“ᑖᓐᓇ ᐃᖅᑲᓇᐃᔮᕋ ᐊᑐᕐᓂᖃᖅᑐᖅ ᐅᕙᓐᓄᑦ”

922

ᐊᒃᓱᐊᓗᒃ ᓇᓗᓇᖏᑦᑐᖅ ᐱᒃᑯᒥᒋᔭᒥᓂᒃ ᐱᓇᓱᐊᒐᖃᕐᓂᖓᓄᑦ ᑖᓐᓇ ᐅᓂᒃᑳᖅᑎᓪᓗᒍ ᓈᓚᒃᖢᒍ ᓘᕋ-ᔩᓐ ᒋᐸᓐᔅ ᐃᑲᔪᕋᓱᐊᕐᒪᑦ ᓄᓇᓕᖕᒥᐅᓂᒃ ᐱᑦᑎᐊᕈᑕᐅᔪᓐᓇᖅᑐᓂᒃ ᑲᒪᔨᐅᓪᓗᓂ.

ᓘᕋ-ᔩᓐ ᒋᐱᓐᔅ ᖁᕕᐊᓱᒃᖢᓂ ᐃᒡᓚᓚᐅᖅᑐᖅ ᑕᒪᑐᒪᓂ ᓴᓂᕋᔭᐅᑉ ᓯᒡᔭᖓᓂ ᐱᓕᕆᑎᓪᓗᒋᑦ. ᓄᓇᓕᖓᓂ ᐱᕋᔭᓗᐊᑲᑕᔭᐃᒃᑯᑎᓂᒃ ᑲᒪᔨᐅᖕᒪᑦ ᓴᓂᕋᔭᖕᒥ ᐃᓄᐃᑦ ᐱᖅᑯᓯᑐᖃᖏᓐᓂᒃ ᐊᒃᓱᕈᑎᖃᖅᖢᓂ ᐃᓄᐃᑦ ᐅᒃᐱᕆᔭᖏᓐᓂᒃ ᐊᑐᖅᑕᐅᑎᑦᑎᓪᓗᓂ ᐊᔾᔨᒌᖏᑦᑐᓂ ᐱᓕᕆᕝᕕᓂ.
ᐊᔾᔨ ᐱᔭᐅᔪᖅ ᓘᕋ-ᔩᓐ ᒋᐱᓐᔅᒥᑦ

ᐊᕿᒃᓱᐃᓯᒪᔪᖅ ᓄᓇᓕᖓᓂ ᐊᐅᔭᒃᑯᑦ ᐊᕐᓇᐃᖅ ᓴᐃᐹᕿᔾᔪᑎᒋᓂᐊᖅᑕᖏᓐᓂᒃ ᐃᓕᓴᖅᑕᐅᑎᑦᑎᓗᓂ ᓇᑦᑎᕕᓂᖕᓂᒃ ᐱᓚᒃᑐᐃᓂᕐᒥᒃ ᐊᒻᒪᓗ ᕿᓯᓕᕆᓂᕐᒥᒃ ᑲᒻᒥᔭᐅᓂᐊᖅᑐᓂᒃ ᒥᖅᓱᕈᓯᕐᓂᒃᓗ ᕿᓯᖕᓂᒃ ᑲᒻᒥᑎᑦᑎᓗᓂ, ᐃᓅᓯᕐᒥᒍᑦ ᖃᓄᐃᖏᔭᐃᒃᑯᑎᓂᒃ ᐃᓕᓴᖅᑕᐅᑎᑦᑎᓗᓂ. ᕿᓚᓈᖅᑐᑦ ᐊᕙᑎᓂᒃ ᐃᓕᓴᕈᑎᓂᒃ ᐃᓚᐅᑎᑦᑎᓂᐊᕐᓂᕋᖅᖢᓂ.

