ᓘᒃᑖᖅ ᒪᐃᑯᓪ ᐹᑐᓴᓐ ᓴᖅᑭᑎᑦᑎᓚᐅᖅᐳᖅ ᓄᓇᕘᑉ ᒪᑐᐃᒃᑲᓐᓂᕐᓂᐊᕐᓂᕐᒧᑦ ᐸᕐᓇᐅᑎᖏᓐᓂ ᐊᒥᐊᒃᑰᔪᒧᑦ ᑕᖅᑭᐅᔪᒥ ᔫᓂ 15–ᒥ ᑐᓴᒐᒃᓴᓕᐊᖑᔪᒥ.

ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓ ᖃᐅᔨᓴᐃᓐᓇᕐᓂᐊᖅᐳᖅ ᓄᕙᒡᔪᐊᕐᓇᕐᒧᑦ-ᐱᔾᔪᑎᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑎᓕᐅᕈᑕᐅᔪᓂ ᐱᓇᓱᐊᕈᓰᑦ ᒪᕐᕉᒃ ᐊᓂᒍᑐᐊᕌᖓᑦ.

ᐱᒋᐊᕐᓗᓂ ᔫᓂ 22–ᒥ, ᓇᖕᒥᓂᖅ ᐱᔨᑦᑎᕋᖅᑎᐅᔪᓂ ᑐᓂᓯᔨᐅᔪᓂ ᓲᕐᓗ ᓄᔭᓕᕆᔩᑦ ᐊᒻᒪ ᑯᑭᓕᕆᔨᐅᔪᓂ ᒪᑐᐃᒃᑲᓐᓂᕈᓐᓇᓛᕆᕗᑦ. ᑭᓯᐊᓂ ᐊᑕᐅᓯᐅᖃᑎᖃᕐᓂᐅᔪᓂ ᐱᓕᕆᓂᐅᔪᓂ ᐱᔪᓐᓇᖅᑎᑕᐅᓂᐊᖅᐳᑦ. ᐃᒡᓗᕐᔪᐊᖑᔪᑦ ᓇᖕᒥᓂᖅ ᓴᐳᔾᔨᓯᒪᓂᕐᒧᑦ ᐊᓐᓄᕌᖃᕆᐊᖃᕐᓂᐊᖅᐳᑦ (PPE) ᐊᑐᐃᓐᓇᐅᔪᓂ ᐱᓕᕆᔾᔪᔾᔭᐅᕙᒃᑐᓄᑦ ᐊᒻᒪ ᐱᔨᑦᑎᕋᖅᑎᐅᔪᓄᑦ ᑐᓂᓯᔨᐅᔪᓄᑦ ᐱᔭᕆᐊᖃᖅᐸᑕ.

Nunavut bars and restaurants will reopen at half capacity on June 22, 2020. pixabay photo

ᑕᕐᕆᔭᕐᕕᐅᔪᑦ ᐊᒻᒪ ᑐᒃᓯᐊᕐᕕᐅᔪᑦ ᒪᑐᐃᒃᑲᓐᓂᕈᓐᓇᖅᓯᓂᐊᕆᕗᑦ.

ᑭᖑᓪᓕᖅᐹᖑᔪᓂ, ᐃᒥᕐᕖᑦ ᐊᒻᒪ ᓂᕆᕖᑦ ᒪᑐᐃᒃᑲᓐᓂᕈᓐᓇᖅᓯᓂᐊᕆᕗᑦ ᓇᑉᐸᓪᓗᐊᖓᓂ ᐃᓄᖃᕈᓐᓇᕐᓂᖓᓂ. ᐅᑯᐊ ᐱᓕᕆᕝᕕᐅᔪᑦ ᒪᓕᒋᐊᖃᖅᐳᑦ ᐃᓅᖃᑎᒥᓂᒃ ᐅᖓᓯᒌᒋᐊᖃᕐᓂᐅᔪᓂ ᐱᓕᕆᓂᐅᔪᓂ. ᑭᖑᓪᓕᖅᐹᒥ ᑎᑭᓴᐃᔪᓐᓇᕐᓂᐅᔪᒥ ᐃᒥᐊᓗᖕᒧᑦ 9 ᐅᓐᓄᒃᑰᓂᐊᖅᐳᖅ.

ᐃᒥᕐᕖᑦ ᓯᕗᓪᓕᖅᐹᒥ ᐊᕕᒃᑐᖅᑕᐅᓯᒪᓚᐅᓚᐅᕋᓗᐊᖅᐳᑦ ᖁᑦᑎᒃᑐᒥ–ᐅᓗᕆᐊᓇᕐᓂᐅᔪᒥ ᖃᓄᐃᓕᐅᕐᓂᐅᔪᒥ ᓄᓇᕘᑉ ᐊᖅᑯᑎᖓᓂ, ᓄᓇᕗᒻᒥ ᒐᕙᒪᒃᑯᑦ ᒪᑐᐃᖅᐸᓪᓕᐊᒃᑲᓐᓂᕐᓂᐅᔪᒥ ᐸᕐᓇᐅᑎᖓᓐᓂ, ᑭᓯᐊᓂ ᕿᑎᖅᐸᓯᐊᓂ–ᐅᓗᕆᐊᓇᕐᓂᐅᒋᔭᐅᓕᖅᐳᖅ ᖃᓄᐃᓕᐅᕐᓂᐅᔪᓂ.

