Skip to content

ᓇᖕᒥᓂᖅ ᐱᓇᓱᐊᒐᖃᖅᑐᒧᑦ ᑕᒪᓐᓇ ᓴᓇᔭᐅᔪᓐᓇᕐᒪᑦ ᕼᐊᒪᓚᖓᓂ ᐊᑭᓖᔪᓐᓇᑐᐊᖅᐸᑦ

ᖁᕐᓗᖅᑐᒥᐅᑦ ᕼᐊᒪᓚᖓᑦ ᓇᖕᒥᓂᖅ ᐱᔨᑦᓯᕋᕈᑎᓂᒃ ᓴᓇᓂᐊᓕᖅᑐᑦ ᐅᑕᖅᑭᑐᐃᓐᓇᖏᓪᓗᑎᒃ ᓄᓇᕗᑦ ᒐᕙᒪᖓᓂ ᐊᑐᐊᒐᓕᐅᖅᑎᓂᒃ ᖃᐅᔨᓴᖅᑎᓂᒃᓗ ᐊᑯᓂᐅᓕᕈᑕᐅᖃᑦᑕᕐᒪᑕ ᓴᓇᔭᐅᔪᒪᔪᓄᑦ ᑕᒫᓂ ᒪᓕᒐᓂᒃ ᐊᑐᐊᖅᓯᒋᐊᓕᖕᓄᑦ ᑕᒫᓂᕐᒥᐅᑦ ᑲᒪᒋᔭᐅᒋᐊᓖᑦ ᐅᓄᖅᑎᓪᓗᒋᑦ ᐊᐅᓪᓚᖅᑎᑕᐅᖃᑦᑕᓕᑉᒪᑕ ᕼᐊᒪᓚᖓᓄᑦ ᑲᒪᒋᔭᐅᔪᓐᓇᖅᑎᓪᓗᒋᑦ ᓱᓕ.

ᒪᓕᒐᑎᒍᑦ ᐃᐱᖅᑕᐅᓯᒪᒐᓗᐊᕐᒪᑕ ᕼᐊᒪᓚᐃᑦ ᓇᖕᒥᓂᖅ ᐱᖁᑎᖃᕈᓐᓇᖏᓱᑎᒃ ᓄᓇᓕᖓᓂ ᐃᒡᓗᕐᔪᐊᓂᒃ ᑭᓯᐊᓂᓕ ᓄᓇᓕᖕᒥᐅᒧᑦ ᐱᖁᑎᒋᔭᐅᔪᓂᒃ ᐊᑐᖅᑐᐊᕈᓐᓇᕋᓗᐊᖅᖢᑎᒃ ᐊᑐᖅᑐᐊᕈᑎᑎᒍᑦ ᐊᖏᕈᑎᓕᐅᕈᑎᒋᓗᒍ - ᑕᐃᒪᓐᓇ ᐋᕿᒃᓱᖅᓯᒪᓗᑎᒃ ᕼᐊᒪᓚᒃᑯᑦ ᐊᖏᖅᑕᐅᔪᓐᓇᕋᔭᕐᒪᑕ ᓄᓇᓕᖓᓂ ᓇᖕᒥᓂᖃᖅᑐᒧᑦ ᐊᐅᓚᑕᐅᓂᐊᖅᐸᑦ ᐃᒡᓗ ᑖᓐᓇ ᐱᔨᑦᓯᕋᕈᑕᐅᓗᓂ ᓄᓇᓕᖕᒥᐅᓂᒃ ᐊᑐᖅᑕᐅᓕᖅᐸᑦ ᑕᐃᒪᓐᓇ ᐊᑭᓖᖔᕐᓗᑎᒃ ᓴᓇᔭᐅᔪᓯᐊᓂᒃ ᐊᑐᖅᑕᐅᓕᖅᐸᑦ ᒐᕙᒪᑎᒃᑯᓐᓂᑦ ᐅᑎᖅᑎᕕᐅᓂᐊᕐᓗᑎᒃ ᐊᑭᖏᓐᓂᒃ.

