ᓯᓚ ᐅᖅᑰᓯᕙᓪᓕᐊᓂᖓᓂ ᑐᓂᒃ ᑕᐃᒻ ᑎᑭᑉᐳᖅ

31

54-ᖓᓂ ᑐᓂᒃ ᑕᐃᒻ ᐱᒋᐊᕐᓂᐊᖅᐳᖅ ᒪᑐᐃᖅᑕᐅᓂᖓᓂ ᖁᕕᐊᓱᒍᑕᐅᔪᒥ ᐊᐃᑉᕆᓕ 11-ᒥ, ᐊᑦᑎᖅᑕᐅᓂᖓᓂ 2019-ᒥ ᑐᓂᕐᒥ, ᐊᒻᒪᓗᑦᑕᐅᖅ ᐅᐱᒋᔭᐅᔪᒥ ᑐᓂᕐᒥ.

ᓯᓚᒥ ᐱᙳᐊᕐᓂᐅᔪᑦ ᓇᑲᓱᒃ ᐃᓕᓐᓂᐊᕐᕕᖓᓂ, ᓲᕐᓗ ᕿᐱᖕᒧᑦ ᑭᒡᒋᖅᑕᖅᑎᑕᐅᓂᕐᒧᑦ ᐅᕙᓂ ᑕᑯᒃᓴᐅᑎᑕᐅᔪᒥ, ᐃᓄᒋᐊᓕᖅᑎᑕᐅᕗᖅ ᐅᓐᓄᓴᖓᓂ ᓯᕗᓪᓕᕐᒥ ᐅᓪᓗᓕᒫᒥ ᑐᓂᒃ ᑕᐃᒻᒥ ᐊᐃᑉᕆᓕ 13-ᖑᑎᓪᓗᒍ ᐊᕐᕌᓂ. ᑕᒪᑐᒪᓂ ᐊᕐᕌᒎᔪᒥ, ᑐᓂᒃ ᑕᐃᒻ ᐱᒋᐊᕐᓂᐊᖅᐳᖅ ᒪᑐᐃᖅᑕᐅᓂᖓᓂ ᖁᕕᐊᓱᒍᑕᐅᔪᒥ ᐊᐃᑉᕆᓕ 11-ᒥ, ᒪᓕᒃᑕᐅᔪᒥ ᓯᓚᒥ ᐱᙳᐊᕐᓂᐅᔪᓂ ᐅᓪᓗᑐᐃᓐᓇᖅ, ᐊᐃᑉᕆᓕ 12-ᒥ, ᐃᖃᓗᖕᓂ ᕿᑲᕐᓂᐅᔪᒥ ᐃᓚᒌᑦ ᑲᑎᖃᑎᒌᒍᓐᓇᕐᓂᐊᕐᒪᑕ ᖁᕕᐊᓱᒍᑎᖃᕐᓂᕐᒧᑦ ᐅᐱᕐᙶᒥᑦ.

“ᑐᓂᒃ ᑕᐃᒻ ᐱᒋᐊᓕᓵᖅᑎᓪᓗᒍ ᑐᓂᕐᒥ ᓴᖅᑭᑦᑐᖃᖅᐸᓚᐅᖅᓯᒪᕗᖅ ᖃᓕᕈᓯᕐᒥ. ᐅᓇ ᑐᓂᖅ ᑐᒃᑐᕋᔭᐅᑉ-ᐊᒥᖏᓐᓂ ᐊᓐᓄᕌᖅᓯᒪᓪᓗᓂ, ᐊᒻᒪ ᑮᓇᖓ ᐅᓕᒃᓯᒪᓪᓗᓂ ᑭᓯᐊᓂ ᐱᙳᐊᕐᓃᑦ ᐱᒋᐊᕐᒪᑕ. ᐊᓱᐃᓛᒃ ᑮᓇᖓᓂ ᑕᑯᑎᑦᑎᑕᐃᓐᓇᖅᖢᓂ,” ᐅᓂᒃᑳᖅᐳᖅ ᐱᑦᓯᐅᓛᖅ ᐊᓚᐃᙵ, ᖁᕕᐊᓱᒍᑕᐅᔪᒥ ᐋᖅᑭᒃᓱᐃᔨᐅᖃᑕᐅᔪᖅ.

“ᑭᓯᐊᓂ ᓯᕗᓂᐊᓂ, ᐃᓄᐃᑦ ᓇᓚᐅᑦᑖᕆᕙᓚᐅᖅᐳᑦ ᑭᓇ ᑐᓂᐅᓂᐊᕐᓂᖓᓂ. ᓇᓗᓇᖅᐸᓚᐅᖅᐳᖅ ᓇᓚᐅᑦᑖᕆᓇᓱᐊᖅᖢᑎᒃ ᑭᓇᐅᓂᖓᓂ. ᑭᓯᐊᓂ ᐅᓪᓗᒥ ᑕᐃᒪᐃᑉᐸᒍᓐᓃᖅᐳᒍᑦ ᑐᒃᑐᕋᔭᖕᓂ-ᐊᒥᕐᓂ ᐊᓐᓄᕌᖃᕐᓂᕐᒧᑦ ᐊᒻᒪ ᑲᒥᖕᓂ. ᐅᐱᒋᔭᐅᔪᒥ ᑐᓂᖃᓲᖑᓕᖅᐳᑦ ᐊᒻᒪ ᑐᓂᕐᒥ ᓄᓇᓕᖕᓂ ᑕᒫᓂ ᐃᓅᓂᑰᔪᒥᑦ ᐊᒻᒪ ᐱᕈᖅᓴᔭᐅᓯᒪᓪᓗᓂ.”

ᐃᓛᓐᓂᒃᑯᑦ ᖃᐅᔨᒪᔭᐅᕐᔪᐊᖅᑐᓂ ᖃᐃᖁᔭᐅᓯᒪᔪᓄᑦ ᐊᑦᑎᖅᑕᐅᓲᖑᕗᑦ ᐅᐱᒋᔭᐅᔪᒥ ᑐᓂᕐᒥ, ᓲᕐᓗ ᓯᕗᓪᓕᖅᐹᑦᑎᐊᖑᔪᖅ: ᑲᓇᑕᐅᑉ ᐊᖓᔪᖅᑳᕐᔪᐊᕆᔭᐅᓚᐅᖅᓯᒪᔪᖅ ]ᓐ ᑏᕙᓐᐸᐃᑯᕐ.

ᑐᓂᖅ ᐃᓅᕗᖅ ᑐᓃᑦ ᐃᓄᖕᓄᑦ.

“ᐊᖏᓂᖅᓴᐅᓚᐅᖅᐳᑦ ᐃᓄᖕᓂ ᒫᓐᓇᐅᔪᒥ, ᐊᒻᒪ ᓴᙱᓂᖅᓴᐅᓪᓗᑎᒃ. ᐱᓱᖃᑎᖃᖅᐸᓚᐅᖅᐳᑦ ᐊᑕᐅᓯᕐᒥ ᕿᒻᒥᖃᖅᖢᑎᒃ ᐊᒻᒪ ᐱᖁᑎᑭᑦᑐᒻᒪᕆᐅᓪᓗᑎᒃ ᐊᒻᒪ ᓂᕿᖃᑦᑎᐊᕐᓇᑎᒃ, ᐊᒻᒪ ᓄᓇᓕᖕᓄᐊᖅᐸᒃᖢᑎᒃ. ᑕᐃᑲᓂ ᓵᓚᖃᕋᓱᐊᕐᓂᐅᔪᓂ ᐊᒻᒪ ᓂᕿᑕᖃᕋᔭᕐᓂᖓᓂ,” ᐅᖃᓚᐅᖅᐳᖅ ᐊᓚᐃᙵ, ᐃᓚᒋᐊᖅᓯᓪᓗᓂ ᑲᑎᒪᔨᕋᓛᖑᔪᓂ ᐃᓄᑐᖃᕐᓂ ᐊᒻᒪ ᒪᒃᑯᓗᐊᙱᑦᑐᓄᑦ ᐃᓐᓇᕐᓂ ᐅᖃᐅᓯᖃᖃᑦᑕᓚᐅᖅᐳᑦ ᓴᖅᑭᑎᑦᑎᓛᕈᒪᓪᓗᑎᒃ ᑐᓂᒃ ᑕᐃᒻ-ᖑᓕᓛᖅᑐᒥ 1964-ᒥ.

