ᑖᓂᓯᕐᓂᕐᒧᑦ ᓵᓚᒃᓴᐅᑎᖃᑦᑕᐅᑎᓂᖅ ᖁᕕᐊᒋᔭᐅᑦᓯᐊᒪᑦ, ᓵᓚᒃᓴᐅᑎᖃᑦᑕᐅᑎᔪᑦ ᑭᒃᑯᑦ ᐃᓚᐅᓂᐊᕐᒪᖔᑕ

1242

ᓴᐅᒥᐊᓄᑦ, ᑕᓕᖅᐱᐊᓄᑦ, ᓵᖓᐅᑎᖃᑦᑕᐅᑎᓪᓗᑎᒃ ᒧᒥᕐᓂᖏᑦ ᑮᓇᐅᔭᓕᐅᕐᔪᐊᕐᓗᑎᒡᓗᑭᐊᖅ.

ᐊᒥᓱᖑᖅᐸᓪᓕᐊᑐᐃᓐᓇᖅᐳᑦ ᓵᓚᒃᓴᐅᑎᖃᑦᑕᐅᑎᖃᑕᐅᒍᒪᔪᑦ ᐊᒥᓱᑦ. ᐊᕐᕕᐊᓂ ᐊᕐᕌᒍᑕᒫᖅᓯᐅᑎᒥᒃ ᐃᖅᑲᐅᒪᓪᓗᒍ ᕕᓕᑉ ᑯᒍᓯᐅᕐᓈᒃ ᒧᒥᖅᑎᑦᓯᕐᔪᐊᕐᓂᖅ ᓵᓚᒃᓴᐅᑎᖃᑦᑕᐅᑎᓗᓂ ᐄᐳᕈ 12-ᒥ – 15-ᒧᑦ ᐊᑐᖅᑕᐅᓂᖅᐳᖅ ᑮᓇᐅᔭᑦ ᓵᓚᒃᓴᐅᓂᐊᓂᐊᖅᑐᑦ $8,000 ᐃᓐᓇᕐᓄᑦ. ᒪᒃᑯᒃᑐᓪᓗ ᓵᓚᒃᓴᐅᑎᖃᑦᑕᐅᑎᑎᑕᐅᓂᐊᖅᐳᑦ ᓵᓚᒃᓴᐅᑎᒃᓴᖃᖅᖢᑎᒃ.

ᐃᖃᓗᒃᑑᑦᓯᐊᒥ, ᐅᖃᐅᓯᖃᖃᑦᑕᓚᐅᖅᐳᑦ ᐊᓇᔪᐊᒃ ᑖᓂᓯᖅᑎᖏᑦ ᐊᕐᕕᐊᓄᖓᐅᒍᒪᓪᓗᑎᒃ ᓵᓚᒃᓴᐅᑎᖃᑦᑕᐅᑎᒋᐊᖅᑐᕐᓗᑎᒃ, ᑕᐃᒪᓐᓇ ᓵᓚᒃᓴᐅᑎᖃᑦᑕᐅᑎᑎᑦᓯᓂᐊᖅᐳᖅ. ᐊᑐᖅᑕᐅᓂᐊᖅᖢᓂ ᑕᒪᓐᓇ ᐄᐳᕈ 5 – 8-ᒧᑦ.

ᑭᐅᕆᓐ ᑲᒧᐊᔪᐊᒃ, ᐋᖅᑭᒃᓱᐃᖃᑕᐅᓯᒪᔪᖅ ᐃᖃᓗᒃᑑᑦᓯᐊᒥ ᑖᓯᓂᖅᑎᑦ ᓵᓚᒃᓴᐅᑎᑎᑦᓯᓂᐊᖅᑎᓪᓗᒋᑦ, ᐅᖃᓚᐅᖅᐳᖅ ᑕᐃᒪᓐᓇ ᓄᑖᒥᒃ ᐱᓕᕆᐊᖃᕆᐊᕈᒪᖕᒪᑕ.

