ᑲᑎᙵᓂᐅᔪᑦ New Era ᑲᖏᖅᖠᓂᕐᒥᐅᑕᑦ ᑕᑯᒃᓴᐅᑎᑦᑎᓚᐅᖅᐳᑦ ᓄᓇᕗᑦ ᐊᑭᑦᑐᕋᐅᑎᔪᓐᓇᕐᓂᖏᓐᓂ ᑲᓇᑕᒥ ᓴᖅᑭᔮᕐᓂᐅᔪᒥ ᓴᙱᔪᐊᓗᖕᒥ ᑕᑯᒃᓴᐅᑎᑦᑎᓂᖏᓐᓂ ᐊᕐᕌᒍᑕᒫᒥ SPN ᑲᓇᑕᒥ ᓱᒃᑲᐃᑦᑐᒥ ᐃᒋᑦᑎᓂᐅᔪᒧᑦ-ᐊᓇᐅᓕᒑᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ ᓴᐃᓐᑦ ᔮᓐᔅ, ᓂᐅᕙᓐᓛᓐᒥ, ᐋᒍᔅᑎ 2-6-ᒧᑦ.

ᐱᙳᐊᖅᖢᑎᒃ ᐊᖑᑏᑦ ᐊᕐᓇᐃᓪᓗ ᑲᑎᙵᓪᓗᑎᒃ, ᑲᖏᖅᖠᓂᕐᒥ ᐱᙳᐊᖅᑏᑦ 2-2-ᒧᐊᓚᐅᖅᐳᑦ ᓵᓚᖃᖅᐸᓪᓕᐊᔪᓄᑦ ᐊᒥᖅᑳᖃᑦᑕᐅᑎᔪᓂ ᓵᓚᒋᔭᐅᓚᐅᖅᑳᕋᑎᒃ 18-16-ᒧᑦ ᓅᕙᓐᓛᓐᒥ Yes B’y ᐱᙳᐊᖅᑎᖏᓐᓂ ᓵᓚᖃᕋᓱᐊᕐᓂᐅᔪᒥ ᐱᙳᐊᕐᓂᐅᔪᒥ.

ᐅᐃᓐᑐᓪ ᖃᓗᔾᔭᖅ ᑲᖏᖅᖠᓂᐅᑉ New Era ᑯᓂᒃᓯᔭᖅᑐᖅᐳᖅ ᓅᕙᓐᓛᓐᒥ ᐱᖅᑯᓯᑐᐊᖓᓐᓂ ᑯᓂᒃᓯᓂᕐᒥ ᐆᒐᕐᒥᑦ ᑲᑎᙵᓂᐅᔫᑉ ᐳᓚᕋᕐᓂᖏᓐᓂ SPN ᑲᓇᑕᒥ ᓱᒃᑲᐃᑦᑐᒥ ᐃᒋᑦᑎᓂᐅᔪᒧᑦ-ᐊᓇᐅᓕᒑᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ ᓴᐃᓐᑦ ᔮᓐᔅ, ᓂᐅᕙᓐᓛᓐᒥ, ᐋᒍᔅᑎ 2-6-ᒧᑦ.
Wendel Kaludjak of Rankin Inlet’s New Era puckers-up for the Newfoundland tradition of kissing the cod during the team’s visit to the SPN National Slo-Pitch Championship at St. John’s Nfld., from Aug. 2-6 2018.
photo courtesy Connor Faulkner

