐊᕆᔭᐅᓂᐊᕐᓗᓂ ᐊᒻᒪ/ᐅᕝᕙᓘᓐᓃᑦ ᐊᑕᐅᓯᐅᖏᑦᑐᒧᑦ ᑲᑐᔾᔨᖃᑎᒌᓄᑦ.

ᐃᓱᒪᓕᐅᕈᑎᒋᔭᐅᑦᓯᐊᖅᓯᒪᓗᓂᓗ ᐅᖃᐅᓯᕆᔭᐅᑦᓯᐊᖅᓯᒪᓗᓂᓗ ᓯᕗᒻᒧᒍᑕᐅᕙᓪᓕᐊᔪᓐᓇᖅᐳᖅ. ᓴᓐᖏᔪᒥᒃ ᐱᒋᐊᖅᑕᐅᓗᓂ ᖃᐅᔨᒪᔭᐅᑦᓯᐊᕐᓗᓂ ᑐᑭᓯᐅᒪᔭᐅᑦᓯᐊᕐᓗᓂᓗ ᐅᓂᒃᑳᖅᑕᐅᓯᒪᓗᓂ ᓱᖕᒪᑦ ᐊᖏᕈᑕᐅᒋᐊᖃᕐᓂᖓᓄᑦ ᐱᓕᕆᐊᕆᔭᐅᒋᐊᖃᕐᓂᖓᓄᓪᓗ. ᐊᓯᐊᒍᑦ ᐅᖃᐅᓯᕆᓗᒍ ᓯᕗᒻᒧᒃᐸᓪᓕᐊᓂᖅ, ᐃᒻᒥᓂᒃ ᐆᒃᑑᑎᖃᕈᓐᓇᖅᐳᖓ, ᐅᖃᐅᔾᔪᐃᓂᕐᒧᑦ ᖃᓄᐃᓕᐅᕈᑎᖃᓚᐅᕐᓂᓐᓄᑦ ᒪᒃᑯᒃᑐᒥᒃ ᐊᖑᑎᒥᒃ.

ᐅᖃᓪᓚᖃᑎᖃᕈᓐᓇᓚᐅᕋᒪ ᐊᖑᑎᒥᒃ ᒪᒃᑯᒃᑐᒥᒃ ᖃᓄᐃᓕᐅᖅᐸᓪᓕᐊᖏᓐᓂᕋᖅᖢᓂ ᐱᖃᓐᓈᓂᓗ. ᐅᖃᓚᐅᕐᒪᑦ “ᐊᒃᓱᕈᐃᓐᓇᖃᑦᑕᕋᒪ ᓲᕐᓗ ᒪᔪᕋᕆᐊᖃᖅᖢᖓ ᖃᖅᑲᒧᑦ ᐅᓪᓗᑕᒫᑦ”, ᑭᐅᑲᐅᑎᒋᓪᓗᒍ ᐱᐅᕗᖅ ᑕᒪᓐᓇ. ᑕᑯᒋᐊᖅᖢᓂᖓ ᑭᐅᓪᓗᓂᓗ. “ᓱᖕᒪᑦ ᐱᐅᓂᕋᖅᐱᐅᒃ?”

ᐱᐅᓂᖅᓴᐅᕗᖅ ᐊᑖᓃᖏᓐᓇᕕᑦ ᐊᒃᓱᓪᓘᓐᓃᑦ ᒪᔪᕋᖅᐸᓪᓕᐊᒐᕕᑦ ᓱᒃᑲᐃᒃᑲᓗᐊᖅᖢᑎᑦ.

ᐊᖏᖅᓯᒪᒋᐊᖃᖅᐳᒍᑦ ᖃᐅᔨᑎᑦᓯᓗᑕᓗ ᓯᕗᒻᒧᒃᐸᓪᓕᐊᓂᐊᕈᑦᑕ.

ᐃᓱᒪᓕᐅᖅᐳᒍᑦ ᐃᒻᒥᒃᑯᑦ ᓂᕈᐊᖅᓯᒪᓪᓗᑕᓗ ᑲᑕᒃᓯᒪᒍᒪᖏᓐᓂᕐᒧᑦ ᐊᑯᓂ.

ᖃᐅᔨᒪᔭᕆᐊᖃᖅᐳᒍᑦ ᖃᓄᐃᓕᐅᕐᓂᑦᑎᓐᓄᑦ ᐸᕐᓇᐅᑎᖃᕐᓗᑕᓗ ᐋᖅᑭᒃᐸᓪᓕᐊᓂᕐᒧᑦ ᐊᑕᐅᓯᙳᖅᐸᓪᓕᐊᓂᕐᒧᓪᓗ. ᐊᒃᓱᕈᕐᓇᖅᑐᒃᓴᐅᒐᓗᐊᖅᖢᓂ ᑭᓯᐊᓂ ᐱᓇᓱᐊᖏᓐᓇᕈᑦᑕ ᐃᒻᒥᓂᒃ ᐃᑲᔪᕋᓱᐊᕐᓂᕐᒧᑦ ᓯᕗᒻᒧᒃᐸᓪᓕᐊᓂᐊᖅᐳᒍᑦ.

