ᓄᓇᓄᑦ ᓴᐅᓂᓐᓃᖅᐳᖅ, ᐅᖃᓚᐅᖅᐳᖅ ᓴᓇᐅᒐᓕᕆᔨ

339

ᐱᓕᕆᒃᑲᒻᒪᕆᐊᓗᒃ ᑕᕐᕋᓕᒃ ᑕᕕ – ᓴᓇᐅᒐᓕᕆᔨᐅᕗᖅ, ᐋᖅᑭᒃᓱᐃᔨᐅᔪᖅ, ᐊᑐᖅᑕᐅᓲᓂᒃ ᐱᐅᓴᐅᑎᓂᒃ ᐊᒻᒪ ᑎᑎᕋᖅᑎᐅᔪᒥ ᐱᕈᖅᐸᓪᓕᐊᔪᒥ ᖃᐅᔨᒪᔭᐅᕐᓂᐅᔪᒥ−ᖃᐅᔨᒪᔭᐅᒋᕗᖅ ᓴᖅᑭᑎᑦᑎᓂᐅᔪᒥ ᑲᒻᐸᓂᖓᓐᓂ, Ugly Fish ᓴᓇᐅᒐᖏᓐᓂ.

“ᖃᐅᔨᓚᐅᖅᐳᖓ ᐊᒡᒐᓐᓄᑦ ᐱᓕᕆᓪᓗᖓ ᐃᓱᒪᓐᓂᑦ ᓄᖅᑲᖅᑎᑦᑎᕙᖕᓂᖓᓂ,” ᐅᖃᓚᐅᖅᐳᖅ ᓴᓇᐅᒐᓕᕆᔨ, ᐋᖅᑭᒃᓱᐃᔨᐅᔪᖅ, ᐊᑐᖅᑕᐅᓲᓂᒃ ᐱᐅᓴᐅᑎᓂᒃ ᐊᒻᒪ ᑎᑎᕋᖅᑎ ᑕᕐᕋᓕᒃ ᑕᕕ, ᐱᒋᐊᓚᐅᖅᑐᒥ Ugly Fish ᓴᓇᐅᒐᖏᓐᓂ ᐊᓂᐊᑎᑦᑎᓂᐅᔪᒥ ᐱᓕᕆᐊᕆᔭᒥᓄᑦ.

“ᐱᐅᒋᔭᕋ Ugly Fish−ᒥ ᑭᓱᑐᐃᓐᓇᑦ ᐱᓕᕆᕐᔪᐊᕐᓂᖃᓚᐅᙱᓚᑦ. ᑭᓱᑐᐃᓐᓇᑦ ᐸᕐᓇᒃᓯᒪᓂᖃᓚᐅᙱᓚᑦ. ᓇᓂᓯᓂᕐᒥᓪᓘᓐᓃᑦ ᓯᕗᓪᓕᖅᐹᒥ ᖃᑯᖅᑕᖅ ᕿᓚᓗᒐᐅᑉ ᓴᐅᓂᖏᓐᓂ. ᓯᒡᔭᒧᐊᓚᐅᖅᐳᑦ ᐃᓯᒐᓐᓄᑦ. ᒪᕐᕉᒃ ᐃᒪᕐᒧᑦ−ᓴᓗᒻᒪᖅᓴᖅᓯᒪᔪᓂ ᓴᐅᓂᑯᓗᖕᓂ. ᐃᖅᑲᐅᒪᕗᖓ ᐃᔨᒋᕐᔪᐊᖅᖢᒋᑦ … ᓲᕐᓗ ᑐᓐᓂᖅᑯᓯᐊᑦ ᓄᓕᐊᔪᖕᒥ,” ᐅᖃᓚᐅᖅᐳᖅ ᑕᕕ ᓵᔅᑲᑑᓐᒥ.
ᓯᕗᓂᐊᓂ ᐊᔭᐅᕆᓚᐅᖅᐳᖅ ᐃᓅᓯᕐᒥ, ᐅᕙᓂ ᖃᐃᖁᔭᐅᔮᓚᐅᖅᐳᖅ.
ᑕᕕ ᐊᕕᒃᑐᐃᓲᖑᕗᖅ ᐊᖏᕐᕋᖃᕐᓂᕐᒥ ᓵᔅᑲᑑᓐᒥ ᐊᒻᒪ ᐊᖏᕐᕋᓪᓚᕆᐊᓂ ᓴᓪᓕᓂᑦ. ᒫᓐᓇᓕᓴᒥ, ᑕᑯᒃᓴᐅᓂᖃᓲᖑᕗᖅ ᐊᔅᓯᐊᕐᔪᖕᓂ ᐱᓇᓱᐊᕈᓯᕐᓂ ᓄᓇᕗᒻᒥ, ᖃᔅᓯᐊᕐᔪᖕᒥ ᓵᔅᑲᑑᓐᒥ, ᖃᔅᓯᐊᕐᔪᖕᓂ ᐱᓇᓱᐊᕈᓯᕐᓂ ᐅᑎᖅᓯᒪᓪᓗᓂ ᓄᓇᕗᒻᒥ.