New Era ᐱᓚᐅᖅᐳᑦ ᓵᓚᖃᕋᓱᐊᕐᓂᐅᔪᒥ ᐊᐅᓚᖁᑎᖓᓐᓂ ᒪᕐᕉᖕᓂ ᑲᓇᑕᒥ ᐱᓇᓱᐊᕐᓂᐅᔪᓄᑦ ᖃᓄᐃᓐᓂᐅᔪᓄᑦ ᖄᖏᓚᐅᖅᑐᒥ ᓱᒃᑲᐃᑦᑐᒥ ᐃᒋᑦᑎᓂᐅᔪᒧᑦ-ᐊᓇᐅᓕᒑᕐᓂᕐᒧᑦ ᐱᙳᐊᕐᓂᐅᔪᒥ ᐊᕐᕌᒍᒥ, ᐱᓪᓗᑎᒃ ᑕᒪᒃᑭᓂ ᑳᓪᒻ ᐃᐊᕐ ᐃᕐᙳᓯᖓᓐᓂ ᑲᖏᖅᖠᓂᕐᒥ ᐊᒻᒪ ᓯᕗᓪᓕᕐᒥ ᓂᐅᕕᖅᑎᒃᑯᑦ ᕼᐊᑦᓴᓐ ᐸᐃ ᐱᐅᓛᖑᔪᓄᑦ ᑰᒡᔪᐊᕌᓗᒃ, ᒫᓂᑑᐸᒥ.

ᑲᓇᑕᒥ ᐱᙳᐊᕐᓂᐅᔪᒥ ᓴᐃᓐᑦ ᔮᓐᔅᓂ ᓴᖅᑭᔮᖅᑎᑦᑎᓚᐅᖅᐳᖅ ᖃᓄᐃᓕᐅᕐᓂᐅᔪᓂ ᐊᖑᑎᓄᑦ, ᐊᕐᓇᓄᑦ ᐊᒻᒪ ᐊᖑᑎᑦ ᐊᕐᓇᐃᑦ ᑲᑎᙵᔪᓄᑦ ᐊᕕᒃᑐᖅᓯᒪᓂᐅᔪᓂᑦ.

ᑳᓄᕐ ᕙᓪᒃᓄᕐ ᑲᖏᖅᖠᓂᕐᒥᐅᑕᖅ – ᐱᖓᔪᖓᓐᓂ ᐊᕐᕌᒍᖓᓃᓐᓂᐊᖅᑐᒥ ᐊᕙᑎᓕᕆᓂᕐᒧᑦ ᐃᓕᓐᓂᐊᕐᓂᐅᔪᒥ ᓯᓚᑦᑐᖅᓴᕐᕕᒡᔪᐊᒥ ᒫᓂᑑᐸᒥ – ᐅᖃᓚᐅᖅᐳᖅ ᖁᕕᐊᕐᔪᐊᓚᐅᖅᐳᖅ ᐃᒻᒥᓂᒃ ᐊᒻᒪ ᐱᙳᐊᖃᑎᒋᕙᒃᑕᖓ ᓯᑦᓂ ᓂᑰᓪ ᐊᐱᕆᔭᐅᖕᒪᑕ ᐃᓚᐅᖃᑕᐅᓂᕐᒧᑦ New Era-ᒥ ᑲᓇᑕᒧᑦ ᓵᓚᖃᕋᓱᐊᕐᓂᐅᔪᒥ.

ᐅᖃᓚᐅᖅᐳᖅ ᑲᖏᖅᖠᓂᕐᒥ ᐱᙳᐊᖅᑏᑦ ᑕᒪᕐᒥᓗᒃᑕᖅ ᐱᙳᐊᕐᓂᓃᓚᐅᖅᐳᑦ ᐊᒻᒪ ᓂᐱᖃᒃᑲᓐᓂᕈᓐᓇᓚᐅᖅᐳᑦ ᖃᓄᐃᓐᓂᐅᔪᒥ ᐴᑲᖅᑕᖅᐸᓚᐅᕐᓗᑎᒃ ᐅᕙᓂ ᑕᐃᑲᓂᓗ ᐃᑲᔪᖅᓯᖅᑕᐅᓂᖏᓐᓂ.

“ᑭᒡᓕᐅᔪᖅ ᐊᓇᐅᓕᒑᕐᓂᕐᒥ ᓅᕙᓐᓛᓐᒥ ᐊᔾᔨᑦᑎᐊᐸᓗᒋᓂᖓᓐᓂ ᑕᐃᒪᐃᑉᐸᖕᓂᑦᑎᓐᓂ ᑲᖏᖅᖠᓂᕐᒥ,” ᐅᖃᓚᐅᖅᐳᖅ ᕙᓪᒃᓄᕐ.

