Skip to content

ᓄᓇᕗᑦ ᑐᙵᓱᒃᑎᑦᑎᕗᖅ ᓯᕗᓪᓕᖅᐹᒥ ᓄᑕᕋᓛᖅᑖᖓᓂ 2021–ᒥ

ᐊᒡᒐᑕ ᔅᑖᒃᑕᐃᔪᓪ ᐃᓅᓚᐅᖅᐳᖅ 3:15 ᐅᓪᓛᒃᑯᑦ ᔭᓄᐊᕆ 1–ᒥ

ᐅᓪᓛᕐᔪᐊᒃᑯᑦ ᐃᑲᕐᕋᓂ ᔭᓄᐊᕆ 1–ᒥ ᕿᑭᖅᑕᓂ ᐋᓐᓂᐊᕕᖓᓂ (QGH) ᐃᖃᓗᖕᓂ, ᓄᓕᐊᕇᒃ ᐅᐃᖓᓗ ᐃᐊᕆᐊᓪ ᔅᑖᒃᑕᐃᔪᓪ ᐊᒻᒪ ᑎᒻ ᐳᕋᐅᓐ ᑐᙵᓱᒃᑎᑦᑎᓚᐅᖅᐳᑦ ᐊᒡᒐᑕ ᔅᑖᒃᑕᐃᔪᓪᒥ ᓄᓇᕐᔪᐊᒧᑦ, ᓄᓇᕘᑉ ᓯᕗᓪᓕᖅᐹᖑᓪᓗᓂ ᓄᑕᕋᓛᖓ 2021–ᒥ.

ᐃᓗᐊᖅᓴᐃᔨ ᒪᓕᓐᑕ ᐃᕼᐊᓗᐊᒃ, ᓴᐅᒥᖕᒥ, ᐊᒻᒪ ᓘᒃᑖᖅ ᕕᐊᓇ ᒪᐃᓐ ᐃᑲᔪᖅᓱᐃᕗᑦ ᒥᑭᑦᑐᑯᓗᖕᒥ ᐊᒡᒐᑕ ᔅᑖᒃᑕᐃᔪᓪ ᐊᓈᓇᖓ ᐃᐊᕆᐊᓪ ᔅᑖᒃᑕᐃᔪᓪ, ᕿᑎᐊᓂ, ᖁᖓᔮᖅᐳᖅ ᐃᕐᓂᕋᑖᖅᑕᖓᓂ. ᐃᓅᓪᓗᓂ 3:15 ᐅᓪᓛᒃᑯᑦ ᐊᒡᒐᑕ ᓄᓇᕘᑉ ᓯᕗᓪᓕᖅᐹᖑᓪᓗᓂ ᓄᑕᕋᓛᖅᑖᖑᕗᖅ 2021−ᒥ.photo courtesy of Government of Nunavut

"ᖁᔭᓕᕐᔪᐊᖅᐳᒍᑦ ᓇᒡᓕᒍᓱᑦᑎᐊᖅᑐᓂ ᐊᒻᒪ ᑲᒪᑦᑎᐊᖅᑐᓂ ᓯᖓᐃᔪᓕᕆᔨᐅᔪᓂ ᑲᑎᙵᓂᐅᔪᓂ ᕿᑭᖅᑕᓂ ᐋᓐᓂᐊᕕᖓᓂ ᐅᕙᑦᑎᓐᓂ ᐃᑲᔪᓚᐅᖅᑐᓂ ᓯᖓᐃᓂᓕᒫᓐᓂ, ᐊᒻᒪᓗ ᖁᔭᓕᕐᔪᐊᖅᐳᒍᑦ ᑲᒪᓇᖅᑐᓂ ᐃᕐᓂᓱᒃᓰᔨᒋᓚᐅᖅᑕᑦᑎᓐᓂ ᑲᑎᙵᓂᐅᔪᓂ, ᐃᓚᖃᖅᑐᒥ RN (ᐃᓗᐊᖅᓴᐃᔨᒻᒪᕆᒃ) ᒪᓕᓐᑕ ᐃᕼᐊᓗᐊᒃ, ᓘᒃᑖᖅ ᕕᐅᓇ ᒪᐃᓐ, ᐃᓗᐊᖅᓴᐃᔨᒻᒪᕆᒃ ᑭᐊᓕᓐ ᑯᓕᓄᔅᑭ ᐊᒻᒪᓗ ᐃᕐᓂᓱᒃᓰᔨ ᒪᐃᒐᓐ ᓚᕕ ᒪᐃᓴᓐᒥ." ᑎᑎᕋᓚᐅᖅᐳᑦ ᐅᐃᒌᒃ ᐅᖃᐅᓯᒃᓴᓕᐊᖑᔪᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ.

