ᓴᓇᐅᒐᓕᕆᔨ ᒍᕋᒡ ᒧᐊᒐᓐ ᓇᓚᐅᑦᑖᕆᕗᖅ ᓄᕙᒡᔪᐊᕐᓇᖅ-19 ᐱᑎᑦᑎᓯᒪᓂᖓᓂ 75 ᐳᓴᓐᑎᖓᓂ ᑮᓇᐅᔾᔭᒃᓴᓂᕆᒐᔪᒃᑕᖓᓂ.

ᐅᑯᐊ ᐃᓚᒋᔭᐅᕗᑦ ᖃᓄᐃᓕᐅᕐᓂᐅᔪᓂ ᒍᕋᒡ ᒧᐊᒐᓐ ᐱᓕᕆᓲᖑᓂᖓᓂ ᓴᓇᙳᐊᒐᓕᐅᖅᖢᓂ ᐊᒻᒪ ᑕᑯᒥᓴᐅᑎᓂᑦ. “ᐊᔪᕐᓇᕐᔪᐊᖅᐳᖅ ᐅᕙᓐᓄᑦ ᐸᖅᑭᓂᓐᓂ ᐃᓚᓐᓂᑦ. ᓂᕆᔭᕆᐊᖃᕆᕗᒍᑦᑕᐅᖅ,” ᓴᓇᐅᒐᓕᕆᔨ ᐅᖃᓚᐅᖅᐳᖅ ᐊᒃᓱᕈᕐᓇᕐᓂᐅᔪᒥ ᓄᕙᒡᔪᐊᕐᓇᕐᒧᑦ ᐱᓕᕆᓂᐅᔪᒥ.

“ᐊᔪᕐᓇᖅᑐᒃᑰᖅᓯᒪᕗᖓ ᓂᐅᕕᐊᒃᓴᖃᕆᐊᒃᓴᖅ … ᐊᔪᕐᓇᖅᑐᕐᔪᐊᖑᕗᖅ ᓴᓇᙳᐊᒐᓂ ᓂᐅᕕᐊᒃᓴᖃᕆᐊᒃᓴᖅ ᒫᓐᓇᐅᔪᒥ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19–ᒧᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑮᓇᐅᔭᓕᐊᖑᔪᑦ ᓴᓇᙳᐊᒐᖏᓐᓂ ᐸᖅᑭᓂᖃᓲᖑᕗᖅ ᓄᓕᐊᒥᓂ, ᑕᓪᓕᒪᓂᒃ ᐸᓂᖏᓐᓂ ᐊᒻᒪ ᐃᕐᙳᑕᖓᓂ. “ᐃᓛᓐᓂᒃᑯᑦ ᓂᐅᕕᐊᒃᓴᖃᓲᖑᕗᖅ (ᓴᓇᙳᐊᒐᓂ) ᐊᑭᑭᑦᑐᒻᒪᕆᐅᓪᓗᓂ ᐅᕙᓂ ᐃᖃᓗᖕᓂ, ᓴᓇᙳᐊᒐᑦᑎᐊᕚᓘᒐᓗᐊᖅᑎᓪᓗᒍ… ᐊᔪᕐᓇᕐᔪᐊᖅᐳᖅ ᐅᕙᓐᓄᑦ ᐸᖅᑭᓂᓐᓂ ᐃᓚᓐᓄᑦ. ᓂᕆᔭᕆᐊᖃᕆᕗᒍᑦᑕᐅᖅ.”

ᒧᐊᒐᓐ ᐆᒃᑑᑎᖃᓚᐅᖅᐳᖅ ᐊᑕᐅᓯᐅᔪᒥ ᓴᓇᙳᐊᒐᖏᓐᓂ ᐱᓇᔭᓚᐅᖅᑐᒥ $1,500–ᒥ ᑕᐃᔅᓱᒪᓂᒃᑲᓐᓂᖅ ᓂᐅᕕᐊᒃᓴᐅᓪᓗᓂ $600–ᑐᐃᓐᓇᕐᒧᑦ ᐅᕘᓇ ᒫᓐᓇᓕᓴᐅᔪᒥ ᖃᕋᓴᐅᔭᑎᒍᑦ ᑎᑭᓴᖅᑕᐅᓂᐅᔪᒧᑦ ᑕᐃᑲᓂ ᓄᕙᒡᔪᐊᕐᓇᕐᒧᑦ ᐱᓕᕆᓂᐅᔪᒥ.