“ᐊᒃᓱᐊᓗᒃ ᐃᑲᔪᕐᓂᐊᖅᑐᑦ ᐃᓅᓯᕐᒥᒍᑦ ᓴᐃᒻᒪᖅᓴᕐᓗᑎᒃ ᒪᒥᓴᕐᓂᐊᕐᒪᑕ ᐊᒥᓱᑦ ᓇᖕᒥᓂᖅ ᐅᖃᓪᓚᑲᑦᑕᐅᑎᓗᑎᒃ.” ᒋᐸᓐᔅ ᐅᓂᒃᑳᓚᐅᖅᑐᖅ, ᐊᕐᓇᐃᑦ ᑲᑐᔾᔨᖃᑎᒌᖓᓐᓂ ᐱᓇᓱᐊᖃᑎᖃᓚᐅᕐᒪᑦ ᐅᑭᐅᖑᕋᑖᖅᑐᒥ – ᑕᒪᑐᒪᓂ ᓯᕗᓪᓕᖅᐹᒥ ᐱᓇᓱᐊᒐᖃᓕᖅᖢᓂ ᓄᓇᓕᖓᓂ ᐃᖅᑲᖅᑐᐃᕕᖕᓂ ᐱᓕᕆᔨᐅᓪᓗᓂ – ᐃᓚᐅᑎᑦᑎᓂᐊᖅᑐᖅ 59-ᓂᒃ ᒪᒥᓴᕐᕕᖕᒥᓂ.

“ᑖᓐᓇ ᐃᖅᑲᓇᐃᔮᕋ ᐅᕙᓐᓄᑦ ᐊᒃᓱᕈᕐᓇᖅᑑᒐᓗᐊᖅ ᖁᕕᐊᒋᔭᕋ, ᐃᑲᔪᕈᓐᓇᕋᒪ ᓄᓇᓕᖕᒥᐅᓂᒃ ᐃᑲᔪᖅᑕᐅᒋᐊᓕᖕᓂᒃ; ᖃᓄᖅ ᓄᓇᓕᑦᑎᓐᓂ ᐱᔭᕋᑲᑕᓗᐊᖁᖏᓱᒋᑦ ᓴᐃᐹᕿᔪᑎᓂᒃ ᑲᒪᔨᐅᒐᒪ.”

ᐃᓐᓇᐃᑦ ᐃᓚᐅᑎᖃᑦᑕᖅᑕᕗᑦ ᐱᖅᑯᓯᑐᖃᖅᑎᑐᑦ ᐊᑐᕐᓂᖃᖅᑐᓂᒃ ᐅᖃᐅᔾᔪᐃᔨᐅᓪᓗᑎᒃ ᐱᒻᒪᕆᐅᔪᖅ ᑕᒪᓐᓇ, ᒋᐱᓐᔅ ᐅᓂᒃᑳᕆᓪᓗᓂ. “ᑕᐅᑦᑐᒐᕆᒐᑦᑎᒍ ᐱᖅᑯᓯᖏᑦ ᐃᓅᓯᖏᑦ,” ᐅᓂᒃᑳᕆᓪᓗᓂ. “ᑕᐃᒪᓐᓇ ᐱᓇᓱᐊᖃᑎᒋᓪᓗᒋᑦ ᐃᓐᓇᐃᑦ ᑲᑎᖓᑎᓪᓗᒋᑦ ᒪᒃᑯᒃᑐᓂᒃ ᐅᖃᐅᔾᔪᐃᔨᐅᓪᓗᑎᒃ ᐃᓅᓱᒃᑐᓪᓗ ᕿᑐᖏᐅᖅᓴᔪᑦ ᐃᓚᐅᑎᓪᓗᒋᑦ; ᐃᓄᐃᑦ ᐱᖅᑯᓯᖏᑎᑐᑦ ᐊᐃᑉᐸᖃᑎᒌᑦᑎᐊᕈᓯᕐᓂᒃ ᐃᓕᓴᖅᑕᐅᖃᑦᑕᕐᒪᑕ ᓄᓇᓕᑦᑎᓐᓂ ᒪᒃᑯᒃᑐᐃᑦ, (ᐃᓄᐃᑦ ᖃᐅᔨᒪᔭᑐᖃᖏᑎᒍᑦ) ᐅᒃᐱᕆᔭᐅᔪᓂᒃ.

