ᓄᓇᕗᒻᒥ ᒐᕙᒪᒃᑯᑦ ᓵᓚᖃᕆᐊᖃᖅᐳᑦ ᐱᕋᔭᖕᓂᒃᑯᑦ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᓂᐅᕕᐊᒃᓴᖃᕐᓂᐅᔪᓂ

220

ᐳᔫᕐᓂᖃᕈᓂ, ᐃᑭᑦᑐᖃᐃᓐᓇᖅᐸᙱᓚᖅ, ᑭᓯᐊᓂ ᐃᑭᑎᑦᑎᔭᕆᐊᖃᕐᓂᐊᖅᐳᑦ ᓄᓇᕗᒻᒥ ᒐᕙᒪᒃᑯᑦ ᐃᒃᓯᕙᐅᑕᖏᑕ ᐊᑖᒍᑦ ᐋᖅᑭᒃᓱᐃᓂᕐᒧᑦ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᓂᐅᕕᐊᒃᓴᐅᓂᖏᓐᓂ ᓄᓇᕗᒻᒥ.

ᑕᐃᒪᙵᓂ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᒪᓕᒐᕐᒥ ᓱᕋᐃᓂᐅᔪᓐᓃᓚᐅᖅᐳᖅ ᐅᒃᑐᐱᕆᒥ 2018–ᒥ, ᓄᓇᕗᒻᒥ
ᒐᕙᒪᒃᑯᑦ ᖄᖓᓂ ᐊᒃᑐᖅᓯᐊᕐᔪᒃᓯᒪᙱᓚᑦ ᐱᕋᔭᖕᓂᒃᑯᑦ ᓂᐅᕕᐊᒃᓴᖃᕐᓂᐅᕙᒃᑐᒥ ᐊᒻᒪ ᓴᖅᑭᑎᑦᑎᓯᒪᕗᑦ ᐊᕙᑎᐅᔪᒥ
ᐱᕋᔭᖕᓂᒃᑯᑦ ᓂᐅᕕᐊᖅᓴᖃᕐᓂᓂ ᓵᓚᖃᕐᔪᐊᕐᓂᖏᓐᓂ ᐊᑦᑕᓇᙱᓐᓂᖅᓴᐅᔪᒥ ᐊᒻᒪ ᐱᕋᔭᙱᓐᓂᒃᑯᑦ ᐱᓂᐅᔪᓂ
ᓂᐅᕕᕐᓂᕐᒧᑦ. ᒫᓐᓇᐅᔪᒥ, ᐱᕋᔭᙱᓐᓂᒃᑯᑦ ᓂᕈᐊᒐᒃᓴᐅᔪᒥ ᓄᓇᕗᒻᒥᐅᑦ ᐱᖃᕐᓂᖏᓐᓂ ᓂᐅᕕᕐᓂᖏᓐᓄᑦ
ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᐅᕘᓇᐅᕗᖅ ᐊᖏᖅᑕᐅᓯᒪᔪᒥ ᖃᕋᓴᐅᔭᑎᒍᑦ ᓂᐅᕕᖅᑎᐅᔪᓄᑦ ᑭᓯᐊᓂ
ᐅᕙᓂ ᓱᓕ ᑭᒡᓕᖃᕐᓂᐅᕗᑦ.

ᓇᒃᓯᐅᔾᔭᐅᓂᖓᓂ ᐊᑭᖃᖅᐳᖅ ᐃᓱᒪᒋᔭᐅᔭᕆᐊᖃᖅᑐᒥ ᑭᓯᐊᓂ ᑎᑭᓴᐃᓂᖅ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ
ᖃᕋᓴᐅᔭᑎᒍᑦ ᑭᓯᐊᓂ ᓂᐅᕕᕈᒪᔪᓄᑦ ᕿᓂᖅᑐᓂ ᒥᑭᑦᑐᒥ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ, ᐱᔭᕆᔪᑐᒃᑰᕐᓂᐅᔪᒥ
ᐋᖅᑭᒃᓱᐃᓂᕐᒥ ᐱᔪᓐᓇᕈᑕᐅᔪᒥ ᐊᒻᒪ ᐅᑕᖅᑭᓗᓂ ᐅᓪᓗᒐᓴᓂ ᐱᓇᓱᐊᕈᓯᕐᓂᓪᓘᓐᓃᑦ ᐊᑕᐅᓯᕐᒧᑦ
ᑎᑭᓴᖅᑕᖓᓂ ᑎᑭᓐᓂᐊᕐᓂᖓᓄᑦ ᐃᓚᖏᓐᓄᑦ ᐅᐊᑲᓪᓚᓗᐊᖑᕗᖅ. ᐊᒻᒪ ᑕᐃᒫᒃ ᓱᓐᓂᕈᑕᐅᕙᒃᑐᓂ
ᓱᐴᖅᑐᒐᕐᓂ ᒪᓕᒐᕐᒥ ᓱᕋᐃᓂᐅᔪᓐᓃᕋᓗᐊᖅᑎᓪᓗᒍ ᑕᒪᒃᑭᓕᒫᑦ ᐃᓗᐊᖅᓴᙱᓚᑦ ᐃᓚᓕᐅᔾᔨᓂᕐᒥ ᓇᖕᒥᓂᖅ
ᐅᖃᐅᓯᒃᓴᖏᓐᓂ, ᐃᓚᖃᖅᑐᒥ ᐊᑭᓕᒃᓴᓂᒍᒻᒥ ᐊᐅᒃᑕᔫᖓᓐᓂ ᐊᒻᒪ Paypal ᓂᐅᕕᕈᓐᓇᐅᑎᖏᓐᓂ,
ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓄᑦ ᓂᐅᕕᕐᓂᖏᓐᓄᑦ.