ᐆᒃᑑᑎᖃᖅᐳᖓ ᓱᕈᓯᓛᓂᒃ ᐊᒥᓱᐃᖅᑕᖅᖢᖓ ᐆᒃᑑᑎᒋᒃᑲᓐᓂᕐᓂᐊᖅᐸᕋᓗ. ᐱᓱᒋᐅᖅᓴᓕᕌᖓᒥᒃ, ᓂᑯᕕᖅᑳᖅᖢᑎᒃ ᐱᓱᒐᓱᐊᖅᐸᒃᐳᑦ, ᐹᓪᓚᖃᑦᑕᖅᖢᑎᒡᓗ ᐱᓱᒋᐅᖅᓴᕙᒃᐳᑦ ᑕᐃᒪᓐᓇ ᐱᓱᒐᓱᐊᖏᓐᓇᖅᖢᑎᒡᓗ. ᐃᓐᓇᐅᓪᓗᑕ ᑕᐃᒪᓐᓇᐃᒃᑭᕗᒍᑦ; ᑕᐃᒪᓐᓇ ᓂᑯᕕᖦᖢᑕ ᖁᐊᔭᕆᓚᐅᖅᐸᒃᐳᒍᑦ ᐹᓪᓚᒃᐸᒃᖢᑕᓗ ᐆᒃᑑᐃᓐᓇᖅᐳᒍᑦ.

ᐊᓯᐊᒍᓪᓗ ᑕᐃᒪᓐᓇᐃᑉᐳᒍᑦ, ᑕᐃᒪᓇᐃᑦᑐᑐᐊᖑᙱᖦᖢᑕᓗ. ᐊᔾᔨᒌᖏᑦᑐᓄᑦ ᐃᑲᔪᖅᑎᓄᑦ ᐃᑲᔪᖅᑕᐅᔪᓐᓇᖅᐳᒍᑦ ᐋᖅᑭᒃᑕᐅᓯᒪᔪᓄᑦ; ᑕᒪᒃᑯᓄᖓ ᐃᒥᐊᓗᓗᐊᕐᓂᕐᒧᑦ ᐃᑲᔪᖅᑎᓄᑦ AA–ᖑᓂᕋᖅᑕᐅᔪᓄᑦ, ᐊᕐᓇᐃᑦ ᐊᖑᑎᓪᓗ ᑲᑐᔾᔨᖃᑎᒌᖏᓐᓄᑦ, ᒪᒃᑯᒃᑐᑦ ᑲᑐᔾᔨᖃᑎᒌᖏᓐᓄᑦ ᐊᓯᖏᓐᓄᓪᓗ. ᐊᔪᕐᓇᖏᓐᓂᖅᓴᐅᕗᖅ ᐃᓄᑑᖏᓐᓇᑦᑕ ᑖᒃᑯᐊᑐᐊᖑᖏᓐᓇᑦᑕ, ᐊᓯᖏᑦ ᐊᖑᑎᑦ ᐊᕐᓇᐃᑦ ᒪᒃᑯᒃᑐᓪᓗ ᑕᐃᒪᓐᓇᐃᒻᒪᑕ ᐃᑲᔪᖅᑕᐅᒍᒪᖕᒪᑕ ᒪᒥᓴᕐᓂᕐᒧᑦ. ᐊᖏᓛᖅ ᐃᑲᔪᖅᑕᐅᒍᑕᐅᒋᐊᓕᒃ ᑕᐃᒪᓐᓇ ᐅᖃᕐᓂᖅ ᐃᑲᔪᖅᑕᐅᒋᐊᖃᕐᓂᕐᒧᑦ ᐊᔪᓕᖅᓯᒪᓂᕐᒧᑦ ᐊᑲᐅᓯᕚᓪᓕᕋᓱᐊᕐᓂᕐᒧᑦ.
ᐃᓛᓐᓂᒃᑯᑦ ᑐᒃᓯᐊᕆᐊᖃᖅᐳᒍᑦ ᐊᑲᐅᓯᕚᓪᓕᕈᑎᒃᓴᑦᑎᓐᓂᒃ ᓯᕗᒻᒧᒐᓱᐊᕐᓂᑦᑎᓐᓂ.

Advertisement