“ᓴᖅᑭᑎᑦᑎᓂᑐᐃᓐᓇᐅᓚᐅᖅᐳᖅ ᐅᓪᓚᒃᑎᑦᑎᓂᖃᕐᓂᕐᒥ ᐱᕕᒃᓴᖃᑐᐊᕌᖓᕕᑦ ᐊᒻᒪ ᑕᒻᒪᕐᓂᐅᔪᑦ ᑭᒡᓕᖃᖅᑎᓪᓗᒋᑦ.

“ᑕᒪᕐᒥᒃ ᐱᙳᐊᕐᓂᐅᔪᖅ ᐱᓕᕆᓂᐅᓚᐅᖅᐳᖅ ᓇᓕᐊᒃ ᑲᑎᙵᓂᐅᔪᑦ ᐱᙳᐊᑦᑎᐊᓛᖑᓂᖏᓐᓂ ᓴᐳᔾᔨᓯᒪᓂᐅᔪᒧᑦ, ᐱᓂᖃᖅᐸᒃᖢᑕ ᐊᓯᓂᑦ ᐱᙳᐊᖅᑐᓄᑦ ᐱᕕᒃᓴᖃᕐᓂᐅᔪᓄᑦ.

“ᓂᕆᐅᒃᑲᔭᖅᐳᖓ ᓇᒥᑐᐃᓐᓇᖅ ᓄᓇᕗᒻᒥ ᑲᑎᙵᓂᐅᔪᓂ ᐊᑭᑦᑐᕋᐅᑎᓂᐅᔪᒥ ᒪᓕᒃᑐᒥ ᑲᓇᑕᒥ ᓵᓚᖃᕋᓱᐊᕐᓂᐅᔪᒥ ᐃᖏᕐᕋᓂᖃᕐᓂᐅᔪᒥ ᓵᓚᖃᕋᓱᐊᕐᓂᐅᔪᒧᑦ.”

ᐊᖑᑎᓄᑦ ᐊᕐᓇᓄᑦ ᑲᑎᙳᓂᐅᔪᓄᑦ (10-ᓂ ᐱᙳᐊᖅᑎᓕᖕᓂ ᐱᙳᐊᕐᓂᐅᔪᒥ ᒥᑭᓛᖓᓂ ᑎᓴᒪᓂ ᐊᕐᓇᖃᖅᑐᓂᑦ) ᐊᕕᒃᓯᒪᓚᐅᖅᐳᑦ ᒪᕐᕉᖕᓄᑦ ᑲᑎᙵᓂᐅᔪᓄᑦ, ᐊᑐᓂ ᑲᑎᙵᓂᐅᔪᑦ ᐱᙳᐊᖅᖢᑎᒃ ᑎᓴᒪᓂ ᐱᙳᐊᕐᓂᐅᔪᓂᑦ ᓵᓚᖃᖅᐸᓪᓕᐊᔪᓄᑦ ᐊᒥᖅᑳᖃᑦᑕᐅᑎᔪᓂ ᐃᓚᖓᓐᓂ ᖃᓄᐃᓐᓂᐅᔪᒥ.

ᓵᓚᖃᕋᓱᐊᕐᓂᐅᔪᖅ ᐋᖅᑭᒃᑕᐅᓯᒪᓚᐅᖅᐳᖅ ᒪᕐᕈᐃᕐᓗᓂ ᓵᓚᒋᔭᐅᓂᕐᒧᑦ, ᑕᐃᒪᓐᓇ ᑲᑎᙵᓂᐅᔪᑦ ᓇᓕᐊᑐᐃᓐᓇᐃᑦ ᓵᓚᐅᓂᐅᔪᑦ ᓵᓚᖃᖅᐸᓪᓕᐊᔪᓄᑦ ᐊᒥᖅᑳᖃᑦᑕᐅᑎᔪᓂ ᑕᒪᒃᑭᓗᒃᑖᓂ ᓵᓚᖃᕋᓱᐊᕐᓂᐅᔪᒃᑰᕆᐊᖃᕋᔭᖅᐳᑦ ᓵᓚᐅᙲᓐᓇᕐᓗᑎᒃ ᐱᓂᕐᒧᑦ ᓵᓚᖃᕋᓱᐊᕐᓂᐅᔪᒥ.