“ᐊᒃᓱᕈᕐᓇᖓ ᐱᓕᕆᕗᖓ. ᐱᕕᒃᓴᖃᕐᓂᕐᒥ ᓴᖅᑭᑦᑐᖃᑐᐊᕌᖓᑦ, ᐱᓲᕆᕙᕋ. ᐊᒻᒪ ᓱᓕᓂᖅᑕᖃᐃᓐᓇᐅᔭᖅᐳᖅ – ᐊᐅᔭᒃᑯᑦ, ᑕᐃᑲᓃᓐᓂᐊᖅᐳᖓ,” ᐅᖃᓚᐅᖅᐳᖅ.
ᐊᔪᕐᓇᖅᓯᒃᑲᓐᓂᒐᓚᖕᓂᐊᖅᐳᖅ ᐃᕐᓂᕋᓛᖓ ᐃᓕᓐᓂᐊᕐᓂᐊᓕᕈᓂ, ᑕᕕ ᐅᖃᓚᐅᖅᐳᖅ ᓄᓇᕗᒻᒥ ᐊᑲᐅᙱᓕᐅᕈᑕᐅᔪᓂ – ᐊᑭᖓ ᐆᒪᓇᓱᐊᕐᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓕᓐᓂᐊᕐᓂᖅ – ᐃᓱᒪᓕᐅᕆᓂᐊᖅᐳᖅ ᐃᓱᒪᓕᐅᕆᓂᖓᓐᓂ.
“ᑭᓯᐊᓂ ᐊᓯᖏᓐᓂ ᐱᐅᓂᖅᑕᖃᐅᖅᐳᖅ ᐅᕙᓐᓄᑦ. ᐅᓇ ᐃᓕᖅᑯᓯᑦᑎᐊᕚᓗᒃ, ᑲᔾᔮᕐᓇᖅᑐᐊᓗᒃ ᓄᓇᖓ.”
ᓵᔅᑲᑑᓐᒥ, ᐊᖓᔪᖅᑳᖑᖃᑎᖃᖅᐳᖅ ᐴᒥ ᐊᑖᑕᖓᓂ, ᐊᓕᐊᓇᐃᒋᔭᖃᖅᖢᓂ ᐱᓕᕆᖃᑎᒌᖕᓂᖏᓐᓂ ᐱᖃᓐᓇᕆᔭᖏᓐᓂ, ᐊᒻᒪᓗᑦᑕᐅᖅ ᐃᓚᖏᓐᓂ ᐃᓚᒋᔭᒥᓂᑦ.
“ᐃᓗᐊᖅᐳᖅ. ᐊᖏᕐᕋᕆᔮᖅᑕᕋ. ᑭᓯᐊᓂ ᐆᒻᒪᑎᒐ ᑕᕐᓂᕋᓗ ᓄᓇᕗᒻᒦᑉᐳᖅ. ᐅᕙᓃᒃᑭᕗᖅ, ᑭᓯᐊᓂ ᐃᓂᑕᖃᙱᓚᖅ – ” ᑕᕕ ᐃᒻᒥᓂᒃ ᓄᖅᑲᖅᑎᖦᖢᓂ ᐊᒻᒪ ᐃᓪᓚᖅᓯᓪᓗᓂ.
“ᐃᔪᕐᓇᖅᐳᖅ, ᓲᕐᓗ Wizard of Oz. ᐊᑐᖅᑕᐅᓗᐊᓲᒥᒃ, ᑭᓯᐊᓂ ᓱᓕᕐᔪᐊᖅᑐᖅ.”
ᑕᐃᒫᒃ, ᑕᕕᒧᑦ, ᐃᓂᑕᖃᙱᓚᖅ ᐊᖏᕐᕋᑎᑐᑦ.