“ᓄᓇᑦᑎᓐᓂ ᖃᓄᐃᓕᐅᕈᑎᖃᕈᒪᒐᑦᑕ ᐊᒥᓱᑦ ᓱᕈᓯᑦ ᑕᐃᒪᓐᓇᐃᓕᐅᖃᑦᑕᐃᓐᓇᓕᖁᓪᓗᒋᑦ ᐃᓕᖁᓯᕗᑦ ᑕᐃᒪᓐᓇ ᑐᓐᓂᐅᑎᒋᕙᓪᓕᐊᓪᓗᒍ,” ᐅᖃᓚᐅᖅᐳᖅ ᑲᒧᐊᔪᐊᒃ, ᐅᖃᓚᐅᖅᖢᓂᓗ ᐃᖃᓗᒃᑑᑦᓯᐊᒃ 12-ᓂᒃ ᑖᓂᓯᖃᑦᑕᖅᑐᓂᒃ ᐱᑕᖃᕐᒪᑦ ᐃᓐᓇᕐᓂᒃ. “ᑕᐃᑦᓱᒪᓂᐊᓚᐅᖅᑐᖅ ᖁᕕᐊᒋᔭᐅᕙᓚᐅᕐᒪᑕ ᓄᓇᑦᑎᓐᓂ ᑭᓯᐊᓂ ᐊᑐᖅᑕᐅᖃᑦᑕᖏᓕᓚᐅᕐᒪᑦ. ᒪᑭᑉᐸᓪᓕᐊᒃᑲᓐᓂᖁᓪᓗᒋᑦ ᐱᓇᓱᐊᕋᑦᑎᒍ…. ᓱᕈᓯᑦ ᑕᐃᒪᓐᓇ ᑕᑯᓐᓇᖃᑦᑕᓕᖅᐸᑕ ᖃᓄᐃᓕᐅᕈᑎᒋᔭᑦᑎᓐᓂᒃ ᐃᓕᓐᓂᐊᕈᒪᓂᐊᕐᒪᑕ.”

ᖁᑦᓯᓛᒃ ᓵᓚᒃᓴᕈᑎᒃᓴᖅ ᐃᓐᓇᕐᓄᑦ ᐃᖃᓗᒃᑑᑦᓯᐊᒥ $5,000, ᑮᓇᐅᔭᖅᑖᕈᓐᓇᕐᓂᕈᑦᑕ, ᐅᖃᓚᐅᖅᐳᖅ.

ᐅᖅᓱᖅᑑᒥ, ᖁᕕᐊᒋᔭᐅᑦᓯᐊᕆᕗᑦ ᑖᓯᓂᖃᑦᑕᖅᑐᑦ, ᐊᕐᕌᒍᑕᒫᖅᓯᐅᑎᖃᖅᖢᑎᒃ ᓵᓚᒃᓴᐅᑎᖃᑦᑕᐅᑎᕙᒃᐳᑦ, ᑕᒡᕙᓂ ᐄᐳᕈᒥ ᐊᑐᖅᑕᐅᖃᑦᑕᖅᖢᓂ, ᐊᑐᖅᑕᐅᓂᐊᖏᒻᒪᑦ ᑭᓯᐊᓂ ᓄᕕᐱᕆᒥ ᐃᖃᓗᒃᑑᑦᓯᐊᓕᐊᕈᓐᓇᖁᓪᓗᒋᑦ ᐊᕐᕕᐊᓄᓪᓘᓐᓃᑦ ᓵᓚᒃᓴᐅᑎᖃᑦᑕᐅᑎᓂᐊᕐᓗᑎᒃ, ᐅᖃᓚᐅᖅᐳᖅ ᐃᓕᓴᐱᑦ ᐊᓇᕕᓗᒃ.