ᕙᓪᒃᓄᕐ ᐅᖃᓚᐅᖅᐳᖅ ᐃᓱᒪᒋᓚᐅᖅᐸᖓ ᐋᖅᑭᒃᓯᒪᓂᖓ ᓈᒻᒪᖕᓂᖓᓂ ᐊᒻᒪ ᖁᕕᐊᓇᖅᖢᓂ.

ᐅᖃᓚᐅᖅᐳᖅ ᐊᓕᐊᓇᐃᕐᔪᐊᓚᐅᕆᕗᖅ ᐃᓅᖃᑎᖃᕐᓂᕐᒥ ᐱᙳᐊᖅᑎᓂᑦ ᐊᓯᖏᓐᓂ ᑲᑎᙵᓂᐅᔪᓂ ᖃᓄᐃᓐᓂᐅᔪᒥ, ᐊᒻᒪ ᐃᓚᐅᖃᑕᐅᓂᕐᒥ ᖃᔅᓯᒐᓚᖕᓂ ᓅᕙᓐᓛᓐᒥ ᐱᖅᑯᓯᑐᖃᖏᓐᓂᑦ.

“ᐊᓇᐅᓕᒑᕐᓂᖅ ᐊᖏᓛᖑᓪᓗᓂ ᐃᓚᒋᔭᐅᓚᐅᖅᐳᖅ ᐊᐅᓪᓛᕐᓂᐅᔪᒥ ᑕᒪᐅᙵᖅᓯᒪᒐᑦᑕ ᑖᔅᓱᒧᖓ, ᐄᑦᑎᐊᖅ, ᑭᓯᐊᓂ ᕿᒥᕐᕈᓇᕐᓂᕐᒥ ᓴᐃᓐᑦ ᔮᓐᔅᒥ ᓄᖅᑲᖔᓚᐅᑲᖕᓂᑦᑎᓐᓂ ᑲᒪᓇᑦᑎᐊᓚᐅᖅᐳᖅ.

“ᐃᓄᑦᑎᐊᕙᒻᒪᕆᐅᕗᑦ ᐊᒻᒪ ᑐᙵᓇᕐᓂᖏᑦ ᑲᒪᓇᕐᔪᐊᓚᐅᖅᐳᖅ.

“ᑭᒃᑯᓕᒫᑦ ᐊᓇᐅᓕᒑᕐᕕᖕᒦᕋᔭᖃᑦᑕᓚᐅᖅᐳᑦ ᐊᒻᒪ ᐱᖃᓐᓇᕆᔭᓕᐅᕐᔪᐊᖅᖢᑎᒃ.

“ᖃᓂᒡᓕᕐᔪᐊᕐᓂᖃᓚᐅᖅᐳᒍᑦ ᑲᑎᙵᓂᐅᔪᓂ ᕼᐋᓕᕚᔅᒥ/ᑖᑦᒪᑦ ᐃᓂᐅᔪᒥ ᓅᕙ ᔅᑰᓯᐊᒥ ᑕᐃᔭᐅᔪᓂ Bombers-ᓂ.”

ᕙᓪᒃᓄᕐ ᐅᖃᓚᐅᖅᐳᖅ ᓯᕗᓪᓕᖅᐹᕆᕙᖓ ᐊᐅᓪᓛᕐᓂᖓᓂ “ᐅᔭᖅᑲᒧᑦ” ᐊᒻᒪ ᖄᖏᐅᑎᓚᐅᖅᐳᖅ ᓂᕆᐅᒋᓚᐅᖅᑕᓕᒫᖏᓐᓂ.

ᐅᖃᓚᐅᖅᐳᖅ ᖁᕕᐊᒋᕐᔪᐊᓚᐅᖅᑕᖓ ᐊᑐᕐᓂᑯᖏᓐᓂ ᐊᒻᒪ ᐅᑎᓪᓚᕆᒃᑲᔭᖅᑐᖅ ᐱᕕᒃᓴᖃᒃᑲᓐᓂᑐᐊᕐᓂᖅᐸᑦ.