“ᑭᓱᓕᒫᑦᑎᐊᖅ. ᓄᓇᖓ. ᐃᒪᖓ. ᓴᐅᓂᓐᓃᑦᑐᖅ, ᕼᐃᓖ? ᐊᔭᒃᑲ ᐅᖃᐅᓯᕆᕙᓚᐅᖅᐸᖓ ᐱᕈᖅᓴᑎᓪᓗᒍ. ᖃᓱᖓᑦᑎᐊᕈᓐᓇᙱᓐᓂᖓᓐᓂ ᑭᓯᐊᓂ ᒥᓕᒑᑦᑎᐊᓕᕌᖓᒥᒃ ᐊᖏᕐᕋᒧᑦ, ᐊᐅᓪᓛᖅᓯᒪᒐᔪᓚᐅᕐᒪᑕ. ᐊᒻᒪᓗ ᓴᓪᓕᓃᖦᖢᖓ ᐃᒫᒃ, ‘ᐅᕙᙵᑦ (ᐅᖃᕐᓘᑎᕐᓂᖅ) ᐊᐅᓪᓚᕈᒪᕐᔪᐊᖅᐳᖓ. ᖃᓄᖅ ᐅᖃᓪᓚᒃᐱᑦ?’ ᑭᓯᐊᓂ ᒫᓐᓇ ᑐᑭᓯᐅᒪᑦᑎᐊᓕᖅᐳᖓ.”
ᐅᖃᐅᓯᖃᖅᐳᖅ ᐱᓐᓇᕆᔭᖃᕐᓂᖓᓂ ᓄᓇᒥᒃ ᐊᒻᒪ ᑕᕆᐅᕐᒥ ᐃᕐᓂᖓᓄᑦ, ᒪᓕᓲᖑᔪᒥ ᓴᐅᓂᖅᓯᐅᖅᑎᓪᓗᒍ. ᐱᓕᕆᓂᐅᔪᒥ ᐱᔭᕆᐊᖃᖅᑕᒥᓂᑦ ᐃᓄᑑᓗᓂ, ᓲᕐᓗ ᑎᑎᕋᕐᓂᕐᒧᑦ, ᑕᕕ ᐊᑑᑎᖃᓲᖑᕗᖅ ᓄᓇᓕᖕᓂ, ᐴ ᐊᑖᑕᖓᓄᑦ ᐊᒻᒪ ᐃᓚᖏᓐᓄᑦ.
ᓴᖑᑎᑦᑎᓂᕐᒧᑦ ᐃᓱᒪᑐᓂᖓᓄᑦ ᐃᓱᒪᒋᔭᖃᕐᓂᕐᒥ ᐊᑐᖅᑕᐅᓲᓂᒃ ᐱᐅᓴᐅᑎᓄᑦ, ᑕᕕ ᐅᖃᓚᐅᖅᐳᖅ ᐱᒋᐊᓚᐅᖅᐳᖅ ᑲᒪᒋᔭᖃᕐᓂᕐᒥ ᖁᓱᓂᐅᔪᒧᑦ.
“ᐱᔭᒃᓴᖃᐃᓐᓇᐅᔭᕐᓗᓂ ᐊᒻᒪ ᐊᒡᒐᒃᑲ ᐱᓕᕆᑎᓪᓗᒋᑦ. ᓇᓂᓯᓚᐅᖅᐳᖓ ᐊᒡᒐᓐᓄᑦ ᐱᓕᕆᓂᕐᒧᑦ ᐃᓱᒪᓐᓂ ᓂᐸᖏᖅᑎᑦᑎᕙᖕᓂᖓᓂ. ᐃᑲᕐᕋᐃᑦ ᐊᓂᒍᓲᖑᕗᑦ ᐊᒻᒪ ᐅᔾᔨᕆᓲᖑᙱᖦᖢᖓ, ᐊᒻᒪ ᐃᒃᐱᒍᓱᖕᓂᖃᖅᖢᖓ ᐱᓕᕆᑦᑎᐊᕐᓂᕐᒧᑦ ᐱᓕᕆᐊᕆᔭᕋ ᐊᑐᖅᑕᐅᓲᒥ ᐱᐅᓴᐅᑎᐅᔪᒥ ᐱᔭᕇᕌᖓᑦ,” ᐅᖃᓚᐅᖅᐳᖅ.
“ᑲᒪᓇᕐᓂᐅᓚᐅᖅᑐᖅ ᑕᐃᒪᓐᓇᑐᐃᓐᓇᖅ ᐱᕈᓚᐅᕐᓂᖓᓂ. ᐃᓄᐃᑦ ᐱᔪᒪᓂᖃᓚᐅᖅᐳᑦ ᓴᓇᔭᓐᓂ. Ugly Fish ᐃᒻᒥᓂᑐᐃᓐᓇᖅ ᐱᒋᐊᓚᐅᖅᐳᖅ ᐅᕙᓐᓂᑦ ᑭᓱᑐᐃᓐᓇᓂᒃ ᓴᓇᓪᓗᖓ.”
