ᑭᕙᓪᓕᖅ ᕼᐋᓪᒥ ᐃᓕᓐᓂᐊᖅᑏᑦ ᐱᕗᑦ ᒪᓕᒐᑎᒍᑦ ᓵᓚᖃᕐᓂᐅᔪᒥ

by Cody Punter- August 8, 2018

ᑭᕙᓪᓕᖅ ᕼᐋᓪᒥ ᐃᓕᓐᓂᐊᖅᑎᐅᕙᓚᐅᖅᓯᒪᔪᑦ ᐱᓚᐅᖅᐳᑦ ᓵᓚᖃᕐᔪᐊᕐᓂᐅᔪᒥ ᐱᓇᓱᐊᕈᓯᐅᓚᐅᖅᑐᒥ ᓄᓇᕗᒻᒥ ᐃᖅᑲᖅᑐᐃᕖᑦ ᖁᑦᑎᖕᓂᖅᐹᖓᑕ ᑐᒡᓕᐊ ᑲᔪᓯᑎᑦᑏᓐᓇᕐᓂᖏᓐᓂ ᒪᓕᒋᐊᖃᕐᓂᐅᔪᒥ ᐅᖃᖅᓯᒪᔪᒥ ᒐᕙᒪᑐᖃᒃᑯᑦ ᒪᓕᒐᑎᒍᑦ ᐊᑭᓖᔭᕆᐊᖃᕐᓂᖏᓐᓂ ᐅᑎᕐᕕᐅᔭᕆᐊᖃᕐᓂᐅᔪᓄᑦ ᐱᓕᕆᓂᖓᓐᓄᑦ ᐊᐅᓚᑕᐅᓂᖓᓂ ᐃᓕᓐᓂᐊᕐᕕᖓᓐᓂ.

ᐅᕙᓐᓂ ᐃᒃᐱᒍᓱᒃᑎᑦᑎᕗᖅ ᓇᓕᒧᑦᑐᒥ ᐱᓕᕆᐊᖑᓕᕐᓂᑦᑎᓐᓂ ᐊᒻᒪ ᑕᐃᒪᓐᓇᑐᐃᓐᓇᖅ ᐊᓯᖏᓐᓂ ᑲᓇᑕᒥᐅᑕᐅᔪᑎᑐᑦ,” ᐅᖃᓚᐅᖅᐳᖅ ᐃᓕᓐᓂᐊᖅᑎᐅᓚᐅᖅᑐᖅ ᓯᒥᐅᓐ ᒥᒃᑯᙳᐊᖅ

ᐃᖅᑲᑦᑐᖅᑕᐅᓂᐅᔪᖅ ᐃᖏᕐᕋᐃᓐᓇᖅᓯᒪᕗᖅ ᑕᐃᒪᙵᓂ 2013-ᒥ ᒥᒃᑯᙳᐊᖅ ᓯᕗᒻᒧᐊᕆᑎᓪᓗᒍ ᓱᓕᓂᕋᐅᑎᒋᔭᒥᓂᑦ ᖃᓄᐃᓐᓂᐅᔪᒥ ᑭᒡᒐᖅᑐᐃᓪᓗᓂ ᐃᒻᒥᓄᑦ ᐊᒻᒪ ᐊᓯᖏᓐᓄᑦ ᐃᓕᓐᓂᐊᖅᑎᓄᑦ ᐃᑲᔪᖅᓯᖅᑕᐅᓪᓗᓂ ᓄᓇᕗᒻᒥ ᑐᙵᕕᒃᑯᓐᓂ (NTI) ᑭᕙᓪᓕᖅ ᕼᐋᓪ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᓯᕕᐅᓚᐅᕐᓂᖓᓂᑦ.

ᑭᕙᓪᓕᖅ ᕼᐋᓪ ᐊᐅᓚᑕᐅᓚᐅᖅᐳᖅ ᑐᔪᕐᒥᕕᐅᓪᓗᓂ ᐃᓕᓐᓂᐊᖅᑎᓄᑦ ᐃᓕᓐᓂᐊᕆᐊᖅᓯᒪᔪᓄᑦ ᖁᑦᑎᒃᑐᒥ ᐃᓕᓐᓂᐊᕐᓂᕐᒧᑦ ᑲᖏᖅᖠᓂᕐᒥ ᕿᑎᐊᓂ 1985-ᒥ ᐊᒻᒪ 1995-ᒧᑦ.

ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᓯᒪᔪᑦ ᐊᑐᖅᑐᕕᓂᕐᓂ ᐱᔪᓐᓇᖅᓯᒪᕗᑦ ᑕᐃᒪᐃᒐᔪᒃᑐᒥ ᐊᑐᖅᑕᐅᓂᑯᓂ ᐊᑭᓕᐅᑕᐅᔪᓂᑦ ᑕᐃᒪᙵᓂ ᒐᕙᒪᑐᖃᒃᑯᑦ ᐊᖏᖃᑎᖃᓚᐅᖅᑎᓪᓗᒋᑦ ᐊᖏᓛᖑᔪᒥ ᐃᖅᑲᖅᑐᒐᒃᓴᓕᐊᖑᔪᒧᑦ ᑲᓇᑕᐅᑉ ᖃᓄᐃᑉᐸᓚᐅᕐᓂᖏᓐᓄᑦ ᐊᓪᓚᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᓯᒪᔪᓄᑦ ᐊᖏᖃᑎᒌᖕᓂᕐᒧᑦ ᐊᖑᕈᑕᐅᔪᒥ.

ᑭᕙᓪᓕᖅ ᕼᐋᓪᒧᑦ ᐃᖅᑲᖅᑐᒐᒃᓴᐅᓂᖓ ᓯᕗᓪᓕᕐᒥ ᐊᖏᖃᑎᒌᒍᑕᐅᓚᐅᖅᐳᖅ ᒥᒃᑯᙳᐊᑉ ᐱᔪᒪᔭᖓᓄᑦ 2016-ᒥ ᑭᓯᐊᓂ ᒐᕙᒪᑐᖃᒃᑯᑦ ᐊᔪᐃᓐᓇᕆᐊᒃᑲᓐᓂᕐᓂᖃᓚᐅᖅᐳᑦ ᐃᓱᒪᓕᐊᖑᔪᒥ.

ᒥᒃᑯᙳᐊᖅ ᐅᖃᐅᓯᕆᕙᖓ ᒫᓐᓇᓕᓴᐅᔪᒥ ᖃᓄᐃᓕᖓᑎᑕᐅᓂᖓᓂ ᑎᑭᐅᑎᔭᐅᕐᔪᐊᕐᓂᐅᔪᒥ. ᑭᓯᐊᓂ ᓱᓕ ᐅᔾᔨᖅᓱᕐᓂᖃᖅᐳᖅ ᒐᕙᒪᑐᖃᒃᑯᑦ ᑭᐅᓘᑎᖃᕋᓱᑐᐃᓐᓇᕆᐊᖃᕐᒪᑕ ᐃᖅᑲᖅᑐᖅᑕᐅᓂᐅᔪᒥ ᖁᑦᑎᓛᒧᑦ ᐃᖅᑲᖅᑐᐃᕕᖕᒧᑦ.

ᑕᑯᒋᐊᕈᕕᐅᒃ ᐊᕐᕌᒍᓄᑦ 6-ᓄᑦ ᐊᑯᓂᐅᓂᕆᔭᖓᓂ ᑲᓇᑕᐅᑉ ᒐᕙᒪᒃᑯᓐᓂᑐᐊᖅ ᐊᑯᓂᐅᑎᑦᑎᒃᑲᓐᓂᕈᑎᒋᕙᖓ,” ᐅᖃᓚᐅᖅᐳᖅ ᒥᒃᑯᙳᐊᖅ, ᒪᓕᒐᓕᐅᖅᑎᐅᓯᒪᔪᒥ ᖃᒪᓂᑦᑐᐊᕐᒧᑦ ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ ᑕᓪᓕᒪᓄᑦ. “ᖃᐅᔨᒪᑦᑎᐊᕈᑎᒃ ᒪᕐᕉᖕᓂ ᐃᖅᑲᖅᑐᐃᕕᖕᓂ ᒪᓕᒋᐊᖃᖅᑎᑕᐅᓂᖃᓚᐅᖅᑎᓪᓗᒋᑦ ᐊᔪᐃᓐᓇᕆᐊᒃᑲᓐᓂᕐᓂᖃᕋᔭᙱᓚᑦ ᐆᒥᖓ. ᑭᓯᐊᓂ ᖃᐅᔨᒪᓇᙱᓚᑦ ᑲᓇᑕᒥ ᒐᕙᒪᐅᔪᑦ.”