“ᐅᕙᑦᑎᓐᓄᑦ, ᐃᓛᓐᓂᓚᐅᓱᖓᖅ ᐱᓕᕆᓂᖃᑦᑎᐊᓚᐅᙱᑉᐳᒍᑦ ᑲᑎᙵᓂᐅᔪᑦ ᐃᓱᐊᓅᕐᓂᖏᓐᓂ 6-ᖑᔪᓄᑦ ᐅᓪᓚᖕᓂᐅᔪᓄᑦ ᐱᙳᐊᕐᓂᐅᔪᒥ, ᐊᒻᒪ ᑕᐃᒃᑯᐊ ᖃᔅᓯᐊᕐᔪᐃᑦ ᑕᒻᒪᕐᓂᐅᔪᑦ ᐅᕙᓂ ᑕᐃᑲᓂᓗ ᐱᓕᕆᑦᑎᐊᙱᓐᓂᖃᓚᐅᖅᐳᑦ ᐃᓱᐊᓂ.

“ᐊᑕᐅᓯᖅ ᐅᔾᔨᕆᓚᐅᖅᑕᕗᑦ ᐊᕐᓇᒥᑦ ᐊᖅᓴᒥᒃ ᐃᒋᑦᑎᑦᑎᐊᕈᓐᓇᖅᑐᒥ ᐊᖏᔪᒥ ᐱᕚᓪᓕᕈᑕᐅᓚᐅᖅᐳᖅ ᐋᖅᑭᒃᓱᐃᔪᓐᓇᕐᓂᐅᔪᒥ ᐊᓇᐅᓕᒑᕐᕕᖕᒥ.

“ᐱᙳᐊᖃᑎᖃᓚᐅᖅᐳᒍᑦ ᐊᑕᐅᓯᕐᒥ ᑲᑎᙵᓂᐅᔪᓂᑦ ᐊᑐᓚᐅᖅᑐᒥ ᐊᖑᒻᒥ ᐊᖅᓴᒥ ᐃᒋᑦᑎᔨᐅᔪᒥ ᑕᒪᕐᒥᓗᒃᑕᖅ ᓵᓚᖃᕋᓱᐊᕐᓂᐅᔪᒥ, ᐊᒻᒪ ᑕᑯᓚᐅᖅᐳᒍᑦ ᐊᕐᓇᒥ ᐊᖅᓴᒥ ᐃᒋᑦᑎᔨᖃᖅᖢᓂ ᐱᔪᓐᓇᖅᑎᑦᑎᕗᖅ ᑎᓴᒪᓂ ᐊᖑᑎᓂᑦ ᓯᓚᑖᓃᓐᓂᖃᕐᓂᕐᒧᑦ ᓴᐳᔾᔨᓯᒪᔨᐅᔪᓄᑦ ᐱᐅᑎᑦᑎᑦᑎᐊᕈᓐᓇᖅᑐᒥ.

“ᐱᙳᐊᖃᑎᕗᑦ ᐊᑭᕋᕗᑦ ᐱᐅᑦᑎᐊᓚᐅᖅᐳᑦ ᓵᓚᖃᕋᓱᐊᕐᓂᐅᔪᓕᒫᒥ – ᐃᓚᖃᖅᑐᒥ ᐊᕐᓇᓂ ᐱᙳᐊᖅᑎᑦᑎᒋᔭᑦᑎᓐᓂ – ᐊᒻᒪ ᔫᒪᐃᓐ ᑕᑎ ᐊᓇᐅᓯᓚᐅᖅᐳᖅ ᓱᒃᑲᔪᒻᒪᕆᖕᒥ ᓴᐅᒥᖕᒥ ᐊᓇᐅᓕᒑᕐᕕᖕᒥᐅᑕᐅᑉ ᓂᐊᖁᖓᑕ ᖁᓛᒍᑦ ᑭᖑᓪᓕᐅᔪᒥ ᐱᙳᐊᕐᓂᐅᔪᒥ ᑎᔅᓯᓇᓚᐅᖅᑐᒥ.”

Advertisement

Darrell Greer

Darrell Greer is Editor of Kivalliq News