ᑕᒪᓐᓇ ᐃᓚᐃᓐᓇᖓᓂ ᐱᓇᓱᐊᕈᓯᒥ ᑲᒪᔨᐅᕕᒋᖃᑦᑕᕐᒪᒍ ᓄᓇᓕᖓᓂ – ᐅᓐᓄᒃᓴᒃᑯᑦ ᐱᓕᕆᐊᕆᖃᑦᑕᖅᑕᕋ ᐃᓛᓐᓂᒃᑯᑦ ᐅᖃᓗᒃᕕᐅᕙᒃᖢᓂᓗ ᐊᒃᓱᕈᓗᐊᖅᑐᖃᓕᕌᖓᑦ ᐅᓐᓄᐊᒃᑯᑦ – ᑕᐃᒫᓴᐃᓐᓇᖅ ᐃᑲᔪᖅᓴᕈᑎᓂᒃ ᐱᑕᖃᖁᖕᒥᔭᖓᒎᖅ ᐊᖑᑎᓄᑦ ᓄᓇᓕᖓᓂ ᐃᓅᓯᕐᒥᒃ ᐃᓕᓴᕈᑕᐅᓗᓂ ᓴᐅᐹᕿᔾᔪᑎᓂᒃ ᓱᕈᓯᕐᓄᑦ ᐃᓅᓱᒃᑐᓄᓪᓗ ᕿᑐᖏᐅᓕᕋᑖᖅᑐᓄᑦ ᓯᖓᐃᔪᓄᓪᓗ ᑎᒥᒥᒍᑦ ᐊᒃᓱᕉᑎᒋᕙᒃᑕᖏᓐᓂᒃ ᑯᔭᖃᑦᑕᓕᖅᑐᓄᑦ ᒪᒃᑯᒃᑐᐃᑦ ᐋᓐᓂᐊᖅᑖᕆᔪᓐᓇᖅᑕᖏᓐᓂᒃ ᐅᔾᔨᖅᓱᑦᑎᐊᕆᐊᖃᕐᓂᖏᓐᓂᒃ ᑐᓴᐅᒪᑎᑦᑎᔨᐅᓪᓗᓂ.

ᐃᓚᐅᖃᑕᐅᖃᑦᑕᖅᖢᓂ ᐊᕐᓇᐃᑦ ᑲᑎᒪᕕᖏᓐᓂ ᑲᑎᒪᔪᑎᖏᓐᓂᒃ ᐋᕿᒃᓱᐃᔨᐅᖃᑦᑕᖅᖢᓂ, ᒌᐱᓐᔅ ᓄᓇᓕᖕᒥᐅᓂᒃ ᐃᑲᔪᖅᑎᐅᖕᒪᑦ ᓇᓗᒋᔭᐅᔪᓂᒃ ᐊᔪᓕᖅᑕᐅᓯᒪᔪᓂᒃᓗ ᐃᑲᔪᖃᑦᑕᖅᖢᓂᒋᑦ ᓇᖕᒥᓂᖅ ᖃᐅᔨᒪᔭᒥᓂᒃ ᐊᓯᒥᓗ ᖃᐅᔨᒪᔭᖏᓐᓂᒃ ᐋᕿᒃᓱᐃᖃᑦᑕᖅᖢᓂ ᓄᓇᓕᖕᒥᐅᓂᒃ ᐃᑲᔪᕋᓱᐊᖅᖢᓂ. ᑕᒪᑐᒪᓂ ᐳᐊᓗᓕᐅᕐᓂᕐᒥᒃ, ᓂᐊᖁᕈᓯᓕᐅᕐᓂᒥᒃᓗ ᓂᕈᒥᐊᒐᓕᐅᕐᓂᕐᒥᒃᓗ ᐃᓕᓴᖅᑕᐅᑎᓚᐅᖅᑕᖏᑦ, ᓇᖕᒥᓂᖅ ᐊᔪᖏᑕᒥᓂᒃ ᐃᓕᓴᐃᖃᑦᑕᖅᑐᑦ ᖁᓕᑦᑕᐅᔭᓕᐅᓚᐅᖅᖢᓂᓗ.