ᐊᐱᕆᔭᐅᒐᒥ ᖃᓄᐃᒻᒪᑦ ᐅᓇ ᐊᓯᔾᔨᕐᓂᖃᓚᐅᕐᓂᖓᓂ, ᐹᑐᓴᓐ ᐅᓂᒃᑳᓚᐅᖅᐳᖅ, “ᐱᓕᕆᓂᖃᖅᐳᖅ ᐃᒥᐊᓗᖕᒧᑦ ᒪᓕᒐᕐᒨᖓᓂᐅᕗᖅ ᐊᒻᒪᓗ ᐋᖅᑭᒃᓱᐃᓇᓱᐊᕐᓂᖓᓂ ᑭᓖᖃᖅᑎᑦᑎᓂᕐᒥ ᖁᑦᑎᒃᑐᒥ–ᐅᓗᕆᐊᓇᕐᓂᐅᔪᓂ ᖃᓄᐃᓕᐅᕐᓂᐅᔪᓂ ᐃᓚᐅᖃᑕᐅᔪᓂ ᐃᒥᕐᕕᖕᓂᑦ ᑕᐅᑐᒃᖢᒍ ᓂᕆᕝᕕᐅᔪᓂᑦ.”

“ᐊᒻᒪᓗ ᐊᑑᑎᖃᑦᑎᐊᖅᑐᒥ ᐱᓕᕆᓂᖃᓚᐅᙱᓚᖅ ᑎᓕᐅᕈᑕᐅᔪᓂ ᐊᕕᒃᑐᖅᓯᒪᓂᐅᔪᓂ ᒪᕐᕉᔪᓂᑦ ᓯᕗᓪᓕᖅᐹᒥ ᑕᐅᑐᙳᐊᓚᐅᖅᑕᑦᑎᓐᓂ,” ᐅᖃᓚᐅᖅᐳᖅ ᐹᑐᓴᓐ.

ᔫᓂ 29–ᒥ, ᒪᒃᑯᒃᑐᒃᑯᕖᑦ, ᐅᓪᓗᕐᒥ ᑕᖕᒫᕐᕕᐅᔪᓂ ᐊᒻᒪ ᐊᑯᓂᐅᔪᒃᑯᑦ ᐸᖅᑭᕝᕕᐅᔪᓂ ᐳᓚᕋᕐᓂᕐᒧᑦ ᐱᔾᔪᑕᐅᔪᓄᑦ ᒪᑐᐃᒃᑲᓐᓂᕐᓂᐊᖅᐳᑦ. ᐊᑕᐅᓯᕐᒥ ᒪᕐᕉᖕᓂᓪᓘᓐᓃᑦ ᐳᓚᕋᖅᑐᖃᕈᓐᓇᕐᓂᐊᖅᐳᖅ, ᑕᐃᒃᑯᓄᖓ ᖃᑕᙳᑎᓪᓚᕆᖏᓐᓄᑦᑐᐊᖅ, ᐃᓯᕈᓐᓇᕐᓂᐊᖅᐳᑦ ᐊᑯᓂᐅᔪᒃᑯᑦ ᐸᖅᑭᕝᕕᐅᔪᓄᑦ ᐊᑕᐅᑦᑎᒥᒃ.

ᐹᑐᓴᓐ ᐅᖃᓚᐅᖅᐳᖅ ᐃᓱᒪᒋᓇᒍ ᓇᓚᐅᑦᑖᕆᓂᐅᔪᒥ ᖃᓱᕙᓪᓕᐊᓂᐅᔪᒥ ᑭᒡᓕᖃᖅᑎᑕᐅᓂᐅᔪᓂ ᒪᓕᒃᑐᓄᑦ ᐱᓇᓱᐊᕈᓯᐅᔪᓄᑦ ᒪᕐᕉᖕᓄᑦ, ᐱᑕᖃᑐᐃᓐᓇᕆᐊᖃᕐᓂᖓᓂ ᓴᖅᑭᑎᑦᑎᒃᑲᓐᓂᕐᓂᐅᔪᒥ ᐅᕝᕙᓘᓐᓃᑦ ᐊᓯᔾᔩᓂᐅᔪᒥ ᐅᑯᓂᖓ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓄᑦ ᐱᑕᖃᐃᓐᓇᖅᐳᑦ.

“ᐃᓂᒦᑎᓪᓗᑕ ᖃᓱᒋᐊᖅᓯᔪᓐᓇᕐᓂᐅᔪᒥ ᑭᒡᓕᖃᖅᑎᑕᐅᓂᐅᔪᓂ, ᓱᓕ ᐊᒃᑐᖅᑕᐅᓴᕋᐃᑉᐳᒍᑦ ᐊᒃᑐᐃᓂᐅᔪᓄᑦ ᐆᒪᙵᑦ ᓄᓇᕐᔪᐊᒥ ᐊᒥᓱᓄᑦ ᖃᓂᒻᒪᓐᓇᐅᔪᒧᑦ,” ᐅᖃᓚᐅᖅᐳᖅ.

ᓄᓇᕗᒻᒥᐅᑦ ᓱᓕ ᐊᑐᕆᐊᖃᖅᐳᑦ ᐃᓅᖃᑎᒥᓂᒃ ᐅᖓᓯᒌᒋᐊᖃᕐᓂᐅᔪᒥ, ᐊᒡᒐᒥᓂᑦ ᐅᐊᓴᒐᔪᒡᓗᑎᒃ ᐊᒻᒪ ᐊᖏᕐᕋᖅᓯᒪᐃᓐᓇᖅᐸᒡᓗᑎᒃ ᖃᓂᒪᒑᖓᒥᒃ, ᐅᖃᓚᐅᖅᐳᖅ ᓘᒃᑖᖅ.

 

Advertisement

Rajnesh Sharma

Rajnesh Sharma is a Canadian journalist, who has extensively travelled the world to experience various cultures. She has lived and worked internationally over the past decade, meeting and interviewing...