ᑐᓂᒃ ᑕᐃᒻ, ᐱᒋᐊᖅᑕᐅᓚᐅᖅᑐᒥ 1965-ᒥ, ᖁᑦᑎᓛᙳᖅᖢᓂ ᐅᑭᐅᒃᑯᑦ-ᖁᕕᐊᓱᒍᑕᐅᔪᒥ ᑎᑎᕋᖅᑕᐅᓯᒪᓂᐅᔪᓄᑦ, ᓱᓕᓂᐅᔪᖅ ᐃᖃᓗᖕᓂ ᖁᕕᐊᓱᒍᑕᐅᔪᖅ ᖁᕕᐊᓱᒍᑎᐅᖏᓐᓇᐅᔭᖅᐳᖅ ᑎᑭᓐᓂᖓᓂ ᐅᖅᑰᓂᖅᓴᐅᔪᒥ ᓯᓚᐅᔪᒥᑦ, ᐅᓂᒃᑳᕆᓚᐅᖅᐳᖅ ᐊᓚᐃᙵ, ᐃᒻᒥᓂᒃ ᐅᐱᒋᔭᐅᓪᓗᓂ ᑐᓂᐅᓯᒪᔪᖅ 2016-ᒥ.

“ᖁᕕᐊᓱᖕᓂᐅᓚᐅᖅᐳᖅ ᐃᓄᖕᓂ ᐊᐅᓪᓛᖅᐸᓚᐅᖅᑐᓄᑦ. ᐱᙳᐊᖃᑦᑕᓚᐅᖅᐳᑦ ᓄᓇᓕᐅᔪᓂ ᑕᐃᔅᓱᒪᓂ. ᑭᒃᑯᓕᒫᓂᒃ ᑐᙵᓱᒃᑎᑦᑎᕙᓚᐅᖅᐳᒍᑦ,” ᐅᖃᓚᐅᖅᐳᖅ ᐊᓚᐃᙵ.

ᐊᓚᐃᙵ ᐅᖃᓚᐅᖅᐳᖅ ᓯᑭᑑᓄᑦ ᓱᒃᑲᓴᐅᑎᑕᖃᐃᓐᓇᒃᐸᖕᓂᖓᓂ, ᐋᖅᑭᒃᓱᖅᑕᐅᔪᒥ ᐊᓯᐊᓂ ᑲᑎᙵᓂᐅᔪᓄᑦ ᑕᒪᑐᒪᓂ ᐊᕐᕌᒎᔪᒥ, ᐊᒻᒪ ᓇᑦᑎᕋᓱᖕᓂᐅᔪᒥ ᓵᓚᖃᕋᓱᐊᕐᓂᐅᔪᓂᑦ.

ᓇᑦᑎᕋᓱᔾᔮᙱᑦᑐᑦ ᑕᒪᑐᒪᓂ ᐊᕐᕌᒎᔪᒥ.

“ᓯᑯᕐᓗᖕᓂᖓᓂ ᐊᒻᒪ ᐅᕙᑦᑎᓐᓄᑦ ᓇᑦᑎᕋᓱᖕᓂᕐᒥ ᓵᓚᖃᕋᓱᐊᕐᓂᕐᒥ ᐊᑭᑐᔪᐊᓗᖕᒥ ᓇᓪᓕᐅᒃᑯᒫᖃᕆᐊᖃᕋᔭᕋᑦᑕ. ᐱᕐᕈᓗᐊᕿᓂᖃᒃᑲᓐᓂᖅᐸᑦ ᐊᒻᒪ ᐊᓯᐅᔨᒃᑲᓐᓂᕐᓗᑕ ᐊᖑᓇᓱᒃᑎᒃᑲᓐᓂᕐᒥ, ᐸᓯᔭᒃᓴᐅᓇᔭᖅᐳᒍᑦ. ᑕᐃᒪᓐᓇ ᐲᕐᓂᐊᖅᑕᕗᑦ ᑕᒪᑐᒪᓂ ᐊᕐᕌᒎᔪᒥ,” ᐅᖃᓚᐅᖅᐳᖅ ᐊᓚᐃᙵ.