ᐃᓱᒋᓂᕆᔭᖏᑦ ᑐᕌᖅᑎᑦᑎᓚᐅᖅᐳᑦ ᓇᓗᓇᐃᒃᑯᑕᙳᖅᑐᓄᑦ ᓴᓇᓂᐅᔪᓄᑦ – ᑭᓇ ᐱᐅᒍᕈᓐᓇᙱᓚᖅ ᒃᓕᒃ ᐊᑕᔪᕐᒥ 2017−ᒥ, ᐅᕝᕙᓘᓐᓃᑦ ᒫᓐᓇᓕᓴᐅᓂᖅᓴᒥ Red Rose ᑏᒥ ᖃᕐᓕᓂᑦ? ᐃᒃᐱᒍᓱᖕᓂᖓ ᐱᙳᐊᕐᓂᕐᒧᑦ ᐅᖓᓯᓗᐊᕌᓗᒍᓐᓇᙱᓚᖅ, ᐃᓅᖃᑎᒌᖕᓄᖅ ᓯᐊᒻᒪᖅᑎᑦᑎᓂᐅᔪᒥ Ugly Fish−ᒧᑦ, ᑎᑎᕋᖅᐳᖅ: “ᓴᙱᓂᖅᓴᐅᓂᖓᓂ ᑏ, ᐃᑎᓂᖅᓴᐅᕗᖅ ᐊᐃᕋᖏᑦ.”
ᐊᐱᕆᔭᐅᒐᒥ ᐆᒻᒪᑎᖓ−ᒪᑐᐃᖓᑦᑎᐊᖅᖢᓂ ᐅᖃᐅᓯᖃᕐᓂᖓ ᑕᐃᒪᓐᓇᐃᑐᐃᓐᓇᖅᐸᖕᒪᖔᑦ, ᑕᕕ ᐅᖃᓚᐅᖅᐳᖅ:
“ᐅᕙᓐᓄᑦ, ᑲᒪᒋᔭᖃᖅᓯᒪᖅᑰᖅᐳᖓ ᐊᖏᔪᒻᒪᕆᐊᓗᖕᒥ ᐃᒻᒥᓂᒃ−ᖀᒥᒍᓱᖕᓂᕐᒥ ᐊᒻᒪ ᐃᒻᒥᓂᒃ−ᕿᐸᒍᓱᖕᓂᕐᒥ, ᐊᒥᓱᐊᓗᒃᑎᒍᑦ ᑕᐃᒪᐃᑉᐸᒃᑲᑦᑕ, ᐊᒻᒪ ᓇᓗᓕᕈᑎᒋᕙᒃᖢᑎᒍᑦ. ᑭᓱᓕᒫᓂᒃ ᓴᓇᓯᒪᔭᓐᓂᑦ, ᐊᒻᒪ ᓴᓇᐅᒐᓐᓂᑦ, ᓴᓇᙳᐊᖅᓯᓯᒪᕗᖅ ᐱᐅᓂᕐᓂᑦ.
“ᑎᑎᕋᕐᓂᓐᓂ, ᐱᒋᐊᓲᖑᕗᖅ ᐱᒋᐊᕈᒻᒥ ᑎᑎᕋᕐᓂᐅᔪᒥ ᑕᐃᒎᓯᒥᒡᓘᓐᓃᑦ, ᐃᒃᐱᒋᔭᕐᓂ ᐅᕝᕙᓘᓐᓃᑦ ᐃᖅᑲᐅᒪᓂᐅᔪᒥ. ᖃᐅᔨᒪᓗᐊᕐᓇᓂ ᑭᓱᒧᑦ ᐊᐅᓚᑕᐅᓂᕐᒥᑦ.”
ᑐᓂᓯᓲᒥᒃ ᓴᐃᓕᓂᕐᒥᑦ, ᐅᖃᓚᐅᖅᐳᖅ.
ᑕᕕᐅᑉ ᐱᓕᕆᐊᖏᑦ ᑕᑯᒃᓴᐅᑎᑕᐅᕗᖅ ᖄᕆᔭᐅᔪᒥ ᑭᖑᓪᓕᖅᐹᖑᔪᒥ ᐃᓄᐃᑦ ᓴᓇᐅᒐᖏᓐᓂ ᑕᖅᑭᑦ ᐱᖓᓱᑕᒫᒥ, ᐅᕙᖓ/ᐃᒻᒥᒍᑦ: ᑕᐅᑐᙳᐊᕐᓂᖅ ᑭᓇᐅᓂᑦᑎᓐᓂ ᐅᖃᓕᒫᖅᑕᐅᔪᓐᓇᕐᓂᐊᖅᖢᓂ ᐅᑭᐊᒃᓵᒥ ᓴᖅᑭᑎᑕᐅᓂᐅᔪᒥ.