ᐊᒥᓱᑦ ᐃᓄᐃᑦ ᓂᐅᕖᓐᓇᖃᑦᑕᕐᓂᐊᖅᐳᑦ ᓄᓇᓕᖕᓂ ᐱᕋᔭᖕᓂᒃᑯᑦ ᓂᐅᕕᖅᑎᐅᔪᓂᑦ ᑕᒪᐅᓈᑯᑖᙱᖔᕐᓗᑎᒃ.
ᓄᓇᕗᒻᒥ ᓇᐃᓴᐅᑎᖏᑦ ᐃᒻᒥᓄᑦ ᐅᖃᓪᓚᒃᐳᑦ. ᓄᓇᕗᒻᒥ ᒐᕙᒪᒃᑯᑦ ᐱᓚᐅᖅᐳᑦ $12,000–ᑐᐃᓐᓇᓂ
ᖃᕋᓴᐅᔭᑎᒍᑦ ᓂᐅᕕᐊᒃᓴᐅᔪᓄᑦ ᐅᑯᓇᓂ ᒫᔾᔨᐅᑉ ᓄᙳᐊᓂ ᐊᒻᒪ ᐱᒋᐊᕐᓂᖓᓄᑦ ᓄᕕᐱᕆᒧᑦ ᑕᒪᑐᒪᓂ
ᐊᕐᕌᒎᔪᒥ. ᐃᒪᓐᓇᐅᙱᑦᑐᖅ ᐃᓄᐃᑦ ᐱᔪᓐᓃᕐᓂᖏᓐᓂ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ. 2018–ᒥ, ᑲᓇᑕᒥ ᑭᓪᓕᓯᓂᐊᖅᑎᒃᑯᑦ ᓴᖅᑭᑎᑦᑎᓚᐅᖅᐳᑦ ᐅᓂᒃᑳᓕᐊᒥ ᑕᑯᒃᓴᐅᑎᑦᑎᔪᒥ ᓄᓇᕗᑦ ᖁᑦᑎᓛᖑᔪᒥ ᐅᓄᕐᓂᐅᔪᓄᑦ
ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᐊᑐᕐᓂᐅᔪᒥ ᑲᓇᑕᓕᒫᒥ.

ᐅᓇ ᓱᓕᓗᐊᙳᐊᖅᐳᖅ ᐃᖃᓗᖕᓂ, ᓇᓂᔭᐅᓚᐅᖅᑐᒥ 33 ᐳᓴᓐᑎᐅᔪᒥ ᑕᐃᒃᑯᓇᙵᑦ ᐊᐱᖅᓱᖅᑕᐅᔪᓂ
ᐊᑐᖃᑦᑕᖅᐳᑦ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᖄᖏᖅᓯᒪᓕᖅᑐᓂ ᑕᖅᑭᓂᑦ ᐱᖓᓱᓂᑦ. ᑲᓇᑕᓕᒫᒥ
ᑕᐃᒪᐃᒐᔪᖕᓂᐅᔪᒥ ᐳᓴᓐᑎᖓ ᐊᑐᖅᑕᐅᓂᕐᒧᑦ ᓇᑉᐸᓪᓗᐊᕆᕙᖓ. ᐃᖃᓗᐃᑦ-ᒪᓂᕋᔭᒃ ᒪᓕᒐᓕᐅᖅᑎᖓ ᐋᑕᒻ ᓚᐃᑦᔅᑑᓐ
ᓯᕗᒻᒧᐊᕆᓯᒪᕗᖅ ᒪᓕᒐᓕᐅᕐᕕᖕᒥ ᖃᐃᖁᔨᓪᓗᓂ ᒐᕙᒪᐅᑉ ᐱᓕᕆᙱᓗᐊᕐᓂᖓᓂ ᓄᓇᓕᖕᓂ
ᓂᐅᕕᕐᕕᖃᕐᓂᐅᔪᒥ “ᓈᒻᒪᙱᓐᓂᖓᓂ.”