“ᑕᐃᔅᓱᒪᓂᐅᓚᐅᖅᑐᒥ ᓇᑦᑎᕋᓱᑎᑦᑎᔪᒥᒃ ᓵᓚᖃᕋᓱᐊᕐᓂᐅᔪᒥ, ᓯᑯ ᐅᖃᓕᒫᑦᑎᐊᕈᓐᓇᕐᓂᖅᓴᐅᓚᐅᕋᑦᑎᒍᑦ ᐅᓪᓗᒥᐅᓕᖅᑐᒥ.”

ᓄᓇᓕᐅᔪᑦ ᐅᒡᒍᐊᕐᓂᖃᓚᐅᖅᐳᑦ ᐊᓯᐅᔨᔭᐅᓂᖓᓂ ᐊᖑᓇᓱᒃᑎᒥᑦ ᓵᓐᑎ ᐅᓛᔪᒥᑦ ᑐᓂᒃ ᑕᐃᒻᒥ 2015-ᒥ.

ᐊᓚᐃᙵ ᐅᖃᓚᐅᖅᐳᖅ ᑕᒪᑐᒪᓂ ᐊᕐᕌᒍᒥ ᐋᖅᑭᒃᓱᖅᑕᐅᓯᒪᔪᑦ ᖃᓄᐃᓕᐅᕐᓂᐅᔪᓄᑦ ᐊᔾᔩᓐᓇᐸᓗᒋᓂᐊᖅᐸᖓ ᐊᕐᕌᓂᐅᓚᐅᖅᑐᒥ. ᑐᓂᒃ ᑕᐃᒻ 2018 ᓯᕗᓪᓕᖅᐹᖑᓪᓗᓂ ᐊᕐᕌᒍᒥ ᓄᑖᖑᔪᖅ ᑲᑎᙵᓂᐅᔪᑦ– 123 ᐊᑏᒥᒃ! – ᐋᖅᑭᒃᓱᖅᓯᒪᕗᑦ ᐃᓅᓯᓕᒫᒥᒃ ᐱᖃᓐᓇᕇᖑᔪᓂᑦ: ᐊᓚᐃᙵ, ᒋᑎᐅᓂ ᔫᒥ, ᐋᑕᒥ ᐃᑦᑐᐊᑦᓯᐊᖅ, ᔨᒥ ᓅᐳᓪ ᐊᒻᒪ ᒫᑎᐅ ᐊᓚᐃᙵ.

ᐊᓚᐃᙵ ᐅᖃᓚᐅᖅᐳᖅ, ᐊᐃᑉᕆᓕ 4-ᒥ, ᑲᑎᙵᓂᐅᔪᑦ, ᑐᕌᒐᒃᓴᖃᖅᑐᓂ ᐆᒻᒪᖅᑎᑦᑎᒃᑲᓐᓂᕐᓂᕐᒥ ᑕᐃᔅᓱᒪᓂᑐᖃᖅ ᓯᓚᒥ ᖃᓄᐃᓕᐅᕐᓂᐅᔪᓂᑦ ’70-ᖏᓐᓂ ᐊᒻᒪ ’80-ᖏᓐᓂ, ᓱᓕ ᐱᔭᕇᖅᓯᓇᓱᐊᖅᐳᑦ ᐋᖅᑭᒃᓱᖅᑕᐅᓯᒪᓂᐅᔪᒥ, ᐊᒡᕕᐊᕈᑕᐅᔪᓐᓇᖅᑐᖅ ᓯᓚ.