ᐊᒥᓱᑦ ᓄᓇᕗᒥᐅᑦ - ᐃᓐᓇᐃᑦ ᐱᓗᐊᖑᐊᖅᑐᒥᒃ, ᐋᓐᓂᐊᖅᑲᓕᖅᑐᓪᓗ, ᓄᑕᖅᑲᐃᓪᓗ ᐸᖅᑭᔭᐅᒋᐊᓖᑦ, ᐱᕋᔭᖃᑦᑕᖅᑐᓪᓗ ᓄᓇᓕᖕᓂ ᐊᐅᓪᓚᖅᑎᑕᐅᓪᓗᑎᒃ ᑭᓯᐊᓂᐅᖃᑦᑕᓕᕐᒪᑕ ᐅᖓᓯᒃᑐᓄᑦ ᐊᖏᕐᕋᒥᓂᑦ. ᐊᖏᕐᕋᒥᓃᒍᓐᓃᖅᖢᑎᒃ ᖃᑕᖑᑎᒥᓂᒃ ᑕᑯᔪᓐᓇᐃᓪᓕᖃᑦᑕᕐᒪᑕ, ᐃᓐᓇᐃᑦ ᐊᖏᕐᕋᒥᓂᒃ ᐅᖓᒋᔭᒥᓂᒃ ᕿᒪᐃᓪᓗᑎᒃ ᕿᒃᓵᓕᖃᑦᑕᕐᒪᑕ, ᐊᓯᖏᓐᓄᑦ ᓄᓇᒋᔭᐅᔪᓃᓕᖅᖢᑎᒃ ᐊᐅᓪᓚᖅᓯᒪᔪᑎᑐᑦ ᐊᑯᓂ ᑕᐃᒪᓐᓇ ᐱᓕᖃᑦᑕᕐᒪᑕ ᐅᑕᖅᑭᑐᐃᓐᓇᓕᖃᑦᑕᕐᒪᑕ ᐃᓚᒥᓂᒃ ᑕᑯᔪᒪᓪᓗᑎᒃ ᑐᓄᑕᐅᑐᐃᓐᓇᕆᐊᖃᖅᑐᒃᓴᐅᖏᒻᒪᑕ ᐃᒡᓗᓕᐅᕈᔭᐅᔪᓐᓇᖅᑎᓪᓗᒋᑦ ᓄᓇᓕᖏᓐᓂ ᐸᖅᑭᔭᐅᔪᓐᓇᕐᓂᐊᕐᒪᑕ ᓄᓇᕗᒥ ᐊᖏᕐᕋᒥᓂ.

