Skip to content

ᑮᓇᐅᔮᓗᐃᓪᓗ ᐊᔪᖏᓕᕈᓐᓇᖅᐳᑦ ᑕᐃᒪᓐᓇ ᐱᒍᒪᔭᒥᖕᓂᒃ

ᑲᓇᑕᒥ ᑮᓇᐅᔭᖃᕐᕕᒃ ᐃᓱᒪᓕᐅᓚᐅᖅᑎᓪᓗᒋᑦ ᐊᑭᑦᑐᕆᐊᖅᑕᐅᖁᓪᓗᒋᑦ ᕿᑐᖏᐅᕈᑎᑦ ᑕᒡᕙᓂ ᑕᖅᑭᒥ ᐅᖃᓚᐅᕐᒪᑕ ᑕᒪᓐᓇ ᓇᓚᐅᑦᓵᑦᓯᐊᕈᑎᒃᓴᐅᓂᐊᖅᐳᖅ ᑮᓇᐅᔭᒃᓴᐅᑎᖃᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᑲᓇᑕᒥ ᐊᕐᕌᒍᓂ ᖃᐃᔪᓂ, ᐅᑉᓗᒥᓗ ᑮᓇᐅᔭᓕᐅᑦᓯᐊᕐᓂᖅᓴᐅᓕᕐᓗᑎᒃ.

Kivalliq News editor Darrell Greer

ᑭᓯᐊᓂ, ᓱᓕ ᑲᓇᑕᒥ ᑮᓇᐅᔭᖃᕐᕕᒃ ᐅᔾᔨᖅᑐᐃᖁᔨᓚᐅᖅᐳᖅ ᐊᒥᐊᓕᑲᒥᐅᑦ ᐊᖓᔪᖄᖓᑦ ᑖᓄ ᑐᕋᑉ ᐋᖅᑭᒃᓱᐃᔪᓐᓇᕈᓂ ᓄᐊ ᐊᒥᓕᑲᐅᑉ ᐊᑭᖃᖏᑦᑐᒃᑯᑦ ᑭᐴᑎᖃᑦᑕᕐᓂᖅ ᐊᖏᕈᑦ (NAFTA), ᑮᓇᐅᔭᓕᐅᕐᓂᖅ ᐊᑐᖅᑕᐅᖏᑐᐃᓐᓇᕆᐊᖃᖅᐳᖅ, ᓇᓚᐅᑦᓵᖅᑕᐅᔪᓐᓇᖏᓪᓗᓂᓗ ᖃᓄᐃᓐᓂᐊᕐᓂᖓᓄᑦ, ᑕᒡᕙᓂ ᑲᓇᑕᒥ.

ᑐᕋᑉ ᑕᐃᒪ ᐋᖅᑭᒃᓱᐃᕈᓘᔭᕐᓂᖅᐸᒃ ᑕᒪᒃᑯᓂᖓ NAFTA−ᒥᒃ, ᑲᓇᑕᒥ ᑕᒪᓐᓇ ᐃᒃᐱᖕᓇᒻᒪᕆᖕᓂᐊᖅᐳᖅ ᐊᒻᒪ ᑖᕐᓗᓂ ᐃᖢᐃᓪᓕᐅᕈᑕᐅᓗᓂᓗ, ᑕᐃᒪᓐᓇᐃᑐᐃᓐᓇᕆᐊᖃᖅᖢᓂᓗ.
ᑭᓇᒃᑯᓐᓄᑦ ᓵᒍᓐᓇᖅᐱᑕ ᐃᑲᔪᖅᑕᐅᒍᒪᓗᑕ $2 ᑐᕆᓕᔭᓐ ($84 ᐱᓕᔭᓐ ᐊᕐᕌᒍᑕᒫᑦ) ᑲᓇᑕᐅᑉ ᑮᓇᐅᔭᓕᐅᕈᑎᖏᓐᓄᑦ ᐃᑲᔪᕆᐊᖃᕋᔭᕐᓗᑕ ᐊᒥᓱᓂ ᐅᑭᐅᓂ ᐊᒥᓱᑦ ᑲᓇᑕᒥᐅᑕᐃᑦ ᑕᐃᒪᓐᓇ ᖁᖓᑎᖏᓐᓇᕐᓂᐊᕈᑉᑎᒍ ᐱᓕᕆᖏᓐᓇᕐᓂᐊᖅᐸᑕᓗ?

ᑕᐃᒪ, ᐃᑲᔪᕈᓐᓇᖅᑐᖃᖅᐳᖅ, ᑭᓯᐊᓂ ᐃᐊᐴᑕᒥ ᐅᖅᓱᐊᓗᒃ ᐱᐅᒋᔭᐅᖏᒻᒪᑦ ᒫᓐᓇ ᓇᓂᑐᐃᓐᓇᖅ ᐱᓕᕆᕕᒡᔪᐊᓄᓪᓗ ᐱᐅᒋᔭᐅᖏᑦᖢᓂ ᑕᐃᒪᖓᓂᑦ.

ᐊᑐᖅᑕᐅᖏᓗᐊᓕᕐᓂᖏᓪᓗ ᐅᖅᓱᐊᓗᓕᕆᔨᑦ ᐃᓄᐃᓪᓗ ᑭᒃᑯᑐᐃᓐᓇᐃᑦ ᐃᑲᔪᕋᔭᖏᑦᖢᑎᒃ ᓱᑉᓗᓕᖕᒥᒃ ᐱᖁᑎᕐᔪᐊᓂᒡᓗ ᓴᓇᖁᔨᖏᑦᖢᑎᒃ ᑖᒃᑯᐊ ᐃᐊᐴᑕᒥᐅᑦ ᐅᖅᓱᐊᓗᖏᑦ ᐊᐅᓪᓚᖅᑎᑕᐅᕙᓪᓕᐊᓂᐊᖏᑉᐳᑦ ᓄᓇᒥᖕᓃᖏᓐᓇᕐᓂᐊᖅᖢᑎᒃ.

ᐃᓚᖓᒍᑦ, ᑕᐃᒪᓐᓇ ᐊᒥᐊᓕᑲᐃᑦ ᖃᐅᔨᒪᓐᓂᖅᐸᑕ ᑕᐃᒪᓐᓇᐃᓐᓂᐊᕐᓂᖏᓐᓄᑦ ᐸᕐᓇᒃᓯᒪᓂᖅᓴᐅᑉᓗᑎᒡᓗ ᐅᕙᑉᑎᓐᓂᑦ.

ᐊᒻᒪᓗᒃᑲᓐᓂᖅ, ᐊᑯᓂᐊᓘᓚᐅᖏᑦᑐᒥ, 2014-ᒥ, ᖃᐅᔨᓴᖅᑎ ᓱᓇᑐᐃᓐᓇᓕᕆᓂᕐᒧᑦ Vivian Krause ᑎᑎᕋᓚᐅᖅᐳᖅ ᑕᒪᒃᑯᐊ ᐊᒥᐊᓕᑲᒥᐅᑦ ᑲᑐᔾᔨᖃᑎᒌᒃᑯᖏᑦ ᑮᓇᐅᔭᖃᖅᑎᑦᓯᖕᒪᑕ ᐊᒥᓱᓂᒃ ᒥᓕᔭᓃᑦᑐᓂᒃ ᑮᓇᐅᔭᓂᒃ ᑲᓇᑕᒥᐅᑦ ᐆᒻᒪᖁᑎᖃᖅᑎᑕᐅᑦᓯᐊᓕᖁᑉᓗᒋᑦ.