ᒐᕙᒪᑐᖃᒃᑯᑦ ᑭᐅᓗᓚᐅᖅᐳᑦ ᑭᕙᓪᓕᖅ ᕼᐋᓪᒥ ᐃᓕᓐᓂᐊᖅᑎᐅᔪᑦ ᐱᔪᓐᓇᓪᓗᐊᙱᓚᑦ ᐅᑎᕐᕕᐅᔭᕆᐊᖃᕐᓂᐅᔪᒥ ᐃᓕᓐᓂᐊᕐᕖᑦ ᐊᐅᓚᑕᐅᓚᐅᕐᒪᑕ ᓄᓇᑦᓯᐊᕐᒥ, ᓄᓇᕗᑖᓚᐅᖅᑳᕋᑎᒃ, ᐊᒻᒪ ᑲᓇᑕᒥᐅᙱᑦᑐᖅ.

ᐃᖅᑲᖅᑐᐃᕕᐅᑉ ᒪᓕᒋᐊᖃᕐᓂᖓᓂᑦ, ᐃᓄᓕᒫᓄᑦ ᖃᐅᔨᒪᓇᖅᓯᑎᑕᐅᓪᓗᓂ ᔪᓚᐃ 20-ᒥ, ᐱᖓᓱᑦ ᐃᖅᑲᖅᑐᐃᔨᐅᔪᑦ ᐊᐅᓚᑎᑦᑎᔪᓂ ᐊᔪᐃᓐᓇᕆᐊᒃᑲᓐᓂᕐᓂᐅᔪᒥ ᑲᔪᓯᑎᑦᑏᓐᓇᓚᐅᖅᐳᑦ ᓯᕗᓪᓕᕐᒥ ᒪᓕᒋᐊᖃᕐᓂᐅᔪᒥ ᑕᒪᓐᓇ ᓱᓕᓂᐅᔪᖅ ᐱᙱᑎᑦᑎᓂᖃᕐᓂᖓᓂ ᖁᔭᓈᖅᓯᓚᐅᙱᓚᑦ ᒐᕙᒪᑐᖃᒃᑯᓐᓂᑦ.

ᐅᖃᐅᓯᐅᓪᓗᓂ ᓈᒻᒪᒋᔭᐅᔪᓄᑦ ᓱᓕᓂᐅᔪᓄᑦ ᐃᖅᑲᖅᑐᒐᒃᓴᐅᔪᒧᑦ, ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑦᑎᓚᐅᖅᐳᑦ ᑕᒪᕐᒥᑦᑎᐊᖅ ᓇᑉᐸᖅᑎᕆᓂᐅᔪᒧᑦ ᐊᑭᖏᓐᓂ ᐊᒻᒪᓗᑦᑕᐅᖅ ᐃᓚᖏᓐᓂ ᐊᐅᓚᑕᐅᓂᖓᓄᑦ ᐊᑭᐅᔪᓄᑦ ᑭᕙᓪᓕᖅ ᕼᐋᓪᒧᑦ.

ᑕᐃᔅᓱᒪᓂ, ᓄᓇᕗᑦ ᐊᐅᓚᑕᐅᓚᐅᖅᐳᖅ ᒐᕙᒪᑐᖃᒃᑯᓐᓂ ᑎᒃᑯᐊᖅᑕᐅᓯᒪᔪᒥ ᑲᒥᓴᓇᐅᔪᒥ.