ᓂᐅᕕᖅᑕᐅᓂᑭᖃᑦᑕᕋᓗᐊᖅᑎᓪᓗᒋᑦ, ᒧᐊᒐᓐ ᐅᖃᓚᐅᖅᐳᖅ ᓴᓇᙳᐊᒐᓕᐅᒃᑲᓐᓂᖅᐳᖅ ᐊᒻᒪ ᑕᑯᒥᓴᐅᑎᓂᑦ ᐊᒻᒪ ᑲᑎᖅᓱᖅᐸᓪᓕᐊᕙᖏᑦ ᓂᕆᐅᖕᓂᐅᔪᒥ ᐱᓕᕆᑦᑎᐊᒃᑲᓐᓂᕈᓐᓇᕐᓂᐊᕐᓂᖓᓂ ᐅᑎᕐᓂᐊᕐᓂᖓᓂ. ᑲᑎᖅᓱᐃᕙᓪᓕᐊᒋᕗᖅ ᓴᓇᙳᐊᕈᑎᒃᓴᓂ ᓲᕐᓗ ᐅᒥᖕᒪᐅᑉ ᓇᒡᔪᐊᓗᖏᓐᓂ, ᐊᓪᓚᙳᐊᑉ ᑑᒑᖓᓂ ᐊᒻᒪ ᑐᒃᑑᑉ ᓇᒡᔪᖏᓐᓂ ᓯᕗᓂᒃᓴᒧᑦ ᐊᑐᕐᓂᐊᖅᑕᒥᓂᑦ.

ᐅᖃᓚᐅᖅᐳᖅ ᑕᒪᓐᓇ ᐊᒃᓱᕈᕐᓇᓛᖑᕗᖅ ᐊᑯᓂᐅᓂᖓᓂ ᐊᑐᓚᐅᖅᓯᒪᔭᖓᓐᓂ ᐱᓕᕆᔨᒻᒪᕆᐅᓪᓗᓂ.

ᓴᓇᙳᐊᖅᑎᐅᓪᓗᓂ ᐊᕐᕌᒍᓄᑦ 27–ᓄᑦ ᐊᒻᒪᓗ ᐱᓕᒻᒪᒃᓴᖅᓯᒪᓪᓚᕆᒃᖢᓂ ᑕᑯᒥᓴᐅᑎᓂᑦ-ᓴᓇᔨᐅᓪᓗᓂ ᖁᓖᑦ ᐊᕐᕌᒍᑦ ᐅᖓᑖᓄᑦ, ᒧᐊᒐᓐ ᖃᔅᓯᒐᓚᖕᓂ ᓄᓇᓕᖅᐸᐅᔭᖕᓂ ᓂᐅᕕᐊᒃᓴᖃᕋᔪᒃᐳᖅ, ᐃᓚᖃᖅᑐᒥ ᓄᓇᑦᑕ ᓱᓇᒃᑯᑖᖏᓐᓂ ᑕᑯᔭᒐᖃᕐᕕᖕᒧᑦ.

ᔭᓯᑲ ᑰᑦᑎᖅ, ᑕᑯᔭᒐᖃᕐᕕᐅᑉ ᐊᐅᓚᑦᑎᔨᖓ ᐊᒻᒪ ᐸᖅᑭᔨᐅᔪᖅ, ᐅᖃᓚᐅᖅᐳᖅ ᐳᓚᕋᕐᓂᐅᔪᒧᑦ ᐅᐸᒃᑕᐅᒐᔪᖕᓂᐅᔪᒥ ᒪᑐᔭᐅᓚᐅᖅᐳᖅ ᐱᔾᔪᑎᖃᖅᑐᒥ ᐊᒥᓱᓄᑦ ᖃᓂᒻᒪᓐᓇᐅᔪᒧᑦ ᒫᔾᔨ 16–ᒥ. ᓴᓇᐅᒐᓄᑦ ᓂᐅᕕᐊᒃᓴᐅᓂᐅᔪᑦ ᓄᖅᑲᑦᑎᐊᒻᒪᕆᓚᐅᖅᐳᑦ.