ᐊᑎᓗᒃᑖᖓ ᐊᒡᒐᑕ ᒃᓛᑎᐊ ᒍᐃᓂᑦ ᔅᑖᒃᑕᐃᔪᓪ ᐊᒻᒪ ᐃᓅᓚᐅᖅᐳᖅ 3:15 ᐅᓪᓛᒃᑯᑦ ᐅᖁᒪᐃᓐᓂᖃᖅᖢᓂ 4 ᐸᐅᓐᓂ, 6 ᐊᐅᓐᓯᔅᓂ ᐊᒻᒪᓗ ᑕᑭᓂᖃᖅᖢᓂ 42.5 ᓴᓐᑕᒦᑕᓂ.

"ᖁᒃᓴᓪᓚᓚᐅᖅᐳᒍᑦ ᐊᒡᒐᑕ ᓄᓇᕗᒻᒥ ᓯᕗᓪᓕᖅᐹᖑᓪᓗᓂ ᓄᑕᕋᓛᖑᓂᖓᓂ 2021–ᒥ!" ᐃᓚᒋᐊᖅᓯᓚᐅᖅᐳᑦ.

ᐅᐃᒌᒃ ᖁᕕᐊᓱᒃᑕᐅᓚᐅᖅᐳᑦ ᓄᑕᕋᓛᒧᑦ ᐴᖑᔪᒥ ᓴᓇᔭᐅᓚᐅᖅᑐᒥ ᐋᓂ ᐲᑦᑕᐅᓛᓯᒧᑦ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓂ ᒥᖅᑯᓄᑦ ᓴᓇᓂᐅᔪᒥ ᐱᓕᕆᐊᖑᔪᒥ ᐅᐱᒋᔭᐅᓂᖓᓄᑦ ᓄᓇᕗᒻᒥ ᓯᕗᓪᓕᖅᐹᖑᔪᒥ ᓄᑕᕋᓛᖅᑖᕆᔭᐅᓂᖓᓄᑦ 2021–ᒥ.

"ᖁᕕᐊᓱᑦᑎᐊᖅᐳᒍᑦ ᐴᖑᔪᒥ; ᐱᐅᔪᒻᒪᕆᐊᓗᒃ. ᐅᐊᑲᓪᓚᖔ ᐱᓕᕆᐊᒃᓴᑦᑎᐊᕙᒻᒪᕆᐊᓗᒃ!"

ᐅᐃᒌᒃ ᑭᒃᑯᓕᒫᓂᒃ ᐊᕐᕌᒍᒥ ᓄᑖᒥᒃ ᖁᕕᐊᓱᖁᔨᓚᐅᖅᐳᑦ ᐊᒻᒪᓗ ᐱᐅᓂᖅᐹᒥ ᐃᓱᒪᒋᔭᐅᑦᑎᐊᕐᓂᖏᓐᓂ ᐊᕐᕌᒍᒧᑦ ᓵᙵᔭᑦᑎᓐᓄᑦ.

"ᖁᔭᓐᓇᒦᒃᑲᓐᓂᖅ ᑭᒃᑯᓕᒫᓄᑦ ᐃᑲᔪᓚᐅᖅᑐᓄᑦ ᐃᓅᑎᑦᑎᓂᕐᒧᑦ ᒥᑭᑦᑐᑯᓗᖕᒥ ᐊᒡᒐᑕᒥ ᐅᕙᑦᑎᓐᓄᑦ ᐊᒻᒪᓗ ᖁᕕᐊᓱᒋᑦᑎ ᐊᕐᕌᒍᒥ ᓄᑖᖑᔪᒥ, 2021! ᑕᐃᒪᑐᖅ 2021 ᓇᒃᓴᕐᓂᐊᖅᐳᖅ ᖁᕕᐊᓐᓂᐅᔪᒥ ᐊᒻᒪᓗ ᐱᐅᓂᐅᔪᒥ ᓄᓇᕗᒻᒥᐅᓄᑦ!"