“ᐱᕈᖅᐸᓪᓕᐊᓂᐊᖅᐳᖅ ᑕᒪᓐᓇ. ᓄᓇᕗᒥ ᐊᑐᖅᑕᐅᕙᓕᐊᑐᐃᓐᓇᖅᐳᖅ,” ᐅᖃᓚᐅᖅᐳᖅ ᑖᓯᓂᖃᑦᑕᕐᓂᖅ ᐱᔾᔪᑎᒋᓪᓗᒍ. “ᐊᖏᓪᓕᕙᓪᓕᐊᑐᐃᓐᓇᖅᖢᓂᓗ ᐊᕐᕌᒍᑕᒫᑦ.”

ᑮᓇᐅᔭᓂᒃ ᐊᒥᓱᓂᒃ ᓵᓚᒃᓴᕈᑎᖃᕐᓂᐊᖅᑎᓪᓗᒋᑦ, ᐊᑭᑐᓪᓗᓂᓗ ᐃᖏᕐᕋᔭᒡᓗᓂ ᑕᒪᒃᑯᓄᖓ, ᐊᓇᕕᓗᒃ ᐅᖃᓚᐅᖅᐳᖅ. ᐅᖃᓚᐅᖅᖢᓂᓗ ᒫᓐᓇ ᑮᓇᐅᔭᓂᒃ ᐱᕈᖅᓴᐃᓇᓱᐊᕐᒪᑕ ᓇᓂᑐᐃᓐᓇᖅ.

ᐊᕐᕌᒍᒥ ᐊᑐᖅᑐᒥ ᐅᖅᓱᖅᑑᒥ ᐊᕐᕌᒍᓂᒃ ᖁᓕᓂᒃ ᑕᐃᒪᓐᓇ ᑖᓂᓯᖅᑎᑦᓯᖃᑦᑕᖅᓯᒪᓕᖅᐳᖅ ᓵᓚᒃᓴᐅᑎᖃᑦᑕᐅᑎᑦᓯᓪᓗᑎᒃ.

ᐊᓇᕕᓗᒃ ᐃᓚᐅᖃᑦᑕᖅᐳᖅ ᓵᓚᒃᓴᐅᑎᖃᑦᑕᐅᑎᓂᖅ ᐱᒋᐊᓚᐅᖏᓐᓂᖏᓐᓂ ᓱᓕ. ᑕᑯᓯᒪᓪᓗᓂᓗ ᒪᒃᑯᒃᑐᑦ ᐃᓐᓇᕈᖅᓯᒪᓕᖅᑐᑦ ᐊᕐᕌᒍᓂ ᖁᓕᓂ ᓱᕈᓯᖃᐅᓕᖅᖢᑎᒡᓗ ᑖᓯᓂᕐᓂᕐᒧᑦ ᐃᓚᐅᔪᓂᒃ.

“ᐃᓕᓐᓂᐊᖅᑎᑦᓯᒋᐊᓚᐅᖅᓯᒪᕗᖓ ᒪᒃᑯᒃᑐᓂᒃ ᓱᕈᓯᓂᒃ. ᐃᓕᓐᓂᐊᖅᑎᑦᓯᕙᓪᓕᐊᑐᐃᓐᓇᖅᐳᖓ ᓄᑖᓂᒃ ᐆᒃᑐᕈᒪᔪᓂᒃ, ᐅᕙᖓᑐᐊᖅ ᐃᓕᓐᓂᐊᖅᑎᑦᓯᖃᑦᑕᖏᑉᐳᖓ ᐊᓯᒃᑲᓗ ᐃᓕᓐᓂᐊᖅᑎᑦᓯᖃᑦᑕᖅᐳᑦ,” ᐊᓇᕕᓗᒃ ᐅᖃᓚᐅᖅᐳᖅ.

ᐃᓕᓐᓂᐊᓚᐅᖅᖢᑎᒃ, ᑖᓯᓂᖅᑎᑦ ᐃᓚᐅᔪᓐᓇᓕᖅᐸᒃᐳᑦ ᑕᑯᓐᓇᒐᒃᓴᐅᓪᓗᑎᒃ ᐃᓄᖕᓄᑦ.