“ᐊᐅᐸᖅᑐᓂᒃ ᑲᓚᖃᖅᑐᓂᒃ ᐊᒃᓱᐊᓗᒃ ᐱᐅᒃᓴᕋᒪ,” ᐅᖃᕆᓪᓗᓂ ᐃᒡᓛᕐᔪᒃᖢᓂ. “ᐊᒃᓱᐊᓗᒃ ᖁᕕᐊᓇᖅᑐᖅ.”
ᐊᓈᓇᑦᑎᐊᒃᑯᒥᓄᑦ ᐊᑖᑕᑦᑎᐊᒃᑯᒥᓄᓪᓗ ᐱᕈᖅᓴᔭᐅᓂᑰᒐᒥᓕ, ᐃᓕᓴᖅᓯᒪᑦᑎᐊᕆᐊᖃᕐᓂᕐᒥᒃ ᐃᓕᓴᖅᑕᐅᓯᒪᒐᒥ, ᐅᓂᒃᑳᕆᓪᓗᓂ.
“ᐊᔪᐃᓐᓇᖅᑕᐅᓯᒪᒐᒪ ᓄᑕᕋᓛᖑᓂᓐᓂᑦ ᐃᓕᓴᕈᑎᓐᓂᒃ ᐱᐊᓂᒃᓯᒋᐊᖃᖃᑦᑕᕐᓂᕐᓂᒃ ᑐᖓᓕᖓᓂ ᐃᓕᓴᕐᕕᖕᒥ ᑕᐃᒪᓐᓇ ᐱᐊᓂᒃᓯᓯᒪᔪᖓ ᐃᖅᑲᓇᐃᔭᖅᑖᕈᓐᓇᕐᓂᐊᕋᒪ.” ᐅᖃᕆᓪᓗᓂ, ᐃᓕᓴᓯᒋᐊᖅᑐᕕᓂᖅ ᐃᒡᓗᓕᖕᒥ ᑐᖓᓂᖓᓂᒃ ᐃᓕᓴᕆᓪᓗᓂ ᓴᓂᕋᔭᒃᒥᓗ ᓄᒃᑎᖅᓯᒪᓕᖅᑎᓪᓗᒋᑦ ᓄᑕᕋᐅᓂᕐᒥᓂ ᐃᓕᓴᖅᑐᕕᓂᖅ.

ᑭᖑᓂᖓᓂ ᐃᓕᓴᕆᐊᓪᓚᒃᑲᓐᓂᓕᖅᑐᕕᓂᖅ ᓂᕿᓕᐅᖅᑎᐅᓂᕐᒥᒃ ᓄᓇᒥ ᓴᓇᔨᓄᑦ ᐅᑭᐅᖅᑕᖅᑐᒥ ᓯᓚᑦᑐᒃᓴᕐᕕᒃᔪᐊᖓᓂ. ᑕᐃᒪᖓᓂᑦ ᐃᓕᓴᐃᔨᐅᓂᕐᒥᒃ ᐃᓕᓴᖅᓯᒪᓕᕋᒥ ᐃᑲᔪᖃᖅᑕᖅᓯᒪᖕᒥᔪᖅ ᐃᓕᓴᐃᔨᓂᒃ ᓄᓇᓕᖓᓂ, ᐃᓕᓴᕐᕕᖕᒥᓗ ᐊᒡᓚᒃᑎᐅᓚᐅᖅᐸᒃᖢᓂ, ᓄᓇᓕᖓᓂ ᐃᒡᓗᓕᕆᔨᒃᑯᓐᓄᑦ ᐊᑐᖅᑐᐊᖅᑐᓂᒃ ᑲᒪᔨᐅᓯᒪᒋᓪᓗᓂ ᐊᒻᒪᓗ ᓄᓇᓕᖓᓂ ᐋᓐᓂᐊᓯᐊᑎᒃᑯᓐᓂ ᐃᑲᔪᖅᑎᐅᓯᒪᒋᓪᓗᓂ.