ᓇᖕᒥᓂᖃᖅᑐᓂᒃ ᑕᑎᖃᖅᖢᑎᒃ ᓴᓇᔭᐅᓂᐊᖅᑐᖅ ᐃᑲᔪᕈᓐᓇᕐᒪᑦ ᓄᓇᓕᖕᒥᐅᓂᒃ ᐋᕿᒃᓱᐃᓯᒪᔪᑦ ᖁᕐᓗᖅᑐᒥᐅᑦ ᐃᔾᔪᐊᕈᒥᓇᖅᑐᑦ, ᐊᓯᖏᓐᓂ ᓄᓇᓕᖕᓂ ᐃᓐᓇᕐᓄᑦ ᐊᔪᕐᓂᖃᖅᑐᓄᓪᓗ ᓄᓇᓕᖕᓂ ᐊᖏᕐᕋᖃᖅᑎᑦᑎᔪᓐᓇᕐᓗᑎᒃ ᐊᔪᕐᓂᖃᓕᖅᑐᓄᑦ. ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖓᑦ ᑕᐃᒫᓴᐃᓐᓇᖅᑕᐅᖅ ᒐᕙᒪᑎᒃᑯᓐᓄᑦ ᑎᒥᖁᑎᒋᔭᐅᖏᓱᓂ ᐃᓄᐃᑦ ᓄᓇᖁᑎᖏᓐᓂ ᐋᕿᒃᓱᐃᓯᒪᓕᕐᒥᔪᑦ ᐃᖃᓗᖕᓂ. ᓴᓇᔭᐅᓂᐊᖅᑐᓂᒃ ᒪᑯᓂᖓ ᐃᓄᐃᑦ ᐱᖅᑯᓯᖏᓐᓄᑦ ᐱᖑᐊᕐᕕᒃᓴᒥᒃ ᑕᕐᕆᔭᕐᕕᓕᐅᕐᓂᐊᕐᒪᑕ ᐃᖃᓗᖕᓂ, ᐊᑐᕐᓂᖃᕐᓂᐊᖅᑐᒥᒃ ᐱᖑᐊᖅᑏᑦ ᑎᒥᖁᑎᐊᑕ ᓯᓚᑖᓄᑦ ᐱᖅᑯᓯᓕᕆᔪᑎᓄᑦ ᐃᒡᓗᕐᔪᐊᖃᓕᖅᐸᑕ, ᑕᑯᒃᓴᐅᑎᑦᑎᖃᖅᑕᕈᓐᓇᖅᓯᓂᐊᕐᒪᑕ ᑕᕝᕙᓂ ᐊᒻᒪᓗ ᖃᖓᑐᐃᓐᓇᒃᑯᑦ ᐊᒃᓱᕈᖅᑐᖃᓕᕐᓂᖅᐸᑦ ᓄᓇᓕᖓᓂ ᐊᖏᔪᒥᒃ ᐃᒡᓗᒥᒃ ᐊᑐᒐᑦᓴᖃᕐᓂᐊᕐᒪᑕ ᐃᖃᓗᖕᒥᐅᑦ.

ᑎᒥᖁᑎᒋᔭᐅᔪᓂᒃ ᓄᓇᓕᑦᑎᓐᓂ ᐱᑕᖃᕆᐊᖃᕐᒪᑦ ᓄᓇᓕᖕᒥᐅᓂᒃ ᐃᑲᔪᕈᓐᓇᖅᑐᓂᒃ ᐱᕙᓪᓕᐊᑎᑦᑎᔨᐅᓗᑎᒃ ᓄᓇᓕᖓᓂ ᓄᓇᕗᒥᓗ. ᐊᒃᓱᐊᓗᒃ ᐱᔭᕆᑐᖕᒪᑦ ᐊᖏᔫᑎᓂᒃ ᓴᓇᓇᓱᐊᖅᖢᓂ ᐅᑭᐅᖅᑕᖅᑐᒥᐅᑦ ᓄᓇᓕᖏᓐᓂ ᐊᑐᖅᑕᐅᓂᐊᖅᑐᓂᒃ. ᓇᓗᓇᖏᒻᒪᑦ ᓄᓇᓕᖕᒥᐅᑦ ᑲᑎᕕᖃᕆᐊᖃᕐᒪᑕ ᑕᐃᒪᖓᓂᑦ ᐱᖑᐊᕐᕕᓕᐅᖃᑦᑕᕐᒪᑕ ᓯᐊᕆᔮᕐᕕᖃᖅᖢᑎᒃᓗ ᐳᐃᔪᕋᕐᕖᓪᓗ ᑕᒪᔾᔭ ᕼᐊᒪᓚᓂ ᐱᑕᖃᕈᓐᓇᖅᓯᔪᑦ ᒫᓐᓇ ᑭᓯᐊᓂ ᒐᕙᒪᑎᒃᑯᓐᓄᑦ ᐊᑭᓖᔾᔪᔾᔭᐅᓪᓗᑎᒃ.