ᒥᓂᔅᑕᐅᔪᖅ ᑮᓇᐅᔭᓕᕆᔨᒃᑯᓐᓄᑦ, ᔪᐊᔾ ᕼᐃᒃᔅ, ᑲᒪᒋᔭᖃᖅᑐᒥ ᐊᐅᓚᑦᑎᓂᕐᒥ ᓱᓐᓂᕈᑕᐅᕙᒃᑐᓂ
ᓱᐴᖅᑐᒐᕐᓂ ᐊᒻᒪ ᐃᒥᐊᓗᖕᓂ, ᓇᓗᓇᐃᖅᓯᓯᒪᕗᖅ ᐃᓚᑰᓂᐅᔪᓂ ᒫᓐᓇᐅᔪᒥ ᐱᓕᕆᔾᔪᓯᐅᔪᒥ ᐊᒻᒪ
ᐅᖃᖅᓯᒪᕗᖅ ᓴᖅᑭᑎᑦᑎᓛᕈᒪᓂᕐᒧᑦ ᓂᐅᕕᕐᕕᖕᓂᑦ. ᕼᐃᒃᔅ ᐅᖃᓚᐅᖅᐳᖅ ᐃᒻᒥᓂᒃ ᐊᒻᒪ
ᐃᖅᑲᓇᐃᔭᖅᑎᖏᓐᓂ ᐱᓕᕆᕙᓪᓕᐊᕗᑦ ᐋᖅᑭᒍᑎᒃᓴᐅᓂᐊᖅᑐᒧᑦ, ᑭᓯᐊᓂ ᐊᑯᓂᐅᓂᖅᓴᒥ
ᓄᓇᖃᖅᑎᐅᔪᑦ ᐅᑕᖅᑭᒍᑎᒃ, ᐃᓱᒪᓂᖃᖅᐸᓪᓕᐊᕗᖅ ᒐᕙᒪᒃᑯᑦ ᑐᓂᓯᔪᓐᓇᔾᔮᙱᓐᓂᖓᓐᓂ ᐱᔭᐅᔪᒪᔪᓂ
ᐃᓕᓯᒪᕐᔪᐊᖅᐳᖅ ᐃᓄᐃᑦ ᐃᓱᒪᖓᓐᓄᑦ. ᒐᕙᒪᒃᑯᑦ ᐱᓕᕆᓂᓯᒪᒐᓚᒃᐳᑦ ᓴᖅᑭᑎᑦᑎᓂᕐᒧᑦ
ᑲᔪᖏᖅᓴᐅᑎᓂᑦ ᓂᐅᕕᖅᐸᒃᑐᓄᑦ, ᐃᓚᖃᖅᑐᒥ ᒥᒃᖠᒋᐊᖅᑎᑦᑎᓂᕐᒥ ᒐᕙᒪᒃᑯᑦ ᖃᑭᓂᖏᓐᓂ $4
ᐊᑐᓂ ᒍᕌᒻᒥ $1–ᒧᑦ, ᑭᓯᐊᓂ ᓱᓕ ᓇᓗᓇᙱᓚᖅ ᓈᒻᒪᙱᓗᐊᕐᓂᖓᓂ.

