ᑕᐃᑦᓱᒪᓂ ᒐᕙᒪᐅᔪᑦ ᐋᖅᑭᒃᓱᐃᕙᓪᓕᐊᓕᕐᒪᑕ ᐋᖅᑭᐅᒪᖏᓐᓂᕋᖅᑕᒥᖕᓂᒃ, ᖃᐅᔨᒪᓚᐅᖏᑉᐳᑦ ᑐᑭᓯᐅᒪᓚᐅᖏᑉᐳᓪᓗ ᓄᓇᖃᖅᑳᖅᓯᒪᔪᑦ ᓄᓇᖏᑦ ᐱᕙᓪᓕᐊᓯᒪᓕᐊᓂᖕᓂᖏᓐᓄᑦ ᒐᕙᒪᒋᔭᒥᖕᓂᒃ. ᐃᓄᕗᑦ ᖃᐅᔨᒪᓚᐅᕐᒪᑕᓕ ᖃᓄᐃᓕᐅᕆᐊᒃᓴᖅ ᐃᓚᔮᕇᖕᒥᖕᓂᒃ ᐃᓚᒥᖕᓂᒡᓗ ᐊᑲᐅᔪᒃᑯᑦ ᑕᑯᒃᓴᐅᑦᓯᐊᖅᑐᒃᑯᓪᓗ. ᐊᑯᓂ ᐊᐃᕙᐅᑎᖃᑦᑕᓚᐅᖏᒻᒪᑕᓗ ᖃᓄᖅ ᐊᖑᑎᑦ ᐊᕐᓇᐃᓪᓗ ᐊᖓᔪᖃᐅᑎᖏᑦᑕ ᐃᓱᒪᓕᐊᕆᔭᖏᓐᓂᒃ. ᑕᐃᒪᓐᓇ ᐅᓂᒃᑳᖅᖢᑎᒃ ᑲᑎᙵᔪᓄᑦ ᓄᓇᖃᑎᒌᓄᑦ, ᐅᖃᓪᓚᖃᑎᒌᓚᐅᖅᖢᑎᒡᓗ, ᖃᓄᐃᓕᐅᕈᑕᐅᓂᐊᖅᑐᓂᒃ ᐱᒋᐊᖅᑎᑦᓯᓕᖅᖢᑎᒃ.

ᐅᓪᓗᒥᐅᓕᖅᑐᖅ ᓄᑖᒥᒃ ᐊᑐᖅᑎᑕᐅᓕᖅᐳᒍᑦ ᖃᓄᐃᓕᐅᕐᓂᐊᕐᒪᖔᑦᑕ. ᑕᐃᒪ ᐃᓱᒪᒋᔭᓯ ᐅᕗᖓ ᑐᓂᕐᕈᑎᒋᓗᒋᑦ, ᐱᓕᕆᐊᕆᔭᐅᓂᐊᕐᒪᑦ ᑲᑎᒪᔨᐊᓛᓄᑦ, ᑲᑎᒪᔨᕋᓛᑦ ᑲᑎᒪᒍᑎᖃᓚᐅᕐᓗᑎᒃ ᖃᓄᐃᓕᐅᕆᐊᖁᔭᐅᒍᑕᐅᔪᒥᒃ ᐃᓱᒪᓕᐅᕈᑕᐅᓕᕐᓗᓂᓗ. ᖃᐅᔨᒪᕗᒍᓪᓗ ᑕᐃᒪᓐᓇᐃᓕᐅᕐᓂᖏᑦ ᐅᓪᓗᓄᑦ ᐊᒥᓱᓄᑦ ᐱᓇᓱᐊᕈᓯᓄᓪᓗ ᐊᒥᓱᓄᑦ ᑲᒪᒋᔭᐅᓂᐊᕐᓂᖓᓄᑦ ᑕᖅᑭᓕᒫᕐᓘᓐᓃᑦ ᒐᕙᒪᒃᑯᑦ ᐱᒍᒪᔭᖏᑦ ᐊᑐᖅᑕᐅᑦᓯᐊᕋᓗᐊᕐᒪᖔᑕ.

ᑕᐃᒪᓐᓇᐃᓕᐅᖅᑎᓪᓗᒋᑦ, ᓯᕗᓪᓕᕐᒥ ᐃᓱᒪᒋᔭᐅᓚᐅᖅᑐᖅ ᐅᕝᕙᓘᓐᓃᑦ ᖃᓄᐃᓕᐅᕈᑕᐅᓂᐊᓚᐅᖅᑐᖅ ᐊᓯᔾᔨᖅᑕᐅᔪᓐᓇᖅᖢᓂ ᐊᑲᐅᓂᖅᓴᒃᑰᕋᓱᐊᓗᐊᒧᑦ.

ᐃᓄᐃᑦ ᖃᐅᔨᒪᖕᒪᑕ ᕿᓚᒥᐅᓂᖅᓴᖅ ᐱᓕᕆᐊᕆᔭᐅᔪᓐᓇᕐᓂᖓᓄᑦ ᐱᔭᕆᐊᑐᖏᓐᓂᖅᓴᐅᖁᓪᓗᒍ ᐊᒃᓱᕈᕐᓇᖏᓐᓂᖅᓴᐅᖁᓪᓗᒍᓗ ᑮᓴᐅᔭᖅᑐᙱᓐᓂᖅᓴᐅᖁᓪᓗᒍᓗ ᐱᔨᑦᓯᕋᐅᓪᓗ.