“ᖃᐅᔨᒪᐃᓐᓇᕋᓱᐊᕐᓂᐊᖅᐸᕗᑦ, ᖁᙱᐊᕐᓗᑕ ᓯᓚ ᒪᓕᑦᑎᐊᕐᓂᐊᕐᒪᖔᑦ. ᓯᓚᑦᑎᐊᕙᐅᙱᒃᑯᓂ, ᐃᒡᓘᑉ ᐃᓗᐊᓄᐊᕆᐊᖃᕐᓂᐊᖅᐳᒍᑦ,” ᐅᖃᓚᐅᖅᐳᖅ ᐊᓚᐃᙵ.

ᑕᒪᑐᒪᓂ ᐊᕐᕌᒍᒥ ᓯᓚᒥ ᐱᙳᐊᕐᓃᑦ ᐱᓕᕆᐊᖑᓂᐊᖅᐳᑦ ᐅᓪᓗᑐᐃᓐᓇᕐᒥ 12-ᖑᔪᒥ, ᓄᓇᓕᖅᐸᐅᔭᒥ ᐃᖃᓗᖕᓂ ᐅᖃᖅᓯᒪᓪᓗᑎᒃ ᐱᓪᓚᕆᐅᔪᒥ ᑐᓂᒃ ᑕᐃᒻᒥ ᕿᑲᕐᓇᐅᔪᒥ, ᒪᓕᒃᑐᒥ ᒪᓕᒐᕋᓛᖏᓐᓂᑦ, ᐃᓚᒌᑦ ᐊᓕᐊᓇᐃᒍᓱᒍᓐᓇᕐᓂᐊᕐᒪᑕ ᖃᓄᐃᓕᐅᕐᓂᐅᔪᓂᑦ ᑲᑎᙵᓗᑎᒃ.

ᐊᓚᐃᙵ ᐅᖃᖅᐳᖅ ᓄᓇᕗᒻᒥ ᐊᒻᒪ ᓄᓇᕕᖕᒥ ᑎᑕᒃᑎᓂ ᐱᙳᐊᕐᓂᐊᖅᐳᑦ ᑕᒪᑐᒪᓂ ᐊᕐᕌᒎᔪᒥ.

“ᐱᓕᕆᑐᐃᓐᓇᕆᐊᖃᖅᐳᒍᑦ ᐅᓐᓄᒃᑯᑦ ᑎᑕᖕᓂᐅᔪᓂ ᐃᓄᖕᓄᑦ ᐱᒑᕈᒪᓲᓄᑦ, ᐃᒻᒪᖄ 10-ᒥ 12-ᒧᐊᕋᓱᖕᓂᖓᓂ, ᐊᒻᒪ ᓱᕈᓯᖃᕆᐊᖃᔾᔮᙱᓚᖅ,” ᐅᖃᓚᐅᖅᐳᖅ.

ᐊᓯᖏᑦ ᖃᓄᐃᓕᐅᕐᓂᐅᔪᓂ ᐃᓚᖃᖅᐳᖅ ᑏᒐᔭᕐᓂᕐᒥ ᓵᓚᖃᕋᓱᐊᕐᓂᐅᔪᒥ, ᐊᒻᒪ ᑏᒥᒃ ᐊᒻᒪ ᐸᓚᐅᒑᓕᐅᕐᓂᕐᒥ ᓵᓚᖃᕋᓱᐊᕐᓂᐅᔪᒥ.

“ᐅᑎᖅᑎᑦᑎᓇᓱᐊᕐᔪᐊᖅᐳᒍᑦ ᓄᑕᐅᙱᑦᑐᓂ ᑐᓂᒃ ᑕᐃᒻᒥ,” ᐅᖃᓚᐅᖅᐳᖅ ᐊᓚᐃᙵ.

“ᐃᖃᓗᒐᓱᖕᓂᖃᕐᓂᐊᖅᐳᖅ, ᐊᖏᔪᒻᒪᕆᐊᓗᖕᒥ ᐱᙴᒥᓪᓗ. ᐱᓇᓱᐊᕈᓯᓕᒫᒥᒃ ᑲᑎᙵᓂᕗᑦ ᐊᒻᒪ ᓄᓇᓕᖅᐸᐅᔭᖅ ᖃᓄᐃᓕᐅᕐᓂᖃᕐᓂᐊᖅᐳᑦ.”