ᐊᒥᓱᐊᓗᖕᓂ ᐱᓕᕆᓂᖃᖅᐳᑦ ᒐᕙᒪᒃᑯᑦ ᐱᓇᓱᐊᓪᓗᐊᖅᑕᖏᓐᓂ ᑭᓯᐊᓂ ᐱᔪᓐᓇᖅᑎᑦᑎᓗᑎᒃ
ᓄᓇᖃᖅᑎᐅᔪᓂ ᐱᖃᓯᐅᑎᓗᓂᒋᑦᑕᐅᖅ. ᓄᓇᕗᒻᒥ ᐱᔪᒪᓂᖃᕐᔪᐊᖅᑐᓂ ᓇᖕᒥᓂᖃᕐᓂᕐᒧᑦ ᐱᕕᒃᓴᖃᕐᓂᐅᔪᒥ
ᐊᒻᒪ ᐃᖅᑲᓇᐃᔮᓂᑦ, ᐱᓗᐊᖅᑐᒥ ᐃᓄᑭᓐᓂᖅᓴᐅᔪᓄᑦ ᓄᓇᓕᐅᔪᓄᑦ, ᓄᓇᓕᖕᓂ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ
ᓂᐅᕕᕐᕕᐅᔪᓂ ᒪᕐᕉᓕᖓᔪᓂ ᐱᓕᕆᓇᔭᖅᐳᑦ ᐊᑕᐅᓯᕐᒧᑦ ᐅᔭᖅᑲᒧᑦ. ᐊᑭᑦᑐᕋᐅᑎᓂᖃᕋᔭᖅᐳᖅ – ᐊᑭᖓ ᓈᒻᒪᑦᑎᐊᕈᓂ
– ᑐᕌᖓᓂᖃᕐᓗᓂ ᐱᕋᔭᖕᓂᒃᑯᑦ ᓱᐴᖅᑐᒐᕐᓄᑦ ᑕᐅᖅᓰᓂᐅᔪᒥ ᑐᓂᓯᐅᔮᕐᔪᒃᑎᓪᓗᒋᑦ ᐱᓕᕆᓂᐅᔪᒥ
ᓂᐅᕕᖅᑎᐅᔪᓐᓇᕋᔭᖅᑐᓂ. ᑕᒪᕐᒥᒃ ᓄᓇᓕᐅᔪᑦ ᐱᔪᒪᓂᖃᔾᔮᙱᓚᑦ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᓂᐅᕕᕐᕕᓂᑦ ᑕᐃᒫᒃ
ᐅᑯᐊ ᓂᐅᕕᕐᕕᖃᕋᔭᖅᑐᑦ ᐃᓱᒪᓕᐊᖑᔭᕆᐊᖃᕋᔭᖅᐳᑦ ᓄᓇᓕᖕᓂ ᐃᒻᒥᒃᑯᑦ. ᑭᓯᐊᓂ ᖃᐅᔨᒪᔭᐅᓪᓗᐊᖅᐳᖅ,
ᓂᐅᕕᕐᕕᖃᕋᔭᖅᑐᒥ, ᑭᓇᑐᐃᓐᓇᖅ ᕿᓂᖅᑐᒥ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᐃᓕᓯᒪᔪᓐᓃᕋᔭᖅᐳᖅ
ᐱᕋᔭᖕᓂᒃᑯᑦ ᓂᐅᕕᕐᕕᐅᕙᒃᑐᑦ ᐊᔭᐅᕆᓂᖓᓂ ᐱᕋᔭᖕᓂᒃᑯᑦ ᐃᒥᐊᓗᖕᓂ ᓂᐅᕕᐊᒃᓴᖃᕐᓂᕐᒥ ᐅᕝᕙᓘᓐᓃᑦ
ᐊᓯᖏᓐᓂ ᓱᔪᐃᔪᓐᓇᖅᑐᓂ ᐋᖓᔮᕐᓇᖅᑐᓂ ᑮᓇᖓᓄᑦ.

ᑐᓂᓯᓂᕐᒥ ᑎᓯᑦᑎᐊᖅᑐᓂ ᓂᐅᕕᕐᕕᓂᑦ ᓂᐅᕕᐊᒃᓴᖃᖅᑐᓂ ᓱᓐᓂᕈᑕᐅᕙᒃᑐᓂ ᓱᐴᖅᑐᒐᕐᓂ ᓴᖅᑭᑎᑕᐅᓂᖃᖅᑐᒥ ᖁᑦᑎᒃᑐᒥ ᐊᒻᒪ ᐊᐅᓚᑕᐅᑦᑎᐊᖅᑐᒥ ᐊᑐᒐᒃᓴᐃᑦ ᐋᖅᑭᒃᑕᐅᓯᒪᓂᖏᑎᒍᑦ ᐱᔨᑦᑎᕋᑐᐃᓐᓇᕋᔭᖅᐳᖅ ᑐᕌᒐᒃᓴᐅᔪᒥ ᓄᓇᕗᒻᒥ ᒐᕙᒪᒃᑯᓐᓄᑦ ᓴᐳᔾᔨᓯᒪᓂᒃᑯᑦ ᓄᓇᖅᑲᑎᖏᓐᓂ ᐱᕋᔭᖕᓂᒃᑯᑦ ᓂᐅᕕᕐᕕᐅᓲᓄᑦ ᑐᓂᓯᐅᔮᕐᔪᒃᑎᓪᓗᒋᑦ ᐱᕕᒃᓴᖃᕐᓂᐅᔪᒥ ᒪᓕᒐᑎᒍᑦ
ᓱᕋᐃᙱᑦᑐᒥ ᓂᐅᕕᕐᕕᐅᔪᓄᑦ.