ᑕᑯᔭᒐᖃᕐᕕᐅᑉ ᐃᖅᑲᓇᐃᔭᖅᑎᖏᑦ ᓴᖅᑭᔮᖅᑎᑦᑎᕙᓪᓕᐊᓕᓚᐅᖅᐳᑦ ᑐᓂᕐᕈᑎᒃᓴᒥ ᓂᐅᕕᕐᕕᖓᓐᓂ ᓂᐅᕕᐊᒃᓴᓂ ᕙᐃᔅᐳᒃᑯᑦ ᐊᒻᒪ ᐃᓐᔅᑎᒍᕌᒻᑯᑦ ᒪᑐᓚᐅᖅᑎᓪᓗᒋᑦ ᒫᔾᔨᒥ ᐱᕈᖅᓴᐃᓇᓱᐊᖅᖢᑎᒃ ᓂᐅᕕᐊᒃᓴᐅᔪᓂ ᐃᖏᕐᕋᓂᕆᔭᖓᓐᓂ, ᑭᓯᐊᓂ ᖃᔅᓯᐊᕐᔪᖕᓂ ᐊᔪᕈᑎᖃᖃᑦᑕᓚᐅᖅᐳᖅ.

“ᖃᕋᓴᐅᔭᑎᒍᑦ–ᓂᐅᕕᕐᓂᕐᒥ ᓂᐅᕕᐊᒃᓴᖃᕐᓂᕐᒥᓪᓗ ᐃᒪᖃᙱᓐᓇᑦᑕ ᑕᑯᔭᒐᖃᕐᕕᑦᑕ ᐃᑭᐊᖅᑭᕕᖓᓐᓂ ᑕᐃᒫᒃ ᓇᓗᓇᒐᓚᖃᑦᑕᖅᐳᖅ,” ᑰᑦᑎᖅ ᐅᖃᓚᐅᖅᐳᖅ. “ᐊᑯᓂᒐᓚᐅᔪᒥ ᐃᓄᖕᓂ ᓱᖏᐅᑎᓇᓱᐊᕐᓂᕐᒧᑦ ᐃᓱᒪᓂᕐᒧᑦ ᑭᓱᑐᐃᓐᓇᓂ ᓇᒃᓯᐅᔾᔨᔪᓐᓇᕐᓂᑦᑎᓐᓂ.”

ᐊᖏᓗᐊᙱᑦᑐᒥ ᓄᖅᑲᖅᑎᑦᑎᓂᖃᓚᐅᑲᒃᐳᖅ ᑕᑯᔭᒐᖃᕐᕕᐅᑉ ᑐᓐᓂᖅᑯᓯᐊᒃᓴᓄᑦ ᓂᐅᕕᕐᕕᖓᓄᑦ ᐱᑕᖃᖅᐸᒌᖅᑐᓄᑦ ᐱᓯᒪᔭᖏᓐᓄᑦ, ᐃᓗᓕᖃᖅᑐᒥ ᓴᓇᙳᐊᒐᓂ, ᑎᑎᕋᐅᔭᒐᐃᑦ, ᓂᔾᔮᔾᔪᑎᒃᓴᑦ, ᐅᖃᓕᒫᒐᑦ ᐊᒻᒪ ᐊᔾᔨᓕᐅᒐᕐᓂ ᐊᒥᓱᓄᑦ ᓴᓇᐅᒐᓕᕆᔨᓄᑦ.

“ᓂᐅᕕᕈᓐᓇᙱᓐᓂᖅᓴᐅᓯᒪᕗᒍᑦ ᑕᐃᒪᐃᒐᔪᓚᐅᕐᓂᖓᑎᑐᑦ ᐃᓂᒃᓴᖃᙱᓐᓇᑦᑕ. ᓂᐅᕕᖅᑕᐅᖁᕙᕗᑦ ᐃᓇᖏᓚᐅᖅᑳᕋᑎᒍᑦ,” ᐅᖃᓚᐅᖅᐳᖅ.

ᐃᓂᒋᔭᐅᔪᖅ ᒪᑐᐃᒃᑲᓐᓂᓚᐅᖅᐳᖅ ᐃᓂᒃᓴᓕᐅᖅᖢᑎᒃ ᑭᓯᐊᓂ ᔪᓚᐃ 7–ᒥ ᐊᒻᒪ ᐊᖏᓗᐊᙱᑦᑐᒥ ᐅᑎᕐᓂᖃᖅᓯᒪᕗᖅ ᓂᐅᕕᖅᑕᐅᓂᐅᔪᓄᑦ, ᐅᖃᐅᓯᐅᓪᓗᓂ ᑰᑦᑎᕐᒧᑦ.