ᓯᕗᓪᓕᕐᒥ ᒪᓕᒋᐊᖃᖅᑎᑕᐅᔪᒥ ᐃᖅᑲᖅᑐᐃᕕᒃ ᓇᓂᓯᓚᐅᖅᐳᑦ ᒥᒃᑯᙳᐊᖅ ᐅᓂᒃᑲᐅᓯᐊᖓ ᐅᒃᐱᕐᓇᕐᓂᖅᓴᐅᓚᐅᖅᐳᖅ ᐅᑯᓇᙵᑦ ᒐᕙᒪᑐᖃᒃᑯᑦ ᐸᓯᔨᖏᓐᓂᑦ’, “ᖃᐅᔨᒪᓂᐅᔪᒥ ᑕᐃᔅᓱᒪᓂᐅᓚᐅᖅᑐᒥ ᐱᓕᕆᖃᑎᖃᕐᓂᐅᔪᒥ ᑲᓇᑕᒥ ᐊᒻᒪ ᓄᓇᑦᓯᐊᕐᒥ ᐃᓗᑐᙱᓚᖅ.”

ᑕᐃᒪᙵᓂ ᒪᓕᒋᐊᖃᓕᕐᓂᐅᔪᒥ, ᒥᒃᑯᙳᐊᖅ ᐅᖃᓚᐅᖅᐳᖅ ᐊᒥᓱᒻᒪᕆᐊᓗᖕᓂ ᐃᑲᔪᖅᓯᖅᑕᐅᓯᒪᖕᒪᑦ ᐊᓯᖏᓐᓂ ᐃᓕᓐᓂᐊᖅᑎᐅᕙᓚᐅᖅᑐᓂ ᓯᕗᒻᒧᐊᕆᓂᖓᓄᑦ ᐱᓕᕆᓂᐅᔪᒥ ᑭᒡᒐᖅᑐᖅᖢᓂᒋᑦ.

ᒪᓕᒋᐊᖃᕐᓂᖃᓚᐅᖅᑎᓪᓗᒍ, ᐅᖃᓘᑎᖓ ᐊᒻᒪ ᖃᕋᓴᐅᔭᑎᒍᑦ ᐅᖃᐅᓯᒃᓴᓕᐊᓂ ᓄᖅᑲᓚᐅᖅᓯᒪᙱᓚᑦ,” ᐅᖃᓚᐅᖅᐳᖅ.

ᓄᓇᕗᒻᒥ ᐃᖅᑲᖅᑐᐃᕖᑦ ᖁᑦᑎᖕᓂᖅᐹᖓᑕ ᑐᒡᓕᐊᑕ ᐃᓱᒪᓕᐊᖓ ᑕᐃᒪᐃᖏᓐᓇᕈᓐᓇᕐᓂᐊᖅᐸᑦ, ᑭᕙᓪᓕᖅ ᕼᐋᓪᒥ ᐃᓕᓐᓂᐊᖅᑎᐅᓚᐅᖅᑐᑦ ᐱᔪᓐᓇᕐᓂᐊᖅᐳᑦ $10,000-ᒥ ᓯᕗᓪᓕᕐᒥ ᐊᕐᕌᒍᒧᑦ ᐅᐸᒃᓯᒪᓚᐅᕐᓂᖏᓐᓄᑦ ᐊᒻᒪ $3,000 ᐊᑐᓂᒧᑦ ᒪᓕᒃᑐᒥ ᐊᕐᕌᒍᒧᑦ. ᑭᓇᑐᐃᓐᓇᖅ ᐊᑐᖅᓯᒪᓂᖃᕈᓂ ᐋᓐᓂᖅᓯᕆᓂᕐᒥ ᐱᓂᕐᓗᒃᑕᐅᕐᔪᐊᕐᓂᐅᔪᒥᓪᓘᓐᓃᑦ ᑐᒃᓯᕋᕈᓐᓇᕆᕗᑦ ᖄᒃᑲᓐᓂᐊᒍᑦ ᐅᑎᕐᕕᐅᔭᕆᐊᖃᕐᓂᐅᔪᒧᑦ.