ᑕᒪᓐᓇ ᓇᓗᓇᕈᔪᒃᖢᓂᓗ ᑕᐃᒪᓐᓇᐃᒻᒪᖔᑦ ᑕᐃᒪᓐᓇ ᐅᑯᐊ ᐊᑭᕋᕆᓗᒋᑦ ᐅᑯᐊ ᐃᑲᔪᕐᓂᖅᓴᐅᓗᒋᑦ ᑕᐃᒪᓐᓇᐃᓕᐅᓱᐃᑦᑑᖕᒪᑕ ᑕᐃᒪᓐᓇ ᑭᓯᐊᓂ ᐃᖢᐃᖏᑦᑐᒦᑎᑕᐅᓇᓱᐊᖅᐳᒍᑦ ᐅᒃᐱᕆᔭᐅᑦᑕᐃᓕᒪᒋᐊᖃᖅᖢᑕ.
ᐊᒥᐊᓕᑲᒥᐅᑦ ᑮᓇᐅᔭᖏᑦ ᒪᕐᕉᖕᓄᑦ ᐃᑲᔪᖅᑕᐅᒋᐊᖃᖅᑐᓄᐊᖅᑕᐅᕙᖕᒪᑕ, Tides Foundation ᐊᒻᒪ New Venture Fund, ᑮᓇᐅᔭᖃᖅᑎᑦᓯᔨᐅᕙᒃᖢᑎᒃ ᑖᑉᑯᐊ ᑲᓇᑕᒥ ᐊᕙᑎᒥᐅᑕᓂᒃ ᐸᐸᑦᓯᖁᔨᔨᓄᑦ ᑕᒪᒃᑯᐊ ᓲᕐᓗ Dogwood Initiative, The Tar Sands Campaign, Leadnow ᐊᒻᒪ OpenMedia.

ᐊᑭᕋᕆᒋᐊᖅᑕᐅᓚᐅᖅᐳᖅ ᖃᐅᔨᓴᓚᐅᖅᑕᖏᑦ ᑖᑉᓱᒪ Krause ᐊᑐᖅᑕᐅᖏᓕᖅᖢᑎᒃ ᐅᑭᐅᑦ ᒪᕐᕉᓚᐅᖅᑐᓂ ᐊᓂᒍᖅᓯᒪᓕᖅᑐᓂ ᐅᖃᓚᐅᖅᑎᓪᓗᒍ ᑕᒪᒃᑯᐊ ᑎᒥᐅᔪᑦ ᐃᑲᔪᖅᓯᒪᖕᒪᑕ ᔭᔅᑎᓐ ᑐᕈᑐᒥᒃ ᐋᖅᑭᒃᓱᐃᑎᓪᓗᒍ ᑮᓇᐅᔭᓕᐅᖏᑦᑐᓂᒃ ᐃᑲᔪᖅᑎᒃᓴᓂᒃ, ᐅᖃᓗᒃᑎᒃᓴᓂᒃ ᐊᒻᒪ ᓂᕈᐊᖅᑕᐅᖁᔨᓂᕐᒧᑦ ᐱᓕᕆᔨᒃᓴᓂᒃ.

ᓱᓕᔪᖅ, ᑕᒪᒃᑯᐊ ᑲᑐᔾᔨᖃᑎᒌᑦ ᔫᓂᐊᒃᑯᑦ ᐹᑎᖏᑦ ᑕᐃᒪᓐᓇᐃᖃᑦᑕᕐᒪᑕ ᓂᕈᐊᖅᑕᒥᖕᓄᑦ (ᑖᒃᑯᐊᖑᒐᔪᒃᖢᑎᒃ NDP−ᑯᑦ), ᐊᒻᒪ ᐱᔅᓂᔅᖃᖅᑐᑦ ᑎᒥᖁᑎᖏᑦ ᑕᐃᒪᓐᓇᐃᓕᖅᐸᒋᑉᓗᑎᒃ ᑲᓐᓱᕕᑎᒃᑯᓐᓄᑦ.

ᓱᓕ, ᐅᖃᐅᓯᖃᖅᐳᒍᓕᓛ, ᑲᓇᑕᒥ ᓯᕗᓕᖅᑎᒥᒃ.

ᐊᒥᓱᑦ ᖃᐅᔨᒪᔪᑦ ᐅᖃᖃᑦᑕᖅᓯᒪᖕᒪᑕ ᐊᒥᐊᓕᑲᒥᐅᑦ ᑐᓂᕐᕈᓯᐊᖅᐸᖕᒪᑕ ᑮᓇᐅᔭᓂᒃ $300 ᒥᓕᔭᓐᑖᓚᓂᒃ ᑲᓇᑕᒥ ᐊᕙᑎᒥᐅᑕᓂᒃ ᓴᐳᔾᔨᓇᓱᐊᖅᑎᓄᑦ ᐊᕐᕌᒍᓂ ᐊᑯᓐᓂᖓᓂ 2000 ᓂᑦ 2016ᒧᑦ, ᐃᓚᖏᓪᓗ ᖃᐅᔨᒪᔪᑦ ᐱᓕᕆᖃᑕᐅᔪᑦ ᐅᖃᖃᑦᑕᖅᖢᑎᒃ ᐊᖏᓂᖅᓴᐃᑦ ᑮᓇᐅᔭᑦ ᐊᑐᖅᑕᐅᒐᔭᕐᓂᖏᓐᓄᑦ Great Bear Rainforest ᓴᐳᔾᔨᑉᓗᒍ, ᑕᒪᒃᑯᐊ ᐆᒻᒪᖁᑎᓕᕆᔨᑦ ᐱᓕᕆᔨᓪᓗ ᐅᖃᖃᑦᑕᖅᖢᑎᒃ ᑮᓇᐅᔭᑦ ᐊᒥᓲᓕᖅᓴᐃᑦ ᐊᑭᕋᖅᑐᕐᓂᕐᒧᑦ ᐃᐊᐴᑕᒥ ᐅᖅᓱᐊᓗᓕᐅᖅᑎᓂᒃ ᓴᓇᓂᕐᒥᒡᓗ ᓱᑉᓗᓕᖕᓂᒃ.

ᓱᖁᑎᒋᒋᐊᖃᖅᐱᑎᒍ ᑕᒪᓐᓇ?

ᐄᓪᓚᕆᒃ ᓱᖁᑎᒃᓴᕆᐊᖃᖅᐳᒍᑦ. ᐃᓄᐃᑦ ᓇᒃᓯᐅᔾᔨᒋᐊᖃᖅᐳᑦ ᑮᓇᐅᔭᓂᒃ ᒥᓕᔭᓃᑦᑐᓂᒃ ᐊᒥᓱᓂᒃ ᑲᑐᔾᔨᖃᑎᒌᓄᑦ ᑎᒥᐅᔪᓄᓪᓗ ᐅᒃᐱᕈᓱᒃᑯᑎᑦ ᖃᓄᐃᓕᐅᕈᑎᒋᒍᒪᔭᖏᓐᓄᑦ ᐃᑲᔪᖅᑕᐅᓂᐊᕐᓂᕐᒧᑦ, ᑕᒪᓐᓇᓗ ᐊᑐᖅᑕᐅᒐᔪᒃᓯᐊᖅᖢᓂ, ᐊᑐᖅᑕᐅᔪᓐᓇᑦᓯᐊᖅᖢᓂᓗ.

ᐊᑯᓂ ᐅᑭᐅᓂ ᐊᒥᓱᓂ ᑐᕌᕐᓂᖃᕐᒪᑕ ᑖᒃᑯᐊ ᐅᖅᓱᐊᓗᓕᐅᖅᑐᓂᒃ ᐱᐅᒃᓴᖏᑦᑐᑦ Tar Sands Campaign ᓄᖅᑲᖅᑎᑦᓯᓇᓱᐊᖅᖢᑎᒃ ᑲᓇᑕᐅᑉ ᐅᖅᓱᐊᓗᓕᕆᔨᖏᓐᓂᒃ ᐅᖅᓱᐊᓗᓕᐅᖅᑎᖏᓐᓂᒡᓗ, ᑕᐃᒪᓐᓇ ᐊᑐᖅᑕᐅᖏᓐᓂᖅᓴᐅᓕᖁᑉᓗᒋᑦ ᐅᖅᓱᐊᓗᒃᓴᐃᑦ ᐊᒥᐊᓕᑲᒥᐅᓂ, ᓄᖅᑲᖅᑎᑦᓯᓗᑎᒡᓗ ᓱᒃᑲᐃᓪᓕᒋᐊᖅᑎᑦᓯᓗᑎᒡᓗ ᓱᑉᓗᓕᓕᐅᖅᑐᓂᒃ ᐊᒻᒪ ᓂᐅᕋᐃᕕᒃᓴᓕᐅᖅᑐᓂᒃ ᐅᖅᓱᐊᓗᖕᓂᒃ.

ᑕᒪᓐᓇ ᖃᐅᔨᒪᑉᓗᒍ, ᐃᓱᒪᓇᖅᐳᖅ ᐃᒋᑦᓯᑐᐃᓐᓇᕆᐊᖃᕐᒪᑕ ᐱᖁᑎᒥᖕᓂᒃ (ᑮᓇᐅᔭᓂᒡᓗ) ᓇᓪᓕᐊᑐᐃᓐᓇᕐᓄᑦ ᑎᒥᐅᔪᓄᑦ, ᓄᓇᖃᖅᑳᖅᓯᒪᒃᐸᑕᓘᓐᓃᖅ ᐋᒃᑲᓘᓐᓃᑦ, ᑕᐃᒪᓐᓇ ᐱᓕᕆᓂᐊᑐᐃᓐᓇᐸ ᐱᒍᔭᒥᖕᓂᒃ ᑐᕌᕐᓂᕆᔭᒥᖕᓂᒃ.

ᐅᐱᒋᕙᕗᑦ ᐱᔪᓐᓇᕐᓂᖏᑦ, ᑯᐊᐳᕇᓴᐅᒃᐸᑕ ᐊᖓᔪᖃᐅᑕᐅᓗᑎᒡᓗ ᐃᑲᔪᖅᐃᒐᓱᐊᖅᑐᓂᒃ, ᐃᒪᓐᓇᓗ ᑐᑭᖃᖅᖢᓂ, ᐅᕝᕙ ᑮᓇᐅᔭᑦ, ᐱᐅᖏᑦᑐᓂᒃ ᐱᓕᕆᔭᖅᑐᓕᕆᑦᓯ ᖃᓄᑐᐃᓐᓇᑦᓯᐊᖅ.

ᐊᔪᕐᓇᖏᑦᑐᑯᓘᖏᑉᐳᑦ ᑭᐅᓂᐊᕐᓗᒍ ᑕᒪᓐᓇ, ᑭᓯᐊᓂ ᐃᓄᐃᑦ ᓄᓇᕗᒥᐅᑦ ᐃᓕᓯᒪᓕᖅᐳᑦ ᖃᐅᔨᒪᓕᖅᐳᓪᓗ ᑮᓇᐅᔭᑦ ᐊᒥᓱᑦ ᐊᒻᒪ ᐊᖓᔪᖄᖑᓂᕐᒧᑦ ᐱᔾᔪᑎᒋᔭᐅᔪᓂᒃ ᖃᓄᐃᓕᐅᕈᓐᓇᕐᓂᖏᓐᓄᑦ ᓄᖅᑲᖅᑎᑦᓯᓯᒪᖕᒪᑕ ᓇᑦᓯᕐᓂᒃ ᐃᓚᖏᓐᓂᒡᓗ ᐱᔾᔪᑎᖃᖅᖢᑎᒃ.

ᑭᓇᑐᐃᓐᓇᖅ, ᓇᓪᓕᐊᑐᐃᓐᓇᕐᓂ ᐊᑭᕋᕇᖕᓂ, ᑐᑭᓯᓇᓱᐊᕆᐊᖃᕋᓗᐊᕐᒪᑕ ᑭᑑᓂᖏᓐᓄᑦ ᑕᒪᒃᑯᐊ ᖃᖁᖅᑐᓂᒃ ᓇᓴᖅᓯᒪᖃᑦᑕᖅᑐᑦ.

ᑕᐃᒪᓐᓇ ᑭᓯᐊᓂ, ᐱᐅᒃᐸᑦ ᐱᐅᖏᑉᐸᓪᓘᓐᓃᑦ, ᐅᖃᑦᓯᐊᕈᒪᓐᓇᕐᒪᑦ ᖃᐅᔨᒪᔭᕐᓂᒃ, ᐊᒻᒪ ᐃᒻᒪᖄ, ᑐᑭᓯᓇᑦᓯᐊᖅᑐᓂᒃ ᐃᓱᒪᓇᕐᓂᐊᕐᒪᑦ ᖃᖓᑭᐊᕐᓗ ᑕᒪᒃᑯᐊ ᐊᑐᕈᓐᓇᕐᓂᐊᕋᑉᑎᒍ ᓇᓕᐊᑐᐃᓐᓇᖅ ᐅᖅᓱᐊᓗᒃᑰᖅᑐᓂᒃ ᐊᓯᐊᒍᓪᓘᓐᓃᑦ ᐊᑐᕈᓐᓇᖅᓯᖁᑉᓗᑕ.