ᐋᓐᓂᕐᓇᖅᑐᖅ ᕿᓚᒥᐅᓂᖅᓴᖅ ᐱᔭᐅᖁᓪᓗᒍ ᒐᕙᒪᒃᑯᑎᑐᑦ ᐱᓕᕆᐊᕆᖏᖔᕐᓗᒍ ᑕᐃᒪᓐᓇ ᐅᖃᐅᑎᔭᐅᖃᑦᑕᓕᖅᐳᒍᑦ ᐋᖅᑭᒃᑕᐅᔪᓐᓇᕐᓂᖓᓄᑦ ᖃᓄᐃᓕᖓᓂᕆᔭᕗᑦ ᐱᓯᒪᓂᕆᔭᖅᐳᓪᓗ ᑲᑎᑕᐅᓯᒪᓪᓗᑕ ᒫᓐᓇᐅᓕᖅᑐᖅ ᒐᕙᒪᒃᑯᓪᓗ ᐃᓕᖅᑯᓯᖓᓐᓂᒃ ᐊᑐᓕᕐᓂᑦᑎᓐᓄᑦ. ᐊᐱᕆᔭᐅᒍᒪ ᑭᓇᐅᖕᒪᖔᕐᒪ ᑭᐅᒐᔭᖅᐳᖓ ᑲᓇᑕᒥᐅᑕᐅᓂᓐᓄᑦ ᐃᓄᕕᐊᓗᖑᓪᓗᖓᓗ. ᑕᐃᒪᓐᓇ ᑲᓇᑕᒥᐅᑕᐅᖏᓐᓇᕐᓂᐊᕋᒪ ᑕᕆᐅᑉ ᐊᑭᐊᓂᒥᐅᑕᐅᙱᖦᖢᑕᓗ, ᑭᒡᓕᒋᔭᐅᔪᒥᐅᑕᐅᓂᕋᖅᑕᐅᒐᔭᖅᐳᖓ.

ᑕᒪᒃᑯᐊ ᐃᓕᖅᑯᓯᒃᑲ ᐱᖅᑯᓯᒃᑲᓗ ᑕᕆᐅᑉ ᐊᑭᐊᓂᒥᐅᑕᐅᖏᒻᒪᑕ ᑕᒫᓂᒥᐅᑕᐅᓪᓗᖓᓗ; ᐅᐱᒋᓪᓗᒋᓪ ᐱᖃᑎᒃᑲ ᐃᓅᖃᑎᒃᑲ, ᐃᓚᒃᑲᓗ ᑲᒪᒋᑦᓯᐊᕐᓗᑎᒃ ᐃᓅᖃᑎᒃᑲ; ᑕᐃᒪᓐᓇ ᐱᑦᓯᐊᖅᖢᖓᓗ ᒪᑐᐃᖔᑦᓯᐊᕋᒪ, ᑐᓐᖓᓇᖅᖢᖓᓗ ᐃᓚᐅᑎᑦᓯᒐᒪ ᑭᒃᑯᑐᐃᓐᓇᕐᓂᒃ; ᐱᔨᑦᓯᕋᖅᖢᒋᓪᓗ ᐃᑲᔪᖃᑦᑕᖅᖢᒋᓪᓗ ᐃᓚᒃᑲ ᐊᒻᒪ ᐅᕝᕙᓘᓐᓃᑦ/ᓄᓇᒥᐅᖃᑎᒃᑲ; ᑕᐃᒪᓐᓇᐃᖏᓐᓇᕐᓂᐊᕐᖢᖓ ᐊᖏᖃᑎᒋᓯᒪᓗᒋᑦ; ᐊᔪᙱᓴᖅᐸᓪᓕᐊᖏᓐᓇᖅᖢᖓᓗ ᐊᔪᙱᓴᐃᓐᓇᖅᖢᖓ, ᐊᒃᓱᕈᖃᑦᑕᖅᖢᖓᓗ ᐱᓕᕆᓪᓗᖓ; ᐱᓕᕆᖃᑎᖃᖅᖢᖓᓗ ᐊᓯᓐᓂᒃ ᐊᑕᐅᓯᕐᒧᑦ ᐱᓇᓱᐊᕈᓯᖃᑎᖃᖅᖢᖓ; ᐱᒋᐊᕈᑎᖃᖅᐸᒃᖢᖓᓗ ᓄᑖᓂᒃ ᐊᒃᓱᕈᖅᖢᖓᓗ ᖃᓄᐃᓕᐅᕈᑎᒃᓴᓐᓂᒃ ᐃᓱᒪᒃᓴᖅᓯᐅᕈᑎᖃᖅᐸᒃᖢᖓ ᐊᒻᒪ ᐅᐱᒋᓪᓗᒋᑦ ᑲᒪᒋᑦᓯᐊᖅᖢᒋᓪᓗ ᓄᓇ, ᐆᒪᔪᖏᓪᓗ ᐊᕙᑎᒥᐅᑕᐃᓪᓗ. ᑕᐃᒪᓐᓇ ᐸᐸᓯᒪᔭᒃᑲ ᑕᐃᒪᙵᓂᑦ ᐊᑐᖅᐸᒃᑲ ᖃᐅᔨᒪᓪᓗᖓᓗ ᑭᒃᑰᓂᑦᑎᓐᓂᒃ.

ᓴᕆᒪᒋᕙᕋ ᐅᐱᒋᕙᕋᓗ ᑲᓇᑕᒥᐅᑕᐅᓂᕋ ᐱᓗᐊᖅᑐᒥᒃ ᐃᓄᕕᐊᓘᓂᕋ.

Advertisement