ᓄᓇᕗᒥᐅᑦ ᓱᒃᑲᓕᔪᒥᒃ ᐃᓄᒋᐊᒃᓯᕙᓪᓕᐊᖕᒪᑕ, ᕼᐊᒪᓚᖏᓐᓂ ᐱᔨᑦᓯᕋᕈᑏᑦ ᓄᓇᓕᖕᒥᐅᓄᑦ ᑕᐃᒫᓴᐃᓐᓇᖅ ᐃᓄᒋᐊᖕᓂᖅᓴᐅᓕᕋᓗᐊᕐᓗᑎᒃ ᐱᔨᑦᓯᕋᕈᑎᖃᕆᐊᖃᕐᒪᑕ, ᑕᕝᕙ ᐋᕿᒃᓱᐃᑲᐃᓐᓇᖅᐳᑦ ᖁᕐᓗᖅᑐᒥᐅᑦ ᒪᓐᓇ ᐃᓐᓇᕐᓂᒃ ᐱᔨᑦᓯᕋᕐᕕᐅᓗᓂ ᐊᑐᖅᑕᐅᔪᓐᓇᕐᓂᐊᖅᑐᒥᒃ ᓄᓇᓕᖓᓂ ᓴᓇᓪᓗᑎᒃ ᑭᓯᐊᓂᓕᑦᑕᐅᖅ ᒫᓐᓇ ᓄᓇᓖᑦ ᐊᔪᖅᓴᖏᑦᑐᑦ ᑕᐃᒪᓐᓇ ᐱᔪᓐᓇᕐᒪᑕ.

ᐃᓱᒪᒋᓪᓗᒋᑦ ᐱᓗᐊᖑᐊᖅᑐᒥᒃ ᒐᕙᒪᑎᑐᖃᒃᑯᑦ ᐱᓕᕆᕝᕕᖏᑦ ᖃᓪᓗᓈᓂ ᓄᓇᓕᖕᒥᐅᓂᒃ ᐱᔨᑦᓯᕋᑦᑎᐅᓪᓗᑎᒃ ᖃᓄᖅ ᓄᓇᓕᖕᓄᑦ ᓄᒃᑎᖅᑕᐅᓂᐊᖅᐸᑦ ᐊᒻᒪᓗ ᐃᒃᑯᐊ ᐊᓕᒍᓂᒃ ᐅᐊᔭᓕᖕᓂᒃ ᖃᕆᑕᐅᔭᖃᕈᑎᓂᒃ ᐱᔪᓐᓇᖅᑐᑦ ᓄᓇᓖᑦ ᐊᒻᒪᓗ ᐱᔪᓐᓇᖏᑦᑐᑦ ᓄᓇᓖᑦ ᐱᓂᐊᕐᒥᖕᒪᑕ ᓇᓕᒧᖏᔪᑕᐅᓕᕐᓗᑎᒃ ᐊᓐᓂᕈᓚᐅᑕᐅᓂᐊᕐᒥᔪᑦ ᒐᕙᒪᑎᒃᑯᓐᓄᑦ ᐊᑭᕋᖅᑑᑕᐅᓕᕐᒥᓗᑎᒃ ᑕᐃᒪᐃᖃᑦᑕᕐᒪᑕ ᖃᖓᑐᐃᓐᓇᖅ ᓄᓇᓕᐅᖃᑎᖏᑦ ᐊᑐᐊᒐᐃᑦ ᓯᓚᑖᒎᖅᖢᑎᒃ ᐱᔪᓐᓇᖅᓯᔪᖃᕌᖓᑦ ᐱᔨᑦᓯᕋᕈᑎᓂᒃ ᓄᓇᓕᖕᓂ.