“ᖁᕕᐊᓇᑦᓯᐊᖅᐳᖅ ᑕᑯᓐᓇᖅᖢᒋᑦ,” ᐊᓇᕕᓗᒃ ᐅᖃᓚᐅᖅᐳᖅ ᓵᓚᒃᓴᐅᑎᖃᑦᑕᐅᑎᖃᑦᑕᖅᑐᓂᒃ ᐅᖃᐅᓯᖃᖅᖢᓂ. “ᐃᖃᐃᓕᓴᕐᕕᒃ ᐱᓐᖑᐊᕐᕕᒃ ᑕᑕᖃᑦᑕᖅᐳᖅ ᑕᒪᕐᒥᒃ ᓄᓇᓕᖕᓂᒥᐅᑦ ᑕᐅᑐᒋᐊᖅᑐᖃᑦᑕᖅᐳᑦ ᓵᓚᒃᓴᐅᑎᖃᑦᑕᐅᑎᔪᓂᒃ.’

ᖃᐅᔨᓴᖅᑎᑦ ᐃᓱᒪᓕᐅᖅᑎᑦ ᑕᐃᒪᓐᓇ ᑕᑯᓐᓇᓚᐅᖅᖢᑎᒃ ᖃᓄᐃᓕᐅᕐᓂᖏᓐᓄᑦ, ᑕᒻᒪᐅᑕᐅᔪᓪᓗ ᐊᓐᓄᕌᖏᓪᓗ ᖃᐅᔨᓴᖅᑕᐅᖃᑦᑕᖅᐳᑦ, ᐊᓇᕕᓗᒃ ᐅᖃᓚᐅᖅᐳᖅ.

“ᑖᓯᓂᖅᑎᑦ ᐊᔾᔨᒌᖏᑦᑐᓂᒃ ᐊᐅᓚᒍᑎᖃᖅᐳᑦ. ᐊᔾᔨᒌᖃᑦᑕᖏᑉᐳᓪᓗ ᐃᓕᖁᓯᖏᑦ,” ᐅᖃᓚᐅᖅᐳᖅ.

ᐃᖃᓗᒃᑑᑦᓯᐊᒥᐅᑕᑦ ᐊᓇᔪᐊᒃ ᑖᓂᓯᖅᑎᖏᑦ ᑖᓂᓯᕐᓂᕐᒧᑦ ᓵᓚᒃᓴᐅᑎᖃᑦᑕᐅᑎᓂᐊᖅᐳᑦ ᐄᐳᕈᒥ, ᐱᓇᓱᐊᕈᓯᖅ ᓯᕗᓂᐊᓂ ᐊᕐᕕᐊᓂ ᑖᓂᓯᕐᓂᕐᒧᑦ ᓵᓚᒃᓴᐅᑎᖃᑦᑕᐅᑎᓚᐅᖏᓐᓂᖏᓐᓂ. ᑖᒃᑯᐊ ᐊᓇᔪᐊᒃ ᑖᓯᓂᖅᑎᖏᑦ ᐅᑯᐊᖑᕗᑦ, ᓯᕗᓂᐊᓂ ᓴᐅᒥᐊᓂᑦ, ᑐᐊᕋᔅ ᑭᔪᒃ, ᐃᓐᓇᑐᖃᖅ ᕉᓯ ᑲᐃᔪᒐᓇ, ᑲᒥᓚ ᓇᐃᑲᒃ, ᐋᓐ ᕕᓐᓂᒃ, ᐋᓚᔅ ᓂᒡᓚᒃ, ᒨᓇ ᐃᕕᑕᓕᒐᒃ ᐊᒻᒪ ᑭᐅᕆᓐ ᑲᒧᐊᔪᒃ. ᑐᓄᐊᓂ ᓴᐅᒥᐊᓂᑦ, ᓵᒻ ᐊᓇᔪᐊᒃ, ᑏᕕᑦ ᐃᑎᒋᒃ, ᔩᓴᓐ ᐊᑯᓗᒃ ᐊᒻᒪ ᐋᓚᓐ ᑲᐃᔪᒐᓇ.