ᐊᑕᐅᓯᕐᒥ 10–ᓄᑦ ᐃᓄᖕᓂ ᐊᑐᓂ ᐅᓪᓗᕐᒥ ᐃᓯᕈᓐᓇᕈᑎᓄᑦ ᐃᓂᐅᔪᒃᑯᑦ, ᐊᖏᓛᖑᔪᒥ ᑕᓪᓕᒪᓂ ᐊᑕᐅᑦᑎᒥ.

“ᒫᓐᓇ ᒪᑐᐃᖅᓯᒪᑲᑕᓕᕋᑦᑕ ᐃᓚᖏᓐᓂ ᓂᐅᕕᖅᑕᐅᔪᖃᑕᑲᑕᓕᖅᐳᖅ ᐅᕙᓂ ᑕᐃᑲᓂᓗ ᐊᒻᒪ ᓂᐅᕕᖅᑎᐅᔫᑉ ᖁᕕᐊᑦᑕᖕᓂᖅᑖᓲᖑᕗᖓ ᑭᓇᑐᐃᓐᓇᒥᒃ ᓂᐅᕕᖅᑐᖃᖅᑎᓪᓗᒍ ᖃᐅᔨᒪᔭᓐᓂ ᐱᐅᕐᔪᐊᕐᓂᖓᓂ ᐊᒻᒪ ᖁᕕᐊᓱᒃᖢᑎᒃ ᐱᓂᐊᕐᓂᖓᓐᓂ, ᖁᕕᐊᓇᖅᓯᒃᑲᓐᓂᕆᕗᖅ,” ᑰᑦᑎᖅ ᐅᖃᓚᐅᖅᐳᖅ. “ᖁᕕᐊᕐᔪᐊᖅᐳᖓ ᐅᓄᕐᓂᖅᓴᓂ ᐃᓄᖕᓂ ᐃᓯᕈᓐᓇᖅᓯᓛᕐᓂᖏᓐᓂ ᐊᒻᒪ ᓂᐅᕕᕐᓗᑎᒃ ᐱᐅᔫᑎᒻᒪᕆᐊᓗᖕᓂ.”

ᒧᐊᒐᓐ ᖁᕕᐊᑉᐳᖅ ᐅᓪᓗᑦᑎᐊᕙᐅᓂᖅᓴᐅᔪᓐᓇᕐᓂᐊᖅᑐᓄᑦ. ᑐᒃᓯᕋᓚᐅᕋᓗᐊᖅᐳᖅ ᓂᖃᐃᓱᕐᓂᕐᒧᑦ ᑭᓯᐊᓂ ᐅᖃᓚᐅᖅᐳᖅ ᐅᖃᐅᔾᔭᐅᓚᐅᕐᓂᖓᓂ ᑮᓇᐅᔭᓕᐊᖏᑦ ᓱᓕ ᖄᖏᐅᑎᓯᒪᓂᖓᓐᓂ ᐱᓕᕆᐊᖑᔪᒧᑦ ᐃᓱᖓᓐᓂ.

“ᐸᒡᕕᓇᖅᐳᖅ ᐃᓛᓐᓂᒃᑯᑦ … ᑭᓯᐊᓂ ᐆᒪᓂᐊᖅᐳᖓ,” ᐅᖃᓚᐅᖅᐳᖅ.

ᑐᒃᓯᕋᓚᐅᕆᕗᖅ ᓄᓇᕗᒻᒥ ᒐᕙᒪᒃᑯᓐᓄᑦ ᐃᓄᓕᒫᓄᑦ ᓴᓇᐅᒐᓕᕆᓂᕐᒧᑦ ᐱᒋᐊᕈᑕᐅᔪᒥ, ᐊᑐᐃᓐᓇᖃᖅᑎᑦᑎᔪᒥ ᓂᕈᐊᖅᑕᐅᓯᒪᔪᓄᑦ ᓴᓇᐅᒐᓕᕆᔨᐅᔪᓄᑦ $5,000–ᒥ $50,000–ᒧᑦ ᐃᑲᔪᖅᓯᖅᑕᐅᓂᕐᓄᑦ. ᑐᒃᓯᕋᕐᓂᕐᒧᑦ ᐃᓱᓕᕝᕕᒃᓴᖓ ᑕᐃᔅᓱᒧᖓ ᐱᓕᕆᐊᖑᔪᒧᑦ ᒪᑐᓚᐅᖅᐳᖅ ᓯᑎᐱᕆ 1–ᒥ.

Advertisement

Derek Neary

Derek Neary has been reporting on developments in the North for 18 years. When he's not writing for Nunavut News, he's working on Northern News Services' special publications such as Opportunities North,...