ᐃᒡᓗᐊᓄᖔᖅᑕᐅᖅ ᑕᑯᓪᓗᒋᑦ, ᐃᖃᓗᖕᒥᐅᑦ ᓄᓇᓕᐸᐅᔭᖓ ᑕᐃᒪᖓᓂᑦ ᐱᑎᑕᐅᖏᓐᓇᐅᔭᕐᒪᑦ ᓯᕗᓪᓕᖅᐹᖑᓪᓗᓂ ᓄᑖᓂᒃ ᒐᕙᒪᑎᒃᑯᑦ  ᐃᑲᔪᖅᓴᖅᑕᐅᖃᑦᑕᑉᒪᑕ ᐱᒋᐊᖓᖅᑎᑦᑎᒑᖓᑕ ᐊᖏᔫᑎᓂᒃ ᐃᒪᒃ ᐳᐃᔾᔪᕋᕐᕕᒃᑖᕋᒥᒃ ᐃᓚᖓᓂᒃ ᐊᑭᓖᔾᔪᔾᔭᐅᓂᐊᕋᓱᒋᔪᖕᒪᑕ ᒐᕙᑎᑐᖃᒃᑯᓐᓄᑦ, ᐃᓄᑭᓗᐊᒧᑦ ᐊᑐᐊᒐᓂᒃ ᐊᖑᒻᒪᑎᖏᒻᒪᑕ ᐊᑭᓖᒋᐊᖃᓕᓚᐅᖅᑐᖅ ᑲᑎᓱᒋᑦ $10-ᒥᓕᐊᓐᑖᓚᓂᒃ.

ᑭᓯᐊᓂᓕ ᖁᕐᓗᖅᑐᕐᒥᐅᑦ ᒫᓐᓇ ᓴᓇᓂᐊᕐᒪᑕ ᓄᓇᓕᖓᓂ ᐊᑐᖅᑕᐅᓪᓗᑐᕆᐊᓕᖕᓂᒃ ᐃᓄᓕᒫᓄᑦ ᐱᔨᑦᓯᕋᕈᑎᓂᒃ ᑲᒪᒋᔭᐅᒋᐊᓕᖕᓂᒃ, ᓄᓇᓕᖕᒥᐅᓄᑦ ᐱᖑᐊᕕᑐᐃᓐᓇᐅᖏᑦᑐᒥᒃ. ᐃᒡᓗᐊ ᓄᓇᕗᑦ ᒐᕙᒪᖓᓄᑦ ᐊᑐᖅᑐᐊᖅᑕᐅᓂᐊᕐᓗᓂ ᐊᖏᖅᑕᐅᒋᐊᖃᕐᓂᐊᖅᑐᖅ ᓴᓇᔭᐅᕌᓂᒃᓯᒪᓕᖅᐸᑦ, ᑕᐃᒪᓐᓇ ᑕᒪᐅᖓᑐᐃᓐᓇᖅ ᐃᒡᓗᓕᐅᔮᖏᒻᒪᑕ ᐊᑐᖅᑕᐅᖏᑐᐃᓐᓇᕆᐊᓕᖕᒥᒃ - ᑕᐃᒪᓐᓇᓗ ᐱᔨᑦᓯᕋᕈᑎᓄᑦ ᐊᑐᖅᑕᐅᓂᐊᖅᑐᓂᒃ ᐃᒡᓗᓕᐅᖅᑐᖃᖅᐸᑦ  ᓇᖕᒥᓂᖃᖅᑐᒧᑦ ᐊᑐᕐᓂᖃᕐᒥᖕᒪᒃ ᓄᓇᕗᒃ ᒐᕙᒪᖓᓄᑦ ᓴᓇᔭᐅᖏᖔᕐᓗᓂ ᐱᖏᖕᓇᔮᖏᒻᒪᑦ ᐊᒃᓱᕈᓗᐊᖏᓪᓗᑎᒃ ᐃᒡᓗᓕᐅᕋᓱᐊᕐᓗᑎᒃ ᒐᕙᒪᑎᒃᑯᑦ ᐊᑐᖅᑐᐊᑐᐃᓐᓇᕐᓂᐊᕐᒪᑕ ᐃᒡᓗᒥᒃ ᓴᓇᕙᒌᖅᓯᒪᔪᒥᒃ, ᓄᓇᕗᑦ ᒐᕙᒪᖓ ᐃᓄᓕᕆᔪᑎᓂᒃ ᑲᒪᔨᐅᒐᓗᐊᕐᒪᑕ ᓄᓇᕗᒥᐅᓄᑦ.