ᒫᓐᓇ ᐃᖅᑲᓇᐃᔮᕆᔨᖅᑕᖓᓂ, ᓄᓇᓕᖓᓂ ᓱᓕᔪᓂᒃ ᐃᔾᔪᔪᒥᒃ ᐸᑎᒃᓯᔨᐅᔪᖅ, ᒪᓕᒐᑎᒍᑦ ᐃᓅᓯᒃᑯᑦ ᓱᓕᔪᓂᒃ ᑎᑎᖅᑲᖁᑎᒋᔭᐅᓱᓂ ᑕᐅᑐᒃᑎᐅᓪᓗᓂ ᓱᓕᔪᓂᒃ ᑎᑎᕋᖅᑕᐅᑎᓪᓗᒋᑦ. ᐃᓅᔪᑦ ᑐᖁᔪᓪᓗ ᐊᒻᒪᓗ ᐃᓗᐊᖅᓴᖅᑕᐅᒋᐊᖅᑐᖅᑐᑦ ᑎᑎᕋᖁᑎᖏᑦ ᐋᕿᒃᓱᑦᑎᐊᖅᓯᒪᖁᓪᓗᒋᑦ, ᑕᐃᒪᓐᓇ ᐃᖏᕐᕋᓂᐊᓕᕌᖓᑕ ᐊᓯᖏᓐᓄᑦ ᓄᓇᓄᑦ ᑎᑎᕋᖁᑎᒋᔭᐅᔪᑦ ᐅᓪᓗᒥᒧᑦ ᓈᒻᒪᓈᖅᓯᒪᓗᑎᒃ ᑎᑎᕋᖅᓯᒪᒋᐊᖃᕐᒪᑕ ᒪᓕᒐᑎᒍᓪᓗ ᓴᐳᑎᔭᐅᓯᒪᒋᐊᓖᑦ ᑎᑎᕋᖁᑎᖏᓐᓂᒃ ᐅᔾᔨᖅᓱᖅᑎᐅᒋᓪᓗᓂ ᓄᓇᓕᖓᓂ ᐃᖅᑲᖅᑐᐃᕕᒃᑎᒍᑦ ᑎᓕᔭᐅᓯᒪᔪᓄᑦ, ᑭᒃᑯᑐᐃᓐᓇᓂᒃ ᐃᓅᖃᑎᒥᓂᒃ ᐋᓐᓂᖅᓯᕆᔪᕕᓂᕐᓄᑦ ᖃᐅᔨᒪᔭᐅᔪᓄᑦ.

ᐊᒻᒪᓗᑦᑕᐅᖅ ᐃᖅᑲᓇᐃᔮᒥ ᐊᓯᐊᒍᑦ, ᐊᖏᕐᕋᒥᓂ ᓯᑕᒪᓂᒃ ᕿᑐᖓᖃᖅᖢᓂ ᐱᕈᖅᓴᐃᔪᖅ ᐃᓚᒥᓂᒃ ᑕᐃᒪᖓᓂᑦ ᓇᖕᒥᓂᖅ ᐅᔾᔨᖅᓱᐃᓐᓇᕆᐊᓕᖕᒥᓂᒃ ᐱᑕᖃᕐᒥᔪᖅ ᓄᓇᓕᖓᓂ.

“ᓄᓇᕗᒥᐅᓂᒃ ᐃᓅᓯᖃᑦᑎᐊᖁᔨᒐᒪ ᓯᕗᓂᕆᓂᐊᖅᑕᑦᑎᓐᓂᒃ ᓯᕗᕚᒃᓴᑦᑎᓐᓄᑦ,” ᐅᓂᒃᑳᕆᓪᓗᓂ ᒋᐱᓐᔅ.