ᒫᑎᐅ ᑎᓕᓐ-ᓚᐃᑦᔅ, ᐅᖃᖅᑎᐅᔪᖅ ᑯᐃᓐ ᑭᒡᒐᖅᑐᖅᑎᖓᓐᓄᑦ ᓄᓇᖃᖅᑳᖅᓯᒪᔪᓄᑦ ᐱᓕᕆᓂᐅᔪᓄᑦ, ᐅᖃᓚᐅᖅᐳᖅ ᑎᑎᕋᕐᕕᖓ ᕿᒥᕐᕈᕗᑦ ᐃᖅᑲᖅᑐᐃᕕᐅᑉ ᒪᓕᒋᐊᖃᖅᑎᑕᐅᓂᖓᓂ.

ᐊᖏᖅᓯᒪᓂᖃᖅᐳᒍᑦ ᑐᓂᓯᓂᕐᒥ ᓈᒻᒪᒃᑐᒥ, ᑕᒪᒃᑭᐅᒪᔪᒥ, ᐊᒻᒪ ᐊᑯᓂᐅᔪᒥ ᐋᖅᑭᒍᑎᒃᓴᐅᔪᒥ ᑭᐅᓂᕐᒧᑦ ᐱᐅᒋᑦᑐᒧᑦ ᐃᓚᒋᔭᐅᓂᖓᓂ ᑲᓇᑕᐅᑉ ᖃᓄᐃᑉᐸᓚᐅᕐᓂᖏᓐᓄᑦ,” ᐅᖃᓚᐅᖅᐳᖅ ᑎᓕᓐ-ᓚᐃᑦᔅ ᖃᕋᓴᐅᔭᑎᒍᑦ ᑎᑎᕋᕐᓂᒃᑯᑦ.

ᒥᒃᑯᙳᐊᖅ ᑐᑭᓯᓇᖅᓯᑎᑦᑎᐊᓚᐅᖅᐸᖓ ᐋᓐᓂᖅᓯᖅᑕᐅᓂᖃᓚᐅᙱᑎᐊᕐᓂᖓᓂ ᐊᒻᒪ ᐃᓕᓐᓂᐊᑦᑎᐊᖅᓯᒪᓪᓗᓂ ᑭᕙᓪᓕᖅ ᕼᐋᓪᒥ. ᐊᑐᕐᓂᖃᓗᐊᙱᓐᓂᕗᖅ ᑮᓇᐅᔭᓄᑦ, ᐅᖃᓚᐅᖅᐳᖅ.

ᑭᓯᐊᓂ, ᖃᐅᔨᒪᕗᖅ ᐃᓚᖏᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᓯᒪᔪᑦ ᓱᕈᓯᑦ ᓵᙵᓚᐅᖅᑐᓂ ᐱᑦᑎᐊᖅᑕᐅᙱᕐᔪᐊᕐᓂᐅᔪᓂᑦ.

ᐱᓂᖅᓴᐅᓪᓗᓂ ᐊᓯᓕᒫᖏᓐᓄᑦ, ᒥᒃᑯᙳᐊᖅ ᐅᖃᓚᐅᖅᐳᖅ ᐱᔪᒪᓂᖃᑦᑎᐊᖅᐳᖅ ᓵᓚᖃᕐᓂᖓᓂ ᐃᖅᑲᖅᑐᖅᑕᐅᓂᐅᔪᒥ ᐱᓕᕆᓂᐅᕗᖅ ᒪᓕᒃᑕᐅᒋᐊᖃᕐᓂᐅᕗᖅ. ᒫᓐᓇ ᐅᑕᖅᑭᓂᑐᐃᓐᓇᐅᓕᖅᐳᖅ ᖃᐅᔨᓇᓱᖕᓂᕐᒧᑦ ᒐᕙᒪᑐᖃᒃᑯᑦ ᐅᓇᑕᐃᓐᓇᕈᒪᖕᒪᖔᑕ, ᐅᖃᓚᐅᖅᐳᖅ.

ᑕᒪᑦᑕ ᐅᑕᖅᑭᔪᐃᓐᓇᐅᖅᑰᓕᖅᐳᒍᑦ ᓇᓗᓇᐃᖅᓯᓂᐊᕐᒪᑦ ᐱᓕᕆᐊᖑᓂᑦᑎᓐᓂ ᓇᓕᒧᑦᑐᒥ.”

Leave a Comment: